1. Yon ti tan anvan Jezi mouri, ki sa l te di yon bandi ki te bò kote l? (Lik 23:39-43).

 JEZI ak de bandi ki te bò kote l yo t ap soufri pandan yo t apral mouri (Lik 23:32, 33). Toule de bandi yo t ap pase Jezi nan jwèt, sa ki montre aklè yo pa t disip li (Mat. 27:44; Mak 15:32). Men, gen youn nan yo ki te chanje atitid. Li te di: “Jezi, sonje m lè w vin wa.” Jezi te reponn li: “Anverite m ap di w sa jodi a: W ap avè m nan Paradi a.” (Li Lik 23:39-43.) Pa gen anyen ki montre bandi sa a te aksepte mesaj konsènan “Wayòm syèl la” Jezi t ap preche pandan sèvis li sou tè a. Epi, Jezi pa t janm di mesye a t ap gen pou l fè pati Wayòm nan (Mat. 4:17). Jezi t ap pale konsènan Paradi ki pral gen sou tè a alavni. Sa k fè nou ka di sa?

2. Ki sa k montre bandi ki te repanti a te yon Juif?

² Sanble bandi ki te repanti a te yon Juif. Men sa bandi sa a te di lòt la: “Ou pa krenn Bondye ditou ou menm, alòske w resevwa menm santans avè l?” (Lik 23:40). Juif yo te konn adore yon sèl Dye, men, moun lòt nasyon yo te kwè nan plizyè dye (Egz. 20:2, 3; 1 Kor. 8:5, 6). Si bandi sa yo te soti nan lòt nasyon, men kesyon li te ka poze: “Ou pa krenn dye yo ditou ou menm?” Epitou, Bondye pa t voye Jezi pou moun lòt nasyon, li te voye l pou “mouton ki pèdi ki nan pèp Izrayèl la”. (Mat. 15:24.) Bondye te fè Izrayelit yo konnen Li t ap resisite moun ki mouri yo. Bandi ki te repanti an dwe te konn sa, e pawòl li te di yo montre li te kwè Jewova t ap resisite Jezi pou l dirije nan Wayòm Li an. Sanble mesye a te gen espwa Bondye t ap resisite l tou.

3. Ki sa bandi ki te repanti a dwe te konprann lè Jezi te pale de Paradi a? Esplike. (Jenèz 2:15).

 ³ Si bandi ki te repanti a te yon Juif, li dwe te konn tande pale de Adan ak Èv ak Paradi Jewova te kreye pou yo a. Donk, bandi a te kapab byen konprann Paradi Jezi t ap pale a t ap yon bèl jaden sou tè a. — Li Jenèz 2:15.

4. Sou ki sa pawòl Jezi te di youn nan bandi yo ta dwe fè n reflechi?

⁴ Pawòl Jezi te di bandi a ta dwe fè n panse ak jan lavi a pral ye nan Paradi a. Anfèt, nou ka aprann yon bagay sou Paradi a lè n reflechi sou rèy Salomon an ki te gen lapè. E nou ka atann Jezi, li menm ki pi enpòtan pase Salomon, pral travay ansanm ak moun ki pral dirije ansanm avè l yo pou fè tè a vin yon bèl paradi (Mat. 12:42). Nou konprann rezon ki fè “lòt mouton” yo ta dwe chèche konnen ki sa yo bezwen fè pou yo ka gen posiblite pou yo viv pou toutan nan Paradi a. — Jan 10:16.

5. Ki jan w imajine lavi a ap ye nan Paradi a?

⁵ Ki sa k vin nan lespri w lè w ap panse ak jan lavi a ap ye nan Paradi a? Petèt ou imajine yon bèl jaden ki sanble ak jaden Edenn nan (Jen. 2:7-9). Sandout ou sonje pwofesi Miche te anonse a ki fè konnen chak moun nan pèp Bondye a ap chita “anba pye rezen yo ak pye fig frans yo”. (Miche 4:3, 4.) Petèt vèsè ki di tè a gen pou l chaje ak manje a ka vin nan lespri w (Sòm 72:16; Eza. 65:21, 22). Donk, ou ka imajine ou menm ki nan yon bèl jaden e ki chita devan yon tab ki chaje ak bon manje. Ou ka imajine lè a ki anbonmen ak sant plant yo ak flè yo ki santi bon anpil. E se sèten ou ka imajine fanmi w ak zanmi w, san wete moun ki resisite yo, k ap ri pandan y ap pase yon bon ti moman ansanm. Tout sa nou sot di la a se pa jis yon rèv. Pa gen dout, bagay sa yo gen pou yo fèt sou tè a. Sepandan, nan Paradi a, nou pral kontan fè yon seri travay nou renmen tou.

