ATIK ETID 8
KANTIK 130 Se pou nou dispoze padone
Ki jan w ka padone menm jan ak Jewova?
“Menm jan Jewova padone nou ak tout kè l, nou menm tou, nou dwe fè menm jan an.” — KOL. 3:13.
PWEN KLE
Atik sa a ap pale sou sa n ka fè pou n padone yon moun ki di n oswa fè n yon bagay ki fè n mal.
1-2. a) Ki lè n ka twouve l vrèman difisil pou n padone yon moun? b) Ki jan Denise te montre li padone?
ÈSKE W santi l difisil pou w padone lòt moun? Anpil nan nou konn santi sa, sitou lè yon moun di oswa fè yon bagay ki fè n mal anpil. Sepandan, gen bagay nou kapab fè pou n pa ret fache e pou n padone. Pa egzanp, ann wè eksperyans yon sè ki rele Denise a ki te bay bèl egzanp nan kesyon padone te fè. Nan ane 2017, Denise ak fanmi l te sot vizite nouvo syèj mondyal Temwen Jewova yo ki te fèk ouvè. Pandan yo t ap retounen lakay yo, gen yon chofè ki te pèdi kontwòl machin li t ap kondui a e ki te vin frape machin pa yo a. Denise te pèdi konesans nan aksidan an. Lè l te retounen nan nòmal li, li te aprann pitit li yo blese grav e Brian, mari l, mouri. Lè Denise ap panse ak sa k te pase a, li di: “Mwen te santi m kraze e m pa t ka konprann sa k te rive a.” Annapre, li te vin aprann chofè a pa t ni sou ni pran dwòg e li pa t distrè. Denise te priye Jewova pou l te ka santi l anpè.
2 Yo te arete chofè ki te frape machin yo a e yo te jije l poutèt li te lakòz moun mouri. Si tribinal la te fè jwenn li koupab, li te ka pran prizon. Sepandan, tribinal la te fè Denise konnen santans y ap bay mesye a t ap depann de temwayaj li bay. Men sa Denise di: “Mwen te santi se kòmsi yon moun te dekoud kote yo te koud mwen an epi l lage yon galon sèl nan blese a, paske m te oblije reviv moman ki te pi difisil nan lavi m.” Kèk semèn annapre, Denise te chita nan tribinal la e l te pare pou l pale ak mesye ki te lakòz fanmi l soufri anpil konsa. Ki sa l te di? Li te mande jij la pou l fè mesye a gras b. Lè Denise te fin pale, jij la te tonbe kriye. Men sa l te di: “Mwen gen 25 an depi m jij, mwen pa janm tande yon bagay konsa nan tribinal kote m ap fè jijman. Mwen pa janm tande fanmi moun ki viktim nan ap mande pou yo fè moun ki koupab la gras. Mwen pa janm tande moun di pawòl ki demontre lanmou ak padon.”
3. Ki sa k te pouse Denise padone?
3 Ki sa k te pouse Denise padone? Li te medite sou fason Jewova padone (Miche 7:18). Lè n gen rekonesans dèske Jewova padone n, sa ap fè n anvi padone lòt moun.
4. Ki sa Jewova vle nou fè? (Efezyen 4:32).
4 Jewova vle nou padone lòt moun menm jan li padone n san grate tèt. (Li Efezyen 4:32.) Li atann pou n dispoze padone moun ki di n oswa fè n yon bagay ki fè n mal (Sòm 86:5; Lik 17:4). Nan atik sa a, nou pral egzamine twa bagay k ap ede n pi dispoze padone.
