1-3. a) Ki sa k ban nou asirans nou kapab vin zanmi Bondye? b) De ki moun nou pral pale nan atik sa a?

AN TWA fwa nan Bib la, yo pale de Abraram kòm zanmi Bondye (2 Kwonik 20:7; Ezayi 41:8; Jak 2:23). Li se sèl moun Bib la rele zanmi Bondye yon fason ki klè. Èske sa vle di Abraram se sèl moun ki te rive vin zanmi Jewova? Non. Bib la montre nou tout kapab gen privilèj sa a.

² Pawòl Bondye a gen istwa anpil gason ak fi ki te fidèl ak Jewova, ki te gen lakrentif pou li, ki te gen lafwa nan li e ki te vin bon zanmi l. (Li Sòm 25:14.) Moun sa yo fè pati “gwo nyaj temwen” apot Pòl te pale de li a. Tout kalite moun sa yo te vin zanmi Bondye. — Ebre 12:1.

³ Ann konsidere egzanp twa zanmi Jewova yo pale de yo nan Bib la: 1) Rit, jèn vèv fidèl ki te moun Mowab la, 2) Ezekyas, yon wa Jida ki te fidèl, e 3) Mari, manman Jezi, yon dam ki te gen anpil imilite. Ki sa n ka aprann nan fason yo chak te rive vin zanmi Bondye?

4, 5. Ki gwo desizyon Rit te dwe pran, e poukisa l te difisil pou l pran desizyon sa a? (Gade foto ki nan kòmansman atik la.)

⁴ Nawomi ak de bèlfi l yo, Rit ak Òpa, t ap fè yon vwayaj ki byen long apye, soti Mowab pou rive Izrayèl. Pandan yo nan wout, Òpa te deside retounen lakay li nan Mowab. Men, Nawomi te vle retounen ann Izrayèl, nan peyi l. Ki sa Rit te deside fè? Li te gen pou l pran yon gwo desizyon. Èske l ta dwe retounen nan peyi Mowab, lakay li, oubyen, èske l ta dwe ret ansanm ak Nawomi, bèlmè l, epi kontinye vwayaj la pou y al Betleyèm? — Rit 1:1-8, 14.

⁵ Fanmi Rit t ap viv nan peyi Mowab. Li te ka retounen al jwenn yo, e sandout, yo t ap pran swen l. Li te konn pèp Mowab la byen, li te konn lang lan e l te konn koutim moun yo. Nawomi pa t ka pwomèt Rit okenn nan bagay sa yo lè l rive Betleyèm. Epi, Nawomi te pè pou l pa jwenn yon mari pou Rit oubyen yon kote pou Rit rete. Se sa k fè Nawomi te di Rit pou l retounen Mowab, nan peyi l. Jan n te wè sa, Òpa te “retounen al jwenn pèp li a ak dye l yo”. (Rit 1:9-15.) Men, Rit pa t deside retounen al jwenn pèp li a ak fo dye yo te konn sèvi yo.

6. a) Ki bon desizyon Rit te pran? b) Poukisa Bowaz te di Rit t ap chèche pwoteksyon anba zèl Jewova?

⁶ Sanble se mari Rit oswa Nawomi ki te pale l de Jewova. Rit te vin aprann Jewova pa tankou dye nan peyi Mowab yo. Li te renmen Jewova e l te konnen Jewova merite pou l renmen l e pou l adore l. Se sa k fè Rit te pran bon desizyon an. Men sa l te di Nawomi: “Pèp ou a ap pèp mwen, e Bondye w la ap Bondye m.” (Rit 1:16). Sa touche kè nou lè n ap reflechi sou lanmou Rit te gen pou Nawomi. Men, sa k pi enpresyone nou se lanmou Rit te gen pou Jewova a. Lanmou sa a te gen gwo efè sou Bowaz tou, e pi devan, sa te pouse l fè lwanj pou Rit dèske Rit te ‘chèche pwoteksyon anba zèl Jewova’. (Li Rit 2:12.) Mo Bowaz te itilize yo kapab fè n sonje fason ti zwazo yo konn chèche pwoteksyon anba zèl paran yo (Sòm 36:7; 91:1-4). Menm jan an tou, Jewova te byen pwoteje Rit e l te rekonpanse l pou lafwa l. Rit pa t janm gen okenn rezon pou l regrèt desizyon l te pran an.

7. Ki sa k ka ede yon moun ki pè vwe lavi l bay Jewova?

⁷ Gen anpil moun ki rive konn kiyès Jewova ye, men, ki pa chwazi chèche pwoteksyon anba zèl li. Yo pè vwe lavi yo bay Jewova e yo pè batize. Si se ka pa w, fè yon ti reflechi sou rezon ki fè w pè a. Tout moun gen yon dye y ap sèvi (Jozye 24:15). Pi bon desizyon yon moun ka pran se vin sèvi vrè Dye a. Lè w vwe lavi w bay Jewova, ou montre w gen lafwa l ap tounen yon kote w ka jwenn pwoteksyon. Epi, l ap ede w kontinye sèvi l kèlkeswa pwoblèm ou ta jwenn. Se sa Bondye te fè pou Rit.

