Bondye vle w kòm zanmi. Èske w te janm panse yon jou ou ta ka zanmi pi gran Pèsonaj nan linivè a? Abraram te viv sou tè a sa gen anpil tan. Yo te rele l zanmi Bondye (Jak 2:23). Bib la pale de lòt moun tou ki te zanmi Bondye e ki te jwenn anpil benediksyon. Jodi a, gen moun sou tout kò tè a ki vin zanmi Bondye. Ou menm tou, ou kapab vin zanmi Bondye.

Vin zanmi Bondye pi bon lontan pase vin zanmi nenpòt lòt moun. Bondye pap janm lage zanmi l yo ki fidèl (Sòm 18:25). Vin zanmi Bondye pi bon pase richès. Lè yon moun rich mouri, se lòt moun ki jwi lajan li te genyen. Poutan moun ki zanmi Bondye yo gen yon trezò pèsonn pa ka pran. — Matye 6:19.

Gen moun ki ka chèche anpeche w konnen Bondye. Gendwa se zanmi w oswa fanmi w k ap chèche anpeche w konnen Bondye (Matye 10:36, 37). Si gen moun k ap pase w nan rizib oswa k ap fè w menas, mande tèt ou: “Èske se moun mwen vle fè plezi, oswa èske se Bondye?” Si yon moun ta di w pou w sispann manje, èske w t ap obeyi moun sa a ? Non! Fòk ou manje pou w viv. Kanta Bondye li menm, li vle w viv pou toutan! Donk, pa janm kite pèsonn anpeche w aprann ki jan w ka vin zanmi Bondye. — Jan 17:3.