FÈ YON ti reflechi ak jou w te gen plis kè kontan nan lavi w. Èske se lè w te marye oswa lè w te gen premye pitit ou? Oubyen, èske se jou w te batize a? Petèt jou sa a se jou ki te pi enpòtan e ki te ba w plis kè kontan nan lavi w. Epi jou sa a, se pa ti kontan frè ak sè w yo te kontan lè yo te wè jan w montre w renmen Bondye ak tout kè w, ak tout nanm ou, ak tout lespri w e ak tout fòs ou! — Mak 12:30.

Pa gen dout nan sa, ou jwenn anpil kè kontan nan sèvis w ap bay Jewova depi lè w fin batize a. Sepandan, gen yon pakèt pwoklamatè ki pèdi yon pati nan jwa yo te genyen an. Ki sa k fè sa? Ki rezon nou genyen pou n kontinye sèvi Jewova ak kè kontan?

Mesaj Wayòm nan fè n jwenn anpil kè kontan. Sa k fè sa? Se paske Jewova fè n konnen talè konsa Wayòm nan pral detwi monn mechan sa a e l pral fè n antre nan monn nouvo Bondye a. Men sa nou li nan Sofoni 1:14: “Gran jou Jewova a toupre rive! Li toupre rive e l ap vini byen vit!” Sepandan, si n santi n oblije ret tann plis pase sa n te panse, sa ka fè n pèdi jwa nou e sa ka lakòz nou vin ralanti nan sèvis n ap bay Bondye a. — Pwovèb 13:12.

Lè n pase tan ak frè ak sè n yo, nou santi n jwenn ankourajman pou n kontinye sèvi Jewova ak kè kontan. Petèt se bon konduit pèp Jewova a ki te atire n vin nan vrè adorasyon an e ki te ede n kòmanse sèvi Bondye ak kè kontan (1 Pyè 2:12). Sepandan, ki sa k ka rive si youn nan frè n ak sè n yo te resevwa yon disiplin paske l pa obeyi kòmandman Bondye yo? Sa ka dekouraje kèk moun nan kongregasyon an e sa ka lakòz yo pèdi jwa yo.

Lanmou pou bagay materyèl ka lakòz nou pèdi jwa nou tou. Kòman sa? Monn Satan an ap eseye konvenk nou pou n achte yon seri bagay nou pa vrèman bezwen. Se sa k fè n dwe sonje pawòl sa yo Jezi te di a: “Pèsonn pa ka esklav de mèt anmenmtan. Paske, se swa li rayi youn e li renmen lòt la, oubyen li atache ak youn e li meprize lòt la. Nou pa ka esklav Bondye ak Lajan anmenmtan.” (Matye 6:24). Nou pap ka sèvi Jewova ak kè kontan toutpandan n ap eseye chèche jwenn tout sa n kapab nan monn sa a.

Moun ki renmen Jewova yo pa wè sèvis y ap ba li a tankou yon pwa lou (1 Jan 5:3). Pa bliye, Jezi te di: “Vin jwenn mwen, nou tout ki bouke e ki gen chay n ap pote, e m ap ban nou fòs. Pran jouk mwen an met sou zepòl nou, e aprann nan men m, konsa n ap jwenn fòs, paske mwen gen tanperaman dou e mwen gen imilite nan kè m. Paske, jouk mwen an fasil pou moun pote e chay mwen an lejè.” (Matye 11:28-30). Antanke vrè kretyen, nou gen anpil kè kontan e sa ban nou fòs. Sa klè, nou  gen bonjan rezon pou n sèvi Jewova ak kè kontan. Kounye a, ann wè twa nan rezon sa yo. — Abakouk 3:18.

N ap sèvi Moun ki ban nou lavi a, Bondye ki gen kè kontan an (Travay 17:28; 1 Timote 1:11). Nou rekonèt se grasa Kreyatè nou an ki fè n ap viv. Donk, ann kontinye sèvi l ak kè kontan kèlkeswa kantite ane nou genyen depi n batize.

Ann pran egzanp Héctor ki te fè 40 an ap sèvi Jewova antanke siveyan sikonskripsyon. “Menm lè [kounye a li] vin granmoun”, li toujou gen kè kontan nan sèvis Jewova a (Sòm 92:12-14). Héctor te vin pa t ka fè anpil nan sèvis Bondye a akoz madanm li te malad, men, li pa t pèdi jwa l. Men sa l te di: “Byenke sa fè m mal pou m wè jan sante madanm mwen ap deteryore tikras pa tikras e jan l vin pi difisil pou m pran swen l, mwen pa janm kite sa fè m pèdi jwa m genyen lefètke m ap sèvi vrè Dye a. Lefètke m konnen se grasa Jewova ki fè m ap viv e m konnen l kreye m pou yon rezon byen presi, sa sèlman se yon rezon ki fè m renmen l anpil e ki pouse m sèvi l ak tout kè m. Mwen fè efò pou m ret aktif nan travay predikasyon an e m fè efò pou m kontinye kenbe esperans Wayòm nan byen klè nan lespri m yon fason pou m pa pèdi jwa m.”

