SE TOUT moun k ap fè fas ak enkyetid, menm moun ki fè pati pèp Bondye a. Gen yon salmis ki te di: “Enkyetid te anvayi m.” ​(Sòm 94:19). Epi, Jezi te fè konnen nan tan lafen an “tètchaje ki gen nan lavi a” te ka fè l difisil pou yon moun sèvi Jewova (Lik 21:34). E ou menm? Èske w santi w dekouraje akoz pwoblèm ekonomik, pwoblèm fanmi ak pwoblèm sante? Ki jan Jewova ka ede w?

Nou pa ka fè fas ak enkyetid yo poukont nou. Apot Pòl te fè konnen: “Nou nan eto tout jan. [...] Nou pa konn sa pou n fè. [...] Yo lage nou atè.” Sepandan, li te di tou, “nou pa kwense nan pwen pou nou pa ka bouje”, “nou pa fin sanzespwa nèt” epi “nou pa detwi”. Ki sa k ede n andire? Se “pisans ki depase yon pisans nòmal” Jewova, Bondye Toupisan an, ban nou an. — 2 Korentyen 4:7-9.

Fè yon ti reflechi ak fason w te resevwa “pisans ki depase yon pisans nòmal” la. Èske w sonje jan yon diskou ankourajan te fè w gen plis apresyasyon pou lanmou fidèl Jewova gen lakay li? Èske w te vin gen plis lafwa nan pwomès Jewova yo lè w te konn fè lòt moun konnen esperans pou yo viv nan Paradi a? Lè n asiste reyinyon yo e n pataje lafwa nou ak lòt moun n ap jwenn fòs pou n fè fas ak tètchaje ki gen nan lavi a e n ap santi n anpè yon fason pou n ka sèvi Jewova ak kè kontan.

Nòmalman, ou ka santi y ap rale w nan plizyè direksyon alafwa. Pa egzanp, Jewova mande pou n chèche Wayòm nan an premye epi pou n kenbe yon bon abitid nan domèn espirityèl (Matye 6:33; Lik 13:24). Sepandan, e si opozisyon, pwoblèm sante oswa pwoblèm fanmi ta limite w nan sa w ka fè? E si travay ou mande pou w envesti tan ak enèji ou ta ka bay kongregasyon an? Fas ak tout bagay sa yo, vin jwenn ou pa gen ase tan ak enèji, ou ka santi w pa kapab ankò. Petèt ou te menm mande tèt ou si Jewova pa mande w fè twòp.

Jewova gen bon konprann. Li pa janm mande n fè plis pase sa n ka fè. E l konnen sa mande tan pou yon moun reprann li apre l fin fè fas ak sitiyasyon ki te afekte l nan domèn fizik ak nan domèn afektif. — Sòm 103:13, 14.

Ann fè yon ti pale sou fason Jewova te montre l gen sousi pou pwofèt Eli. Lè Eli te kouri al nan dezè a paske l te dekouraje e l te pè anpil, èske Jewova te reprimande l epi l te ba l lòd retounen nan asiyasyon l? Non. Pandan de fwa, Jewova te voye yon zanj al reveye Eli tou dousman pou ba l manje. Aktout sa, apre 40 jou Eli te toujou dekouraje e l te toujou pè. Ki sa Jewova te  fè ankò pou ede l? Premyèman, Jewova te montre li ka pwoteje l. Dezyèmman, Jewova te rekonfòte l ak “yon vwa kalm ki te byen ba”. Finalman, Jewova te fè l konnen gen plizyè milye lòt moun k ap adore l fidèlman. San pèdi tan, Eli te retounen vin zele nan travay li antanke pwofèt (1 Wa 19:1-19). Ki leson n aprann? Lè enkyetid te anvayi Eli, Jewova te demontre pasyans ak konpasyon anvè l. Jewova pa chanje. Li sousye l menm jan an pou nou tou.

Lè w ap reflechi sou sa w ka bay Jewova, ou dwe montre w reyalis. Pa konpare sa w ka fè kounye a ak sa w te konn fè lontan. Ann pran yon egzanp: Yon atlèt ki pa antrene pandan plizyè mwa oswa plizyè ane pa ka atann pou l annik rejwenn abitid li te genyen yo. Olye de sa, l ap kòmanse fikse ti objektif k ap pèmèt li rejwenn fòs ak andirans. Kretyen yo menm jan ak yon atlèt. Yo antrene ak yon objektif klè nan lespri yo (1 Korentyen 9:24-27). Poukisa w pa fikse yon objektif espirityèl ou kapab atenn kounye a? Pa egzanp, ou ka fikse objektif pou w asiste yon reyinyon epi mande Jewova ede w atenn li. Toutpandan w ap rejwenn fòs nan domèn espirityèl, w ap ‘goute e w ap wè jan Jewova bon’. (Sòm 34:8.) Pa bliye kèlkeswa sa w fè pou w demontre lanmou w anvè Jewova gen anpil valè pou li, menmsi sa w fè a ka parèt piti. — Lik 21:1-4.

Ki jan Jewova te bay June fòs pou l retounen? Men sa June di: “M te kontinye priye Jewova pou m mande l èd. Apre sa, bèlfi m nan te fè m konnen gen yon asanble ki t ap fèt nan vil kote m te rete a. M te deside asiste yon jou asanble. Se pa ti byen m te santi m byen pami pèp Jewova a! Asanble sa a te ban m boustè m t ap tann nan. Kounye a, m ap sèvi Jewova ak kè kontan ankò. Lavi a vin gen plis sans pou mwen. Plis pase nenpòt lòt lè, m konnen m pa ka izole tèt mwen e m pa ka ret poukont mwen. M kontan dèske m te toujou gen tan pou m retounen.”