1, 2. Nan ki sitiyasyon difisil Jefte ak pitit fi l la te vin twouve yo?

GEN yon jèn fi k ap kouri al rankontre papa l e ki kontan anpil lè l wè papa l retounen sot nan yon batay sennesof. Kokenn viktwa papa l te genyen an te fè jèn fi a pran chante e l t ap danse tèlman l kontan. Men, reyaksyon papa l te genyen ak sa l te di nan moman an dwe te fè jèn fi a sezi anpil. Papa l te dechire rad sou li e l te pran rele byen fò, li di: “O non, pitit fi m nan! Kè m ap dechire.” Apre sa, papa a te fè jèn fi a konnen li te fè Jewova yon pwomès ki t apral chanje lavi jèn fi a pou toutan. Selon pwomès sa a, jèn fi a pa t ap janm ka marye ni gen okenn pitit. Sepandan, jèn fi a te bay yon bèl repons menm kote a e l te ankouraje papa l kenbe pwomès li fè Jewova a. Repons jèn fi a te bay la montre li gen konfyans kèlkeswa sa Jewova mande l fè a se ap yon bon bagay (Jij 11:34-37). Lè papa jèn fi a wè jan l gen lafwa, li santi l fyè de pitit fi l la paske l te konnen  bon dispozisyon jèn fi a demontre a t ap fè kè Jewova kontan.

² Jefte ak pitit fi l la te gen bonjan konfyans nan Jewova ak nan fason Jewova fè bagay yo. Yo te rete fidèl menm lè sa pa t tèlman fasil pou yo. Yo te vle jwenn favè Jewova kèlkeswa sakrifis sa te mande.

3. Ki sa k fè egzanp Jefte ak pitit fi l la ka ede n jodi a?

³ Li pa toujou fasil pou yon moun ret fidèl ak Jewova. Nou bezwen “mennen yon gwo lit pou lafwa” nou (Jid 3). Pou ede n fè sa, ann aprann kòman Jefte ak pitit fi l la te rive fè fas ak difikilte yo te jwenn nan lavi yo. Ki jan yo te fè ret fidèl ak Jewova?

4, 5. a) Ki lòd Jewova te bay Izrayelit yo lè yo te antre nan peyi li te pwomèt yo a? b) Jan sa parèt nan Sòm 106 la, ki sa k te rive lefètke Izrayelit yo te dezobeyi Jewova?

⁴ Chak jou, Jefte ak pitit fi l la dwe te konn reflechi ak sa k te rive Izrayelit yo lefètke yo te dezobeyi Jewova. Prèske 300 an anvan sa, Jewova te bay Izrayelit yo lòd pou yo touye tout moun ki t ap adore fo dye nan peyi li te pwomèt yo a, men, yo pa t obeyi (Detewonòm 7:1-4). Gen anpil Izrayelit ki te kòmanse imite Kananeyen yo ki t ap adore fo dye e ki t ap mennen yon vi imoral. — Li Sòm 106:34-39.

⁵ Piske Izrayelit yo te dezobeyi, Jewova pa t pwoteje yo kont ènmi yo (Jij 2:1-3, 11-15; Sòm 106:40-43). Sa dwe te difisil anpil pou fanmi ki te renmen Jewova yo ret fidèl pandan ane difisil sa yo. Sepandan, Bib la pale de kèk moun fidèl tankou Jefte ak pitit fi l la ansanm ak Èlkana, Ana ak Samyèl. Moun sa yo te detèmine pou yo fè kè Jewova kontan. — 1 Samyèl 1:20-28; 2:26.

