1-3. a) Ki jan anpil moun konsidere travay yo? b) Ki jan Labib ankouraje moun wè kesyon travay la, e ki kesyon nou pral egzamine nan chapit sa a?

JODI A, pou anpil moun nan monn nan, travay pa yon bagay yo fè paske yo renmen l. Lefètke yo pase yon pakèt tan ap fè yon travay yo pa renmen, yo pa pran plezi pou y al nan travay la chak jou. Ki jan yon moun konsa ka enterese nan travay l ap fè a e pou l ta jwenn satisfaksyon ladan l?

² Bib la ankouraje nou pou nou byen wè kesyon travay di a. Li fè konnen travay ak sa yon moun jwenn pou travay li fè se yon benediksyon. Men sa Salomon te ekri: “Se pou tout moun manje, se pou yo bwè e se pou yo gen kè kontan pou tout travay di yo fè. Se kado Bondye bay.” ​(Eklezyas 3:13). Jewova renmen nou e li toujou vle sa ki bon pou nou. Se sa k fè li vle pou nou jwenn satisfaksyon nan travay nou e pou nou pran plezi nan sa nou jwenn pou travay nou fè. Pou nou rete nan lanmou Bondye, nou bezwen wè kesyon travay la menm jan ak Bondye e nou bezwen suiv prensip li bay ki gen rapò ak travay. — Li Eklezyas 2:24; 5:18.

³ Nan chapit sa a, nou pral egzamine kat kesyon: Ki jan nou ka gen kè kontan pou travay di nou fè? Ki kalite travay ki pa pou vrè kretyen? Ki jan nou ka fè ekilib ant travay pwofàn nou ak aktivite nou fè ki gen rapò ak adorasyon n ap bay Bondye a? E ki travay ki pi enpòtan nou ka fè?  Men, anvan sa, ann egzamine egzanp de pi gran travayè ki genyen nan linivè a: Jewova Dye ak Jezi Kris.

4, 5. Ki sa Bib la di ki montre Jewova se yon travayè ki fè anpil travay?

⁴ Jewova se pi gran Travayè a. Jenèz 1:1 di: “Okòmansman, Bondye te kreye syèl la ak tè a.” Lè Bondye te fin kreye tè a ak tout sa ki sou li yo, li te wè travay li te fè a te “bon anpil”. (Jenèz 1:31.) Sa vle di Bondye te kontan nèt poutèt tout travay li te fè sou tè a. Se sèten, Jewova, “Bondye ki gen kè kontan an”, te pran anpil plezi nan tout travay li te fè yo. — 1 Timote 1:11.

⁵ Bondye nou an travay anpil e li pa janm sispann travay. Byen lontan apre li te fin kreye tout bagay sou tè a, men sa Jezi te di: “Papa m kontinye travay jis kounye a.” ​(Jan 5:17). Ki travay konsa Papa l ap fè? Detan l nan syèl la, se sèten li kontinye bay lèzòm direksyon e li kontinye pran swen yo. Li fè “yon nouvo kreyati”, anpalan de kretyen ki vin pitit li grasa lespri sen yo e ki pral dirije ak Jezi nan syèl la (2 Korentyen 5:17). L ap travay pou l reyalize objektif li genyen pou lèzòm, yon fason pou moun ki renmen l yo ka jwenn lavi ki pap janm fini an nan monn nouvo a (Women 6:23). Se pa ti kontan Jewova dwe kontan lè l ap gade rezilta travay li fè pou l akonpli objektif sa a! Gen plizyè milyon moun ki byen reyaji devan mesaj Wayòm nan. Bondye atire yo e yo fè chanjman nan lavi yo pou yo ka rete nan lanmou l. — Jan 6:44.

6, 7. Ki sa k montre Jezi ap travay di depi lontan?

