1. Esplike nan ki sikonstans Jezi te fè premye mirak li.

 IMAJINE kòman sa te ye nan fen ane 29 epòk nou an lè Jezi te fèk kòmanse sèvis li. Yo te envite Jezi ak manman l, Mari, ansanm ak kèk nan disip li yo nan yon resepsyon maryaj ki t ap fèt nan Kana, yon bouk ki nan nò Nazarèt, vil kote Jezi te leve a. Mari se te zanmi fanmi an, e sanble li t ap ede yo resevwa envite yo. Men, pandan resepsyon an, te vin gen yon pwoblèm ki te kapab fè fanmi an ak jèn marye yo jennen anpil. Diven an te fini b. Petèt, te gen plis moun pase sa yo te atann. Tousuit, Mari te di pitit gason l lan: “Yo pa gen diven ankò.” (Jan 2:1-3). Ki sa Jezi te fè? Jezi te fè yon bagay estrawòdinè. Li te fè yon mirak kote l te fè dlo tounen “bon diven”. — Jan 2:9, 10.

2-3. a) Ki jan Jezi te itilize pouvwa l te genyen pou l fè mirak la? b) Ki byenfè n ap jwenn lè n egzamine mirak Jezi te fè yo?

² Jezi te fè anpil lòt mirak pandan sèvis li sou tè a c. Li te sèvi ak pouvwa l genyen pou l fè mirak pou l te ede plizyè dizèn milye moun. Pa egzanp, si nou annik pran de nan mirak li te fè yo, lè l te bay 5 000 gason manje e annapre li te bay 4 000 gason manje, te ka gen plis pase 27 000 moun si n ta ajoute fi ak timoun ki te la tou (Mat. 14:15-21; 15: 32-38). Nan toule de okazyon sa yo, Jezi te geri anpil moun ki te malad tou (Mat. 14:14; 15:30, 31). Imajine jan moun yo nan foul la dwe te kontan lefètke Jezi te fè mirak pou l te geri yo e pou l te ba yo manje!

³ Mirak Jezi te fè yo gen anpil enpòtans pou nou jodi a. Nan atik sa a, nou pral wè kèk leson k ap ranfòse lafwa nou nou ka aprann nan yo. Apre sa, nou pral wè ki jan n ka imite fason Jezi te demontre imilite ak konpasyon lè l t ap fè mirak.

4. Sou kiyès mirak Jezi te fè yo aprann nou yon seri leson ki kapab ranfòse lafwa nou?

⁴ Mirak Jezi te fè yo aprann nou yon seri leson ki ka ranfòse lafwa nou nonsèlman nan li, men tou, nan Papa l. Dayè, se grasa Jewova mirak yo te fèt. Travay 10:38 fè n konnen: “Bondye [te] chwazi l [Jezi] antanke Kris ak lespri sen ak pisans, [e] li te mache nan tout peyi a, li t ap fè sa ki byen e li t ap geri tout moun Dyab la t ap toupizi, paske Bondye te avè l.” Epitou, sonje nan tout sa Jezi te di ak nan tout sa l te fè, san wete mirak li te fè yo, li te montre li panse egzakteman menm jan ak Papa l e li gen menm santiman avè l (Jan 14:9). Ann wè twa leson nou ka aprann nan mirak Jezi te fè yo.

5. Ki sa k te pouse Jezi fè mirak? (Matye 20:30-34).

⁵ Premyèman, Jezi ak Papa l renmen nou anpil. Lè Jezi te sou tè a, li te montre jis nan ki pwen li renmen moun lè l te sèvi ak pouvwa l genyen pou l fè mirak pou l te ka soulaje soufrans yo. Yon lè, gen de mesye ki avèg ki te sipliye l pou l ede yo. (Li Matye 20:30-34.) Remake se apre Jezi te fin “pran pitye” pou yo, li te geri yo. Vèb grèk yo itilize la a, lè yo tradui l yo mete “pran pitye” pou li a, fè referans ak anpil konpasyon yon moun genyen ki sot nan zantray li. Kalite konpasyon sa a, ki se yon fason Jezi te montre li renmen moun te pouse l tou pou l bay moun ki te grangou manje e pou l te geri yon mesye ki te gen lèp (Mat. 15:32; Mak 1:41). Nou mèt gen konfyans Jewova, Bondye ki gen “kè sansib” la, ak Pitit Gason l lan renmen nou anpil e sa fè yo mal lè yo wè n ap soufri (Lik 1:78; 1 Pyè 5:7). Se pa ti anvi yo dwe anvi elimine tout pwoblèm k ap boulvèse lèzòm!