PA FÈ KÒMSI SA PA DI W ANYEN
5. Selon Pwovèb 12:18, ki jan n ka santi n lè yon moun di n oswa fè n yon bagay ki fè nou mal?
5 Nou ka santi n ap soufri anpil akoz sa yon moun di n oswa fè n, sitou si moun sa a se yon bon zanmi nou oswa yon moun nan fanmi nou (Sòm 55:12-14). Pafwa, nou ka santi se kòmsi yo ban nou yon kout kouto. (Li Pwovèb 12:18.) Nou ka eseye bliye sa k ap fè nou soufri a. Men, si nou fè sa, se kòmsi yo ta fin ban nou yon kout kouto epi n kite kouto a nan blese a. Menm jan an tou, nou pa ka atann n ap santi n pi byen si n fè kòmsi sa pa di n anyen.
6. Ki jan n ka reyaji lè yon moun di n oswa fè n yon bagay ki fè nou mal?
6 Lè yon moun di n oswa fè n yon bagay ki fè nou mal, premye reyaksyon nou ka genyen se fache. Labib fè konnen nou ka an kòlè. Sepandan, li mande n pou n pa ret fache (Sòm 4:4; Efe. 4:26). Poukisa? Paske, byen souvan, fason nou santi nou konn pouse n fè yon seri aksyon. An jeneral, kòlè pa konn bay bon rezilta (Jak 1:20). Pa bliye, fache se yon reyaksyon, men ret fache se yon chwa.
Fache se yon reyaksyon, men ret fache se yon chwa.
7. Ki lòt santiman nou ka genyen lè yon moun di n oswa fè n yon bagay ki fè nou mal?
7 Lè yo mal aji avè n, nou ka vin gen lòt santiman ki fè n soufri. Pa egzanp, men sa yon sè ki rele Anne di: “Lè m te timoun, papa m te kite manman m e li t al marye ak dam ki t ap okipe nou an. Mwen te santi l abandone m. Lè yo te vin gen pitit, mwen te santi l pa bezwen m ankò. Mwen te grandi ak santiman kòmkwa moun pa bezwen m.” Men ki jan yon sè ki rele Georgette fè konnen li te santi l lè mari l te vin pa fidèl avè l: “Nou te zanmi depi n te toupiti. Nou te pyonye ansanm! Kè m te fann lè sa te rive.” Finalman, yo te divòse. E men sa yon sè ki rele Naomi di: “Mwen pa t janm panse mari m ta ka fè m soufri. Donk, lè l te fè m konnen li te konn gade pònografi an kachèt, mwen te santi l desevwa m e m te santi l trayi m.”
8. a) Bay kèk rezon ki fè n bezwen padone lòt moun. b) Ki byenfè nou jwenn lè n padone? (Gade kare ki gen tit “ Ki sa pou n fè si yon moun fè n yon bagay ki boulvèse lavi n?”)
8 Nou pa ka gen kontwòl sou sa lòt moun ap di n oswa fè n, men nou ka chèche gen kontwòl sou fason n ap reyaji. E souvan, sa ki pi bon pou n fè se padone. Poukisa? Paske nou renmen Jewova e li vle nou padone. Si nou ret fache e nou pa padone, nou ka aji san reflechi, e sa ka gen efè sou sante n (Pwo. 14:17, 29, 30). Ann wè eksperyans yon sè ki rele Christine te fè. Men sa l di: “Lè yon moun di m oswa fè m yon bagay ki fè m mal e m kite sa fè m ret fache, mwen souri mwens. Mwen gen tandans manje manje ki pa bon pou mwen. Mwen pa dòmi ase, li vin pi difisil pou m metrize santiman m, e sa vin gen efè sou maryaj mwen ak sou relasyon m ak lòt moun.”
9. Poukisa nou pa dwe gen rankin?
9 Menmsi moun ki lakòz n ap soufri a pa janm rekonèt sa l fè a, nou ka fè yon jan pou sa pa afekte nou twòp. Kòman? Men sa Georgette nou te pale de li pi wo a di: “Sa te pran yon ti tan, men mwen te vin sispann santi m fache kont ansyen mari m nan. Sa te ede m santi m vrèman anpè.” Lè n pa ret fache, nou pa kite lahèn anvayi kè n. Epitou, nou fè tèt nou yon kado: nou sispann panse ak sa k te pase a e nou vin gen kè kontan nan lavi n ankò (Pwo. 11:17). Sepandan, ki sa w bezwen fè si w poko santi w ka padone?
