LÈ YON timoun aji byen, sa fè moun k ap pran swen l yo kontan. Pa egzanp, lè yon tifi oswa yon tigason aji byen, papa l fyè pou l di lòt moun: “Se pitit fi m”, oswa: “Se pitit gason m.”

Jezi te toujou konn fè Papa l plezi. Sa fè Papa l santi l fyè. Èske w sonje sa Papa Jezi te fè yon jou, lè Jezi te ansanm ak twa nan disip li yo? — Bondye te rete nan syèl la, li di yo: “Se Pitit Gason m, byenneme a, li menm mwen apwouve a.” — Matye 17:5.

Jezi toujou kontan fè Papa l plezi. Èske w konn poukisa? Se paske li renmen Papa l toutbonvre. Si yon moun fè yon bagay sèlman paske yo fòse l fè l, sa kapab difisil pou li. Men, lè moun nan dispoze fè sa l ap fè a, sa pi fasil. Èske w konnen sa sa vle di dispoze fè yon bagay? — Sa siyifi anvi fè l toutbonvre.

Menm anvan Jezi te vin sou tè a, li te dispoze fè kèlkeswa sa Papa l mande l fè. Se paske li renmen Papa l, Jewova Dye. Jezi te gen yon bèl pozisyon nan syèl la bò kote Papa l. Men, Bondye te mande Jezi pou l fè yon travay espesyal. Pou Jezi te fè travay sa a, li te dwe kite syèl la. Li te dwe vin fèt sou tè a menm jan ak yon tibebe. Jezi te dakò fè sa paske Jewova te vle l fè l.

Pou Jezi te ka fèt kòm yon tibebe sou tè a, li te bezwen gen yon manman. Èske w konn kiyès ki te manman Jezi? — Manman l te rele Mari. Jewova te voye zanj Gabriyèl al pale avèk Mari. Zanj lan di l li pral fè yon tigason. Li dwe rele l Jezi.  Èske w konnen kiyès ki t apral papa tigason sa a? — Zanj lan di se Jewova Dye. Se poutèt sa yo t apral rele Jezi Pitit Gason Bondye.

Dapre ou, ki jan Mari te reyaji? — Èske l te di: “Mwen pa vle vin manman Jezi”? Non, okontrè, Mari te dispoze fè sa Bondye vle. Men, ki jan Pitit Gason Bondye a ki nan syèl la t ap ka fèt kòm yon tibebe sou tè a? Nan ki sans fason Jezi te fèt la pa t menm ak fason tout lòt tibebe yo fèt? Èske w konnen? —

Ebyen, lè Bondye te fè premye paran nou yo, Adan ak Èv, li te ba yo posiblite pou yo ini yo ansanm yon fason espesyal. Se apre yon inyon konsa yon tibebe ka kòmanse devlope anndan vant manman l. Moun di se yon mirak! Mwen sèten w ap dakò.

Men, sa Bondye te fè nan ka pa Jezi a, se yon mirak ki pi estrawòdinè toujou. Li pran lavi Pitit Gason l lan nan syèl la, li mete l anndan vant Mari. Bondye pa t janm fè sa anvan, e li pa janm fè sa ankò. Grasa mirak sa a, Jezi kòmanse devlope anndan vant Mari, menm jan lòt tibebe yo devlope anndan vant manman yo. Apre sa, Mari marye ak Jozèf.

Lè moman an rive pou Jezi fèt, Mari ak Jozèf te twouve yo nan vil Betleyèm. Men, vil la te tèlman foul ak moun, Mari ak Jozèf pa t menm ka jwenn yon chanm. Donk, yo te oblije rete  yon kote yo gade bèt. Se la Mari akouche, e yo mete Jezi nan yon manjwa, jan nou wè l nan foto a. Yon manjwa se tankou yon ganmèl oswa yon kivèt an bwa yo konn mete manje pou vach ak lòt bèt manje.

Nan lannuit Jezi te fèt la, gen yon seri bagay estrawòdinè ki rive. Toupre Betleyèm, yon zanj parèt sou kèk bèje. Li fè yo konnen Jezi se yon moun enpòtan. Men sa zanj lan di: ‘Gade! M ap ban nou yon bon nouvèl k ap fè moun kontan. Jodi a, gen yon moun ki fèt ki pral sove pèp la.’ — Lik 2:10, 11.

Zanj lan di bèje yo y ap jwenn Jezi nan vil Betleyèm, y ap jwenn li kouche nan yon manjwa. Epi, bridsoukou, gen lòt zanj nan syèl la ki met ansanm ak premye zanj lan, y ap louwe Bondye.  Men chante zanj yo t ap chante: ‘Glwa pou Bondye, e sou tè a lapè pami moun li apwouve!’ — Lik 2:12-14.

Lè zanj yo ale, bèje yo al Betleyèm e yo jwenn Jezi. Lè yo rive, yo rakonte Jozèf ak Mari tout bon bagay yo te tande. Èske w imajine jan Mari te kontan dèske li te dispoze vin manman Jezi?

Apre sa, Jozèf ak Mari pran Jezi, yo mennen l nan vil Nazarèt. Se la Jezi te grandi. Lè l vin gran, li kòmanse gwo travay ansèyman li an. Sa se te youn nan travay Jewova Dye te vle pou Pitit Gason l lan fè sou tè a. Jezi te vle fè travay sa a paske li renmen Papa li ki nan syèl la anpil.

 Anvan Jezi te kòmanse travay li a antanke gran Anseyan, Jan Batis te batize l nan rivyè Jouden an. Apre sa, gen yon bagay etonan ki rive. Etan Jezi t ap leve sot anba dlo a, Jewova rete nan syèl la, li pale. Men sa l di: “Se Pitit Gason m, byenneme a, li menm mwen apwouve a.” ​(Matye 3:17). Ou pa santi w kontan lè paran w di w yo renmen w? — Nou mèt sèten, Jezi te santi l kontan tou.

Jezi te toujou fè sa ki dwat. Li pa t janm pran pòz sa l pa ye. Li pa t di moun yo li se Bondye. Zanj Gabriyèl te esplike Mari yo t ap gen pou yo rele Jezi Pitit Bondye, e Jezi li menm li te di se Pitit Bondye li ye. Epitou, li pa t di moun yo li konn plis bagay pase Papa l. Men sa l te di: “Papa a pi gran pase m.” — Jan 14:28.

Menm lè Jezi te nan syèl la, lè Papa l te ba l yon travay pou l fè, li te fè l. Li pa t konn di l ap fè l epi apre, l al fè yon lòt bagay. Jezi te renmen Papa l. Donk, li te konn koute sa Papa l di l. Apre sa, lè Jezi te vin sou tè a, li te fè sa Papa l ki nan syèl la te voye l fè a. Li pa t pase tan l ap fè lòt bagay. Kounye a ou ka konprann poukisa Jewova fyè de Pitit Gason l lan konsa.

Nou menm tou, nou vle fè Jewova plezi, pa vre? — Donk, nou dwe montre n ap koute Bondye toutbon, menm jan ak Jezi. Bondye sèvi ak Bib la pou l pale avèk nou. Li pa t ap bon pou nou fè kòmsi n ap koute Bondye epi pou nou kwè nan bagay Bib la pa dakò avèk yo, oswa pou n ap fè sa Bib la pa vle nou fè. Sa w panse? — Epitou, pa bliye sa: si nou renmen Jewova toutbonvre, n ap kontan anpil pou nou fè l plezi.