Chwazi egzanp ki senp. Menm jan ak Jezi, sèvi ak bagay moun yo byen konnen pou w esplike bagay ki enpòtan, e sèvi ak bagay ki fasil pou w esplike bagay ki difisil. Pa bay detay ki pa nesesè k ap fè egzanp lan parèt konplike. Asire w ide ki nan egzanp ou pran an vrèman gen rapò ak leson w ap anseye a yon fason pou moun k ap koute w yo pa vin distrè akoz kèk detay ki pa gen sans.

Panse ak moun k ap koute w yo. Chwazi egzanp ki gen rapò ak aktivite moun k ap koute w yo e k ap enterese yo. Veye pou egzanp ou pran yo pa fè yo santi yo jennen oswa pou yo pa blese santiman yo.

Atire atansyon sou pwen prensipal la. Sèvi ak egzanp ki gen rapò ak pwen prensipal yo, ou pa bezwen bay egzanp sou ti detay yo. Asire w moun k ap koute w yo pap sèlman sonje egzanp lan, men tou, ansèyman ki nan egzanp lan.