ÈSKE W te deja fè fas ak yon pwoblèm e w pa t jwenn moun pou ede w? N ap viv nan ‘tan ki di e ki difisil pou moun sipòte’ ki kapab fè n santi n dekouraje, e nou ka santi n poukò n (2 Tim. 3:1). Men, nou pa oblije fè fas ak pwoblèm sa yo poukont nou. Bib la montre enpòtans bon zanmi genyen “lè gen malè”. — Pwo. 17:17.

Pandan apot Pòl t ap vwayaje antanke misyonè, kèk zanmi l ki te ansanm avè l te ede l (Kol. 4:​7-11). Lè Pòl te nan prizon nan vil Wòm, zanmi l yo te ede l fè kèk travay li pa t ka fè poukont li. Pa egzanp, Epafwodit te fè Pòl jwenn pwovizyon frè ak sè nan vil Filip yo te voye (Flp. 4:18). Tichik te bay plizyè kongregasyon lèt Pòl te ekri yo (Kol. 4:7). Lefètke zanmi Pòl yo te ede l, li te rive ankouraje kongregasyon yo menm lè l pa t gen dwa kite kay kote l te ye a. E l te fè sa tou annapre, lè yo te mete l nan prizon. Jodi a, ki jan w ka yon bon zanmi?

Jodi a, gen frè ak sè ki montre ki jan bon zanmi konn ede youn lòt. Ann pran egzanp yon sè ki te montre li se yon bon zanmi pou Elisabet, yon pyonye pèmanan nan peyi Espay. Lè doktè te dekouvri manman Elisabet gen yon kansè ki nan dènye faz li, sè a te ekri plizyè mesaj ki baze sou Bib la voye bay Elisabet. Men sa Elisabet di: “Mesaj sa yo te ban m fòs pou m fè sa m te bezwen fè, e sa te fè m pa santi m poukò m.” — Pwo. 18:24.

Nou ka vin pi bon zanmi kretyen parèy nou lè nou patisipe ansanm avè yo nan aktivite kongregasyon an. Pa egzanp, èske w ta ka ofri tèt ou pou w al chèche yon frè oswa yon sè ki granmoun pou w mennen l nan reyinyon oswa nan predikasyon? Lè w fè sa, sandout, youn ap ankouraje lòt (Wom. 1:12). Sepandan, gen kèk kretyen ki pa ka kite lakay yo. Ki jan nou kapab montre nou se yon bon zanmi pou yo?

Gen kèk kwayan parèy nou ki gen pwoblèm sante oswa lòt sitiyasyon ki fè yo pa ka asiste reyinyon an pèsòn. Ann pran egzanp David, yon frè doktè te dekouvri ki gen kansè. Pandan plis pase sis mwa, li te fè chimyoterapi. Pandan David t ap fè tretman, li menm ak madanm li, Lidia, te asiste reyinyon pa mwayen videyo konferans.

Ki jan zanmi yo te gen nan kongregasyon an te ede yo? Apre chak reyinyon, gen kèk frè ak sè nan Sal Wayòm nan ki te pran yon ti tan pou yo pale ak David ak Lidia pa mwayen videyo konferans. Epitou, lè David  ak Lidia te fè kòmantè, gen frè ak sè ki te ekri yo yon ti mesaj pou ankouraje yo. Ki rezilta sa te bay? David ak Lidia pa t twò santi yo poukont yo.

Petèt, nou ka fè aranjman pou n preche ak frè ak sè ki oblije ret lakay yo. Nou kapab fè kèk ti chanjman nan pwogram nou pou nou preche ansanm avèk yo. Konsa, n ap montre nou pa bliye yo (Pwo. 3:27). Petèt, li t ap bon pou w pase yon ti tan ansanm avèk yo pou n ekri lèt oswa pou n rele moun nan telefòn pou n preche yo. Moun ki oblije ret lakay yo ka konekte nan reyinyon pou predikasyon an pa mwayen videyo konferans. David ak Lidia te apresye aranjman sa a kongregasyon an te fè pou yo. Men sa David esplike: “Lefètke n te asiste reyinyon pou predikasyon e n te tande priyè frè yo te fè, sa te ban n anpil fòs.” Mete sou sa, si pap gen pwoblèm, èske w pa ta ka fè aranjman tanzantan pou w mennen yon etidyan w al fè etid la lakay yon frè oswa yon sè ki pa ka deplase?

Lè n pase tan ak frè n ak sè n ki oblije ret lakay yo, n ap wè bèl kalite yo genyen e n ap vin pi pwòch avè yo. Pa egzanp, lè w patisipe nan travay predikasyon an ak pwoklamatè sa yo e w wè jan yo byen sèvi ak Pawòl Bondye a pou yo touche kè moun, sa ap fè w pi apresye yo toujou. Lè w ede frè w ak sè w yo nan sèvis Jewova a, ou ka vin gen plis zanmi. — 2 Kor. 6:13.

Tit, yon zanmi Pòl, te vin wè l e sa te ede l santi l byen (2 Kor. 7:​5-7). Sa fè n sonje nou pap sèlman di frè n ak sè n yo pawòl ki pou ankouraje yo, men, n ap fè efò pou n pase tan avè yo e n ap fè yon seri bagay pou n ede yo. — 1 Jan 3:18.

Frè n ak sè n yo nan peyi Larisi ban nou yon bèl egzanp lefètke yo ede youn lòt. Ann pran egzanp Sergey ak madanm li, Tatyana. Apre lapolis te fin fouye kay yo, yo te ale avè yo pou yo poze yo kesyon. Yo te lage Tatyana anvan e l te retounen lakay. Men sa Sergey di: “Tousuit apre [Tatyana] te rive lakay, gen yon sè ki te gen kran ki te vin wè l. Annapre, te gen plis frè ak sè ki te vin ede n ranje apatman nou an.”

Men sa Sergey ajoute: “Mwen te toujou renmen Pwovèb 17:17 ki di: ‘Yon bon zanmi demontre lanmou toutan e li se yon frè yo ka konte sou li lè gen malè.’ Pawòl sa yo te vin gen plis sans pou mwen nan moman pèsekisyon sa a lè m te santi m te bezwen èd. Jewova te ede m jwenn zanmi ki pa t pè kanpe avè m.” a

Tank n ap fè fas ak sitiyasyon ki vin pi difisil, se tank n ap bezwen zanmi ki pou ede nou. N ap bezwen yo plis toujou pandan gwo tribilasyon an. Ann fè anpil efò pou n se yon bon zanmi depi kounye a! — 1 Pyè 4:​7, 8.