6. Ki sa k enfliyanse moun yo nan monn nan jodi a, e ki sa n dwe fè?

⁶ Nan epòk nou an, moun yo reyaji e yo panse menm jan ak moun Kanaran yo. Lavi yo chita sou sèks, vyolans ak lajan. Sepandan, Jewova ban nou bonjan avètisman. Li vle pwoteje n kont move enfliyans menm jan l te vle fè sa pou Izrayelit yo. Èske n ap aprann yon leson nan erè yo te fè yo (1 Korentyen 10:6-11)? Nou dwe fè tout sa n kapab pou n evite panse menm jan ak moun nan monn nan (Women 12:2). Èske n ap eseye fè tout sa n kapab pou sa?

7. a) Ki sa pwòp pèp Jefte a te fè l? b) Ki jan Jefte te reyaji?

⁷ Nan epòk Jefte a, etandone Izrayelit yo te dezobeyi Jewova, desandan Amon yo ak moun Filisti yo t ap toupizi yo (Jij 10:7, 8). Anplis ènmi nasyon an te genyen yo, Jefte te jwenn pwoblèm nan men pwòp frè l ansanm ak moun ki te chèf ann Izrayèl yo. Piske frè l yo te jalou sò l e yo te rayi l, yo te fòse l kite yon tè nòmalman ki te pou li dapre lalwa (Jij 11:1-3). Jefte pa t kite move fason  yo te aji avè l la gen efè sou fason l te wè bagay yo. Ki jan n fè konn sa? Se paske lè ansyen ann Izrayèl yo te sipliye l pou l ede yo, li te fè sa menm kote a (Jij 11:4-11). Ki sa petèt ki te pouse Jefte aji fason l te aji a?

8, 9. a) Ki prensip nou jwenn nan Lwa Jewova te bay pa mwayen Moyiz la ki te ede Jefte? b) Ki sa k te pi enpòtan pou Jefte?

⁸ Jefte te yon sòlda vanyan e l te byen konn istwa pèp Izrayèl la ak Lalwa Bondye te bay pa mwayen Moyiz la. Fason Jewova te boule ak pèp li a te fè Jefte vin konn prensip Bondye anrapò ak sa ki byen ak sa ki mal (Jij 11:12-27). Jefte te sèvi ak konesans sa a lè l t ap pran desizyon nan lavi l. Li te byen konn ki jan Jewova konsidere yon moun ki an kòlè e k ap tire revanj, e l te konn jan Bondye vle pou moun nan pèp li a renmen youn lòt. Anplis de sa, Lalwa te anseye l kòman pou l boule ak lòt moun, menm moun ki rayi l yo. — Li Egzòd 23:5; Levitik 19:17, 18.

⁹ Petèt, egzanp Jozèf te ede Jefte. Jefte dwe te aprann kòman Jozèf te demontre mizèrikòd anvè frè l yo menm lè yo te rayi l (Jenèz 37:4; 45:4, 5). Sandout, lè Jefte te reflechi ak egzanp sa a, sa te ede l aji yon fason ki fè Jewova plezi. Sa frè l yo te fè a te vrèman blese santiman l. Men, se pa t santiman Jefte yo ki te pi enpòtan pou li, sa k te pi enpòtan pou li a se te goumen pou non Jewova e pou pèp Jewova a (Jij 11:9). Li te detèmine pou l ret fidèl ak Jewova. Fason l te aji a te fè ni li menm ni Izrayelit yo jwenn favè Jewova. — Ebre 11:32, 33.

10. Ki jan n kapab kite prensip Bondye yo ede n aji antanke kretyen jodi a?

¹⁰ Ki leson nou aprann nan egzanp Jefte a? Ki sa n ap fè si frè nou yo fè n yon bagay ki mal oswa si n santi yo pa byen aji avè n? Menmsi yo blese santiman nou, nou pa dwe kite sa anpeche n sèvi Jewova. Pa janm sispann al nan reyinyon oswa pase tan ak moun nan kongregasyon an. Ann imite Jefte lè n obeyi Jewova. Sa ap ede n fè fas ak sitiyasyon difisil yo yon fason pou nou menm tou nou ka vin yon bon egzanp. — Women 12:20, 21; Kolosyen 3:13.