6. Ki sa n pral fè nan Paradi a? (Gade foto a.)

⁶ Jewova kreye nou yon fason pou n pran plezi nan travay nou (Ekl. 2:24). Nou pral gen anpil travay pou n fè pandan Rèy mil an Kris la. Moun k ap ret vivan apre gwo tribilasyon an, san wete plizyè milyon moun ki pral resisite yo, pral bezwen rad, manje ak yon kote pou yo rete. Nou pral bezwen travay anpil pou n ede yo jwenn sa yo bezwen e n ap kontan fè sa! Menm jan Adan ak Èv te dwe pran swen jaden kote yo te rete a, nou pral kontan travay pou fè  tè a vin yon paradi. Epitou, imajine jan n pral kontan anseye plizyè milyon moun k ap resisite ki pa t konn anpil bagay sou Jewova ak objektif li e pou n ede moun ki te fidèl ki te viv byen lontan anvan Jezi te vin sou tè a pou yo aprann plis bagay toujou!

7. Ki asirans nou kapab genyen, e poukisa?

⁷ Nou kapab gen asirans nou pral viv anpè nan Paradi a, nou pral gen tout sa n bezwen, e tout bagay ap byen òganize. Sa k fè n di sa? Se paske Jewova deja ban n yon apèsi sou ki jan lavi a pral ye anba gouvènman Pitit Gason l lan. Nou kapab wè sa lè n egzamine istwa rèy wa Salomon.

8. Ki jan pawòl wa David te ekri nou jwenn nan Sòm 37:10, 11, 29 yo te reyalize nan tan lontan? (Gade “Kesyon lektè yo poze” ki nan Toudegad sa a.)

⁸ Bondye te pouse wa David ekri konsènan fason lavi a t ap ye lè yon wa ki gen sajès e ki fidèl t ap vin chita sou twòn nan alavni. (Li Sòm 37:10, 11, 29.) Byen souvan, nou konn li Sòm 37:11 ak moun yo lè n ap pale konsènan Paradi ki gen pou vini an. E nou gen rezon fè sa, paske Jezi te site vèsè sa a nan Diskou li te bay sou mòn nan, sa ki montre se yon bagay ki gen pou fèt alavni (Mat. 5:5). Men, pawòl David yo te montre tou ki jan lavi a t ap ye nan epòk wa Salomon. Lè Salomon t ap dirije peyi Izrayèl, pèp Bondye a te gen bonjan lapè e yo te gen tout sa yo te bezwen nan yon peyi kote “lèt ak siwo myèl [t] ap koule”. Bondye te di: “Si nou kontinye mache selon lwa [m yo], [...] m ap mete lapè nan peyi a e n ap kouche san pèsonn pa fè nou tranble.” (Lev. 20:24; 26:3, 6). Pwomès sa yo te reyalize sou rèy Salomon (1 Kwo. 22:9; 29:26-28). E Jewova te fè konnen moun ki mechan yo ‘pa t ap la ankò’. (Sòm 37:10.) Vrèmanvre, pawòl nou jwenn nan Sòm 37:10, 11, 29 yo te reyalize nan tan lontan e y ap gen pou yo reyalize alavni tou.

9. Ki sa rèn Cheba a te di konsènan rèy wa Salomon?

 ⁹ Rèn Cheba a te aprann jan Izrayelit yo te gen lapè ak jan afè yo t ap byen mache sou rèy Salomon. Rèn nan te fè yon vwayaj byen long pou l al Jerizalèm pou l te ka wè sa ak je l (1 Wa 10:1). Apre l te fin vizite wayòm Salomon an li te di: “Sa m te tande a pa ka parèt devan sa m wè a. [...] Byennere moun ki nan pèp ou a e byennere sèvitè w yo ki toujou kanpe devan w ap koute pawòl sajès k ap sot nan bouch ou!” (1 Wa 10:6-8). Men, fason moun yo t ap viv sou rèy Salomon an se te jis yon apèsi sou sa Jewova pral fè lè Jezi, Pitit Gason l lan, pral dirije limanite.