⁶ Jezi tou ap travay di depi byen lontan. Anvan li te vin sou tè a, li te konn travay ak Bondye antanke “yon moun ki konn travay byen” e li te patisipe nan kreyasyon tout bagay, ‘ni sa ki nan syèl la, ni sa ki sou tè a’. (Pwovèb 8:22-31;  Kolosyen 1:15-17.) Lè Jezi te vin sou tè a, li te kontinye travay di. Lè l te jèn, li te aprann yon metye ki gen rapò ak konstriksyon kay, e yo te vin konnen l kòm yon “bòs chapant” *. (Mak 6:3.) Metye sa a te mande pou Jezi travay di e pou l abil nan plizyè domèn, sitou nan epòk sa a, paske pa t gen ni kote pou moun al bay siye bwa, ni magazen kote yo vann materyo konstriksyon, ni zouti elektrik. Èske w imajine Jezi ki pati al chèche bwa pou l fè yon travay? Petèt li te oblije koupe pyebwa epi transpòte bwa a kote li t ap travay la. Èske w imajine l k ap fè yon kay, k ap prepare travès pou twati kay la e k ap enstale yo, k ap fè pòt yo e petèt menm k ap fè kèk mèb pou kay la? Sandout, Jezi te konnen satisfaksyon yon moun jwenn lè l travay di e li fè travay li byen.

⁷ Nan fason Jezi te akonpli ministè l, li te montre li se yon travayè estrawòdinè ki dilijan. Pandan twazan edmi, li te okipe nèt nan travay sa a ki enpòtan anpil. Lefètke li te vle preche plis moun posib, li te konn byen itilize jounen l. Li te konn leve bonè e li te konn travay rive jis nan aswè (Lik 21:37, 38; Jan 3:2). Li te konn mache “sot nan yon vil al nan yon lòt, sot nan yon bouk al nan yon lòt, l ap preche e l ap anonse bon nouvèl Wayòm Bondye a”. (Lik 8:1.) Jezi te konn mache plizyè kilomèt apye, nan wout ki gen pousyè, pou l te ka pote bon nouvèl la bay moun yo.

8, 9. Ki sa k fè Jezi te gen kè kontan pou travay di li te fè?

⁸ Èske Jezi te gen kè kontan lefètke li te travay di nan ministè a? Wi! Li te simen semans verite ki gen rapò ak Wayòm nan e li te retounen nan syèl la. E jaden li te kite a te pare pou yo rekòlte l. Jezi te tèlman jwenn fòs ak enèji nan travay Bondye a, li te dispoze rete san manje pou l ka  fè travay sa a (Jan 4:31-38). Reflechi sou satisfaksyon Jezi dwe te jwenn lefètke, nan fen ministè l sou tè a, li te anmezi pou l di Papa l: “Mwen te ba w glwa sou tè a, mwen fini travay ou te ban m fè a.” — Jan 17:4.

⁹ Se sèten, Jewova ak Jezi se de pi gwo egzanp moun ki gen kè kontan pou travay di yo fè. Lanmou nou gen pou Bondye pouse nou “imite Bondye”. (Efezyen 5:1.) Lanmou nou gen pou Jezi pouse nou “suiv tras li pye pou pye”. (1 Pyè 2:21.) Kounye a, annou egzamine ki jan nou menm tou nou ka gen kè kontan pou travay di nou fè.

10, 11. Ki sa k ka ede nou wè travay n ap fè a yon fason pozitif?

¹⁰ Travay pwofàn gen plas li nan lavi vrè kretyen yo. Nou ta renmen jwenn satisfaksyon e nou ta renmen plizoumwen jwenn kè kontan nan travay pwofàn nou. Men, sa ka difisil anpil si nou pa renmen travay n ap fè a. Donk, ki jan n ap fè gen kè kontan pou travay di n ap fè nan yon sitiyasyon konsa?

¹¹ Se pou nou aprann wè bagay yo yon fason pozitif. Nou pa toujou ka chanje sitiyasyon nou, men nou ka chanje fason nou wè bagay yo. Lè nou medite sou pwennvi Jewova, sa ka ede nou wè travay n ap fè a yon fason pozitif. Pa egzanp, si w se yon chèf fanmi, ou ka reflechi sou pwen sa a: Kèlkeswa travay w ap fè a, menmsi w pa renmen l, li ede w bay fanmi w sa yo bezwen pou yo viv. Lè w kontinye nan yon travay konsa pou w pran swen fanmi w, sa gen anpil valè nan je Bondye. Pawòl li a di: Si yon moun pa bay fanmi l sa yo gen bezwen, “li pi mal pase yon moun ki pa gen lafwa”. (1 Timote 5:8.) Lè w rekonèt travay w ap fè a ede w pran yon responsablite Bondye ba ou, sa ka ede w plizoumwen jwenn satisfaksyon ladan l e sa ka ankouraje w, alòske lòt moun ki nan travay la gendwa pa santi yo konsa.

