John ak madanm li, Mary a, ap viv yon kote sou tè a ki gen anpil moun ki sot nan peyi Filipin pou vin travay nan zòn nan, e yo kontan pataje bon nouvèl la ak yo. Pandan pandemi COVID-19 la, Mary te kòmanse kondui etid biblik nonsèlman nan peyi kote l ap viv la, men tou, plizyè lòt kote sou tè a. Ki jan l te rive fè sa?

Mary konn mande etidyan l yo: “Èske w konn lòt moun ki ta renmen etidye Labib?” Si yo te di wi, li te konn mande yo pou yo fè l fè konesans ak moun sa yo. Lè Mary te konn poze kesyon tou senp sa a, sa te konn bay bon rezilta. Sa k fè sa? Paske, an jeneral, moun ki renmen Pawòl Bondye a vle pataje sa yo aprann ak moun nan fanmi yo ak zanmi yo. Ki rezilta Mary te jwenn lefètke l te poze etidyan l yo kesyon sa a?

Jasmin, yon etidyan Mary, te fè Mary fè konesans ak kat lòt moun ki te vle etidye Labib. Youn ladan yo ki rele Kristine te tèlman renmen etid la, li te mande Mary pou l fè etid avè l de fwa pa semèn. Lè Mary te mande Kristine si l konn yon lòt moun ki ta renmen etidye Labib, Kristine te di: “Wi, m ap fè w fè konesans ak zanmi m yo.” Nan kèk semèn, Kristine te fè Mary fè konesans ak kat zanmi l ki te vle etidye. Annapre, Kristine te fè Mary fè konesans ak lòt zanmi l, kèk nan yo te bay Mary non lòt moun ki ta renmen etidye Labib tou.

Epitou, Kristine te vle pou fanmi l k ap viv nan peyi Filipin aprann verite ki nan Bib la. Donk, li te pale sou sa ak Andrea, pitit fi l. Okòmansman, Andrea te di tèt li: ‘Temwen Jewova yo se yon sèk, yo pa kwè nan Jezi, e yo sèvi sèlman ak Ansyen Testaman an.’ Men, apre sèlman yon etid, li te rann li kont sa l te panse sou Temwen Jewova yo se pa t sa. Pandan etid li t ap fèt, li te konn di: “Depi se Labib ki di sa, se laverite!”

Rive yon lè, Andrea te fè Mary fè konesans ak de zanmi l ak yon kòlèg travay li e yo te vin ap etidye. Epitou, san Mary pa t konnen, Angela, yon matant Andrea ki avèg, te konn ap koute lè yo t ap fè etid la. Epi yon jou, Angela te mande Andrea pou l fè l fè konesans ak Mary, e l te mande Mary pou l etidye ak li. Angela te renmen sa l t ap aprann yo. Nan yon mwa, li te gentan kenbe plizyè vèsè nan tèt li, e l te vle fè etid la kat fwa pa semèn! Grasa èd Andrea, Angela te kòmanse asiste reyinyon regilyèman pa mwayen videyo konferans.

 Lè Mary te aprann Joshua, mari Kristine nan, t ap koute an chatpent pandan etid la t ap fèt, Mary te mande l si l ta renmen suiv etid la ak yo. Joshua te di l: “M ap jis koute, men, pa poze m okenn kesyon. Si w poze m kesyon m prale.” Pandan senk premye minit etid la, li te poze plis kesyon pase Kristine e l te vle kontinye pale sou Bib la.

Kesyon tou senp Mary te konn poze a te fè l jwenn plizyè etid. Li te fè aranjman pou lòt Temwen etidye ak plizyè nan moun sa yo. Antou, Mary te kòmanse 28 etid Labib nan kat peyi.

Jasmin, premye etidyan nou te pale de li nan esperyans sa a, te batize ann avril 2021. Kristine te batize an me 2022 e l te retounen Filipin pou l ka ansanm ak fanmi l. De lòt etidyan Kristine te fè Mary fè konesans ak yo a te batize tou. Kèk mwa annapre, Angela te batize e kounye a li se pyonye pèmanan. Joshua, mari Kristine nan, ansanm ak Andrea, pitit fi yo a, ak plizyè lòt etidyan ap fè bonjan pwogrè.

Nan premye syèk la, anpil moun te pataje bon nouvèl la ak moun nan fanmi yo ak zanmi yo (Jan 1:​41, 42a; Tra. 10:​24, 27, 48; 16:​25-33). Èske w te ka mande etidyan Labib ou yo ak lòt moun ki enterese: “Èske w konn lòt moun ki ta renmen etidye Labib?” Ou pa janm konnen kantite etid ou ka kòmanse si ou menm tou ou poze moun yo kesyon tou senp sa a!