6. Ki pouvwa Bondye bay Jezi?

⁶ Dezyèmman, Bondye bay Jezi pouvwa pou l rezoud tout pwoblèm lèzòm genyen. Mirak Jezi te konn fè yo montre li gen pouvwa pou l rezoud tout pwoblèm nou pa t ap janm ka rezoud poukont nou yo. Li gen pouvwa pou l retire rasin pwoblèm lèzòm yo, anpalan de peche ak tout sa peche lakòz, pa egzanp maladi ak lanmò (Mat. 9:1-6; Wom. 5:12, 18, 19). Mirak Jezi te fè yo montre li kapab geri “tout kalite” maladi e li kapab menm resisite moun ki mouri (Mat. 4:23; Jan 11:43, 44). Epitou, li gen pouvwa pou l metrize gwo van tanpèt e pou l libere moun anba movèzespri (Mak 4:37-39; Lik 8:2). Sa vrèman ankouraje n lefètke n konnen Jewova bay Pitit Gason l lan tout pouvwa sa a!

7-8. a) Ki asirans mirak Jezi te konn fè yo ban nou? b) Ki mirak ou ta renmen wè nan monn nouvo ki gen pou vini an?

⁷ Twazyèmman, nou kapab gen bonjan asirans n ap jwenn benediksyon Wayòm Bondye a pral pote. Mirak Jezi te fè lè l te sou tè a montre n sa l pral fè sou tout tè a antanke Wa nan Wayòm Bondye a ki nan  syèl la. Ann wè sa n pral benefisye talè konsa lè Kris pral dirije tè a. Nou pap janm malad, paske li pral elimine tout kalite maladi ak tout kalite enfimite lèzòm genyen (Eza. 33:24; 35:5, 6; Rev. 21:3, 4). Nou pap janm grangou e nou pap janm viktim anba katastwòf natirèl (Eza. 25:6; Mak 4:41). Se pa ti kontan nou pral kontan akeyi moun pa nou yo ki pral sot nan “tonm yo”! (Jan 5:28, 29.) Ki mirak ou ta plis renmen wè nan monn nouvo ki gen pou vini an?

⁸ Lè Jezi t ap fè mirak, li te montre l gen anpil imilite ak konpasyon, yon seri kalite l ap bon pou n imite. Ann pran de egzanp. N ap kòmanse ak istwa resepsyon maryaj ki te fèt Kana a.

9. Poukisa Jezi te fè yon mirak nan resepsyon maryaj la? (Jan 2:6-10).

⁹ Li Jan 2:6-10. Èske Jezi te oblije fè yon bagay lè diven an te fini nan resepsyon maryaj la? Non. Pa t gen okenn pwofesi ki te anonse Mesi a t apral fè mirak pou l fè diven. Men, ki jan w t ap santi w si nan pwòp resepsyon maryaj ou ta vin pa gen anyen pou moun bwè? Se sèten Jezi te santi kè l fè l mal pou fanmi an, sitou lemarye ak lamarye, e li pa t vle yo wont. Donk, jan nou te di sa nan kòmansman atik la, li te fè yon mirak. Li te fè dlo (anviwon 103 galon) tounen pi bon diven an. Petèt li te bay tout kantite diven  sa a pou yo te ka itilize sa k rete a annapre oubyen pou mesyedam ki te fèk marye yo te ka menm vann li pou yo jwenn kòb pou yo depanse. De moun ki te fèk marye yo dwe te santi yo soulaje anpil!

10. Bay kèk enfòmasyon enpòtan nan istwa ki nan Jan chapit 2 a. (Gade foto a tou.)

¹⁰ Ann wè kèk detay enpòtan nan istwa ki nan Jan chapit 2 a. Èske w te remake se pa t Jezi ki te plen ja an wòch yo ak dlo? Olye l te atire atansyon sou tèt li, li te mande moun ki t ap sèvi yo pou yo plen ja yo dlo (vèsè 6, 7). E apre Jezi te fin fè dlo a tounen diven, se pa li menm pèsonèlman ki te pot diven bay moun ki t ap dirije resepsyon an. Se moun ki t ap sèvi yo li te mande fè sa (vèsè 8). Se sèten Jezi pa t pran yon koup diven, li leve l devan envite yo, epi pou l t ap vante tèt li pandan l ap di: ‘Goute nan diven mwen fèk sot fè la a!’

