1, 2. Ki fason David te montre l fidèl ak Bondye? (Gade foto ki nan kòmansman atik la.)

SAYIL ansanm ak 3 000 sòlda ki te avè l yo t ap chèche David nan dezè Jida a pou yo touye l. Men, yon jou swa, David ak mesye ki te avè l yo te jwenn kote Sayil ak sòlda l yo te tabli kan yo. Yo tout nèt t ap dòmi. Konsa, David ak Abichayi te pase kot sòlda yo tou dousman jis yo rive kot Sayil t ap dòmi an. Men sa Abichayi te di David tou ba: “Kite m kloure l atè a ak yon sèl kout lans, mwen pap bezwen ba l de.” Men, David pa t vle kite l touye Sayil. Men sa David te di Abichayi: “Pa fè l anyen ki mal, paske ki moun ki ka leve men l pou l frape moun Jewova chwazi a epi pou l ret inosan?” Epi, David di l: “Piske mwen gen respè pou Jewova, sa pa t ap janm vin nan lide m pou m leve men m pou m frape moun Jewova chwazi a!” — 1 Samyèl 26:8-12.

 ² David te konprann sa l dwe fè pou l ret fidèl ak Jewova. Li konnen l te dwe respekte Sayil e l pa t menm imajine li menm k ap fè Sayil mal. Poukisa? Paske se Bondye ki te chwazi Sayil pou l vin wa ann Izrayèl. Menm jan ak nan tan lontan, jodi a, Jewova vle pou tout moun k ap sèvi l ret fidèl avè l e pou yo respekte moun li pèmèt gen otorite yo. — Li Miche 6:8.

3. Ki fason Abichayi te montre l fidèl ak David?

³ Abichayi te respekte David paske l konnen Bondye te chwazi David pou l vin wa. Sepandan, David te fè peche ki grav apre l te fin wa. Li te gen relasyon seksyèl ak madanm Ouri a epi, apre sa, li te di Jowab pou l fè yon fason pou Ouri mouri nan batay la (2 Samyèl 11:2-4, 14, 15; 1 Kwonik 2:16). Petèt Abichayi te rive konnen sa David te fè a piske Jowab te frè l. Sepandan, Abichayi te kontinye demontre respè pou David. Anplis de sa, Abichayi te yon chèf nan lame a e l te ka sèvi ak otorite l te genyen an pou l vin wa, men l pa t janm fè sa. Olye de sa, li te sèvi David e l te pwoteje l kont ènmi l yo. — 2 Samyèl 10:10; 20:6; 21:15-17.

4. a) Ki jan David te montre li se yon egzanp antanke yon moun ki te fidèl ak Bondye? b) Ki lòt egzanp nou pral wè nan atik sa a?

⁴ David te ret fidèl ak Jewova pandan tout vi l. Lè l te jèn, li te touye jeyan ki te rele Golyat la ki t ap manke Jewova ak Izrayelit yo dega (1 Samyèl 17:23, 26, 48-51). Lè David te vin wa, Natan, pwofèt Jewova a te reprimande l pou peche l te fè yo. Menm kote a, David te admèt li peche epi l repanti (2 Samyèl 12:1-5, 13). Annapre, lè David te vin granmoun, li te bay yon pakèt bagay ki gen valè pou yo te ka konstwi yon tanp pou Jewova (1 Kwonik 29:1-5). Sa klè, menm lè David te fè anpil gwo erè nan lavi l, li pa t janm sispann ret fidèl ak Bondye (Sòm 51:4, 10; 86:2). Nan atik sa a, nou pral pale de egzanp David ansanm ak kèk lòt moun ki t ap viv nan menm epòk la e nou pral aprann ki jan nou ka montre n met fidelite n ak Jewova anvan fidelite n pou nenpòt lòt moun. Epi n pral pale konsènan kèk lòt kalite ki kapab ede n fè sa.

