ATIK ETID 50
KANTIK 135 “Pitit mwen, montre w saj”
Paran, ede pitit ou vin gen yon lafwa solid
“Verifye pèsonèlman nan lavi nou sa ki volonte Bondye, yon volonte ki bon, ki agreyab e ki pafè.” — WOM. 12:2.
PWEN KLE
Nan atik sa a, paran yo pral aprann fason yo ka byen kominike ak pitit yo epi ede yo vin gen yon lafwa solid nan Bondye ak nan Bib la.
1-2. Ki jan paran yo ta dwe reyaji lè pitit yo poze yo kesyon sou kwayans nou ki baze sou Bib la?
ANPIL moun ap dakò, leve timoun se yon travay ki pran anpil tan. Si w se yon paran ki gen timoun piti, nou felisite w pou efò w fè pou w ede pitit ou vin gen yon lafwa solid (Det. 6:6, 7). Pandan pitit ou ap grandi, li ka kòmanse poze w gwo kesyon sou kwayans nou ki baze sou Bib la, sa gen ladan l prensip moral ki nan Bib la.
2 Okòmansman, kesyon pitit ou a ap poze w yo ka fè w enkyete. Ou ka menm panse kesyon sa yo montre li pa gen lafwa. Sepandan, lè yon timoun ap grandi li bezwen poze kesyon pou l ka gen pwòp konviksyon pa l (1 Kor. 13:11). Donk, pa gen rezon pou w ap enkyete. Ou ka konsidere tout kesyon sensè pitit ou ap poze sou kwayans nou kòm okazyon pou w ede l devlope kapasite l genyen pou l rezone.
3. Ki sa nou pral wè nan atik sa a?
3 Nan atik sa a, nou pral wè ki jan paran yo ka ede pitit yo 1) vin gen pwòp konviksyon pa yo, 2) konprann enpòtans prensip moral ki nan Bib la, e 3) defann kwayans yo. Pandan n ap fè sa, nou pral wè se pa yon move bagay lè timoun yo poze kesyon, e nou pral wè kèk aktivite paran yo ka fè ak fanmi yo ki ka ba yo posiblite pou yo pale sou kwayans nou antanke kretyen.
EDE PITIT OU VIN GEN PWÒP KONVIKSYON PA L
4. Ki kesyon yon timoun ka poze, e poukisa?
4 Paran kretyen yo konnen pitit yo pa fèt tou gen lafwa nan Bondye poutèt yo menm yo gen lafwa. Ou pa t fèt tou gen lafwa nan Jewova e se menm bagay la pou pitit ou. Rive yon lè, pitit ou ka kòmanse poze kesyon tankou: ‘Kòman m fè konnen gen yon Bondye ki egziste? Èske m ka vrèman kwè sa Bib la di?’ Anfèt, Bib la ankouraje n pou n sèvi ak “kapasite nou genyen pou nou rezone” a e pou n “verifye tout bagay”. (Wom. 12:1; 1 Tes. 5:21.) Sepandan, ki jan w ka ede pitit ou vin gen yon lafwa ki solid?
