Ki sa k rive ak kesyon respè pou lòt moun?

FÈ L JWE

REZON KI FÈ RESPÈ POU LÒT MOUN ENPÒTAN

Lè nou gen respè pou lòt moun, sa kalme tansyon ki gen ant moun e sa ka anpeche yon move sitiyasyon vin pi grav.

Men sa yon pwovèb nan Bib la di: “Yon repons ki dous kalme kòlè, men, yon pawòl ki rèd fè moun an kòlè.” (Pwovèb 15:1). Lè moun di pawòl derespektan e yo aji yon fason ki montre yo pa gen respè, sa fè bagay yo vin pi mal, e souvan, sa bay move rezilta.
Men sa Jezi te di: “Pawòl ki sot nan bouch yon moun montre sa k ranpli kè l.” (Matye 12:34). Lè nou di pawòl derespektan, sa ka montre nou gen yon pwoblèm ki pi grav, sa ka montre fason nou santi nou toutbon anrapò ak moun ki pa menm ras, menm tribi, menm nasyonalite oswa ki pa nan menm ran sosyal avèk nou.

Sa pa gen twò lontan, nan yon sondaj yo te fè sou plis pase 32000 moun nan 28 peyi, 65 pousan di se premye fwa yo wè moun yo pa gen politès e yo pa gen respè youn pou lòt nan nivo sa a.

FASON OU KA MONTRE RESPÈ POU LÒT MOUN

Kit se nan lekòl ou, kit se nan travay ou, demontre respè pou tout moun, menmsi w pa wè bagay yo menm jan ak yo. Idantifye bagay ou kapab dakò sou yo. Sa ap ede w pou w pa kritike lòt moun e pou w pa jije yo.

“Sispann jije pou yo pa jije nou.” — Matye 7:1.

Aji ak lòt moun jan w ta renmen yo aji avè w. Si w aji avèk jantiyès ak lòt moun e w pa fè yo enjistis, l ap pi fasil pou yo aji menm jan an avè w.

“Sa nou ta renmen moun fè pou nou, se menm bagay la nou dwe fè pou yo.” — Lik 6:31.

Aprann padone. Pa kouri panse moun vle fè w fache oswa fè w mal, lè yo mal pale avè w oswa yo mal aji avè w, jis pase sou sa.

“Se bon konprann yon moun genyen ki fè l bese kòlè l, e se yon bèl bagay lè l padone bagay mal yo fè l.” — Pwovèb 19:11.

FASON TEMWEN JEWOVA YO ANKOURAJE MOUN GEN RESPÈ

Nan zòn kote Temwen Jewova yo ap viv ak kote y ap travay, yo ankouraje moun gen respè pou moun.

Nou fè kou biblik gratis pou tout moun, men nou pa fòse yo aksepte kwayans nou oswa opinyon nou. Okontrè, nou eseye suiv konsèy Bib la bay lè nou pataje mesaj nou an “avèk dousè e avèk gwo respè”. — 1 Pyè 3:15; 2 Timote 2:24.

Nou pa gen prejije e nan reyinyon kongregasyon nou yo, nou akeyi tout kalite moun, kèlkeswa kote yo soti, depi yo vle aprann sa Bib la anseye. Nou fè efò pou n tolere tout moun e nou “bay chak moun respè li merite”. — 1 Pyè 2:17, Bib la.

Nou respekte otorite gouvènman kote n ap viv la (Women 13:1). Nou obeyi lalwa e nou peye taks. Byenke nou pa mele nan kesyon politik, nou respekte dwa lòt moun genyen pou yo pran desizyon pa yo nan kesyon politik.

REVEYE N!