5. Ki leson n aprann nan erè Abichayi te fè a?

⁵ Lè Abichayi te vle touye Sayil la, se eseye l t ap eseye montre l fidèl ak David. Men, piske David te konnen l pa bon pou yon moun frape “moun Jewova chwazi a”, li pa t kite Abichayi touye wa a (1 Samyèl 26:8-11). Sa aprann nou yon leson enpòtan: Lè n ap deside ak kiyès nou dwe fidèl an premye, nou bezwen reflechi pou n konnen ki prensip biblik ki kapab ede n nan sitiyasyon nou ye a.

6. Byenke l nòmal pou n fidèl ak fanmi nou e ak zanmi nou, poukisa n dwe fè atansyon?

⁶ Li toutafè nòmal pou n fidèl ak yon moun nou renmen, tankou yon zanmi oswa yon moun nan fanmi nou.  Sepandan, piske n enpafè, kè nou ka twonpe nou (Jeremi 17:9). Konsa, si yon moun nou renmen ta fè yon bagay ki mal epi l kite laverite, nou dwe sonje fidelite n ak Jewova pi enpòtan pase fidelite n ak kèlkeswa lòt moun nan. — Li Matye 22:37.

7. Ki fason yon sè te ret fidèl ak Bondye nan yon sitiyasyon difisil?

⁷ Si yon moun nan fanmi nou eskominye, nou ka montre Jewova nou fidèl avè l. Pa egzanp, yon jou, manman Àn, ki te eskominye, te rele Àn nan telefòn pou l di l li vle vin wè l lakay li. ^[1] (Gade nòt la.) Manman Àn te di li santi l tris anpil paske fanmi l te refize pale avè l. Sa te fè Àn tris e l te pwomèt manman l l ap reponn li nan yon lèt. Àn te medite sou kèk prensip nan Bib la anvan l te ekri lèt la (1 Korentyen 5:11; 2 Jan 9-11). Apre sa, avèk jantiyès, li te ekri manman l pou l esplike l se li menm ki kite fanmi an lefètke l te peche epi l refize repanti. Àn te di manman l se sèlman lè l retounen vin jwenn Jewova l ap kapab vin gen kè kontan ankò. — Jak 4:8.

8. Ki kalite k ap ede n ret fidèl ak Bondye?

⁸ Sèvitè fidèl Bondye yo nan epòk David la te gen imilite, bonte ak kouraj tou. Ann wè kòman kalite sa yo ka ede n ret fidèl ak Jewova.

9. Poukisa Abnè te eseye touye David?

⁹ Jonatan, pitit gason Sayil la, ansanm ak Abnè, kòmandan lame Izrayèl la, te la lè David te pot tèt Golyat bay wa Sayil la. Jonatan te vin zanmi David e l te ret fidèl ak li (1 Samyèl 17:57–18:3). Men, Abnè pa t ret fidèl ak David. Anfèt, pi devan, lè Sayil te vle touye David, li te menm ede Sayil (1 Samyèl 26:1-5; Sòm 54:3). Ni Jonatan ni Abnè te konnen Bondye te vle pou David vin wa Izrayèl apre Sayil. Men, apre lanmò Sayil, Abnè pa t soutni David. Olye de sa, li te eseye fè Ichbochèt, yon pitit gason Sayil, vin wa. Pi devan, petèt se paske Abnè te vle vin wa ki fè l te gen relasyon seksyèl ak youn nan madanm wa Sayil yo (2 Samyèl 2:8-10; 3:6-11). Ki sa k fè fason Jonatan te wè  David la te diferan nèt ak fason Abnè te wè David la? Se paske Jonatan te fidèl ak Jewova e l te gen imilite alòske Abnè pa t konsa.

10. Poukisa Absalon pa t fidèl ak Bondye?

¹⁰ Piske Absalon, pitit gason wa David la, pa t gen imilite, li pa t fidèl ak Bondye. Piske l te vle vin wa, li te vin gen “yon charyo ak plizyè cheval, e li te gen 50 gason pou kouri devan l”. (2 Samyèl 15:1.) Anplis de sa, li te konvenk anpil Izrayelit pou fè yo vin fidèl avè l. Li te menm eseye touye papa l aktout li te konnen se Jewova ki te met David wa ann Izrayèl. — 2 Samyèl 15:13, 14; 17:1-4.