5. Ki jan paran yo ka ede pitit yo vin gen lafwa nan Bib la? (Women 12:2).
5 Ankouraje pitit ou pou li verifye pèsonèlman li nan laverite. (Li Women 12:2.) Lè pitit ou poze w kesyon, sèvi ak okazyon sa a pou w montre l ki jan pou l jwenn repons yo lè l sèvi ak zouti nou genyen pou n fè rechèch yo, tankou Index des publications des Témoins de Jéhovah ak Gid pou Temwen Jewova yo fè rechèch. Nan Gid pou Temwen Jewova yo fè rechèch la, nan sijè “Labib”, li kapab chèche “Se Bondye ki enspire l” pou l jwenn prèv Bib la se pa jis yon bon liv lèzòm te ekri. Okontrè, li se “pawòl Bondye”. (1 Tes. 2:13.) Pa egzanp, li ka fè rechèch sou Niniv, yon vil nan peyi Asiri nan tan lontan. Sa gen kèk tan, gen moun ki t ap kritike Bib la ki te fè konnen vil Niniv pa t janm egziste. Men, nan ane 1850 yo, yo te jwenn rès vil Niniv anba tè, sa ki montre sa Bib la di se laverite (Sof. 2:13-15). Pou l jwenn enfòmasyon sou fason destriksyon vil Niniv reyalize pwofesi ki nan Bib la, li kapab gade atik “Èske w te konnen?” ki parèt nan Toudegad novanm 2021. Lè pitit ou konpare sa l aprann nan piblikasyon nou yo ak sa l aprann nan ansiklopedi ak lòt liv moun fè konfyans, l ap gen bonjan rezon pou l vin gen plis lafwa nan sa Bib la di.
6. Ki jan paran yo ka ede pitit yo devlope kapasite yo genyen pou yo rezone a? Bay yon egzanp. (Gade foto a tou.)
6 Ede pitit ou devlope kapasite l genyen pou l rezone a. Paran yo gen plizyè okazyon pou yo pale ak pitit yo sou Labib oswa sou lafwa nan Bondye. Yo kapab jwenn posiblite sa yo lè y al vizite yon mize oswa yon bèl jaden oubyen yon filyal Temwen Jewova yo. Pa egzanp, lè w ap vizite yon mize, kit se an pèsòn, kit se pa mwayen elektwonik, ou kapab atire atansyon pitit ou sou yon seri istwa oswa kèk objè ki kapab fè l gen plis konviksyon sa Bib la di se laverite. Pa egzanp, èske pitit ou konnen non pèsonèl Bondye parèt sou yon wòch ki la depi 3000 an ki sot nan peyi Mowab? Yo ekspoze wòch sa a nan mize Louv nan vil Pari, nan peyi Lafrans. Epitou, yo taye yon wòch ki menm jan ak wòch ki sot nan peyi Mowab la e ki gen menm enfòmasyon yo sou li, yo ekspoze l nan mize “Bib la ak non Bondye” nan syèj mondyal Temwen Jewova yo nan Wòwik, ki nan Nouyòk. Wòch ki sot nan peyi Mowab la montre Mecha, wa peyi Mowab, te fè rebèl ak peyi Izrayèl. Sa ann amoni ak sa Bib la di (2 Wa 3:4, 5). Lè pitit ou wè ak pwòp je l prèv ki montre Bib la se laverite e li egzak, lafwa l ap vin pi djanm. — Konpare ak 2 Kwonik 9:6.
Ede pitit ou vin gen yon lafwa solid nan Bondye ak nan Bib la lè w montre l kèk bagay ki la depi byen lontan ki montre Bib la egzak. (Gade paragraf 6.)
7-8. a) Ki sa n ka aprann nan bèl bagay ak bèl fòm nou wè nan lanati? Bay yon egzanp. (Gade foto a tou.) b) Ki kesyon ki ka ede pitit ou vin gen plis lafwa nan Kreyatè a?