10. Nan ki sans Jezi pi bon pase Salomon?

¹⁰ Jezi pi bon pase Salomon nan tout sans. Salomon pa t pafè e li te fè yon seri erè grav, sa ki te vin lakòz pèp Bondye a tonbe nan pwoblèm. Jezi li menm se yon Dirijan ki pafè ki pa konn fè erè (Lik 1:32; Ebre 4:14, 15). Jezi te ret fidèl ak Bondye malgre Satan te pase l anba yon seri gwo eprèv. Kris montre aklè li pap janm peche oswa li pap janm fè anyen ki ta ka fè moun l ap dirije yo ki fidèl soufri. Vrèmanvre, se yon onè pou n genyen l kòm Wa nou.

11. Kiyès ki pral ede Jezi dirije?

¹¹ Jezi pral gen 144 000 moun ki pral dirije ansanm avè l pou pran swen lèzòm e pou reyalize objektif Jewova gen pou tè a (Rev. 14:1-3). Moun sa yo se yon seri gason ak fi ki te jwenn anpil eprèv ak anpil difikilte lè yo t ap viv sou tè a, donk y ap kapab konprann sitiyasyon moun k ap viv sou tè a. Ki sa moun sa yo ki pral dirije ansanm ak Jezi pral fè egzakteman?

12. Ki travay Jewova pral bay 144 000 moun yo fè?

¹² Travay Jezi ak moun ki pral dirije ansanm avè l yo gen pou yo fè a pi plis lontan pase travay Salomon te fè a. Wa Salomon te gen pou l pran swen plizyè milyon moun ki t ap viv nan yon sèl peyi. Men, moun ki pral dirije nan Wayòm Bondye a ap gen pou yo ede plizyè milya moun ki pral viv toupatou sou tè a. Vrèmanvre, se yon gwo onè Jewova fè 144 000 moun yo!

13. Ki responsablite san parèy moun ki pral dirije ansanm ak Jezi yo pral genyen?

¹³ Menm jan ak Jezi, 144 000 moun yo pral sèvi antanke wa e antanke prèt (Rev. 5:10). Sou Lwa Moyiz la, prèt yo te gen responsablite toudabò pou yo ede pèp la ret an sante toutpandan yo t ap ede yo kontinye gen bon relasyon ak Jewova. Lalwa se te “sèlman lonbray bon bagay ki gen pou vini yo”, donk, li lojik pou n panse moun ki pral dirije ansanm ak Jezi yo pral ede pèp Bondye a ret an sante, epi ede yo rete pwòch ak Bondye (Ebre 10:1). N ap oblije tann pou n wè ki mwayen wa ak prèt sa yo pral itilize pou yo kominike ak moun ki pral viv anba dominasyon Wayòm nan sou tè a. Kèlkeswa dispozisyon Jewova pran, nou kapab gen asirans nan Paradi ki gen pou vini an moun k ap viv sou tè a pral resevwa enstriksyon yo bezwen. — Rev. 21:3, 4.

14. Ki relasyon ki genyen ant “lòt mouton” yo ak “ti twoupo” a?

¹⁴ Jezi te rele moun ki pral dirije ansanm avè l yo yon “ti twoupo”. (Lik 12:32.) Epitou, li te pale konsènan yon dezyèm  gwoup moun, li te rele yo “lòt mouton”. Toule de gwoup moun sa yo vin fè yon sèl twoupo (Jan 10:16). Yo toule de deja ap travay ansanm, e y ap kontinye travay ansanm lè tè a vin yon paradi. Nòmalman, lè sa a, moun ki fè pati “ti twoupo” a ap deja nan syèl la, e moun ki fè pati “lòt mouton” yo pral gen posiblite pou yo viv pou toutan sou tè a. Men, gen yon seri bagay “lòt mouton” yo bezwen fè depi kounye a pou yo gen posiblite viv nan Paradi a.

15. a) Ki jan “lòt mouton” yo ap kolabore ak frè Kris yo? b) Ki jan w ka suiv egzanp frè ki nan famasi a? (Gade foto a.)