11, 12. Ki pwomès Jefte te fè, e ki sa sa te vle di?

¹¹ Jefte te konnen l bezwen èd Bondye pou l te ka libere pèp Izrayèl la anba men desandan Amon yo. Li te pwomèt Jewova si l fè l genyen batay la, l ap ba l premye moun lakay li ki kouri vin rankontre l pandan l ap retounen sot nan batay la kòm “sakrifis yo boule nèt”. (Jij 11:30, 31). Ki sa sa te vle di?

 ¹² Jewova rayi lè moun boule moun kòm sakrifis. Donk, nou sèten Jefte pa t apral fè yon sakrifis konsa (Detewonòm 18:9, 10). Selon Lwa Bondye te bay pa mwayen Moyiz la, yon sakrifis yo boule nèt se te yon kado espesyal yon moun te bay Jewova nèt. Konsa, Jefte te vle fè di moun li t apral bay Jewova a t ap gen pou l sèvi Jewova nan tabènak la pandan tout rès vi l. Jewova te tande priyè Jefte a e l te ede l gen yon gwo viktwa (Jij 11:32, 33). Men, ki moun Jefte t apral bay Jewova?

13, 14. Ki sa pawòl Jefte te di nou jwenn nan Jij 11:35 yo aprann nou konsènan lafwa li?

¹³ Fè yon ti reflechi ak sèn nou te pale de li nan kòmansman atik sa a. Lè Jefte te retounen sot nan batay la, premye moun ki te vin rankontre l se te pitit fi li renmen anpil la, sèl pitit li genyen an! Èske Jefte t ap kenbe pwomès li te fè a? Èske l t apral bay Jewova pitit fi l la pou l sèvi Jewova nan tabènak la pandan tout rès vi l?

¹⁴ Yon lòt fwa ankò, prensip ki gen nan Lwa Bondye te bay la dwe te ede Jefte pran yon bon desizyon. Petèt li te sonje pawòl nou jwenn nan Egzòd 23:19 yo ki mande pèp Bondye a pou yo dispoze bay Jewova sa yo genyen ki pi bon an. Anplis de sa, Lwa Bondye a te fè konnen lè yon moun fè yon ve bay Jewova, “li dwe kenbe pawòl li. Li dwe fè tout sa l te di nan ve li fè a”. (Nonb 30:2.) Menm jan ak Ana, yon dam fidèl petèt ki t ap viv nan menm epòk la, Jefte te kenbe pwomès li te fè a aktout li te konn tout sa sa te vle di pou pitit fi l la ak li menm. Piske pitit fi l la t apral sèvi nan tabènak la, li pa t ap janm ka fè pitit. Konsa, Jefte pa t ap gen pèsonn ki pou pote non l e ki pou eritye tè l  te genyen an (Jij 11:34). Malgre sa, avèk fidelite, Jefte te di: “Mwen fè Jewova yon ve e mwen pa kapab fè bak.” (Jij 11:35). Jewova te aksepte kokenn sakrifis sa a Jefte te fè a e l te beni Jefte. Èske w ap montre w fidèl menm jan ak Jefte?

15. Ki pwomès anpil nan nou te fè, e ki jan n ka montre nou fidèl?

¹⁵ Lè n vwe lavi nou bay Jewova, se pwomèt nou pwomèt pou n fè kèlkeswa sa l mande n fè a. Nou te konnen l pa t ap fasil ditou pou n kenbe pwomès sa a. Men, ki jan nou reyaji lè yo mande n fè yon bagay nou pa renmen? Si n domine santiman nou epi n obeyi Bondye san fòse, n ap montre nou kenbe pwomès nou. Sakrifis nou fè yo ka fè n mal anpil, men, benediksyon Jewova bay yo toujou pi bon lontan (Malachi 3:10). Ki sa n ka di konsènan pitit fi Jefte a? Ki jan l te reyaji lè l te tande pwomès papa l te fè a?

