Non, David pa t egzajere. Sa l te ekri yo se laverite.

Ann egzamine sa l te ekri nan vèsè sa a ak nan lòt vèsè menm jan an. Li te di: “M ap chante louwanj pou non w pou toutan e m ap respekte pwomès mwen fè w yo chak jou.” “M ap fè louwanj pou ou ak tout kè m, o Jewova, Bondye m nan, e m ap toujou bay non w glwa.” “M ap louwe non w pou tout tan gen tan.” — Sòm 61:8; 86:12; 145:1, 2.

Lè David te ekri pawòl sa yo, li pa t panse li pa t ap janm mouri. Li te konnen Jewova te di moun ap mouri paske yo peche. E David te rekonèt li se yon pechè (Jen. 3:3, 17-19; Sòm 51:4, 5). Li te konnen menm yon seri moun ki te fè Bondye plezi, tankou Abraram, Izarak ak Jakòb, te mouri. E David te konnen rive yon lè, li t ap mouri (Sòm 37:25; 39:4). Men, pawòl li te di nou jwenn nan Sòm 61:8 la montre jan l te anvi fè louwanj pou Bondye ak jan l te detèmine pou l fè sa pou toutan, sa vle di, toutotan li vivan. — 2 Sam. 7:12.

Kèk nan pawòl David te ekri yo te gen rapò ak pwòp eksperyans li te fè nan lavi l, jan nou ka wè sa nan ti nòt ki parèt pa anlè Sòm 18, 51 ak 52 a. Nan Sòm 23, David, ki te yon bèje, te pale de Jewova kòm yon bèje k ap gide l, k ap ba l fòs e k ap pwoteje l. Sa te fè David vle sèvi Bondye “chak jou nan lavi [l]”. — Sòm 23:6.

Epitou, sonje se Jewova ki te pouse David ekri tout sa l te ekri yo. Pami sa l te ekri yo, nou jwenn yon seri pwofesi ki te gen pou yo reyalize yon bon bout tan annapre. Pa egzanp, nan Sòm 110, David te ekri konsènan yon tan kote Seyè l la t ap gen pou l “chita adwat” Bondye nan syèl la e l t ap resevwa anpil pouvwa. Poukisa yo te ba l pouvwa sa a? Pou l te kapab fè ènmi Bondye yo soumèt yo e pou l te ka “egzekite jijman l sou nasyon yo” sou tè a. David te yon zansèt Jezi, li menm ki te Mesi a. Mesi a t ap gen pou l dirije detan l nan syèl la e li t ap “prèt pou toutan”. (Sòm 110:1-6.) Jezi te fè konnen pwofesi nou jwenn nan Sòm 110 la te gen rapò avè l e l t ap gen pou l reyalize alavni. — Mat. 22:41-45.

Vrèmanvre, pawòl Jewova te fè David ekri yo te gen rapò ak epòk David t ap viv la e yo pral reyalize alavni tou lè David pral resisite e l pral ka fè louwanj pou Jewova pou toutan. Donk, pawòl nou jwenn nan Sòm 37:10, 11, ak 29 yo kapab ede n konprann jan sitiyasyon an te ye nan Izrayèl tan lontan an e yo gen pou yo reyalize tou alavni sou tout tè a, lè Bondye pral reyalize pwomès li fè yo. — Gade paragraf 8 nan atik ki gen tit “W ap avè m nan Paradi a” nan Toudegad sa a.

Kidonk, Sòm 61:8 ak lòt vèsè menm jan an montre David te vle bay Jewova glwa nan peyi Izrayèl tan lontan an jiskaske l mouri. E yo montre sa David pral kapab fè alavni lè Jewova reba l lavi.