Nou nan dènye jou fèt Tabènak yo, sètadi setyèm jou a. Jezi ap anseye kote nan tanp lan ki gen “kès yo konn met ofrann yo”. (Jan 8:20; Lik 21:1.) Sanble se nan zòn ki rele Lakou medam yo kote sa a ye.

Pandan fèt la, chak swa gen anpil limyè ki klere zòn sa a nan tanp lan. Gen kat kokenn pòtlanp, e yo chak gen kat gwo veso ki plen luil. Limyè lanp sa yo bay la gen ase pisans pou l klere tout zòn nan lannuit rive yon bèl distans. Sa Jezi di kounye a ka fè moun k ap koute l yo panse ak limyè sa a. Jezi di: “Mwen se limyè pou monn nan. Yon moun ki suiv mwen pap janm mache nan fènwa, men l ap gen limyè k ap mennen nan lavi a.” — Jan 8:12.

Farizyen yo pa dakò ak sa Jezi di a, yo di: “W ap bay temwayaj sou pwòp tèt ou. Donk, temwayaj ou a pa laverite.” Jezi di: “Menmsi se mwen ki bay temwayaj sou tèt mwen, temwayaj mwen bay la se laverite, paske mwen konn kote m soti ak kote m prale. Men nou menm, nou pa konn ni kote m soti ni kote m prale.” Li kontinye pou l di: “Men sa ki ekri nan pwòp Lwa nou an: ‘Se temwayaj de moun ki laverite.’ Mwen bay temwayaj sou tèt mwen, e Papa a ki voye m nan bay temwayaj sou mwen.” — Jan 8:13-18.

Farizyen yo pa dakò ak rezònman li an, yo mande l: “Kote Papa w?” Jezi di yo kareman: “Nou pa konnen ni mwen ni Papa m. Si nou te konnen m, nou t ap konn Papa m tou.” ​(Jan 8:19). Byenke Farizyen yo toujou vle arete Jezi, pa gen youn ki touche l.

Jezi repete yon bagay li te deja di: “Mwen prale, e nou gen pou nou chèche m, epoutan n ap mouri nan peche nou. Nou pa ka al kote m prale a.” Juif yo pa konprann ditou sa Jezi ap di yo, yo kòmanse ap mande tèt yo: “Èske se touye  li pral touye tèt li? Paske, li di: ‘Nou pa ka al kote m prale a.’” Yo pa konprann sa Jezi vle di paske yo pa konnen kote Jezi soti. Men sa Jezi esplike: “Nou se moun anba, mwen menm, mwen se moun anwo. Se nan monn sa a nou soti, men mwen menm, mwen pa sot nan monn sa a.” — Jan 8:21-23.

Anfèt, Jezi ap pale konsènan lavi li nan syèl la anvan l te vin sou tè a e lefètke li se Mesi Bondye te pwomèt la oswa Kris, sila a chèf relijye yo te dwe ap tann nan. Sepandan, yo mande Jezi avèk anpil mepri: “Kiyès ou ye?” — Jan 8:25.

Lè Jezi wè yo rejte l e yo opoze avè l, li reponn: “Poukisa menm mwen kontinye ap pale avèk nou toujou?” Malgre sa, li atire atansyon sou Papa l e li esplike rezon ki fè Juif yo dwe koute Pitit la: “Sila a ki voye m nan toujou di laverite, e bagay mwen te tande nan bouch li, se yo menm m ap di nan monn nan.” — Jan 8:25, 26.

Apre sa, Jezi montre konfyans li gen nan Papa l, li menm Juif yo pa konnen an. Men sa Jezi di: “Lè nou fin leve Pitit lòm nan anlè, lè sa a n ap konnen mwen se moun mwen di m ye a, e n ap konnen se pa mwen poukont mwen ki deside fè anyen, men, se sa Papa a anseye m mwen di. E Sila a ki voye m nan avè m. Li pa lage m poukont mwen, paske mwen toujou fè sa ki fè l plezi.” — Jan 8:28, 29.

Men, gen kèk Juif ki met lafwa nan Jezi. Jezi di yo: “Si nou rete nan pawòl mwen, nou se disip mwen toutbonvre, n ap konnen laverite, e laverite ap libere nou.” — Jan 8:31, 32.

Pou kèk Juif, sa Jezi di anrapò ak libète a sanble dwòl. Yo di: “Nou se desandan Abraram e nou pa t janm esklav pèsonn. Kòman w fè di: ‘N ap vin lib’?” Byenke souvan Juif yo konn anba dominasyon lòt nasyon, men yo pa vle yo rele yo esklav. Men, Jezi fè konnen se esklav menm yo ye, li di: “Anverite m ap di nou sa: Yon moun k ap pratike peche se esklav peche li ye.” — Jan 8:33, 34.

Lefètke Juif yo refize admèt yo se esklav peche, sa mete yo nan yon sitiyasyon ki danjere. Men esplikasyon Jezi bay: “Esklav la pa rete nan kay la pou toutan, se pitit la ki rete pou toutan.” ​(Jan 8:35). Yon esklav pa gen dwa resevwa eritaj, e yo ka voye l ale nenpòt lè. Se sèlman pitit ki fèt nan kay la oswa pitit yo adopte a ki rete nan kay la “pou toutan”, sètadi toutotan l ap viv.

Kidonk, verite konsènan Pitit la se verite ki libere moun anba peche ki fè moun jwenn lanmò pou toutan an. Men sa Jezi di: “Si Pitit la libere nou, n ap libere toutbon.” — Jan 8:36.