8. Fè yon ti pale sou fason Ezekyas te leve.

⁸ Ezekyas pa t leve menm jan ak Rit. Ezekyas te fèt nan yon nasyon ki te fè yon alyans ak Bondye. Men, se pa tout Izrayelit yo ki te ret fidèl. Wa Ahaz, ki  te papa Ezekyas, te mechan anpil. Li pa t gen respè pou tanp Bondye a e l te konvenk pèp la pou yo adore lòt dye. Ahaz te menm fè boule kèk nan frè Ezekyas yo vivan pou l ofri yo kòm sakrifis bay yon fo dye. Antanke timoun, Ezekyas pa t grandi nan yon bon anviwònman! — 2 Wa 16:2-4, 10-17; 2 Kwonik 28:1-3.

9, 10. a) Poukisa li te ka fasil pou Ezekyas vin egri? b) Poukisa nou pa dwe vin an kòlè kont Bondye? c) Poukisa nou pa dwe panse kalite moun n ap vin ye a depann de fason nou te leve?

⁹ Move egzanp Ahaz te kite pou Ezekyas, pitit gason l lan, te ka fè Ezekyas vin egri oswa an kòlè kont Jewova. Jodi a, gen kèk moun ki pa menm jwenn tout pwoblèm Ezekyas te jwenn yo ki panse yo gen bonjan rezon pou yo “an kòlè [...] sou Jewova” oubyen pou yo egri kont òganizasyon l lan (Pwovèb 19:3). Gen lòt menm ki santi fason yo te grandi nan fanmi yo ka fè yo mennen yon move vi oswa sa ka fè yo fè menm erè ak paran yo (Ezekyèl 18:2, 3). Men, èske lide sa yo kòrèk?

¹⁰ Lavi Ezekyas montre repons kesyon sa a se non! Pa janm gen yon bon rezon pou yon moun vin an kòlè sou Jewova. Se pa li menm ki fè malè rive pèsonn (Jòb 34:10). Se vre, paran yo kapab montre pitit yo sa ki byen ak sa ki mal (Pwovèb 22:6; Kolosyen 3:21). Men, sa pa vle di se fason nou te leve nan fanmi nou k ap di ki kalite moun n ap vin ye. Sa k fè n di sa? Se paske Jewova ban nou libète pou n chwazi, sa vle di nou ka deside fè sa ki byen oubyen sa ki mal (Detewonòm 30:19). Ki jan Ezekyas te itilize bèl kado sa a Bondye te ba li a?

11. Ki sa k fè Ezekyas te youn nan pi bon wa peyi Jida te genyen?

¹¹ Menm lè papa Ezekyas te youn nan pi move wa ki te ka genyen nan peyi Jida, Ezekyas te vin youn nan pi bon wa peyi sa a te genyen. (Li 2 Wa 18:5, 6.) Li pa t chwazi imite move egzanp papa l la. Olye de sa, li te chwazi pran san l pou l koute pwofèt Jewova yo tankou Ezayi, Miche ak Oze. Li te pran tan pou l koute konsèy yo ba li e l te  aksepte disiplin yo ba li. Sa te ede l rezoud anpil nan pwoblèm papa l te lakòz yo. Li te netwaye tanp lan, li te mande Bondye padon pou peche pèp la e l te detwi zidòl yo nan tout peyi a (2 Kwonik 29:1-11, 18-24; 31:1). Annapre, lè Senakerib, wa Asiri a, te menase pou l atake Jerizalèm, Ezekyas te montre l gen anpil kran ak anpil lafwa. Li te gen konfyans Jewova t ap pwoteje l e l te ankouraje pèp la (2 Kwonik 32:7, 8). Rive yon lè, Ezekyas te vin gen ògèy, men, lè Jewova te korije l, avèk imilite, li te aksepte koreksyon an (2 Kwonik 32:24-26). Li klè, Ezekyas se yon bèl egzanp pou n imite. Li pa t kite erè fanmi l te fè yo fè l gache lavi l. Okontrè, li te montre l se zanmi Jewova.

12. Menm jan ak Ezekyas, ki jan anpil moun jodi a montre yo se zanmi Jewova?

¹² Jodi a, monn nan san pitye, li pa gen lanmou, e gen anpil timoun ki leve san yo pa jwenn lanmou ak swen nan men paran yo (2 Timote 3:1-5). Byenke gen anpil kretyen jodi a ki te grandi nan yon move fanmi, yo chwazi fè efò pou yo vin zanmi Jewova. Menm jan ak Ezekyas, yo montre se pa fason yo te leve nan fanmi yo k ap fè konnen ki kalite moun y ap ye. Bondye ban nou libète pou n chwazi, e n ka chwazi sèvi l epi onore l menm jan ak Ezekyas.

13, 14. Poukisa asiyasyon Mari te resevwa a te ka sanble twò difisil pou li, e malgre sa, ki jan l te reponn Gabriyèl?