Grasa ranson Jewova bay la, sa fè l posib pou n viv ak kè kontan. Bib la di: “Bondye tèlman renmen monn nan, li bay sèl Pitit Gason li fè a pou li, dekwa pou nenpòt moun ki demontre l gen lafwa nan li pa detwi, men pou l gen lavi ki pap janm fini an.” (Jan 3:16). Wi, nou ka jwenn padon pou peche nou yo ak lavi ki pap janm fini an lè n montre nou gen lafwa nan ranson an ki se yon kado Bondye ban nou paske l renmen nou. Vrèmanvre, sa se yon gwo rezon pou n montre n rekonesan! Epi, rekonesans nou genyen pou ranson an ap pouse n sèvi Jewova ak kè kontan.

Men sa yon frè ki rele Jesús, ki t ap viv nan peyi Meksik, te fè konnen: “Mwen te esklav travay mwen. Pafwa, mwen te konn gen senk orè travay youn dèyè lòt menm lè m pa t oblije fè sa. M te fè sa tou senpleman pou m fè plis lajan. Annapre, m te aprann konnen Jewova e m te vin konn ki jan l te bay Pitit gason l renmen anpil la pou lèzòm. M te vin gen yon gwo anvi pou m sèvi l. Konsa, m te vwe lavi m bay Jewova, epi, apre m te fin fè 28 an ap travay pou konpayi a, m te deside kite travay la pou m antre nan sèvis aplentan.” Se konsa Jesús te kòmanse sèvi Jewova ak kè kontan.

Nou mennen yon vi ki pwòp moralman, sa ki ban nou anpil kè kontan. Èske w sonje ki jan lavi w te ye anvan w te aprann konnen Jewova? Apot Pòl te fè kretyen ki te nan vil Wòm yo sonje yo “te esklav peche” yon lè, e annapre, yo te “vin  esklav sa ki jis”. Etandone yo t ap viv yon fason ki pwòp, yo te ka gen espwa y ap jwenn lavi ki pap janm fini an (Women 6:17-22). Nou menm tou n ap suiv prensip Jewova yo, konsa, nou pa nan lapenn menm jan ak moun k ap viv yon fason imoral oswa ki vyolan yo. Se pa ti lajwa sa ban nou!

Ann pran egzanp Jaime, yon moun ki te ate, ki te kwè nan teyori evolisyon an e ki te konn fè bòks. Jaime te kòmanse asiste reyinyon yo e lanmou li te wè lakay frè yo te touche kè l. Pou Jaime te ka chanje fason l t ap viv la, li te mande Jewova pou l ede l vin gen konfyans nan Li. Men sa Jaime fè konnen: “Tikras pa tikras, m te kòmanse aprann gen yon Bondye ki se yon Papa ki gen lanmou ak mizèrikòd. Lefètke m te viv ann amoni ak prensip Jewova yo ki jis, sa te pwoteje m. Si m pa t chanje, m te ka gentan mouri menm jan ak kèk nan zanmi m te genyen ki te konn fè bòks yo. Se ane m pase ap sèvi Jewova yo ki ban m plis kè kontan nan lavi m.”

Ki jan n ta dwe santi n toutpandan n ap tann destriksyon monn mechan sa a? Pa bliye sa, n ap fè volonte Bondye e n gen espwa n ap jwenn lavi ki pap janm fini an. “Donk, annou pa sispann fè sa ki byen, paske lè lè a rive, n ap rekòlte si nou pa kite fatig pote n ale.” (Galat 6:8, 9). Grasa èd Jewova, ann kontinye andire, ann kontinye travay di pou n vin gen kalite n ap bezwen pou n chape vivan nan “gwo tribilasyon an” e pou n kontinye sèvi Jewova ak kè kontan. — Revelasyon 7:9, 13, 14; Jak 1:2-4.

Nou mèt gen konfyans Jewova pral rekonpanse nou pou andirans nou paske l wè travay n ap fè ansanm ak lanmou nou demontre pou li e pou non l. Si n kontinye sèvi l ak kè kontan, n ap vin menm jan ak salmis David ki te di: “Mwen gen Jewova devan je m toutan. Piske li sou bò dwat mwen, mwen pap janm brannen. Se poutèt sa, kè m kontan. Se tout mwen menm ki kontan. E m ap abite an sekirite.” — Sòm 16:8, 9.