12. Ki sa k fè li nan avantaj nou pou nou dilijan e pou nou onèt nan travay nou?

 ¹² Se pou nou dilijan e se pou nou onèt. Lè nou travay di e nou aprann fè travay nou byen, se nan avantaj nou sa ye. Jeneralman, patwon yo gen anpil estim pou anplwaye ki dilijan e ki abil (Pwovèb 12:24; 22:29). Antanke vrè kretyen, nou dwe onèt nan travay nou. Nou pa dwe vòlè ni kòb patwon an, ni materyèl travay la, ni nan lè travay la (Efezyen 4:28). Jan nou te wè sa nan chapit anvan an, lè nou onèt, se nan avantaj nou sa ye. Li pi fasil pou yo fè yon anplwaye ki onèt konfyans. E kit patwon nou remake  travay di nou akonpli, kit li pa remake sa, nou ka gen satisfaksyon yon moun genyen lè li gen yon ‘konsyans ki klè’ e lè li konnen li fè Bondye plezi. — Ebre 13:18; Kolosyen 3:22-24.

13. Ki sa ki ka rive nan travay nou poutèt nou bay bon egzanp?

¹³ Se pou nou konsyan konduit nou ka fè Bondye jwenn glwa. Lè nou toujou gen bon konduit nan travay nou, se sèten lòt moun ap remake sa. Ki rezilta sa ap bay? N ap rive “anbeli ansèyman Bondye, Sovè nou an”. (Tit 2:9, 10.) Wi, bèl konduit nou genyen ka fè lòt moun wè jan sa bèl pou yon moun adore Jewova, e sa ka atire yo. Imajine ki jan w t ap santi w si yon moun k ap travay menm kote avè w ta aksepte laverite grasa bèl egzanp ou bay nan travay ou! Anplis de sa, fè yon ti reflechi: Ki sa k ka fè yon moun pi kontan pase lè l konnen konduit li bay Jewova glwa e li fè kè Jewova kontan? — Li Pwovèb 27:11; 1 Pyè 2:12.

14-16. Lè nou gen desizyon pou nou pran konsènan travay, ki kesyon enpòtan nou dwe poze tèt nou?

¹⁴ Bib la pa bay okenn detay sou kalite travay pwofàn yon kretyen ka fè oswa li pa ka fè. Sa pa vle di nou ka annik aksepte nenpòt ki travay. Bib la ka ede nou chwazi bonjan travay ki onorab, k ap fè Bondye plezi, e li ka ede nou pa pran travay ki pap fè l plezi (Pwovèb 2:6). Lè nou gen pou nou pran desizyon anrapò ak travay, gen de kesyon enpòtan nou dwe poze tèt nou.

¹⁵ Èske sa m ap gen pou m fè nan travay la se yon bagay Bib la kondane? Pawòl Bondye a kondane aklè vòl, bay manti ak fabrike zidòl (Egzòd 20:4; Travay 15:29; Efezyen 4:28; Revelasyon 21:8). Nou pa dwe pran okenn travay ki ta mande pou nou fè bagay sa yo. Lanmou nou gen pou Jewova pa t ap janm pèmèt nou aksepte yon travay  k ap mande pou nou vyole kòmandman Bondye yo. — Li 1 Jan 5:3.

¹⁶ Èske li evidan travay sa a ap fè m konplis nan yon bagay ki pa bon oubyen èske l ap fè m ankouraje moun fè yon bagay ki pa bon? Annou pran yon egzanp. Travay kòm resepsyonis pa gen anyen mal ladan l. Men, e si yo ta ofri yon kretyen pou l travay kòm resepsyonis nan yon klinik kote yo fè avòtman? Se vre travay li t ap fè a pa t ap mande pou l  patisipe dirèkteman nan avòtman yo. Men, èske travay l ap fè a pa t ap soutni avòtman k ap fèt nan klinik la, yon pratik ki kontrè ak sa Pawòl Bondye a di (Egzòd 21:22-24)? Antanke moun ki renmen Jewova, nou pa vle gen rapò ak okenn pratik ki kontrè ak sa Bib la di.