7 Ankouraje pitit ou pou l reflechi sou bèl bagay ki gen nan lanati yo. Pandan w ap mache ak pitit ou yon kote ki gen anpil pyebwa oswa pandan w ap travay nan jaden, ede yo wè pakèt bèl bagay ki gen nan lanati. Poukisa w bezwen fè sa? Bèl bagay sa yo bay prèv gen yon Kreyatè ki entèlijan e ki gen sajès ki te fè tout bagay sa yo. Pa egzanp, si w wè fason yon kokiy kalmason, kèk flè, fèy yon seri plant ak kèk gwoup zetwal fèt, w ap wè yo gen yon fòm spiral. Syantifik yo fè plizyè ane ap etidye fòm kèk nan bagay sa yo. a
8 Pandan pitit ou ap suiv kou syans nan lekòl, li ka aprann yon seri lòt fòm nou jwenn toupatou nan lanati. Pa egzanp, pifò pyebwa gen yon fason yo fèt. Gen gwo branch ki pouse nan kò pyebwa a, apre sa gen ti branch yo, epi vin gen branch ki pi piti. Yo rele fòm sa a fraktal. Nou jwenn fòm fraktal yo tou nan lòt bagay nan lanati. Men, kiyès ki tabli lwa ki fè gen tout bèl fòm sa yo? Kiyès ki fè gen lòd ak bèl fòm nou wè nan lanati yo? Plis pitit ou reflechi sou kesyon sa yo, se plis l ap ka kwè toutbon se Bondye ki kreye tout bagay (Ebre 3:4). Rive yon lè, ou ka mande pitit ou: “Si Bondye kreye nou, èske w pa panse li pi byen konnen fason nou dwe aji pou n ka gen kè kontan?” Lè sa a, ou ka esplike l Bondye ban nou Bib la pou montre n fason n ka gen kè kontan.
NASA, ESA, and the Hubble Heritage (STScl/AURA)-ESA/Hubble Collaboration
Kiyès ki fè bèl bagay ak bèl fòm nou jwenn nan lanati yo? (Gade paragraf 7-8.)
EDE PITIT OU KONPRANN ENPÒTANS PRENSIP MORAL KI NAN BIB LA
9. Ki sa k ka fè yon timoun poze kesyon sou yon seri prensip moral ki nan Bib la?
9 Si pitit ou poze w kesyon sou prensip moral ki nan Bib la, chèche wè rezon ki fè l poze w kesyon sa yo. Èske se paske li pa dakò ak prensip moral ki nan Bib la oswa èske li jis pa konn ki jan pou l esplike lòt moun kwayans li? Kèlkeswa rezon an, ou ka ede pitit ou vin renmen prensip moral ki nan Bib la lè w etidye liv Ou kapab viv ak kè kontan pou toutan! an avè l. b
10. Ki jan w ka ede pitit ou reflechi sou relasyon l ak Jewova?
10 Ankouraje pitit ou pou l bay relasyon l ak Jewova anpil valè. Lè w ap etidye Labib ak pitit ou, sèvi ak kesyon ansanm ak egzanp ki nan liv Ou kapab viv ak kè kontan pou toutan! an pou w eseye fè l di sa k nan kè l (Pwo. 20:5). Pa egzanp, leson 8 la konpare Jewova ak yon zanmi ki renmen nou k ap fè n sonje yon seri bagay ki ka pwoteje nou e k ap itil nou. Apre nou fin egzamine 1 Jan 5:3, ou ka mande l: “Lè n konnen Jewova se yon bon Zanmi konsa, kòman nou ta dwe wè sa l mande n fè yo?” Sa ka parèt yon kesyon senp, men lè n poze kesyon konsa, sa ka ede pitit nou wè lwa Bondye yo kòm yon prèv ki montre Li renmen nou. — Eza. 48:17, 18.
11. Ki jan w ka ede pitit ou renmen prensip ki nan Bib la? (Pwovèb 2:10, 11).
11 Montre pitit ou kòman n ka jwenn byenfè lè n aplike prensip ki nan Bib la. Lè w ap li Bib la oswa w ap fè tèks pou jounen an ansanm ak pitit ou, montre ki jan prensip ki nan Bib la ede fanmi an. Pa egzanp, èske pitit ou konprann li bon pou n travay di e pou n toujou di laverite (Ebre 13:18)? Epitou, ou ka montre l lè nou suiv prensip ki nan Bib la, sa ede n gen pi bon sante e sa ede n gen kè kontan (Pwo. 14:29, 30). Lè n pale sou prensip sa yo ak pitit nou, se sèten sa ap ede yo apresye konsèy ki nan Bib la plis toujou. — Li Pwovèb 2:10, 11.