11. Ki sa n ka aprann nan mirak Jezi te fè a?

¹¹ Ki sa nou ka aprann nan mirak Jezi te fè lè l te fè dlo tounen diven an? Nou aprann jan l enpòtan pou n gen imilite. Jezi pa t vante tèt li pou mirak li te fè a. An reyalite, li pa t janm vante tèt li pou kèlkeswa sa l te fè. Okontrè, avèk imilite, li te toujou bay Papa l tout glwa a e li te toujou fè konnen se grasa Papa l li te rive fè tout sa l fè yo (Jan 5:19, 30; 8:28). Si n imite Jezi lè n fè efò pou n pa pran tèt nou pou yon pakèt afè, nou pap vante tèt nou pou sa n rive fè. Kèlkeswa sa n ta fè nan sèvis Jewova a, ann pa vante tèt nou pou sa, men pito, ann vante tèt nou dèske nou gen privilèj pou n sèvi yon Bondye ki estrawòdinè (Jer. 9:23, 24). Ann ba l onè li merite a. Dayè, nou pa t ap janm ka rive fè anyen ki bon si Jewova pa t ede nou. — 1 Kor. 1:26-31.

12. Bay yon lòt fason nou ka imite imilite Jezi te genyen. Bay yon egzanp.

¹² Ann wè yon lòt fason nou kapab imite imilite Jezi te genyen. Imajine sitiyasyon sa a: Yon ansyen pase anpil tan ap ede yon jèn sèvitè ministeryèl prepare premye diskou piblik li. Grasa èd ansyen an, jèn frè a rive bay yon bon diskou e kongregasyon an te kontan. Apre reyinyon an, gen yon moun ki vin kot ansyen an e ki di: ‘Frè Entèl te bay yon bèl diskou, pa vre?’ Èske ansyen an bezwen di: ‘Se vre, men m te fè anpil tan ap ede l’? Oubyen, èske avèk imilite li ta kapab di: ‘Wi, se vre. Li te vrèman byen fè l? Lè n gen imilite, nou pa chèche fè moun konnen bon bagay nou fè pou lòt moun. Nou kontan paske n konnen Jewova wè sa n fè a e li bay sa anpil enpòtans. (Konpare ak Matye 6:2-4; Ebre 13:16.) Pa gen dout, nou fè kè Jewova kontan lè n imite Jezi nan fason n montre n gen imilite. — 1 Pyè 5:6.

13. Ki sa Jezi wè toupre vil Nayin, e ki sa l fè? (Lik 7:11-15).

¹³ Li Lik 7:11-15. Imajine sèn ki vin annapre a ki te pase anviwon ennan edmi apre Jezi te kòmanse sèvis li sou tè a. Jezi te vwayaje al Nayin, yon vil nan Galile ki pa lwen Chounèm, kote pwofèt Elize te resisite pitit gason yon dam anviwon 900 an anvan sa (2 Wa 4:32-37). Pandan Jezi ap pwoche bò pòtay vil la, li wè moun k ap sot nan vil la ak yon kadav pou y al antere. Sitiyasyon an vrèman tris, paske se te sèl pitit gason yon vèv te genyen. Men manman sa a ki nan lapenn pa poukont li. Gen yon gwo foul moun ki sot nan vil la ki ansanm avè l. Jezi fè  moun yo kanpe e li fè yon bagay vrèman estrawòdinè pou manman sa a ki nan lapenn: li resisite pitit gason l lan! Se premye nan twa rezirèksyon Evanjil yo fè konnen Jezi te fè.

14. Bay kèk enfòmasyon enpòtan nou jwenn nan istwa ki nan Lik chapit 7 la. (Gade foto a tou.)

¹⁴ Remake kèk enfòmasyon enpòtan nou jwenn nan Lik chapit 7. Èske w remake se apre Jezi fin “wè” manman an nan lapenn “kè l fè l mal pou li”? (Vèsè 13.) Petèt Jezi te wè l k ap kriye toutpandan l ap mache devan kadav pitit gason l lan, e sa te fè l gen pitye pou li. Jezi pa t jis santi li gen pitye pou manman an, li te montre li gen konpasyon pou li. Sandout, li te pale avè l yon fason ki te ba l kouraj lè l te di l: “Sispann kriye.” Annapre, li te fè yon bagay pou ede l. Li te rebay jèn gason an lavi epi l te “remèt manman l li”. — Vèsè 14, 15.

