1. Ki jan kèk frè ak sè santi yo lè pou yo pale ak lòt moun nan travay predikasyon an? (Gade foto a tou.)

 ANTANKE pèp Jewova, nou preche lòt moun paske nou renmen Papa nou ki nan syèl la e nou vle ede yo vin konnen l. Anpil pwoklamatè vrèman renmen travay predikasyon an, men gen lòt ki twouve l difisil pou yo pran plezi ladan l. Sa k fè sa? Gen nan yo ki ka timid anpil oswa ki ka santi yo manke konfyans nan tèt yo. Genyen ki santi yo pa alèz pou y al lakay moun san yo pa envite yo. Genyen ki ka pè pou moun pa fè yo malonèt. Gen nan yo paran yo te aprann yo pou yo evite fè diskisyon ak moun. Byenke frè ak sè sa yo renmen Jewova anpil, yo twouve l difisil pou yo pataje bon nouvèl la ak moun yo pa konnen. Sepandan, yo rann yo kont jan travay sa a enpòtan e yo patisipe ladan l regilyèman. Se pa ti kontan Jewova dwe kontan!

2. Poukisa w pa ta dwe dekouraje si l pa fasil pou w gen kè kontan nan travay fè disip la?

² Èske pafwa w konn gen santiman sa yo e sa fè l difisil pou w gen kè kontan nan travay fè disip la? Si w konn santi w konsa, pa dekouraje. Santiman sa yo ka montre w gen imilite, ou pa vle atire atansyon sou tèt ou e w pa ta renmen nan diskisyon ak moun. E pa gen moun ki ta renmen yo fè yo malonèt, sitou si se byen y ap chèche fè pou lòt moun. Papa w ki nan syèl la byen konnen difikilte w jwenn e li vle ede w (Eza. 41:13). Nan atik sa a, nou pral egzamine senk konsèy k ap ede n konn sa pou n fè lè n  gen santiman sa yo ak fason pou n gen kè kontan nan travay fè disip la.

KITE PAWÒL BONDYE A BA W FÒS

3. Ki sa k te ede pwofèt Jeremi pou l te preche lòt moun?

³ Depi nan tan lontan, sèvitè Bondye yo te jwenn fòs nan pawòl Bondye lè yo te gen yon travay ki difisil pou yo fè. Ann pran egzanp pwofèt Jeremi. Li te yon ti jan renka lè Jewova te voye l al preche. Men sa Jeremi te di: “Mwen pa yon moun ki konn pale, paske, se yon timoun mwen ye.” (Jer. 1:6). Ki sa k te ede Jeremi jwenn kouraj pou l preche? Li te jwenn fòs nan pawòl Bondye. Men sa l di: “Li te tankou yon dife ki fèmen nan zo m. Mwen te bouke kenbe l.” (Jer. 20:​8, 9). Malgre Jeremi te gen yon tèritwa ki difisil, mesaj Jewova te ba l preche a te ba l fòs li te bezwen pou l fè travay la.

4. Lè nou li Pawòl Bondye a e nou medite sou sa nou li a, ki rezilta n ap jwenn? (Kolosyen 1:​9, 10).

⁴ Kretyen yo jwenn fòs nan mesaj ki nan Pawòl Bondye a. Nan lèt apot Pòl te ekri kongregasyon nan vil Kolòs la, li te di lè frè ak sè yo chèche gen konesans egzak sa t ap ede yo pou yo “mache yon fason ki diy devan Jewova” toutpandan y ap “kontinye pote fwi nan tout bon travay [y] ap fè”. (Li Kolosyen 1:​9, 10.) Bon travay sa a gen ladan l preche bon nouvèl la. Donk, lè nou li Pawòl Bondye a e nou medite sou sa nou li yo, nou vin gen plis lafwa nan Jewova, e nou vin pi byen konprann jan l enpòtan pou n pataje mesaj Wayòm nan ak lòt moun.

5. Ki jan nou ka pi byen pwofite lekti ak etid n ap fè nan Bib la?

⁵ Pou n pi byen pwofite Pawòl Bondye a, nou pa dwe prese lè n ap li l, lè n ap etidye l e lè n ap medite sou li. Pran san w. Si w tonbe sou yon vèsè ou pa ka fin byen konprann, pa jis pase sou li. Okontrè, sèvi ak Index des publications des Témoins de Jéhovah a oswa Gid pou Temwen Jewova yo fè rechèch la pou w jwenn esplikasyon sou vèsè a. Si w pran tan w pou etidye, w ap vin gen plis konfyans Pawòl Bondye a se laverite (1 Tes. 5:21). Plis ou gen konviksyon Pawòl Bondye a se laverite, se plis w ap pran plezi pataje sa w aprann yo ak lòt moun.

