1, 2. a) Ki jan nou fè konnen moun kapab vin zanmi Bondye? b) Ki sa nou pral egzamine nan atik sa a?

DEPI lè nou fèt pou jis nou mouri, nou bezwen lanmou. Lèzòm bezwen gen bon zanmi, zanmi ki renmen yo, yo pa sèlman bezwen lanmou ki gen ant gason ak fi. Men, lanmou nou plis bezwen an se lanmou Jewova gen pou nou an. Gen anpil moun ki pa kwè moun ka vin bon zanmi Bondye, paske yo pa ka wè l e li Toupisan. Men, nou konnen se pa vre.

² Jan Bib la montre sa, gen moun ki te vin zanmi Bondye. Nou dwe imite moun sa yo. Poukisa? Paske pi gwo objektif yon moun ka atenn nan lavi l se vin zanmi Bondye. Se sa k fè nou pral egzamine egzanp Abraram. (Li Jak 2:23.) Ki jan Abraram te fè vin zanmi Bondye? Abraram te vin bon zanmi Bondye paske l te gen lafwa, e yo te vin konnen l kòm “papa tout moun ki gen lafwa”. (Women 4:11.) Pandan n ap pale de egzanp Abraram nan, mande tèt ou: ‘Ki jan m ka  imite lafwa Abraram te genyen an e ki jan m ka vin pi bon zanmi Jewova?’

3, 4. a) Fè yon ti pale de vwayaj ki sanble te mete lafwa Abraram anba plis eprèv la. b) Poukisa Abraram te dispoze ofri Izarak kòm sakrifis?

³ Imajine Abraram ki gen anviwon 125 an k ap mache tou dousman pou l monte yon mòn. ^[1] (Gade nòt la.) Izarak, pitit gason l, ki te gen anviwon 25 an lè sa a t ap mache dèyè l. Izarak t ap pote bwa pou yo fè dife e Abraram te pote yon kouto ak kèk bagay pou fè dife. Sanble vwayaj sa a se vwayaj ki te pi difisil Abraram te fè nan lavi l. Se pa paske l te granmoun ki te fè sa, piske l te gen anpil fòs toujou. Okontrè, vwayaj sa a te difisil paske Jewova te mande Abraram pou l ofri pitit gason l lan kòm sakrifis. — Jenèz 22:1-8.

⁴ Sanble se vwayaj sa a ki te mete lafwa Abraram anba plis eprèv. Gen kèk moun ki di Bondye te mechan dèske l te mande Abraram ofri pitit gason l lan kòm sakrifis. Gen lòt moun ki di se paske Abraram pa t renmen pitit gason l lan ki fè l te dakò fè sa. Moun yo di pawòl sa yo paske yo pa gen lafwa, yo pa konn ki sa vrè lafwa ye oubyen ki sa l ka pouse yon moun fè (1 Korentyen 2:14-16). Men, Abraram pa t annik obeyi Bondye je fèmen oubyen san l pa reflechi. Li te obeyi paske l te gen bonjan lafwa. Li te konnen Jewova pa t ap janm mande l pou l fè yon bagay ki te ka lakòz yon seri domaj ki pa ka repare. Abraram te konnen depi l obeyi Jewova, Jewova t ap beni ni li menm, ni pitit gason l lan. Ki sa Abraram te bezwen pou l te ka gen yon lafwa solid konsa? Li te bezwen gen konesans ak eksperyans.

5. Ki jan petèt Abraram te fè vin konnen Jewova e ki efè konesans sa a te gen sou li?

⁵ Konesans. Abraram te grandi nan yon vil ki rele Ou. Moun nan vil sa a te konn adore fo dye, e menm papa l te konn adore fo dye tou (Jozye 24:2). Bon, ki jan Abraram te fè vin konnen  Jewova? Bib la fè konnen, Sèm, yon pitit gason Noye, te fanmi Abraram. Abraram te prèske gen 150 an lè Sèm te mouri. Sèm te yon moun ki gen yon lafwa ki djanm, e siman li te pale de Jewova ak fanmi l. Sanble se grasa Sèm Abraram te vin konnen Jewova, byenke pa gen prèv ki montre sa. Sa Abraram te aprann yo te fè l vin renmen Jewova, e konesans sa a te ede l vin gen lafwa.