17. a) Ki sa nou bezwen pran an konsiderasyon lè n ap pran desizyon anrapò ak travay? (Gade kare ki gen tit: “ Èske se pou m aksepte travay sa a?”) b) Ki jan konsyans nou ka ede nou pran desizyon k ap fè Bondye plezi?

¹⁷ Nou ka jwenn repons pou anpil kesyon ki gen rapò ak travay lè nou egzamine repons de kesyon ki nan kòmansman paragraf 15 ak paragraf 16 la. Anplis de sa, gen lòt bagay nou bezwen pran an konsiderasyon lè n ap pran desizyon anrapò ak travay *. Nou pa ka atann pou esklav fidèl  la fè yon seri règ pou chak sitiyasyon nou ka rankontre. Se sa k fè li enpòtan pou nou gen bon jijman. Jan nou te wè sa nan chapit 2 a, nou bezwen fòme konsyans nou lè nou etidye Pawòl Bondye a pou nou ka konnen ki jan pou nou aplike l chak jou nan lavi nou. Konsa, si nou antrene ‘kapasite nou genyen pou n konprann nan afòs nou sèvi avè l’, konsyans nou ap ede nou pran desizyon k ap fè Bondye plezi e k ap ede nou rete nan lanmou l. — Ebre 5:14.

18. Ki sa k fè li pa fasil pou nou rete ekilibre toutpandan n ap adore Bondye?

¹⁸ Li pa toujou fasil pou nou gen yon pwennvi ekilibre nan “dènye jou” sa yo kote tan yo “di” e yo “difisil pou moun sipòte”. (2 Timote 3:1.) Rive jwenn yon travay epi kenbe travay sa a ka difisil anpil. Antanke vrè kretyen, nou rekonèt li enpòtan pou nou travay di pou nou pran swen fanmi nou. Men, si nou pa fè atansyon, presyon nou jwenn nan travay nou oswa nan monn sa a ki materyalis ka fè nou neglije aktivite ki gen rapò ak adorasyon n ap bay Bondye a (1 Timote 6:9, 10). Annou egzamine ki sa nou ka fè pou nou rete ekilibre. Pou nou fè sa, nou dwe rekonèt “bagay ki pi enpòtan yo”. — Filipyen 1:10.

19. Poukisa Jewova merite pou nou mete tout konfyans nou nan li, e lè nou fè sa, ki sa sa ap ede nou evite?

¹⁹ Mete tout konfyans ou nan Jewova. (Li Pwovèb 3:5, 6.) Èske Jewova pa merite pou nou met tout konfyans nou nan li? Anfèt, li gen sousi pou nou (1 Pyè 5:7). Li konnen sa nou gen bezwen pi byen pase nou, e men l pa janm twò kout pou l ede nou (Sòm 37:25). Kidonk, li bon pou nou koute Pawòl Jewova a ki di nou: “Se pou fason n ap viv pa gen lanmou pou lajan ladan l. Kontante nou ak sa nou genyen. Paske, li di: ‘Mwen pap janm kite w e mwen pap janm abandone w.’” ​(Ebre 13:5). Anpil sèvitè aplentan fè  eksperyans sa a, yo konnen Bondye gen kapasite pou l ban nou sa ki nesesè pou nou viv. Si nou kwè toutbon Jewova ap pran swen nou, nou pap bezwen enkyete nou twòp pou nou konnen si n ap toujou kapab pran swen fanmi nou (Matye 6:25-32). Nou pap kite travay pwofàn fè nou neglije aktivite nou genyen ki gen rapò ak adorasyon n ap  bay Bondye a, aktivite tankou preche bon nouvèl la ak asiste reyinyon yo. — Matye 24:14; Ebre 10:24, 25.