 BYEN PREPARE POU TRAVAY FÈ DISIP LA

6. Poukisa nou bezwen byen prepare pou travay fè disip la?

⁶ Si w byen prepare pou travay fè disip la, w ap santi w pi alèz lè w ap pale ak lòt moun. Jezi te ede disip li yo prepare anvan l te voye yo al preche (Lik 10:​1-11). Lefètke yo te aplike sa Jezi te anseye yo, yo te rive fè bon travay e sa te fè yo gen kè kontan. — Lik 10:17.

7. Ki jan nou ka prepare pou travay fè disip la? (Gade foto a tou.)

⁷ Ki jan nou ka prepare pou travay fè disip la? Nou bezwen reflechi sou fason nou ka byen esplike laverite nan pwòp mo pa nou. Li bon tou pou n panse ak de oswa twa fason moun nan tèritwa a konn reyaji epi reflechi sou sa n ap fè nan chak sitiyasyon. Konsa, lè n ap pale ak moun yo, nou ka fè efò pou nou rilaks, pou n souri e pou n amikal.

8. Nan ki sans kretyen yo sanble ak veso ki fèt an tè ki nan egzanp apot Pòl te bay la?

⁸ Apot Pòl te bay yon egzanp pou l montre wòl nou jwe nan travay predikasyon an. Men sa l te di: “Nou gen trezò sa a nan veso ki fèt an tè.” (2 Kor. 4:7). Ki sa trezò sa a ye? Se travay preche mesaj Wayòm nan, yon travay ki ka sove lavi moun (2 Kor. 4:1). Ki sa veso ki fèt an tè yo ye? Yo reprezante sèvitè Bondye yo k ap fè lòt moun konn bon nouvèl la. Nan epòk Pòl la, komèsan yo te konn sèvi ak ja ki fèt ak ajil pou yo transpòte bagay ki gen valè, tankou manje, diven ak lajan. Menm jan an tou, Jewova konfye nou mesaj bon nouvèl la ki gen anpil valè. Avèk èd Jewova, n ap jwenn fòs nou bezwen pou nou kontinye preche.

PRIYE POU W GEN KOURAJ

9. Ki sa k ka ede n pou n pa pè moun oswa pou nou pa pè moun fè nou malonèt? (Gade foto a tou.)

⁹ Pafwa, nou ka pè moun oswa nou ka pè pou moun pa fè nou malonèt. Ki sa nou ka fè nan moman sa yo? Ann sonje priyè apot yo te fè lè yo te ba yo lòd pou yo sispann preche. Yo pa t kite laperèz fè yo sispann preche. Okontrè, yo te mande Jewova ede yo “kontinye pale pawòl  [li] a ak anpil kran”. Jewova te reponn priyè yo a lapoula (Tra. 4:​18, 29, 31). Si pafwa nou pè moun, nou menm tou nou bezwen priye Jewova pou l ede nou. Mande Jewova ede w vin pi renmen moun pou w ka pa pè pataje bon nouvèl la avèk yo.

10. Ki jan Jewova ede nou fè travay nou antanke Temwen l? (Ezayi 43:​10-12).

¹⁰ Jewova chwazi nou kòm Temwen l, e li pwomèt l ap ede nou gen kouraj. (Li Ezayi 43:​10-12.) Ann wè kat nan fason li fè sa. Premyèman, Jezi ansanm avèk nou kèlkeswa lè n ap preche bon nouvèl la (Mat. 28:​18-20). Dezyèmman, Jewova mete zanj pou ede nou (Rev. 14:6). Twazyèmman, Jewova ban nou lespri sen kòm yon èd pou ede nou sonje bagay nou te aprann yo (Jan 14:​25, 26). Katriyèmman, Jewova ban nou frè ak sè pou akonpaye nou. Grasa èd Jewova e grasa èd frè ak sè nou yo ki renmen nou, nou gen tout sa nou bezwen pou nou gen kouraj e pou nou kontinye preche.

APRANN ADAPTE W, EPI RETE POZITIF

11. Ki jan w kapab jwenn plis moun nan travay predikasyon an? (Gade foto a tou.)

¹¹ Èske w konn santi w dekouraje lè w pa tèlman jwenn moun nan kay yo? Li ta bon pou w mande tèt ou: ‘Ki kote moun nan tèritwa m nan ye kounye a?’ (Tra. 16:13). ‘Èske y al travay oswa èske y al achte?’ Si se sa, èske w ta ka jwenn plis moun lè w bay temwayaj nan lari? Men sa yon frè ki rele Joshua di: “Mwen te jwenn posiblite pou m preche lè m t ap mache nan zòn ki gen biznis ak kote ki gen anpil aktivite.” Li menm ak Bridget, madanm li, te jwenn plis moun nan kay yo lè y al preche lè l pral aswè oswa dimanch aprèmidi. — Efe. 5:​15, 16.