6, 7. Ki jan eksperyans Abraram te fè yo te fè lafwa l vin pi solid?

⁶ Eksperyans. Ki jan Abraram te fè vin gen eksperyans ki te fè l vin gen yon lafwa solid nan Jewova? Gen moun ki di sa yon moun panse gen efè sou sa l santi e sa yon moun santi gen efè sou aksyon l. Sa Abraram te aprann sou Bondye yo te touche kè l e sa te fè l vin gen gwo respè pou “Jewova, Bondye, Sila a ki nan pi gwo pozisyon an, Sila a ki fè syèl la ak tè a”. (Jenèz 14:22.) Labib rele gwo respè sa a “lakrentif pou [Bondye]”. (Ebre 5:7.) Pou nou ka vin bon zanmi Bondye, nou bezwen gen lakrentif pou li (Sòm 25:14). Se lakrentif Abraram te gen pou Jewova ki te pouse l obeyi Jewova.

⁷ Bondye te mande Abraram ak Sara pou yo kite Ou, peyi yo, pou y al abite nan yon peyi etranje. Yo pa t jèn ankò e yo t ap gen pou y al viv anba tant pou tout rès vi yo. Byenke Abraram te konnen te gen anpil danje ki t ap tann li, li te pran detèminasyon pou l obeyi Jewova. Piske l te obeyi, Jewova te beni l e li te pwoteje l. Pa egzanp, lè yo te pran Sara, madanm Abraram, ki te yon bèl dam, e lavi Abraram te an danje, grasa yon mirak, Jewova te pwoteje ni Abraram ni Sara plizyè fwa (Jenèz 12:10-20; 20:2-7, 10-12, 17, 18). Grasa eksperyans sa yo, lafwa Abraram te vin pi solid.

8. Ki jan nou ka vin gen konesans ak eksperyans k ap pèmèt nou vin pi zanmi Jewova?

⁸ Èske nou kapab vin bon zanmi Jewova? Wi, nou kapab vin bon zanmi Jewova. Menm jan ak Abraram, nou bezwen aprann konnen Jewova. Epi, nou menm tou, nou kapab vin gen konesans ak eksperyans nou bezwen an. Jodi a, nou gen plis pase sa Abraram te genyen (Dànyèl 12:4; Women 11:33). Bib la chaje ak konesans konsènan “Sila a ki fè syèl la ak tè a”. Sa nou aprann nan Bib la ka fè nou vin renmen Jewova e sa kapab ede nou vin gen gwo respè pou li.  Lanmou ak respè nou gen pou Bondye kapab pouse nou obeyi l. Lè nou obeyi l, nou wè jan li pwoteje nou e li beni nou, sa fè nou gen eksperyans ki fè lafwa nou vin pi solid. Lè nou sèvi Jewova ak tout kè nou, n ap jwenn satisfaksyon, lapè ak kè kontan (Sòm 34:8; Pwovèb 10:22). Plis nou vin gen konesans ak eksperyans, se plis n ap vin zanmi Jewova.

9, 10. a) Ki sa k ka fè relasyon ki gen ant de moun ki zanmi vin pi sere? b) Ki sa k montre Abraram te bay relasyon l genyen ak Jewova antanke zanmi an anpil valè e l te fè efò pou relasyon sa a vin pi sere?

⁹ Relasyon de moun ki bon zanmi kapab sanble ak yon trezò ki gen anpil valè. (Li Pwovèb 17:17.) Li pa menm jan ak yon po ki koute chè ki la pou dekorasyon. Li plis tankou yon bèl flè ki bezwen pou yo wouze l e pou yo ba l swen pou l ka fleri. Abraram te bay relasyon l ak Jewova antanke zanmi anpil valè e l te fè efò pou l kontinye ret zanmi Jewova. Ki jan l te fè sa?

