Yon moun konn fè fas ak pwoblèm lè l reprann li byen fasil apre yon move bagay fin pase. Li vin gen kapasite sa a grasa eksperyans li fè. Menm jan yon timoun pa ka aprann mache san l pa fè kèk ti fo pa, se konsa tou timoun nan pap kapab konn ki jan pou l rive fè fas ak lavi a si l pa jwenn kèk pwoblèm.

Gen timoun ki konn dekouraje lè yo echwe nan yon bagay, lè yon sitiyasyon ba yo tètchaje oswa moun kritike yon bagay yo fè. Gen lòt ki bay vag nèt. Men, yo bezwen konprann verite ki annapre yo:

• N ap jwenn echèk nan kèk bagay. — Jak 3:2.

• Tout moun gen pou yo fè fas ak sitiyasyon ki difisil. — Eklezyas 9:11.

• Li enpòtan pou yon moun jwenn yon lòt moun di l sa l fè ki mal pou l ka amelyore. — Pwovèb 9:9.

Lè timoun yo aprann fè fas ak sitiyasyon ki difisil, y ap gen konfyans yo kapab reyisi lè yo jwenn pwoblèm nan lavi a.

Lè l pa rive fè yon bagay.

PRENSIP BIBLIK: “Moun ki jis la ka tonbe sèt fwa, men l ap leve ankò.” — Pwovèb 24:16.

Ede pitit ou aprann ki jan pou l wè si yon pwoblèm grav oswa si l pa grav. Pa egzanp, ki sa l ap fè si l pa pase yon tès nan lekòl li? Li ka bay vag, epi l di: “M pa ka rive fè anyen byen.”

Pou w anseye l fason pou l fè fas ak pwoblèm, w ap bezwen ede l reflechi sou fason l ka fè pi byen pwochèn fwa a. Konsa, l ap ka aprann rezoud pwoblèm, olye l kite yo pote l ale.

Men tou, pa chèche rezoud pwoblèm yo nan plas pitit ou. Okontrè, ede l wè ki sa pou l fè. Ou ka mande l: “Ki sa w ka fè pou w pi byen konprann kou sa a?”

Lè yon move bagay rive.

PRENSIP BIBLIK: “Nou pa menm konnen sa k ap rive nou demen.” — Jak 4:14.

Lavi a konn chanje. Yon moun ki rich jodi a ka vin pòv demen e yon moun ki an sante jodi a ka vin  malad demen. Bib la di: “Se pa ni moun ki rapid yo ki toujou genyen kous la, ni moun ki gen fòs yo ki genyen batay la [...], paske move moman ak malè rive sou yo tout sanzatann.” — Eklezyas 9:11.

Antanke paran, ou fè tout sa w kapab pou w pwoteje timoun nan devan danje. Men, an reyalite, li pa posib pou w pwoteje l kont tout move bagay ki ka rive nan lavi a.

Se vre, pitit ou a ka poko nan afè pèdi travay oubyen nan afè jwenn pwoblèm lajan. Men, ou ka ede l fè fas ak lòt kalite pwoblèm li kapab jwenn, tankou yon moun vin pa zanmi l ankò oswa gen yon moun nan fanmi an ki mouri. *

Lè l jwenn yon konsèy k ap ede l.

PRENSIP BIBLIK: “Koute konsèy [...] pou w ka vin gen sajès demen.” — Pwovèb 19:20.

Lè yon moun di pitit ou yon bagay l ap bezwen fè pi byen, se pa vle li vle fè timoun nan pè ni fè l ditò, men pito, se vle li vle ede l korije yon bagay ki merite sa.

Lè w aprann pitit ou pou l aksepte yo korije l, sa ap bon ni pou ou ni pou pitit ou a. Men sa yon papa ki rele John fè konnen: “Si w pa janm bay timoun yo posiblite pou yo korije erè yo fè, yo pap janm aprann. Y ap sot nan yon pwoblèm al nan yon lòt, epi w ap pase tout lavi w ap rezoud pwoblèm pou yo. Sa ap fè ni lavi paran yo ni lavi timoun yo difisil.”

Lè yon moun konseye pitit ou sou fason pou l fè yon bagay pi byen, ki jan w ka ede pitit ou byen pwofite konsèy sa a? Lè yo bay pitit ou yon konsèy, kit se nan lekòl, kit se nenpòt lòt kote, pa kouri di pitit ou a pa merite konsèy sa a. Okontrè, li ka pi bon pou w poze l kesyon sa yo:

• “Poukisa w panse ou te bezwen konsèy sa a?”

• “Ki jan w ka pwogrese?”

• “Ki sa w ap fè pwochèn fwa ou nan sitiyasyon sa a ankò?”

Sonje, bon konsèy yo bay pitit ou a pou ede l amelyore ap fè anpil byen pou li, ni kounye a, ni lè l vin granmoun.