11. Ki sa n aprann nan sa Bib la rakonte sou Abnè, Absalon ak Bawouk?

¹¹ Li difisil pou yon moun ki pa gen imilite e ki vle vin gen plis pouvwa ret fidèl ak Bondye. Nòmalman, piske n renmen Jewova, nou pa vle vin wè tèt nou sèlman e n pa vle vin mechan tankou Abnè ak Absalon. Men, nou dwe fè atansyon pou n pa kòmanse vin anvi gen anpil lajan oswa pou n ap chèche yon djòb ki ka fè n santi n enpòtan. Sa ap gen move efè sou relasyon nou ak Jewova. Pandan yon tan, Bawouk, sekretè Jeremi an, te vle vin gen yon bagay li pa t genyen e l te kòmanse pèdi jwa l nan sèvis Bondye a. Se sa k fè, Jewova te di Bawouk: “Gade! Sa m te bati a, m ap kraze l, sa m te plante a, m ap derasinen l. M ap fè sa nan tout peyi a. Men, ou menm w ap chèche gwo bagay pou tèt ou. Sispann chèche bagay sa yo.” (Jeremi 45:4, 5). Bawouk te koute Jewova. Nou menm tou nou dwe koute Jewova paske talè konsa li pral detwi monn mechan sa a.

12. Montre rezon ki fè nou pa kapab fidèl ak Bondye lè nou egoyis.

¹² Daniel, yon frè nan peyi Meksik, te gen pou l deside ak kiyès li te dwe fidèl. Li te vle marye ak yon fi ki pa t ap sèvi Jewova. Men sa Daniel di: “Mwen te kontinye ekri ti dam nan menm apre m te fin pyonye.” Men, Daniel te vin rann li kont li t ap aji yon fason ki egoyis e se sa l vle l t ap fè. Li pa t fidèl ak Jewova e li te bezwen montre l gen imilite. Se sa k fè li t al pale de ti  dam nan ak yon ansyen ki gen eksperyans. Men sa Daniel esplike: “Li te ede m konprann pou m ret fidèl ak Bondye, mwen te dwe sispann ekri ti dam nan. Se vre mwen te priye anpil e m te kriye anpil, men m te suiv konsèy la. Yon ti tan apre sa, mwen te vin jwenn plis kè kontan nan travay predikasyon an.” Kounye a, Daniel marye ak yon sè ki renmen Jewova e li se yon siveyan sikonskripsyon.

13. Ki fason Natan te ret fidèl ni ak Bondye ni ak David lè David te peche a?

¹³ Lè n ret fidèl ak Jewova, sa ede n ret fidèl ak lòt moun e n ka ede yo pi byen. Pwofèt Natan te ret fidèl ak Jewova e l te fidèl ak David tou. Apre David te fin pran madanm yon mesye epi l te fè touye mesye a, Jewova te voye Natan al konseye David. Natan te met kouraj sou li e l te obeyi Jewova. Men, li te aji ak sajès tou e l te pale ak David avèk bonte. Li te vle ede David konprann jis nan ki pwen peche l yo te grav. Se sa k fè l te rakonte l istwa yon misye rich ki te pran sèl ti mouton yon mesye pòv te genyen. Lè David tande istwa sa a, li vin an kòlè anpil pou sa mesye rich la te fè a. Apre sa, Natan di l: “Se ou menm ki mesye sa a!” Konsa, David te rann li kont li peche kont Jewova. — 2 Samyèl 12:1-7, 13.

