Èske se Bondye ki te kreye linivè ak lavi oswa yo vini konsa konsa? Pawòl de fizisyen nou mansyone pi wo yo ak pawòl sa yo ki nan kòmansman Bib la se de repons ki diferan nèt pou kesyon sa a. Gen moun ki kwè nan toude repons sa yo. Sepandan, anpil moun pa fin sèten. Liv ki popilè ak deba piblik yo ap kontredi youn lòt sou sijè sa a.

Pwofesè lekòl ou yo te ka di avèk konviksyon linivè ak lavi te vini bridsoukou, e se pa t travay yon kreyatè. Men, èske pwofesè w yo te ba w prèv pa gen yon Kreyatè? Yon lòt bò, ou ka konn tande dirijan relijye k ap preche gen yon Kreyatè. Men, èske yo te ba w prèv pou kore sa y ap anseye a? Oswa èske yo jis di w pou w aksepte sa paske se “lafwa” ki mande w sa oswa se yon doktrin?

Sandout, ou konn reflechi ak kesyon sa a, e w ka menm santi pèsonn pa ka di si gen yon Kreyatè ki egziste toutbon. Epi ou ka menm poze yon lòt kesyon: Èske repons lan vrèman enpòtan?

Toudabò, nimewo Reveye n! sa a pral montre kèk prèv ki te konvenk anpil moun pou yo kwè nan yon Kreyatè. Apre sa, li pral montre poukisa repons kesyon sa a konsènan orijin lavi sou tè a enpòtan.