¹⁵ Bandi ki te repanti a te gentan mouri anvan l te gen posiblite montre jis nan ki pwen li te gen rekonesans pou sa Kris te fè pou li. Yon lòt bò, nou menm ki fè pati “lòt mouton” yo gen anpil posiblite pou n montre depi kounye a jis nan ki pwen nou gen rekonesans pou sa Jezi fè pou nou. Pa egzanp, nou montre nou renmen l nan fason nou aji ak frè l yo Bondye chwazi pou al nan syèl. Jezi te di se sou sa li pral baze pou l wè kiyès ki mouton yo (Mat. 25:31-40). Nou kapab kolabore ak frè Kris yo, lè nou ede yo ak tout kè nou nan travay preche ak fè disip la (Mat. 28:18-20). Pou n rive fè sa, nou bezwen byen sèvi ak piblikasyon yo ban nou pou n etidye Labib ak moun yo, pa egzanp liv Ou kapab viv ak kè kontan pou toutan! an. Si w poko ap etidye Labib ak yon moun, ou ka chèche ofri mezi moun ou kapab yon etid?

16. Ki sa n ka fè depi kounye a pou n prepare n pou n viv nan Paradi a?

¹⁶ Nou pa bezwen tann n ap viv nan Paradi a pou n vin kalite moun Jewova vle viv nan Paradi a. Depi kounye a, nou kapab fè efò pou n se moun ki kenbe pawòl nou, ki aji dwat e ki montre nou rezonab nan fason n ap viv. Epitou, nou ka montre nou fidèl ak Jewova, ak moun nou marye avè l la, e ak frè n ak sè n yo. Plis nou fè efò pou n obeyi prensip Bondye yo pandan n ap viv nan monn sa a ki chaje ak mechanste, se plis l ap fasil pou n obeyi yo nan Paradi a. Epitou, nou kapab chèche gen yon seri kapasite ak kalite pou montre  n ap prepare n pou n viv nan Paradi a. Gade atik ki gen tit “Èske w pare pou w viv pou toutan sou tè a?” ki nan Toudegad sa a.

17. Èske n ta dwe santi n dekouraje pou peche n te fè? Esplike.

¹⁷ Epitou, nou bezwen fè efò pou n sispann kondane tèt nou pou yon seri peche grav nou te fè. Nòmalman, nou pa t ap janm pran sakrifis ranson an kòm yon eskiz pou n ap “fè espre n ap pratike peche”. (Ebre 10:26-31.) Men, nou mèt gen konfyans, si n repanti toutbon pou yon peche grav nou te fè, nou chèche èd Jewova, nou mande ansyen yo ede n, e n chanje fason n aji, Jewova ap padone nou nèt (Eza. 55:7; Tra. 3:19). Sonje pawòl Jezi te di Farizyen yo: “Mwen pa vin rele moun ki jis, men mwen vin rele moun k ap pratike peche.” (Mat. 9:13). Sakrifis ranson an gen ase fòs pou l kouvri tout peche nou yo.

18. Sou ki sa w ta renmen pale ak bandi ki te mouri bò kot Jezi a?

¹⁸ Èske w ka imajine ou menm ki nan Paradi a k ap pale ak bandi ki te pale ak Jezi a? Pa gen dout, nou toule de t ap di jan nou gen rekonesans pou sakrifis Jezi a. Ou ta ka mande l pou l rakonte w plis bagay toujou sou sa k te pase nan dènye èdtan Jezi te fè ap viv sou tè a e ki jan l te santi l lè Jezi te reponn li an. E li menm bò kote pa l ta ka mande w ki jan lavi a te ye nan dènye jou monn Satan an. Se pa ti privilèj nou pral genyen pou n etidye Pawòl Bondye a ak moun tankou mesye sa a! — Efe. 4:22-24.

19. Poukisa lavi a pap raz nan Paradi a? (Gade foto ki sou paj kouvèti a.)

¹⁹ Lavi a pap janm raz nan Paradi a. N ap toujou rankontre yon seri moun k ap gen bagay enteresan pou yo rakonte n e n ap toujou gen travay pou n fè k ap fè kè n kontan. Sa k pi bèl la, n ap kapab vin konnen Papa nou an ki nan syèl la pi byen chak jou e n ap ka pwofite sa l ban nou yo. N ap toujou gen anpil bagay pou n aprann sou li, e ap gen anpil bagay pou n aprann sou sa li kreye yo. Tank n ap viv, se tank n ap vin renmen Bondye. Nou gen anpil rekonesans dèske Jewova ak Jezi fè n pwomès pou n viv nan Paradi a pou toutan!