1. Ki sa Jezi te di disip li yo konsènan tan lafen an, e ki avètisman li te ba yo?

 KÈK jou anvan Jezi te mouri, kat nan disip li yo te mande l: “Ki siy [...] k ap siy fen sistèm nan?” ​(Mat. 24:3). Sanble disip sa yo t ap mande tèt yo ki jan yo t ap fè konnen lè Jerizalèm ak tanp li an t ap detwi. Lè Jezi te reponn yo, nonsèlman li te pale konsènan fen sistèm juif la, men tou, li te pale konsènan “fen sistèm” n ap viv ladan l kounye a. Men sa Jezi te di konsènan lè lafen an ap rive: “Kanta pou jou sa a ak lè sa a, pèsonn pa konnen yo, ni zanj nan syèl la, ni Pitit la, men se sèl Papa a ki konnen yo.” Apre sa, li te avèti tout disip li yo pou yo “rete je klè” e pou yo “kontinye veye”. — Mak 13:32-37.

2. Poukisa li te enpòtan pou kretyen ki t ap viv nan premye syèk la te kontinye veye?

² Kretyen juif nan premye syèk la te bezwen ret veyatif pou yo te ka sove lavi yo. Jezi te di disip li yo ki sa yo te bezwen veye pou yo te ka konnen lè sistèm juif la t apral detwi. Men sa l te di: “Lè nou wè lame yo monte kan toutotou Jerizalèm, lè sa a, konnen lè pou yo ravaje l la ap pwoche.” Nan moman sa a, yo te dwe obeyi avètisman Jezi te bay la pou yo “kouri al nan mòn”. (Lik 21:20, 21.) Moun ki te koute avètisman li te bay la te chape lè Women yo te detwi Jerizalèm.

3. Ki sa n pral wè nan atik sa a?

³ Jodi a, n ap viv nan moman kote sistèm mechan sa a pral detwi. Se sa k fè nou menm tou nou dwe kenbe tèt  nou anplas e nou dwe kontinye veye. Nan atik sa a, nou pral wè ki jan n bezwen gen ekilib lè n ap suiv sa k ap pase nan monn nan, ki jan nou ka veye kò nou, e ki jan nou ka byen sèvi ak tan ki rete a.

4. Poukisa n ta dwe chèche wè ki jan evènman k ap pase nan monn nan ap reyalize pwofesi ki nan Bib la?

⁴ Nou gen bonjan rezon pou n chèche wè ki jan evènman k ap pase nan monn nan ap reyalize pwofesi ki nan Bib la. Pa egzanp, Jezi te pale konsènan yon seri evènman ki t ap gen pou rive ki t ap ede n konnen lè sistèm Satan an rive nan bout li (Mat. 24:3-14). Apot Pyè te ankouraje n pou n veye fason pwofesi yo ap reyalize pou lafwa n ka ret djanm (2 Pyè 1:19-21). Dènye liv nan Bib la kòmanse ak pawòl ki di: “Men yon revelasyon Bondye bay Jezi Kris pou l montre esklav li yo bagay ki gen pou rive talè konsa.” ​(Rev. 1:1). Se sa k fè nou enterese anpil nan evènman k ap pase nan monn nan jodi a e n enterese konnen ki jan evènman sa yo petèt ap reyalize pwofesi ki nan Bib la. Epitou, nou ka vrèman anvi pale sou evènman sa yo youn ak lòt.

5. Ki sa n pa dwe fè, e ki sa n dwe fè? (Gade foto yo tou.)

⁵ Sepandan, lè n ap pale sou pwofesi ki nan Bib la, nou bezwen veye pou n pa di yon seri bagay nou pa gen okenn prèv sou yo. Poukisa? Paske nou pa ta renmen di anyen ki ta ka met divizyon nan kongregasyon an. Pa egzanp, nou ka tande dirijan nan monn nan k ap pale sou fason pou yo met fen nan yon chirepit pou ka gen lapè ak sekirite. Olye n kouri di yon deklarasyon konsa ap reyalize pwofesi ki nan 1 Tesalonisyen 5:3 a, nou bezwen ret ajou ak dènye enfòmasyon òganizasyon an pibliye. Lè n baze sa n ap di yo sou sa òganizasyon Jewova a pibliye, nou ede kongregasyon an ret ini “nan menm opinyon”. — 1 Kor. 1:10; 4:6.

