ÈSKE W remake jan gen anpil moun nan monn nan ki panse moun dwe aji ak yo yon fason espesyal e yo dwe ba yo yon seri privilèj? Kèlkeswa fason moun aji ak yo, yo toujou panse yo merite plis. Moun ki panse konsa yo montre yo egoyis e yo pa montre yo gen rekonesans pou sa yo jwenn. Bib la te fè konnen se atitid sa yo moun yo t ap genyen nan dènye jou yo. — 2 Tim. 3:2.

Natirèlman, egoyis se pa yon bagay ki nouvo. Adan ak Èv te deside chwazi pou yo menm sa ki byen ak sa ki mal, e sa gen gwo konsekans. Plizyè syèk annapre, Ozyas, wa peyi Jida, te panse li te gen dwa ofri lansan nan tanp lan, men l te fè yon erè grav (2 Kwo. 26:​18, 19). Menm jan an tou, Farizyen yo ak Sadiseyen yo te kwè yo te merite jwenn favè espesyal nan men Bondye, jis paske yo te desandan Abraram. — Mat. 3:9.

Nou chaje ak moun egoyis toutotou nou, e atitid yo kapab detenn sou nou (Gal. 5:26). Nou ta ka kòmanse panse nou merite pou n resevwa yon privilèj, oswa nou merite pou yo aji ak nou yon fason espesyal. Ki sa k ka ede n pou n pa panse menm jan ak moun sa yo? Toudabò, nou bezwen konn sa Jewova panse sou sa. Gen de prensip nan Bib la k ap ede n.

Se Jewova ki deside sa nou merite jwenn. Ann pran kèk egzanp.

•   Nan fanmi an, mari a bezwen santi madanm li respekte l, e madanm nan bezwen santi mari l renmen l (Efe. 5:33). Moun ki marye yo dwe gen je sèlman sou moun yo marye avè l la (1 Kor. 7:3). Paran yo gen dwa mande pitit yo obeyi yo, e timoun yo kapab atann pou paran yo pran swen yo epi montre yo renmen yo. — 2 Kor. 12:14; Efe. 6:2.

• Ansyen yo k ap travay di nan kongregasyon an merite pou nou ba yo respè (1 Tes. 5:12). Sepandan, yo pa gen dwa domine sou frè ak sè yo. — 1 Pyè 5:​2, 3.

• Bondye bay gouvènman lèzòm yo dwa pou yo mande moun y ap dirije yo peye taks e pou yo resevwa onè nan men moun sa yo. — Wom. 13:​1, 6, 7.

Jewova kontan ban nou plis pase sa nou merite. Piske nou se pechè, sèl sa nou merite se lanmò (Wom. 6:23). Aktout sa, lefètke Jewova gen yon lanmou ki fidèl pou nou, li ban nou anpil benediksyon (Sòm 103:​10, 11). Chak benediksyon oswa privilèj Bondye ban nou se favè san parèy li fè nou. — Wom. 12:​6-8; Efe. 2:8.

Pa suiv atitid ki gen nan monn nan. San nou pa rann nou kont, nou ka kòmanse panse nou merite plis pase lòt moun. Jezi te montre jan n ta ka kòmanse panse konsa byen fasil lè l te bay egzanp travayè yo te peye yon denye yo. Gen kèk travayè ki te kòmanse travay byen bonè nan maten e yo te travay tout jounen an anba yon solèy cho. Gen lòt ki te travay pandan sèlman inèdtan. Premye gwoup travayè a te panse yo te merite pou yo peye yo plis kòb pou travay yo te fè a (Mat. 20:​1-16). Jezi te sèvi ak egzanp sa a pou l montre disip li yo enpòtans pou yo satisfè ak sa Bondye ba yo.

Montre nou gen rekonesans, nou pa dwe egzijan (1 Tes. 5:18). Ann imite apot Pòl ki pa t mande kretyen Korent yo ba l sa li te bezwen, alòske li te gen dwa fè sa (1 Kor. 9:​11-14). Nou bezwen gen rekonesans pou chak benediksyon nou resevwa e nou pa dwe egzijan.

 Chèche gen imilite. Lè yon moun bay tèt li twòp enpòtans, an jeneral, li ka vin ap panse li gen plis dwa pase lòt moun. Lè n gen imilite, sa ap ede n goumen ak vye panse sa a.

Pwofèt Dànyèl ban nou yon bèl egzanp nan demontre imilite. Lefètke li te sot nan gran fanmi, li te bèl gason, li te entèlijan e li te gen lòt kapasite, sa te kapab fè l panse li te merite privilèj espesyal li te jwenn yo (Dàn. 1:​3, 4, 19, 20). Sepandan, Dànyèl te kontinye gen imilite, e se kalite sa a ki te fè l gen anpil valè pou Jewova. — Dàn. 2:30; 10:​11, 12.

Ann fè efò pou nou pa suiv atitid egoyis ki gaye toupatou nan monn nan jodi a, kote moun yo se tèt yo sèlman yo wè. Okontrè, ann kontinye jwenn kè kontan nan chak benediksyon Jewova ban nou grasa favè san parèy li fè nou.