16. Ki jan pitit fi Jefte a te reyaji lè l te tande pwomès papa l te fè a? (Gade foto ki nan kòmansman atik la.)

¹⁶ Pwomès Jefte te fè a te diferan ak pwomès Ana te fè a. Ana te bay Jewova Samyèl, pitit gason l lan, pou l sèvi nan tabènak la antanke Nazireyen (1 Samyèl 1:11). Yon Nazireyen te ka marye e l te ka gen pitit. Sepandan, Jefte te bay Jewova pitit fi l la kòm yon “sakrifis yo boule nèt”, sa vle di li pa t ap janm ka goute plezi ki genyen lè yon moun se yon madan marye ak lè l se yon manman (Jij 11:37-40). Fè yon ti reflechi ak sa! Petèt li t ap ka marye ak pi bon gason ki te gen nan peyi a paske papa l te chèf ann Izrayèl. Men, kounye a, l ap vin yon senp moun k ap sèvi nan tabènak la. Ki jan jèn fi sa a te reyaji? Li te pwomèt papa l l ap bay sèvis Jewova a premye plas nan lavi l. Men sa l te di l: “Se pou w fè m sa w te di ou t ap fè m nan.” (Jij 11:36). Li te sakrifye dezi natirèl li gen lakay li pou l gen yon mari e pou l fè pitit la pou l ka sèvi Jewova. Ki  jan n ka imite lespri sakrifis li te genyen an?

17. a) Ki jan n ka imite lafwa Jefte ak pitit fi l la te genyen an? b) Ki jan pawòl nou jwenn nan Ebre 6:10-12 yo ankouraje n fè sakrifis?

¹⁷ Gen plizyè milye jèn kretyen, gason kou fi, ki deside pa marye oswa ki chwazi pa fè pitit omwen pou kounye a. Pou ki rezon? Se paske yo vle ret konsantre plis sou sèvis y ap bay Jewova a. Anplis de sa, gen anpil moun aje ki sakrifye tan yo te konn pase ak pitit yo oswa pitit pitit yo pou yo bay Jewova tan sa a ak enèji sa a. Gen kèk nan yo ki travay nan pwojè konstriksyon oswa ki asiste Lekòl pou evanjelizatè Wayòm nan e k al sèvi nan yon kongregasyon kote yo bezwen plis pwoklamatè. Gen lòt ki fè aranjman pou yo pase plis tan nan sèvis Jewova a pandan epòk Memoryal la. Jewova pap janm bliye tout sakrifis sa yo sèvitè fidèl li yo fè ak tout kè yo. (Li Ebre 6:10-12.) E ou menm? Èske w dispoze fè sakrifis pou w ka sèvi Jewova plis toujou?

18, 19. Ki sa n aprann nan istwa Bib la rakonte sou Jefte ak pitit fi l la, e ki jan nou ka imite yo?

¹⁸ Ki sa k te ede Jefte fè fas ak pwoblèm li te rankontre yo? Li te kite Jewova gide l nan desizyon l t ap pran nan lavi l. Li pa t kite fason moun ki bò kote l yo t ap aji gen enfliyans sou li. Epi, li te ret fidèl menm lè lòt moun t ap ba l pwoblèm. Jewova te beni Jefte ak pitit fi l la pou sakrifis yo te dispoze fè yo e l te sèvi avèk yo pou yo soutni vrè adorasyon an. Jefte ak pitit fi l la te ret fidèl ak Jewova menm lè lòt moun yo te sispann fè sa ki dwat.

¹⁹ Bib la mande pou n “imite moun ki eritye pwomès yo grasa lafwa ak pasyans yo te genyen”. (Ebre 6:12.) Kidonk, annou imite Jefte ak pitit fi l la piske n konnen lè n ret fidèl ak Jewova, l ap beni nou.