6. Ki leson n ka aprann nan 2 Pyè 3:11-13?

⁶ Li 2 Pyè 3:11-13. Apot Pyè ede n pou n gen ekilib lè n ap egzamine pwofesi ki nan Bib la. Li ankouraje n pou n “toujou kenbe [jou Jewova a] nan lespri nou”. Poukisa? Se pa paske n ap chèche konnen ‘jou ak lè’ Jewova pral fè Amagedon, men se paske nou vle sèvi ak tan ki rete a pou n kontinye fè efò pou n “gen yon konduit ki sen e [pou n] montre nan aksyon nou nou gen atachman pou Bondye”. (Mat. 24:36; Lik 12:40.) Sa vle di, nou vle kontinye aji yon fason ki dwat e n vle veye pou tout sa n ap fè nan sèvis Jewova a montre nou renmen l anpil. Pou n rive fè sa, nou dwe veye kò nou.

7. Ki jan n montre n ap veye kò nou? (Lik 21:34).

⁷ Jezi te di disip li yo pou yo veye nonsèlman evènman k ap pase nan monn nan, men, pou yo veye kò yo tou. Li te di sa byen klè nan avètisman nou jwenn nan Lik 21:34. (Li vèsè a.) Remake Jezi te di: “Veye kò nou.” Yon moun k ap veye kò l ap veye nenpòt danje ki kapab menase relasyon l ak Jewova, e l ap fè efò pou l evite yo. Konsa, li rete nan lanmou Bondye. — Pwo. 22:3; Jid 20, 21.

8. Ki konsèy apot Pòl te bay kretyen yo?

 ⁸ Apot Pòl te di kretyen yo pou yo veye kò yo. Pa egzanp, men sa l te di kretyen nan vil Efèz yo: “Byen veye sou fason n ap mache a, pou nou pa mache tankou moun ki pa saj, men pou nou mache tankou moun ki saj.” ​(Efe. 5:15, 16). Satan toujou ap chèche kraze relasyon n ak Jewova, se sa k fè Bib la ankouraje n pou n “kontinye chèche konprann sa volonte Jewova ye” pou n ka fè fas ak kèlkeswa atak Satan ap fè sou nou. — Efe. 5:17.

9. Ki jan n ka chèche konprann sa Jewova vle pou nou?

⁹ Bib la pa di n tout bagay ki ka met relasyon n ak Jewova an danje. Byen souvan, nou oblije pran desizyon sou yon seri sijè Bib la pa pale aklè sou yo. Pou n pran bon desizyon, nou bezwen chèche konprann ki sa “volonte Jewova” ye. N ap kapab fè sa lè n li Pawòl Bondye a regilyèman e lè n medite sou li. Plis nou konprann sa volonte Jewova ye e nou chèche gen “panse Kris la”, se plis n ap ka mache “tankou moun ki saj”, menm lè n pa gen yon seri règ byen klè pou di nou sa pou n fè (1 Kor. 2:14-16). Gen kèk danje ki pi fasil pou n wè, men, gen kèk lòt ki pa fin parèt aklè.

10. Bay kèk danje nou dwe evite.

¹⁰ Gen kèk danje nou dwe evite, pa egzanp, nou pa dwe pran pòz nou gen santiman pou yon moun alòske se pa vre, nou pa dwe bwè twòp bwason ki gen alkòl, nou pa dwe manje twòp, nou pa dwe di moun pawòl k ap blese yo, e n pa dwe gade pwogram ki gen vyolans, pònografi, ak lòt bagay menm jan an (Sòm 101:3). Advèsè nou an, Dyab la, toujou ap chèche okazyon pou l kraze relasyon nou ak Jewova (1 Pyè 5:8). Si nou pa veye, Satan ka met yon seri bagay nan lespri nou ak nan kè nou, tankou anvye sò moun, aji yon fason ki pa onèt, avaris, rayisman, ògèy, ak rankin (Gal. 5:19-21). Okòmansman, tandans sa yo ka pa twò parèt lakay nou. Men, si n pa aji vit pou n derasinen yo, y ap kontinye grandi tankou yon plant ki gen pwazon e y ap lage n nan pwoblèm. — Jak 1:14, 15.