14. Ki jan w ka montre w fidèl ak Jewova, ak zanmi w e ansanm ak moun ki fanmi w?

¹⁴ Ou menm tou ou kapab fidèl ak Jewova an premye e w ka fidèl ak lòt moun lè w demontre bonte. Pa egzanp, ou kapab gen prèv yon frè te fè yon peche grav. Ou ka vle ret fidèl ak frè a sitou si l se bon zanmi w oswa l se yon moun nan fanmi w. Men, anmenmtan tou, ou konnen l pi enpòtan pou w fidèl ak Jewova. Kidonk, menm jan ak Natan, obeyi Jewova epi demontre bonte anvè frè w la. Fè l konnen li dwe al chèche èd nan men ansyen yo e l dwe pale ak yo san pèdi tan. Si l pa fè sa, ou dwe al fè ansyen yo konn sa. Lè w fè sa, w ap ret fidèl ak Jewova e w ap demontre bonte anvè frè w la paske ansyen yo ka ede l vin gen bon relasyon ak Jewova ankò. Y ap disipline l yon fason ki kalm e ak jantiyès. — Li Levitik 5:1; Galat 6:1.

15, 16. Poukisa Ouchayi te bezwen gen kouraj pou l ret fidèl ak Bondye?

¹⁵ Ouchayi se te youn nan zanmi fidèl wa David yo. Lè kèk moun te vle fè Absalon vin wa, Ouchayi te bezwen gen kouraj pou l te ka ret fidèl ni ak David ni ak Bondye. Li te konnen Absalon te vin Jerizalèm ak sòlda l yo epi David te kouri kite vil la (2 Samyèl 15:13; 16:15). Men, ki sa Ouchayi te fè? Èske l te abandone  David epi l pran pou Absalon? Non. Aktout David te fin granmoun e anpil moun te vle touye l, Ouchayi te ret fidèl ak David paske l te konnen se Jewova ki te chwazi David kòm wa. Konsa, Ouchayi t al rankontre David sou Mòn Oliv. — 2 Samyèl 15:30, 32.

¹⁶ David te mande Ouchayi pou l retounen Jerizalèm e pou l pran pòz li se zanmi Absalon yon fason pou l konvenk Absalon pou l fè l koute konsèy li yo olye l koute konsèy Ayitofèl yo. Se konsa Ouchayi te met kouraj sou li e l te riske lavi l pou l obeyi David e pou l ret fidèl ak Jewova. David te priye Jewova pou l ede Ouchayi e Jewova te ede Ouchayi. Absalon te koute Ouchayi e l pa t koute Ayitofèl. — 2 Samyèl 15:31; 17:14.

17. Poukisa nou bezwen gen kouraj pou n ret fidèl?

¹⁷ Nou bezwen gen kouraj pou n ret fidèl ak Jewova e pou n obeyi l olye n fè sa fanmi nou, kòlèg travay nou oswa otorite nan gouvènman yo vle n fè. Pa egzanp, depi lè Taro, k ap viv nan peyi Japon, te toupiti, li te fè tout sa l kapab pou l fè paran l plezi. Li te obeyi yo e l te fidèl ak yo. Li pa t fè sa sèlman paske l te dwe fè sa, men l te fè sa paske l te renmen yo. Sepandan, lè l te kòmanse etidye Labib ak Temwen Jewova yo, paran l yo te vle l kanpe etid la. Sa te fè l tris anpil e sa te difisil anpil pou l di yo li pran desizyon al nan reyinyon yo. Men sa Taro fè konnen: “Yo te tèlman vin fache kont mwen, pandan anpil ane, yo te di m pinga m vin lakay yo. M te priye Jewova pou l ban m kouraj pou m respekte desizyon m te pran an. Kounye a, yo pa reyaji menm jan an ankò e m ka vizite yo regilyèman.” — Li Pwovèb 29:25.

18. Ki fason etid sa a te ede w?

¹⁸ Menm jan ak David, Jonatan, Natan ak Ouchayi, nou swete pou nou menm tou nou jwenn lajwa yon moun jwenn lè l ret fidèl ak Jewova. Pinga nou janm vin menm jan ak Abnè ak Absalon ki pa t fidèl! Se vre nou enpafè e n konn fè erè, men, ann montre Jewova fidelite n anvè l se bagay ki pi enpòtan nan lavi nou.