Lè yon moun responsab, yo kapab fè l konfyans. Lè w mande moun sa a fè yon travay, nonsèlman ou konnen l ap fè l byen, men tou, l ap fini l atan.

Se vre gen anpil bagay yon timoun piti pa ka fè, sepandan, li kapab kòmanse aprann vin yon moun ki responsab. Men sa yon liv di: “Yon timoun gen kapasite pou l fè sa paran l di l depi lè l gen 15 mwa. Lè l vin gen 18 mwa, li vle fè tout sa paran l ap fè.” (Pa gen fwontyè nan responsablite paran yo) (anglè). Nan menm liv sa a, yo di “nan anpil peyi, paran yo kòmanse montre timoun yo ki jan yo kapab ede nan kay la depi lè timoun yo nan laj senk a setan. E menm nan laj sa yo, timoun yo rive fè anpil travay nan kay la e yo fè yo byen.”

Nan kèk peyi, gen anpil jèn ki vin granmoun, ki kite lakay paran yo pou y al viv nan kay pa yo. Sepandan, jèn sa yo retounen al jwenn manmi ak papi paske yo pa gen kapasite pou yo fè fas ak difikilte. Sa rive paske paran yo pa t janm aprann yo ki jan pou yo jere lajan, pran swen yon kay oswa vin yon moun ki responsab pandan yo t ap grandi.

Se sa k fè, li pi bon pou se depi kounye a, pandan pitit ou jèn nan, pou w ede l vin responsab pou l ka konnen ki sa pou l fè lè l vin gran. Gen yon liv ki di: “Ou pa t ap janm renmen fè yo depann de ou jis yo vin gen 18 an, epi pou w annik lage yo pou yo fè fas ak reyalite lavi a.” — Fason pou paran yo ede timoun yo vin granmoun (anglè).

Ba l travay pa l pou l fè nan kay la regilyèman.

PRENSIP BIBLIK: “Kèlkeswa kalite travay di yon moun fè gen avantaj ladan l.” — Pwovèb 14:23.

Timoun yo toujou kontan ede paran yo nan kèlkeswa sa y ap fè. Ou kapab pwofite tandans sa a yo gen lakay yo a pou w ba yo kèk travay pou yo fè nan kay la.

Gen paran ki renka pou yo fè sa. Yo met nan tèt yo timoun yo deja gen twòp bagay pou yo fè nan lekòl yo, donk, li pa nesesè pou yo ajoute sou sa yo genyen yo.

 Epoutan, timoun ki fè travay lakay yo ap pi byen travay lekòl, paske nan kay la yo aprann kòmanse yon travay epi fini l. Men sa liv Fason pou paran yo ede timoun yo vin granmoun nan fè konnen: “Lè nou pa kite pitit nou ede nou pandan yo toupiti, alòske yo anvi sa, yo kòmanse met nan tèt yo sa pa enpòtan pou yo ede lòt moun [...]. Yo kòmanse atann tou lòt moun ap fè yon seri bagay yo te dwe fè.”

Jan sitasyon an montre sa, lè yon timoun aprann fè travay nan kay, li aprann patisipe nan sa k ap fèt yo olye li annik pwofite sa lòt moun fè. Li aprann bay olye li atann pou se lòt moun ki toujou ap ba li. Yon timoun ki fè travay lakay ap santi li jwe yon wòl enpòtan nan fanmi an e l ap vin konprann tou li gen responsablite pa l.

Aprann li rekonèt erè l fè.

PRENSIP BIBLIK: “Koute konsèy epi aksepte disiplin pou w ka vin gen sajès demen.” — Pwovèb 19:20.

Lè pitit ou fè yon erè, pa egzanp, si pitit fi w oswa pitit gason w ta kraze bagay yon moun, fè efò pou w pa kouvri sa pou li. Timoun gen kapasite pou yo rekonèt erè yo fè epi aksepte konsekans sa pote. Se sa k fè, l ap pi bon pou pitit ou a mande padon, e petèt menm repare dega l fè a.

Lè pitit ou konprann lè l fè yon erè sa gen konsekans, sa ap ede l

• pou l onèt epi rekonèt lè l fè erè

• pa lage chay la sou do lòt moun

• pa chèche eskiz

• mande padon lè sa nesesè