11. Bay youn nan danje anba anba nou dwe evite, e poukisa?

¹¹ Youn nan danje anba anba ki genyen se lè n fè move zanmi. Ann pran yon egzanp. W ap travay menm kote ak yon moun ki pa Temwen Jewova. Ou ta renmen kòlèg travay ou a byen wè Temwen Jewova yo, donk, ou aji ak jantiyès e w dispoze ede l. Pafwa w ka menm dakò manje ak moun sa a nan moman poz. E se gade w gade w wè ou pran abitid manje avè l. Kòlèg travay ou a konn pale yon lè konsa sou yon seri bagay imoral. Okòmansman, ou ka pran pòz ou pa konprann. Men, tank tan ap pase, ou ka vin tèlman abitye ak pawòl l ap di yo, sa pa deranje w ankò. Epi yon jou, kòlèg travay ou a envite w al bwè yon bagay avè l apre n fin travay, e w aksepte. Finalman, ou kòmanse wè bagay yo menm jan avè l. Si sa kontinye konsa, ou pap pran tan pou w kòmanse aji menm jan avè l. Nòmalman, nou janti e nou respekte tout moun, men, nou dwe sonje moun nou chwazi pase tan ak yo ap gen gwo enfliyans sou nou (1 Kor. 15:33). Si n veye kò nou, jan Jezi te ankouraje n fè sa, n ap evite pase tan ak  moun ki pap suiv prensip Jewova yo lè sa pa nesesè (2 Kor. 6:15). N ap wè danje a e n ap kouri pou li.

12. Ki sa disip Jezi yo te gen pou yo fè pandan yo t ap tann sistèm nan fini?

¹² Jezi te vle pou disip li yo ret okipe anpil pandan yo t ap tann sistèm nan fini. Jezi te ba yo travay pou yo fè. Li te ba yo lòd pou yo preche bon nouvèl la “nan Jerizalèm, nan tout Jide ak nan Samari, rive jis nan zòn ki pi lwen sou tè a”. (Tra. 1:6-8.) Ala yon gwo travay disip Jezi yo te gen pou yo fè! Lefètke yo te met tout fòs yo nan travay sa a, yo te byen sèvi ak tan yo.

13. Poukisa nou bezwen byen sèvi ak tan nou? (Kolosyen 4:5).

¹³ Li Kolosyen 4:5. Pou n veye kò nou, nou bezwen reflechi sou fason n ap sèvi ak tan nou. “Malè” ka rive nenpòt nan nou “sanzatann”. (Ekl. 9:11.) Nou ka pèdi lavi n bridsoukou.

14-15. Ki jan nou kapab byen sèvi ak tan nou? (Ebre 6:11, 12). (Gade foto a tou.)

¹⁴ Nou kapab byen sèvi ak tan nou lè n fè volonte Jewova e lè n fè efò pou n vin pi pwòch avè l (Jan 14:21). Nou bezwen “vin fèm, san nou pa brannen,  [e] se pou nou toujou gen anpil bagay pou nou fè nan travay Seyè a”. (1 Kor. 15:58.) Konsa, lè lafen an rive, swa fen lavi nou oswa fen sistèm mechan sa a, nou pap regrèt anyen. — Mat. 24:13; Wom. 14:8.

¹⁵ Jodi a, Jezi kontinye dirije disip li yo pandan y ap preche mesaj Wayòm Bondye a sou tout tè a. Li fè sa l te pwomèt la. Pa mwayen òganizasyon Jewova a, Jezi montre n fason pou n preche e li ban n zouti nou bezwen pou n simaye bon nouvèl la (Mat. 28:18-20). Nou jwe wòl pa nou lè n fè anpil efò pou n preche lòt moun, lè n anseye yo e lè n kontinye veye kò nou pandan n ap tann Jewova detwi sistèm sa a. Lè n aplike konsèy nou jwenn nan Ebre 6:11, 12 la, n ap kenbe esperans nou an fèm “jiska lafen”. — Li vèsè yo.

16. Ki detèminasyon nou pran?

¹⁶ Jewova fikse yon jou ak yon lè pou l detwi sistèm Satan an. Lè jou sa a rive, san mank Jewova ap reyalize yon seri pwofesi li te fè ekri nan Pawòl li a. Men, pafwa nou ka panse lafen an pran twòp tan pou l rive. Sepandan, jou Jewova a “pap anreta”! (Aba. 2:3.) Kidonk, ann pran detèminasyon pou n “kontinye ret tann Jewova”, pandan n ap montre n ap “tann Bondye delivrans [nou] an avèk pasyans”. — Miche 7:7.