12. Ki jan yon papa ede pitit gason l konprann byenfè l ap jwenn lè l suiv prensip ki nan Bib la?
12 Steve, yon papa k ap viv nan peyi Lafrans, esplike kòman li menm ak madanm li ede Ethan, pitit gason yo ki nan adolesans li, wè Jewova ban n yon seri lwa pou n suiv paske l renmen nou. Men sa l di: “Nou poze l kesyon tankou: ‘Poukisa Jewova mande pou nou respekte prensip sa a? Ki jan sa montre li renmen nou? Ki sa k ka rive si w pa aplike prensip sa a?’” Konvèsasyon konsa ede Ethan renmen prensip moral Jewova yo. Men sa Steve ajoute: “Objektif nou se ede Ethan wè sajès ki nan Bib la pi siperyè lontan pase sajès lèzòm.”
13. Bay yon egzanp ki montre fason paran yo ka ede pitit yo aplike prensip ki nan Bib la.
13 Ede pitit ou pou l aplike prensip ki nan Bib la. Youn nan okazyon w genyen pou w fè sa se lè lekòl pitit ou ba l yon liv pou l li kòm devwa. Moun ki nan liv la, se kapab moun k ap fè imoralite seksyèl oswa k ap fè gwo kòlè, e liv la ka montre nou ka imite yo. Ou ka ankouraje pitit ou panse ak fason Jewova santi l lè moun aji konsa (Pwo. 22:24, 25; 1 Kor. 15:33; Flp. 4:8). Sa ka ede pitit ou wè poukisa li bon pou n obeyi Jewova e si pwofesè a oswa lòt elèv ta poze l kesyon anrapò ak liv la, l ap kapab pale sou kwayans li.
EDE PITIT OU POU L DEFANN KWAYANS LI
14. Sou ki sijè yon jèn kretyen ka pa fin twò alèz pou l pale, e poukisa?
14 Pafwa, jèn kretyen yo konn pè defann kwayans yo. Yo ka pa santi yo alèz pou yo esplike rezon ki fè yo pa kwè nan teyori evolisyon an. Sa k ka fè sa? Petèt, pwofesè yo ka montre evolisyon se yon bagay ki reyèl. Si w se yon paran, ki jan w ka ede pitit ou gen bonjan konviksyon sa l kwè yo se laverite?
15. Ki sa k ka ede yon jèn kretyen gen plis konfyans sa l kwè yo se laverite?
15 Ede pitit ou vin gen plis konfyans nan sa l kwè yo. Pitit ou pa bezwen santi l jennen paske l kwè nan kreyasyon an (2 Tim. 1:8). Poukisa? Ebyen, se paske gen anpil syantifik ki kwè lavi pa t parèt bridsoukou oswa pa aza. Syantifik sa yo wè prèv gen yon Kreyatè entèlijan ki dwe kreye tout bagay konplike ki vivan yo. Se sa k fè yo pa aksepte teyori evolisyon an yo anseye nan lekòl toupatou sou tè a. Yon bagay k ap ede pitit ou vin gen plis lafwa ak kouraj, se lè l reflechi sou sa k te konvenk lòt frè ak sè pou yo kwè se kreye yo te kreye lavi. c
16. Ki jan paran yo ka ede yon timoun konnen fason pou l esplike lòt moun poukisa li kwè nan yon Kreyatè? (1 Pyè 3:15). (Gade foto a tou.)
16 Ede pitit ou pou l esplike lòt moun rezon ki fè l kwè nan yon Kreyatè. (Li 1 Pyè 3:15.) Li ta bon pou n gade ansanm atik ki nan seri ki gen tit “Kesyon jèn yo konn poze: Kreyasyon oswa evolisyon?” ki sou jw.org. Epi, pitit ou ka chwazi esplikasyon li santi ki ka ede lòt moun konprann gen yon Kreyatè. Fè repetisyon avè l sou sa. Fè l sonje li pa bezwen fè diskisyon ak kamarad lekòl li yo. Ankouraje l sèvi ak esplikasyon ki senp e ki lojik si yon moun dispoze pale sou sijè a. Pa egzanp, yon kamarad lekòl li ka di: “Mwen kwè sèlman sa m ka wè e m pa janm wè Bondye.” Yon jèn kretyen ta ka reponn: “Imajine w ap mache nan yon forè kote pa gen moun epi w jwenn yon pi ki gen dlo. Ki sa w t ap panse? Si lè nou wè yon pi sa montre aklè se yon moun ki te fè l, alewè pou linivè!”