¹⁰ Abraram te toujou fè efò pou l gen plis lakrentif pou Bondye e pou l toujou obeyi l. Pa egzanp, lè l t ap vwayaje pou l al Kanaran ak fanmi l ansanm ak sèvitè l yo, li te kontinye kite Jewova gide l nan tout desizyon l ap pran, kit se ti desizyon, kit se gwo desizyon. Ennan anvan Izarak te fèt, lè Abraram te gen 99 an, Jewova te di l pou l sikonsi tout gason lakay li. Èske Abraram te vin gen dout sou Jewova oubyen èske l t ap chèche yon mwayen pou l pa t fè sa Jewova te mande l la? Non. Li te fè Jewova konfyans e li te obeyi Jewova “menm jou sa a”. — Jenèz 17:10-14, 23.

11. Poukisa Abraram te enkyete l pou Sodòm ak Gomò e ki jan Jewova te ede l?

¹¹ Piske Abraram te toujou obeyi Jewova menm nan bagay ki toupiti, relasyon yo te genyen antanke zanmi an te vin pi sere. Li te santi li te kapab pale de nenpòt bagay avèk Jewova, e l te ka menm mande l èd pou l rezoud pwoblèm ki difisil. Pa egzanp, lè Jewova te di li pral detwi vil Sodòm ak vil Gomò, sa te enkyete Abraram. Poukisa? Li te pè pou ni moun ki bon, ni moun ki mechan pa mouri ansanm. Petèt li t ap bay tèt li pwoblèm pou Lòt, neve l, ak fanmi Lòt, ki t ap viv nan vil Sodòm. Abraram te gen konfyans nan Jewova, “Jij tout tè a”. Se sa k fè, avèk imilite, li te pale ak Jewova sou sa k t ap enkyete l la. Jewova te gen pasyans ak zanmi l lan, e l te montre l li se yon Bondye ki gen mizèrikòd. Jewova te esplike l menm lè l ap fè jijman l, li chèche moun ki bon yo e li pwoteje yo. — Jenèz 18:22-33.

12, 13. a) Ki jan konesans ak eksperyans Abraram te genyen an te vin itil li annapre? b) Ki sa k montre Abraram te fè Jewova konfyans?

¹² Li klè, tout konesans ak eksperyans  Abraram te vin genyen yo te ede l fè relasyon l te genyen ak Jewova antanke zanmi an vin pi sere. Se sa k fè, annapre, lè Jewova te vin mande Abraram pou l ofri pitit li a kòm sakrifis, li te konnen Jewova se yon Bondye ki toujou gen pasyans, mizèrikòd, yon Bondye moun ka fè konfyans e ki pwoteje sèvitè l yo. Abraram te gen yon konfyans total Jewova pa t vin yon moun ki mechan e ki di bridsoukou. Sa k fè n di sa?

¹³ Anvan Abraram te kite sèvitè l yo, men sa l te di yo: “Nou menm, nou mèt ret la ak bourik la, mwen menm ak tigason an nou pral lòtbò a pou n al adore Bondye epi n ap retounen vin jwenn nou.” (Jenèz 22:5). Ki sa Abraram te vle di? Èske se manti l t ap bay lè l te di l ap retounen ak Izarak la alòske l konnen se ofri l pral ofri l kòm sakrifis? Non. Bib la di Abraram te konnen Jewova te kapab resisite Izarak. (Li Ebre 11:19.) Abraram te konnen Jewova te ba l pouvwa pou l gen yon pitit gason menm lè li menm ak Sara te granmoun anpil (Ebre 11:11, 12, 18). Konsa, li te vin konprann pa gen anyen ki enposib pou Jewova. Abraram pa t konnen ki sa k t apral pase jou sa a. Men, li te konnen si sa te nesesè, Jewova te kapab resisite pitit gason l lan yon fason pou tout pwomès Bondye fè yo te ka reyalize. Se sa k fè yo te rele Abraram “papa tout moun ki gen lafwa”.

14. Èske w ka site kèk sitiyasyon difisil ou rankontre nan sèvis w ap bay Jewova a, e ki jan egzanp Abraram nan kapab ede w?