12. Ki jan n ka rive konnen nan ki sa moun yo kwè oswa ki sa k ap trakase yo?

¹² Si moun yo pa twò enterese nan mesaj la, eseye chèche konnen nan ki sa yo kwè oswa ki sa k ap trakase yo. Joshua ak Bridget konn sèvi ak kesyon ki sou yon feyè lè y ap kòmanse pale ak moun yo. Pa egzanp, lè y ap sèvi ak feyè ki gen  tit Ki jan w konsidere Bib la?, men sa yo konn di: “Gen moun ki konsidere Bib la se Pawòl Bondye, men gen lòt moun ki pa fin kwè sa. E ou menm, sa w panse?” Souvan, sa konn pèmèt yo kòmanse yon konvèsasyon.

13. Menm lè moun yo pa koute nou, sa k fè nou kapab di nou reyisi nan travay fè disip la? (Pwovèb 27:11).

¹³ Se pa rezilta nou jwenn ki vle di nou reyisi nan travay fè disip la. Sa k fè nou di sa? Se paske nou rive fè sa Jewova ak Pitit li a vle nou fè a: nou bay yon temwayaj (Tra. 10:42). Menm lè nou pa jwenn pèsonn pou n pale oswa menm lè yo meprize mesaj nou an, nou gen kè kontan paske nou konnen nou fè Papa nou ki nan syèl la plezi. — Li Pwovèb 27:11.

14. Poukisa nou kapab kontan lè yon pwoklamatè jwenn yon moun ki enterese nan tèritwa a?

¹⁴ Nou kapab kontan tou lè yon pwoklamatè jwenn yon moun ki enterese nan tèritwa a. Toudegad te montre travay nou an sanble ak lè y ap chèche yon timoun ki pèdi. Gen anpil moun k ap chèche l, e yo chèche l tout kote. Lè yo jwenn timoun nan, se pa sèlman moun ki jwenn li an ki kontan, se tout moun ki kontan. Menm jan an tou, travay fè disip la se yon travay ki fèt ann ekip. Nou bezwen tout moun nan kongregasyon an pou preche tout tèritwa a, e nou tout kontan lè yon moun kòmanse asiste reyinyon yo.

TOUJOU SONJE SE LANMOU POU JEWOVA AK POU PWOCHEN N KI POUSE N PRECHE

15. Ki jan n ka vin pi chofe nan travay predikasyon an? (Matye 22:​37-39). (Gade foto a tou.)

¹⁵ Nou ka vin pi chofe pou n patisipe nan travay predikasyon an lè n toujou sonje se lanmou pou Jewova ak pou pwochen n ki pouse n preche. (Li Matye 22:​37-39.) Jis imajine jan Jewova kontan lè l wè n ap fè travay la ak jan moun yo pral kontan lè y ap kòmanse etidye Labib! Epitou, sonje moun ki koute mesaj n ap preche a e ki deside sèvi Jewova kapab sove. — Jan 6:40; 1 Tim. 4:16.

16. Ki jan nou ka jwenn kè kontan nan travay fè disip la lè nou oblije ret lakay nou? Bay kèk egzanp.

¹⁶ Èske gen kèk rezon ki fè w oblije rete  lakay ou? Si w nan sitiyasyon sa a, reflechi sou sa w kapab fè pou w montre lanmou pou Jewova ak pou pwochen w. Pandan pandemi COVID-19 la, Samuel ak Dania te oblije rete lakay yo. Nan moman difisil sa a, yo te preche nan telefòn regilyèman, yo te ekri lèt e yo te fè etid sou Zoom. Samuel te bay moun li te rankontre nan klinik kote l t ap fè tretman pou kansè a temwayaj. Men sa Samuel di: “Lè n ap pase move moman, nou ka santi nou enkyete, nou fatige e lafwa nou ka pase anba eprèv. Nou bezwen jwenn kè kontan nan sèvis n ap bay Jewova a.” Nan menm epòk sa a, Dania te tonbe e l te oblije fè twa mwa kouche. Apre sa, li te pase sis mwa nan chèz woulant. Men sa l di: “Mwen te eseye fè tout sa sitiyasyon m te pèmèt mwen fè. Mwen te rive preche yon enfimyè ki te konn vizite m, e m te konn pale ak moun ki te konn vin fè livrezon nan kay la. Mete sou sa, mwen te gen plizyè bèl konvèsasyon nan telefòn ak yon dam k ap travay pou yon konpayi ki vann ekipman medikal.” Akoz sitiyasyon Samuel ak Dania, yo pa t ka fè anpil bagay, men yo te fè sa yo te kapab e sa te fè yo gen kè kontan.

17. Ki jan w ka pi byen pwofite konsèy nou jwenn nan atik sa a?

¹⁷ Konsèy nou jwenn nan atik sa a ap bay pi bon rezilta lè nou aplike yo tout. Chak konsèy sa yo tankou youn nan bagay nou itilize lè n ap fè yon resèt. Lè w ap fè yon resèt e w mete tout sa w dwe mete ladan l, manje a soti gou. Menm jan an tou, lè n aplike tout konsèy sa yo, n ap ka pi byen jere santiman negatif nou genyen e n ap gen plis kè kontan nan travay fè disip la.