Èske w te byen li chak Toudegad ki te parèt ane sa a? Ebyen, gade pou w wè si w ka reponn kesyon ki vin apre yo:

Ki rekonpans n ap jwenn si n pran tan pou n pale ak Jewova, pou n koute l e pou n panse avè l?

N ap pran pi bon desizyon, n ap anseye pi byen, lafwa n ap pi djanm e n ap vin pi renmen Jewova. — w22.01, paj 30-31.

Si n aprann met konfyans nou nan Jewova ak nan moun ki reprezante l yo, ki jan sa ap ede n?

Kounye a se moman pou n aprann met konfyans nou nan fason Bondye aji lè n pa gen dout sou enstriksyon ansyen yo bay ak sou desizyon yo pran. Lè gwo tribilasyon an kòmanse, n ap pare pou n obeyi, menmsi nou ta resevwa enstriksyon ki parèt dwòl oswa ki sanble pa lojik. — w22.02, paj 4-6.

Ki sa zanj lan te vle fè konprann lè l t ap pale ak Zakari konsènan yon “filaplon [ki te] nan men [gouvènè] Zowobabèl”? (Zak. 4:8-10).

Vizyon sa a te bay pèp Bondye a asirans menmsi tanp yo t ap konstwi a te parèt byen senp, li t ap fin konstwi e l t ap jan Bondye te vle l la. — w22.03, paj 16-17.

Ki jan “pawòl” k ap sot nan bouch nou ka montre nou se “yon egzanp”? (1 Tim. 4:12).

Nou pale avèk jantiyès e avèk respè lè n ap preche, nou chante ak tout kè n e n fè kòmantè regilyèman nan reyinyon, epitou nou di laverite e n ankouraje lòt moun, nou pa joure moun. — w22.04, paj 6-9.

Poukisa bèt Revelasyon 13:1, 2 pale de li a gen karakteristik toule kat bèt (wayòm) Dànyèl chapit 7 pale de yo a?

Bèt Revelasyon 13 pale de li a pa reprezante yon sèl wayòm, pa egzanp Wòm. Okontrè, li reprezante tout pisans politik ki domine sou limanite. — w22.05, paj 9.

Ki youn nan pi bon fason pou n montre nou gen konfyans Bondye ap fè n jwenn jistis?

Si yon moun joure n, li mal aji avè n, oswa li peche kont nou, nou fè efò pou n pa fè kòlè e pou n pa kenbe rankin, nou kite bagay yo nan men Jewova. L ap elimine tout pwoblèm peche lakòz. — w22.06, paj 10-11.

Ki sa yon frè k ap priye nan yon reyinyon dwe sonje?

Pandan priyè a, li pa dwe pwofite moman sa a pou l bay moun nan kongregasyon an konsèy oswa pou l bay yon nouvèl. Li pa bezwen di “yon pakèt pawòl”, sitou nan kòmansman yon reyinyon (Mat. 6:7). — w22.07, paj 24-25.

Nan ki sans “moun ki te pratike sa ki mal ap resisite pou jijman”? (Jan 5:29).

Yo pap jwenn yon move santans selon sa yo te fè lè yo t ap viv anvan sa. Y ap egzamine atitid yo ak konduit yo apre yo fin resisite. — w22.09, paj 18.

Ki bèl ankourajman frè Rutherford te bay nan yon kongrè ki te fèt an septanm 1922?

Nan yon kongrè ki te fèt nan Cedar Point, Owayo, Ozetazini, li te di: “Wa a ap dirije! Se nou menm ki pou fè kanpay pou li. Se sa k fè nou dwe pwoklame, pwoklame, pwoklame Wa a ak Wayòm li an!” — w22.10, paj 3-5.

Ezayi chapit 30 bay twa fason Bondye ede n pou n andire. Ki fason sa yo?

Chapit sa a montre 1) li koute priyè n yo e l reponn yo, 2) li gide nou, e 3) li ban n benediksyon kounye a e l ap fè sa alavni. — w22.11, paj 9.

Poukisa nou ka di pawòl nou jwenn nan Sòm 37:10, 11, 29 yo te reyalize nan tan lontan e yo gen pou yo reyalize alavni?

Pawòl David te ekri yo montre aklè pakèt benediksyon ki te genyen ann Izrayèl, pa egzanp sou rèy Salomon. Jezi te pale konsènan yon paradi ki pral gen alavni e l te site vèsè 11 lan (Mat. 5:5; Lik 23:43). — w22.12, paj 8-10, 14.