20. Ki sa sa vle di kenbe je nou fikse sou yon sèl bagay, e ki sa nou ka fè pou nou atenn objektif sa a?

²⁰ Kenbe je w fikse sou yon sèl bagay. (Li Matye 6:22, 23.) Kenbe je nou fikse sou yon sèl bagay vle di pa konplike lavi nou epi konsantre sou fè volonte Bondye. Si je nou fikse sou yon sèl bagay, nou pap plede kouri dèyè gwo djòb, ni nou pap chèche viv nan liks. Anplis de sa, nou pap lage kò nou nan kouri dèyè dènye modèl aparèy ki pi sofistike yo, bagay piblisite fè konprann nou oblije genyen pou nou jwenn kè kontan. Ki sa w ka fè pou w toujou kenbe je w fikse sou yon sèl bagay? Evite fè dèt ki pa nesesè. Pa anbarase lavi w ak yon seri bagay ki mande pou w ba yo anpil tan ak anpil atansyon. Koute konsèy Bib la bay la ki di pou nou kontante nou ak “manje ak rad”. (1 Timote 6:8.) Chèche senplifye lavi w otank posib.

21. Ki rezon ki fè nou dwe bay bagay ki pi enpòtan yo priyorite, e ki sa nou ta dwe bay premye plas nan lavi nou?

²¹ Bay Wayòm nan priyorite e rete atache ak bagay nou bay priyorite yo. Piske nou pa ka fè tout bagay nan lavi a, nou bezwen fikse priyorite. Si nou pa fè sa, bagay ki gen mwens enpòtans yo ap pran tout tan nou, yon tan ki gen valè, e y ap pran plas bagay ki pi enpòtan yo. Ki bagay ki ta dwe gen priyorite nan lavi nou? Anpil moun nan monn nan mete aksan sou gwo etid nan objektif pou yo ka fè yon karyè k ap pèmèt yo fè anpil lajan nan sistèm sa a. Sepandan, Jezi te konseye disip li yo pou yo “kontinye chèche Wayòm nan an premye”. (Matye 6:33.) Wi, antanke vrè kretyen, nou mete Wayòm Bondye a nan premye plas nan lavi nou. Fason nou viv, chwa nou fè, objektif nou fikse ak aktivite nou fè ta dwe demontre Wayòm nan ak volonte Bondye gen plis enpòtans nan lavi nou pase bagay materyèl ak aktivite pwofàn yo.

22, 23. a) Ki prensipal travay kretyen yo gen pou yo fè, e ki jan nou ka montre travay sa a enpòtan pou nou? (Gade kare ki gen tit: “ Desizyon m te pran an fè m jwenn lajwa ak satisfaksyon nan lavi m.”) b) Ki detèminasyon w pran anrapò ak travay pwofàn?

²² Piske nou konsyan nou byen fon nan tan lafen an, nou rete konsantre sou prensipal travay nou gen pou nou fè antanke vrè kretyen an, anpalan de travay preche ak fè disip la (Matye 24:14; 28:19, 20). Menm jan ak Modèl nou an, Jezi, nou vle toujou rete okipe nan travay sa a ki ka sove lavi moun yo. Kòman nou ka montre travay sa a enpòtan pou nou? Pifò moun pami pèp Bondye a bay tout yo menm nan travay predikasyon an antanke pwoklamatè nan kongregasyon yo, e yo fè sa ak tout kè yo. Genyen ki aranje yo pou yo sèvi antanke pyonye oswa antanke misyonè. Gen anpil paran ki ankouraje pitit yo fè karyè nan sèvis aplentan piske paran sa yo konnen li enpòtan pou yon kretyen gen objektif nan sèvis l ap bay Bondye a. Èske pwoklamatè ki zele yo gen kè kontan pou travay di yo fè nan ministè a? Sètènman! Sèl fason pou nou mennen yon vi ki ban nou lajwa, k ap ban nou satisfaksyon e k ap pèmèt nou jwenn benediksyon nou pa ka konte, se lè nou sèvi Jewova ak tout nanm nou. — Li Pwovèb 10:22.

²³ Anpil nan nou oblije pase yon bon valè tan nan travay nou pou nou ka pran swen fanmi nou nan domèn materyèl. Sonje, Jewova vle nou gen kè kontan pou travay di nou fè. Si nou fè efò pou mantalite nou ak aksyon nou pa depaman ni ak fason l wè bagay yo, ni ak prensip li yo, sa ap fè nou jwenn satisfaksyon nan travay nou. Sepandan, se pou nou detèmine pou nou pa janm kite travay pwofàn fè nou ralanti nan prensipal travay nou an, travay anonse bon nouvèl Wayòm Bondye a. Si nou bay travay sa a priyorite nan lavi nou, n ap montre nou renmen Jewova, e konsa, n ap rete nan lanmou li.