¹³ Plizyè ane apre epòk Ezekyas la, gen yon jèn dam ki gen imilite ki te rele Mari, ki te vin gen yon amitye espesyal ak Jewova e l te resevwa yon asiyasyon espesyal. Li te gen pou l vin ansent, pou l vin manman Pitit gason Bondye a e pou l pran swen l. Pou Jewova te ka fè Mari yon gwo onè konsa, Jewova dwe te gen anpil lanmou pou li e l te fè l anpil konfyans. Men, ki jan Mari te reyaji lè l te fèk jwenn asiyasyon sa a?

¹⁴ Byen souvan, nou konn pale de gwo onè Bondye te fè Mari a. Men, ki kèk enkyetid Mari te genyen? Pa egzanp, zanj Gabriyèl te di l l ap vin ansent san l pa gen relasyon ak yon gason. Men, Gabriyèl pa t di Mari l ap esplike fanmi l ak vwazen l yo ki jan l te fè vin ansent. Ki sa yo t apral panse? Ki jan l t apral rive konvenk Jozèf li pa t gen relasyon ak yon gason? Mete sou sa, leve Pitit gason Bondye a se yon gwo responsablite! Se vre, nou pa konn tout enkyetid Mari te genyen, men, nou konn sa l te fè apre Gabriyèl te fin pale avè l. Men sa Mari te di: “Mwen se esklav Jewova! Se pou sa rive m jan w di a.” — Lik 1:26-38.

15. Sa k fè n ka di lafwa Mari te genyen an te estrawòdinè?

 ¹⁵ Lafwa Mari te genyen an te vrèman estrawòdinè! Menm jan ak yon esklav, li te dispoze fè nenpòt sa yo mande l. Li te gen konfyans Jewova t ap pran swen l e l t ap pwoteje l. Ki jan Mari te fè vin gen yon lafwa solid konsa? Lafwa pa yon kalite nou fèt avè l. Men, nou kapab vin gen lafwa si n fè efò pou sa epi n mande Bondye pou l beni efò sa yo (Galat 5:22; Efezyen 2:8). Mari te travay di pou l te ka fè lafwa l vin pi solid. Ki jan n fè konn sa? Ann egzamine fason li te konn koute e sou ki sa li te konn pale.

16. Ki sa k montre Mari te konn pran tan pou l byen koute?

¹⁶ Fason Mari te konn koute. Men sa Bib la di: “Tout moun dwe dispoze koute, yo pa dwe prese pale.” (Jak 1:19). Mari te konn pran tan pou l byen koute. Bib la fè n konnen li te pran tan pou l koute sa l te tande yo, espesyalman sa l t ap aprann sou Jewova yo. Li te pran tan pou l medite sou bagay enpòtan sa yo. Yon egzanp ki montre sa se fason li te koute lè moun ki t ap gade mouton yo te ba l mesaj yon zanj te bay nan epòk Jezi te fèt la. Annapre, lè Jezi te gen 12 an, li te di yon bagay ki te fè Mari reflechi. Nan toule de ka sa yo, Mari te koute, li te sonje sa l te tande yo e l te pran tan pou l reflechi sou yo. — Li Lik 2:16-19, 49, 51.

17. Ki sa n ka aprann konsènan Mari nan sa l te di yo?

¹⁷ Sou ki sa Mari te konn pale. Bib la pa di nou anpil bagay sou sa Mari te di. Nou jwenn pawòl ki pi long Mari te di yo nan Lik 1:46-55. Pawòl sa yo montre Mari te byen konnen Liv ki te ekri ann Ebre yo. Ki jan n fè konn sa? Pawòl Mari te di yo sanble tèt koupe ak pawòl ki nan priyè Ana, manman Samyèl, te fè a (1 Samyèl 2:1-10). Sanble Mari te site Ekriti yo anviwon 20 fwa nan pawòl li te di yo. Li klè, Mari te renmen pale de verite li te aprann nan men pi gwo Zanmi l lan, Jewova.

18. Ki jan n ka imite lafwa Mari te genyen an?

¹⁸ Menm jan ak Mari, pafwa, Jewova ka ban nou kèk asiyasyon nou santi ki twò difisil pou nou. Ann imite egzanp Mari, e avèk imilite, ann aksepte asiyasyon an toutpandan nou gen konfyans Jewova ap ede n. Nou ka imite lafwa Mari te genyen an tou lè n pran tan pou n koute Jewova e pou n medite sou sa n aprann sou li ak objektif li yo. Epitou, nou ka pran plezi pataje sa n aprann yo ak lòt moun. — Sòm 77:11, 12; Lik 8:18; Women 10:15.

19. Toutpandan n ap imite bèl egzanp moun ki te gen lafwa nou jwenn nan Bib la, ki asirans nou kapab genyen?

¹⁹ Sa klè, ni Rit, ni Ezekyas, ni Mari te zanmi Jewova menm jan ak Abraram. Yo te pami moun ki fè pati “gwo nyaj temwen” an ki te gen privilèj pou yo vin zanmi Bondye. Nou swete pou n kontinye imite bèl egzanp moun sa yo kite pou nou, yo menm ki te gen yon lafwa estrawòdinè (Ebre 6:11, 12)! Si n fè sa, n ap gen asirans n ap zanmi Jewova pou toutan!