SA W KA FÈ POU W SISPANN SANTI W FACHE
10. Poukisa nou bezwen bay tèt nou tan pou n geri? (Gade foto yo tou.)
10 Ki sa w ka fè pou w sispann santi w fache? Youn nan bagay ou kapab fè, se bay tèt ou tan pou w geri. Lè yon moun ki te blese grav fin resevwa swen, li bezwen tan pou l geri. Menm jan an tou, sa ka pran tan pou n santi n pare pou n padone yon moun ak tout kè n. — Ekl. 3:3; 1 Pyè 1:22.
Lè n blese, nou bezwen bonjan swen ak tan pou blese a geri, se menm bagay la tou lè yo di n oswa fè n yon bagay ki fè nou mal. (Gade paragraf 10.)
11. Ki jan lapriyè kapab ede w padone?
11 Priye Jewova pou w mande l ede w padone lòt moun c. Anne nou te pale de li pi wo a esplike ki jan lapriyè te ede l. Men sa l di: “Mwen te mande Jewova pou l padone nou chak nan fanmi an pou bagay nou te di oswa nou te fè ki pa t bon. Apre sa, mwen te ekri papa m ak dam li marye avè l la yon lèt pou m te di yo mwen padone yo.” Anne admèt li pa t fasil pou l te fè sa. Men sa l di: “Mwen swete lefètke m fè efò pou m padone menm jan ak Jewova, sa ap ankouraje papa m ak madanm li aprann plis sou Jewova.”
12. Poukisa n bezwen fè Jewova konfyans olye n fè santiman n konfyans? (Pwovèb 3:5, 6).
12 Fè Jewova konfyans, pa fè santiman w konfyans. (Li Pwovèb 3:5, 6.) Jewova toujou konnen sa k pi bon pou nou (Eza. 55:8, 9). Li pap janm mande nou fè yon bagay k ap fè nou soufri. Donk, lè Jewova mande nou padone, nou kapab gen asirans lè n fè sa, sa ap bon pou nou (Sòm 40:4; Eza. 48:17, 18). Yon lòt bò, si n fè santiman nou konfyans, nou ka pa janm rive padone (Pwo. 14:12; Jer. 17:9). Men sa Naomi nou te pale de li pi wo a di: “Okòmansman mwen te santi m gen rezon pou m pa t padone mari m poutèt li t ap gade pònografi. Mwen te pè pou l pa t fè m soufri ankò oswa pou l pa t bliye tout dega li te lakòz. Epitou, m te di tèt mwen Jewova konprann sa m santi. Men, m te kòmanse rann mwen kont se pa paske Jewova konprann santiman m ki fè l dakò ak yo. Li konnen jan m santi m e li konnen sa ap pran tan pou m geri, men tou, li vle m padone.” d
SA W KA FÈ POU W WÈ BAGAY YO YON FASON KI POZITIF
13. Selon Women 12:18-21, ki sa n bezwen fè?
13 Lè n padone yon moun ki di n oswa fè n yon bagay ki fè n mal anpil, nou pa vle annik deside pa pale sou sa k te pase a. Okontrè, nou dwe chèche fè lapè, sitou si moun ki mal aji avè n nan se yon frè oswa yon sè (Mat. 5:23, 24). Pou n rive fè sa, nou bezwen chwazi fè moun nan mizèrikòd olye n ret an kòlè, e n bezwen chwazi padone olye n kenbe rankin. (Li Women 12:18-21; 1 Pyè 3:9.) Ki sa k ka ede n fè sa?