¹⁴ Sepandan, jodi a, Jewova pa mande pou nou ofri pitit nou kòm sakrifis, men l mande nou pou nou obeyi kòmandman l yo. Pafwa nou ka pa konprann pou ki rezon Jewova ban nou tèl ou tèl kòmandman oubyen li ka difisil pou n obeyi yo. Èske w pa janm santi w konsa? Pou kèk moun, travay predikasyon an se yon travay ki difisil. Petèt moun sa yo timid e yo ka wè l difisil pou yo kòmanse konvèsasyon ak moun yo pa konnen. Gen lòt ki pè pou yo pa parèt diferan nan travay yo oswa nan lekòl yo (Egzòd 23:2; 1 Tesalonisyen 2:2). Lè yo mande w pou w fè yon bagay ki difisil, reflechi ak bèl egzanp Abraram kite pou nou antanke yon moun ki te gen lafwa e ki te gen kran. Lè n pran tan pou n reflechi sou egzanp gason ak fi ki fidèl yo kite pou nou, sa kapab ankouraje nou pou nou imite yo e pou nou vin pi pwòch Jewova, Zanmi nou an. — Ebre 12:1, 2.

15. Sa k fè n ka gen asirans Abraram pa t janm regrèt dèske l te toujou obeyi Jewova fidèlman?

¹⁵ Èske Abraram te janm regrèt dèske l te obeyi kòmandman Jewova  yo? Bib la fè konnen Abraram te mouri lè l “te gen yon bon ti laj, [e] li te viv kont li”. (Jenèz 25:8.) Lè Abraram te gen 175 an, li te ka reflechi sou tout tan l te fè ap viv la, e l te santi l satisfè. Poukisa? Paske se amitye l ak Jewova ki te toujou pi enpòtan pou li. Men, lè Bib la di Abraram “te viv kont li” an, li pa t vle di li pa t anvi kontinye viv ankò.

16. Site kèk bagay ki pral fè kè Abraram kontan nan Paradi a.

¹⁶ Bib la fè konnen Abraram “t ap tann vil ki gen vrè fondasyon an, yon vil se Bondye ki fè plan l e se li ki bati l”. (Ebre 11:10.) Abraram te kwè yon jou li t ap wè vil sa a, anpalan de Wayòm Bondye a, k ap dirije tè a. E li gen pou l wè sa! Imajine jan Abraram pral kontan pou l viv nan yon paradi sou tè a e pou l kontinye fè efò pou relasyon l ak Bondye antanke zanmi vin pi sere toujou. Se pa ti kontan l ap kontan konnen egzanp li te kite antanke moun ki gen lafwa a te ede sèvitè Bondye yo pandan plizyè milye ane! Nan Paradi a, Abraram pral rann li kont sakrifis li t apral fè sou Mòn Moriya a te reprezante yon bagay ki gen plis valè toujou (Ebre 11:19). Li pral aprann ki jan lapenn li te santi lè l t ap prepare l pou l al ofri Izarak, pitit gason l, kòm sakrifis la te ede plizyè milyon moun fidèl vin konprann gwo lapenn Jewova te santi lè l te bay Jezi Kris, Pitit gason l lan, kòm yon ranson pou lèzòm (Jan 3:16). Egzanp Abraram nan ede nou tout vin pi byen konprann ranson an ki se pi gwo prèv lanmou Bondye demontre pou lèzòm.

17. Ki detèminasyon w pran, e de ki sa n pral pale nan atik ki vin apre a?

¹⁷ Se pou nou chak pran detèminasyon pou nou imite lafwa Abraram! Menm jan ak Abraram, nou bezwen gen konesans ak eksperyans. Toutpandan n ap kontinye aprann konnen Jewova e n ap kontinye obeyi l, n ap wè jan Jewova beni nou e li pwoteje nou. (Li Ebre 6:10-12.) Se pou Jewova ret zanmi nou pou toutan! Nan atik ki vin apre a, nou pral pale de twa lòt moun fidèl ki te vin bon zanmi Bondye.