15. Ki sa nou ka aprann nan mirak Jezi te fè a?

¹⁵ Ki sa nou ka aprann nan mirak Jezi te fè pou l te resisite pitit gason vèv la? Nou aprann nou bezwen montre nou gen konpasyon pou moun ki nan lapenn. Se vre, nou pa ka resisite moun ki mouri, jan Jezi te fè sa. Sepandan, menm jan ak Jezi, nou kapab montre n gen konpasyon pou moun ki nan lapenn akoz moun pa yo ki mouri lè n chèche wè ki sa n ka fè pou n ede yo. Nou kapab pran devan nan demontre konpasyon lè n di moun sa yo pawòl k ap konsole yo e lè n fè sa n kapab pou n ede yo d (Pwo. 17:17; 2 Kor. 1:3, 4; 1 Pyè 3:8). Menm yon ti pawòl tou senp nou di oswa yon ti jès nou fè kapab vle di anpil bagay pou yo.

16. Jan sa parèt nan foto a ki repwodui yon bagay ki te rive toutbon, ki sa w ka aprann nan eksperyans yon manman ki te fèk pèdi pitit li?

¹⁶ Fè yon ti reflechi sou eksperyans ki vin annapre a. Sa gen kèk ane, pandan yo t ap chante yon kantik nan yon reyinyon, yon sè te remake yon lòt sè ki te toupre l  la ki t ap kriye. Kantik la te gen rapò ak rezirèksyon, e sa pa t gen lontan depi sè ki t ap kriye a te gen tipitit fi l ki mouri. Piske lòt sè a te konn sa, menm kote a, li t al kanpe toupre manman an, li te pase men l nan kou l e l te fin chante kantik la ansanm avè l. Men sa manman an te di annapre: “Mwen te santi m renmen frè ak sè yo anpil.” Li te vrèman kontan li t al nan reyinyon. Men sa l te di: “Se nan Sal Wayòm nan n ap jwenn èd.” Nou kapab gen asirans Jewova remake nenpòt ti bagay nou fè pou n montre nou gen konpasyon pou moun ki gen moun pa yo ki mouri ki gen “lespri yo kraze”, e li bay sa anpil valè. — Sòm 34:18.

17. Ki sa mirak Jezi te fè yo aprann nou?

¹⁷ Lè n egzamine istwa nan Evanjil yo ki gen rapò ak mirak Jezi te fè yo, sa kapab ankouraje n. Yo aprann nou Jewova ak Jezi renmen nou anpil, Jezi gen pouvwa pou l rezoud tout pwoblèm lèzòm, e nou kapab kwè ak tout kè n bèl pwomès Bondye fè konsènan lavni yo ap reyalize talè konsa lè Wayòm Bondye a pral dirije tè a. Lè n ap egzamine istwa sa yo, nou kapab medite sou fason nou ka imite kalite Jezi genyen yo. Sa w panse lè w ap fè etid pèsonèl ou oswa lè w ap fè adorasyon an fanmi si w ta egzamine lòt mirak Jezi te fè? Gade pou w wè ki leson w ka aprann, epi pataje sa w aprann yo ak lòt moun. Lè w fè sa, w ap ka gen bèl konvèsasyon ak lòt moun! — Wom. 1:11, 12.

18. Sou ki sa nou pral pale nan atik ki vin apre a?

¹⁸ Lè sèvis Jezi sou tè a te prèske rive nan bout li, li te fè twazyèm rezirèksyon l, e se te dènye a, jan Bib la montre sa. Men, rezirèksyon sa a pa t menm ak lòt yo paske li te resisite yon bon zanmi l ki te gentan gen kat jou depi l mouri. Ki sa nou kapab aprann nan Evanjil yo sou mirak sa a? E ki jan sa ka fè n gen plis lafwa nan esperans rezirèksyon an? N ap jwenn repons kesyon sa yo nan atik ki vin apre a.