Lè w ap pale ak kamarad lekòl ou, sèvi ak esplikasyon ki senp e ki lojik. (Gade paragraf 16-17.) d
17. Ki jan paran yo ka ankouraje pitit yo chèche okazyon pou yo pataje verite ki nan Bib la ak lòt moun? Bay yon egzanp sou sa timoun nan ka di yon kamarad li.
17 Ankouraje pitit ou chèche okazyon pou l pataje verite ki nan Bib la ak lòt moun (Wom. 10:10). Ou ta ka konpare efò pitit ou ap fè pou defann lafwa l ak efò yon moun bezwen fè pou l jwe yon enstriman mizik. Okòmansman, moun k ap aprann mizik la ap eseye jwe mizik ki fasil. Rive yon lè, l ap pi fasil pou l jwe mizik. Menm jan an tou, pou kòmanse, paran yo ka aprann pitit yo pale yon fason senp lè y ap esplike lòt moun kwayans yo. Pa egzanp, li ka mande yon kamarad lekòl li: “Èske w konnen souvan syantifik yo kopye sa yo wè nan lanati? Kite m montre w yon bèl videyo.” Apre l fin montre l yon videyo nan seri ki gen tit Ki kote mèvèy sa a soti?, li ka di: “Si yo fè lwanj pou syantifik yo pou yon bagay yo kopye ki deja egziste nan lanati, kiyès ki merite lwanj pou orijinal la?” Yon kesyon senp konsa ka pouse yon timoun vle aprann plis sou Jewova.
KONTINYE EDE PITIT OU VIN GEN PLIS LAFWA
18. Ki jan paran yo ka kontinye ede pitit yo vin gen plis lafwa nan Bondye?
18 N ap viv nan yon monn ki chaje ak moun ki pa gen lafwa nan Jewova (2 Pyè 3:3). Donk, nou menm paran, pandan n ap etidye Labib ak pitit nou, ankouraje l egzamine sijè k ap fè l vin gen plis respè pou Pawòl Bondye a e pou prensip moral yo. Ede l sèvi ak kapasite l genyen pou l reflechi a lè n montre l bèl bagay ki genyen nan kreyasyon Jewova a. Ede l konprann pwofesi estrawòdinè nan Bib la ki deja reyalize yo. Sa k pi enpòtan an, priye ak pitit ou e priye pou li. Lè w fè sa, ou kapab gen asirans Jewova ap rekonpanse efò w fè pou w ede pitit ou vin gen plis lafwa. — 2 Kwo. 15:7.
KANTIK 133 Adore Jewova pandan nou jèn
a Pou w jwenn plis enfòmasyon, gade videyo Les merveilles de la création révèlent la gloire de Dieu: Les formes ki sou jw.org.
b Si pitit ou deja fin etidye liv Ou kapab viv ak kè kontan pou toutan! an, ou ka egzamine kèk leson nan seksyon 3 ak seksyon 4 ki pale sou prensip moral ki nan Bib la avè l.
c Gade atik ki gen tit “Pourquoi nous croyons en un Créateur” ki parèt nan Reveye n! septanm 2006 (fransè), ak bwochi Cinq questions à se poser sur l’origine de la vie. Pou w jwenn plis egzanp, gade seri videyo Kèk opinyon sou fason lavi te kòmanse ki sou jw.org.
d ESPLIKASYON SOU FOTO: Yon jèn Temwen k ap montre yon kamarad lekòl li ki enterese nan dwón yon videyo nan seri ki gen tit “Ki kote mèvèy sa a soti?”
