Relasyon ak Bondye
Jan n te wè sa nan premye atik la, anpil moun konsidere Bib la kòm yon liv sakre. Yo wè lè yo li l e yo aplike konsèy li bay yo, sa fè yo vin pi pwòch ak Bondye e yo vin konprann lavi yo gen yon objektif.
Labib montre yon moun ki gen bon relasyon ak Bondye se yon moun ki bay panse Bondye anpil enpòtans e li viv ann amoni ak prensip li yo. Tandiske yon moun ki pa gen bon relasyon ak Bondye konte sou pwòp panse pa l e li aji selon dezi li genyen. — Jid 18, 19; Efezyen 5:1.
ESPERANS
PRENSIP BIB LA BAY: “Si w dekouraje nan moman pwoblèm, w ap prèske san fòs.” — Pwovèb 24:10, nòt.
SA SA VLE DI: Dekourajman ka fini ak fòs nou genyen pou n fè fas ak pwoblèm ki gen nan lavi a. Yon lòt bò, nou ka jwenn fòs pou n kontinye avanse grasa esperans nou. Lè n gen esperans, nou vin konprann pifò nan pwoblèm nou genyen yo kapab gen yon solisyon. Anfèt, nou ka jwenn bon bagay nan yo tou.
MEN SA W KA FÈ: Panse ak bon bagay ki pral rive alavni. Olye w ap enkyete w pou sa ki ta ka rive oswa w toujou ap tann pou tout bagay ale jan w ta vle l la, travay pito pou w reyalize objektif ou. Natirèlman, “malè” ka rive (Eklezyas 9:11). Men, an reyalite, byen souvan, bagay yo konn pi bon pase sa nou te espere. Labib sèvi ak yon egzanp nan domèn agrikilti pou l montre sa. Men sa l di: “Simen semans ou nan maten, e pinga w bay men w repo pou jis li aswè, paske w pa konnen kiyès ladan yo k ap leve, si se sa a oswa lòt la, oubyen si toule de ap leve.” — Eklezyas 11:6.
REPONS POU KESYON ENPÒTAN MOUN POZE SOU LAVI A
PRENSIP BIB LA BAY: “Ban mwen bon konprann [...]. Se tout pawòl ou nèt ki laverite.” — Sòm 119:144, 160.
SA SA VLE DI: Labib bay repons pou yon seri kesyon prèske tout moun ap poze. Li reponn yon seri kesyon tankou:
-
Ki kote nou soti?
-
Poukisa nou egziste?
-
Ki sa k rive yon moun apre l fin mouri?
-
Èske apre lavi sa a pa gen anyen ankò?
Plizyè milyon moun toupatou sou tè a viv pi byen lefètke yo te egzamine kesyon sa yo ak lòt ankò.
MEN SA W KA FÈ: Chèche wè ki sa Labib anseye. Mande nenpòt Temwen Jewova pou l ede w konprann Bib la. Al sou sit nou an, anpalan de jw.org/ht, oswa vin asiste youn nan reyinyon nou fè yo, yo gratis e tout moun ka asiste yo.
KÈK LÒT PRENSIP NAN BIB LA
Gade videyo Poukisa nou dwe etidye Labib? sou jw.org/ht. Videyo sa a disponib nan plis pase 880 lang.
SE POU W PRAN KONSYANS OU BEZWEN BONDYE.
“Byennere moun ki pran konsyans yo bezwen Bondye.” — MATYE 5:3.
APRANN PI BYEN KONNEN BONDYE BIB LA PALE DE LI A.
“Chèche Bondye, [...] jwenn li vre, [...] li pa lwen okenn nan nou.” — TRAVAY 17:27.
LI BIB LA EPI MEDITE SOU SA W LI A.
“Li pran plezi nan lwa Jewova * a e li medite sou lwa sa a tou ba lajounen kou lannuit. [...] L ap reyisi nan tout sa l fè.” — SÒM 1:2, 3, nòt.
^ § 23 Jewova se non Bondye jan sa parèt nan Bib la.