14. Ki sa n bezwen fè efò pou n fè, e poukisa?
14 Nou bezwen fè efò pou n wè moun ki te mal aji avè n nan menm jan Jewova wè l. Jewova chwazi wè sa ki bon lakay moun (2 Kwo. 16:9; Sòm 130:3). An jeneral, sa n ap chèche lakay yon moun se sa n ap jwenn. Si se kalite n ap chèche, se kalite n ap jwenn, men si se defo n ap chèche, se defo n ap jwenn. Lè se bon bagay n ap chèche lakay lòt moun, l ap pi fasil pou n padone yo. Pa egzanp, men sa yon frè ki rele Jarrod di: “Mwen twouve l pi fasil pou m padone yon frè lè m konpare sa l fè m ki mal la ak tout bon bagay mwen renmen lakay li.”
15. Poukisa li ka bon pou w fè yon moun konnen ou padone l?
15 Yon lòt bagay enpòtan l ap bon pou w fè, se di moun nan ou padone l. Poukisa? Men sa Naomi nou te pale de li pi wo a di: “Mari m te mande m: ‘Èske w padone m?’ Lè m te ouvri bouch mwen pou m di l: ‘Mwen padone w’, mo yo pa t ka soti. Mwen te rann mwen kont m pa t padone l ak tout kè m vre. Rive yon lè, mwen te rive di l twa mo sa yo ki gen anpil fòs: ‘Mwen padone w.’ Lè m te di mari m mwen padone l, je l te plen dlo, e m te sezi wè jan l te vin soulaje ak jan m te santi m anpè. Depi lè a, mwen te rekòmanse fè l konfyans e nou vin bon zanmi ankò.”
16. Ki sa w aprann anrapò ak padone?
16 Jewova vle nou padone lòt moun (Kol. 3:13). Aktout sa, li ka pa fasil pou nou pou n padone lòt moun. N ap rive fè sa si n pa fè kòmsi sa pa di n anyen e si n fè efò pou n pa ret fache. Konsa, n ap ka vin wè bagay yo yon fason ki pozitif. — Gade kare ki gen tit “ Twa bagay k ap ede n padone”.
REFLECHI SOU BYENFÈ N AP JWENN LÈ N PADONE
17. Lè n padone, ki jan sa bon pou nou?
17 Nou gen anpil rezon pou n padone. Ann egzamine kèk ladan yo. Premyèman, nou imite Jewova, Papa nou an ki gen mizèrikòd, e nou fè l plezi (Lik 6:36). Dezyèmman, nou montre n gen Jewova rekonesans lefètke l padone nou (Mat. 6:12). E twazyèmman, nou vin gen pi bon sante e n kontinye gen bon relasyon ak lòt moun.
18-19. Lè n padone, ki rezilta sa ka bay?
18 Lè nou padone lòt moun, nou ka jwenn yon seri benediksyon nou pa t atann. Pa egzanp, gade sa k te rive Denise nou te pale de li pi wo a. Li pa t konnen mesye ki te lakòz aksidan an te planifye pou l te touye tèt li apre jijman an. Men, lè Denise te padone l, sa te tèlman touche l, li te vin ap etidye Labib ak Temwen Jewova yo.
19 Nou ka santi youn nan bagay ki pi difisil pou n fè se padone yon moun. Sepandan, se ka youn nan bagay ki bay plis kè kontan tou (Mat. 5:7). Kidonk, ann fè tout sa n kapab pou n imite Jewova, Sila a ki konn padone a.
KANTIK 125 ‘Byennere moun ki gen mizèrikòd yo!’
a Gen kèk non yo chanje.
b Nan yon sitiyasyon konsa, se chak kretyen ki dwe deside sa l ap fè.
c Gade videyo chante ki gen tit “Annou youn padone lòt”, “Padone nèt” ak “Zanmi ankò” sou jw.org.
d Byenke gade pònografi se peche e sa fè moun soufri, sa pa bay moun ki marye ki inosan an dwa pou l divòse selon Bib la.
