OU MÈT gen asirans Jewova ap la avè w toutpandan w ap retounen vin jwenn li. L ap ede w fè fas ak enkyetid, l ap ede w si yo te blese santiman w epi l ap ede w vin gen yon konsyans ki pwòp yon fason pou w santi w anpè ni nan panse w ni nan kè w. Konsa, yon lòt fwa ankò, ou gendwa vin anvi sèvi Jewova ak kwayan parèy ou yo. Lè sa a, sitiyasyon w ap vin sanble ak sitiyasyon kèk kretyen ki t ap viv nan premye syèk la, yon seri moun apot Pyè te di: “Nou te tankou mouton ki pèdi wout yo, men kounye a, nou retounen vin jwenn bèje k ap siveye nanm nou an.” — 1 Pyè 2:25.

Vrèmanvre, retounen vin jwenn Jewova se pi bon bagay ou ka fè. Sa k fè sa? Se paske w ap fè kè l kontan (Pwovèb 27:11). Jan w deja konn sa, Jewova gen santiman, donk, aksyon w yo gen efè sou li. Nòmalman, li pa fòse n renmen l e l pa fòse n sèvi l nonplis (Detewonòm 30:19, 20). Men ki jan yon biblis esplike sa: “Kè lòm pa tankou yon pòt ki gen yon manch pa deyò pou moun ouvri. Men, se anndan sèlman l ka ouvri.” Nou ka chwazi ouvri pòt sa a lè se lanmou ki pouse n adore Jewova. Lè n fè sa, nou ba l yon kado ki gen anpil valè anpalan de entegrite nou, e nou fè kè l kontan anpil. Vrèmanvre, pa gen anyen nou ka konpare ak lajwa n jwenn dèske n ap bay Jewova adorasyon l merite a. — Travay 20:35; Revelasyon 4:11.

Mete sou sa, lè w rekòmanse adore Jewova, w ap konble bezwen w genyen nan domèn espirityèl (Matye 5:3). Nan ki sans? Se tout kote nan monn nan moun yo ap mande tèt yo: ‘Poukisa nou sou tè a?’ Yo swaf pou yo jwenn repons pou kesyon anrapò ak objektif lavi a. Lèzòm gen bezwen sa a paske Jewova te kreye yo avè l. Li kreye n yon fason pou n jwenn satisfaksyon nan sèvis n ap ba li a. Nou pa ka jwenn plis satisfaksyon pase satisfaksyon nou jwenn lefètke n konnen se lanmou ki pouse n adore Jewova. — Sòm 63:1-5.

Tanpri, konnen Jewova vle w retounen vin jwenn li. Ki sa k ka fè w sèten de sa? Fè yon ti reflechi: Yo te fè tout sa yo kapab pou yo te byen prepare bwochi sa a e yo te priye anpil sou sa. Petèt se yon ansyen oswa yon lòt kwayan parèy ou ki te fè w jwenn li. Apre sa, ou te vin anvi li l epi w te suiv konsèy ki ladan l yo. Tout sa se prèv ki montre Jewova pa bliye w. Okontrè, se rale l ap rale w vin jwenn li avèk tandrès. — Jan 6:44.

Lefètke n konnen Jewova pa janm bliye mouton ki te pèdi yo, sa ka fè n jwenn rekonfò. Se sa yon sè ki rele Donna te vin apresye. Men sa l di: “M te kite laverite tikras pa tikras, men, byen souvan, m te konn reflechi ak Sòm 139:23, 24 ki di: ‘Egzamine m, o Bondye, pou w ka konnen sa k nan kè m. Egzamine m pou w ka konnen bagay k ap trakase m yo. Gade pou w wè si gen kèk bagay ki pa bon lakay mwen, epi gide m nan chemen letènite a.’ M te konnen m pa fè pati monn nan, m pa t janm santi m alèz ladan l vre, e m te konnen se nan òganizasyon Jewova a m te vle ye. M te kòmanse konprann Jewova pa t janm abandone m; m te jis bezwen retounen vin jwenn li. Se pa ti kontan m kontan dèske m te fè sa!”

Se ak tout kè n n ap priye pou ou menm tou w retounen jwenn “lajwa Jewova bay la”. (Neyemi 8:10.) Ou pap janm regrèt dèske w te retounen vin jwenn Jewova.