Abraram te anseye Izarak, pitit li, pou l renmen Jewova e pou l gen konfyans nan tout pwomès Jewova fè. Men, lè Izarak te gen anviwon 25 an, Jewova te mande Abraram pou l fè yon bagay ki t ap difisil anpil. Ki bagay sa a?

Bondye te di Abraram: ‘Tanpri, pran sèl pitit gason w lan, epi bay li kòm sakrifis sou yon mòn nan peyi Morija.’ Abraram pa t konnen pou ki rezon Jewova te mande l fè sa. Men, li te obeyi Jewova kanmenm.

Byen bonè nan demen maten, Abraram pran Izarak ak de sèvitè l e yo pran wout pou y al Morija. Apre twa jou, yo vin ka wè mòn yo ki byen lwen. Abraram di sèvitè l yo pou yo tann li pandan li menm ak Izarak pral ofri sakrifis la. Abraram bay Izarak pote bwa pou fè dife, e Abraram pote yon kouto. Izarak mande papa l: ‘Kote bèt nou pral bay kòm sakrifis la?’ Abraram reponn: ‘Gason m, Jewova ap ban nou l.’

Finalman, lè yo rive sou mòn nan, yo fè yon lotèl. Apre sa, Abraram mare men Izarak ak pye l, epi li mete l sou lotèl la.

Abraram pran kouto a, menm kote a, zanj Jewova a rele Abraram detan l nan syèl la. Li di: ‘Abraram! Pa fè tigason an anyen! Kounye a, mwen konnen ou gen lafwa nan Bondye paske w te dakò ofri  pitit gason w lan kòm sakrifis.’ Epi, Abraram wè yon mal mouton kòn li kole nan yon touf bwa. Li kouri demare Izarak, epi li bay mouton an kòm sakrifis pito.

Depi jou sa a, Jewova rele Abraram zanmi l. Èske w konn poukisa? Paske Abraram te fè nenpòt sa Jewova mande l fè, menm lè li pa t konn pou ki rezon Jewova te mande l fè l.

Jewova te retounen fè Abraram menm pwomès li te fè l la, li te di l: ‘M ap beni w e m ap fè pitit ou oswa desandan w vin anpil.’ Sa vle di, Jewova t ap beni tout bon moun pa mwayen fanmi Abraram.