LESON 10
Fason w ka jwenn vrè relijyon an
Si w vle vin zanmi Bondye, ou dwe pratike relijyon Bondye apwouve a. Jezi te di “vrè adoratè yo” t ava adore Bondye avèk “laverite”. (Jan 4:23, 24.) Gen yon sèl bon fason pou moun adore Bondye (Efezyen 4:4-6). Vrè relijyon an ap fè moun jwenn lavi ki pap janm fini an, tandiske fo relijyon an mennen nan destriksyon. — Matye 7:13, 14.
Ou ka rekonèt vrè relijyon an lè w gade sa moun ki ladan l yo ap fè. Piske Jewova bon, moun k ap adore l yo dwe moun k ap fè sa ki byen. Menm jan yon bon pye zoranj bay bèl zoranj, se konsa vrè relijyon an bay moun debyen. — Matye 7:15-20.
Zanmi Jewova yo respekte Bib la anpil. Yo konnen Bib la se pawòl Bondye. Yo li l pou l ka gide yo nan lavi a, pou l ka ede yo rezoud pwoblèm yo genyen, e pou yo konnen Bondye pi byen (2 Timote 3:16). Yo fè efò pou yo mete sa y ap preche a an pratik.
Zanmi Jewova yo gen lanmou youn pou lòt. Jezi te demontre li renmen moun, lè li te aprann yo konnen Bondye, e lè li te geri moun ki te malad yo. Moun k ap pratike vrè relijyon an demontre yo renmen pwochen yo tou. Menm jan ak Jezi, yo pa meprize moun ki pòv oswa ki pa soti nan menm ras avè yo. Jezi di moun yo t ava rekonèt disip li yo, lè yo ta wè jan yo gen lanmou youn pou lòt. — Jan 13:35.
Zanmi Bondye yo onore non Bondye, Jewova. Si yon moun ta refize nonmen non w, ou kwè w t ap pran moun sa a pou bon zanmi w? Non! Lè nou gen yon zanmi, nou rele l nan non l e nou pale an byen de zanmi sa a ak lòt moun. Donk, moun ki vle vin zanmi Bondye ta dwe itilize non l, e yo ta dwe pale lòt moun de li. Jewova vle nou fè sa. — Matye 6:9; Women 10:13, 14.
Tankou Jezi te konn fè sa, zanmi Bondye yo ap anseye lòt moun sou Wayòm Bondye a. Wayòm Bondye a se yon gouvènman nan syèl la ki pral fè tè a tounen yon paradi. Zanmi Bondye yo ap pataje bon nouvèl Wayòm sa a ak lòt moun. — Matye 24:14.
Temwen Jewova yo fè tout sa yo kapab pou yo zanmi Bondye. Yo respekte Bib la e yo gen lanmou youn pou lòt. Anplis, yo onore non Bondye, yo sèvi avè l e yo anseye lòt moun sou Wayòm Bondye a. Temwen Jewova yo ap pratike vrè relijyon an sou tè a jodi a.
Lòt sijè ki enteresan
ANSÈYMAN FONDAMANTAL KI NAN BIB LA
Èske Bondye gen yon non?
Bondye gen anpil tit tankou: Toupisan, Kreyatè ak Seyè. Men, yo itilize non Bondye anviwon 7 000 fwa nan Bib la.
ANSÈYMAN FONDAMANTAL KI NAN BIB LA
Pawòl kiyès ki nan Bib la?
Si se yon seri gason ki te ekri Bib la, èske l nòmal pou yo rele l “pawòl Bondye”? Pawòl kiyès ki nan Bib la?
ANSÈYMAN FONDAMANTAL KI NAN BIB LA
Ki jan nou ka sèten sa ki nan Bib la se laverite?
Si Bib la se Pawòl Bondye, pa dwe gen okenn lòt liv ki sanble avè l.
