JOU mèkredi ki te 24 janvye 2018 la, fanmi Betèl Etazini an ak fanmi Betèl Kanada a te kontan tande yon anons espesyal: frè Kenneth Cook, Jr. vin fè pati Kolèj santral Temwen Jewova yo.

Frè Cook te fèt nan Pennsilvani, Ozetazini, e se la li te leve. Se yon kondisip li ki te aprann li laverite yon ti tan anvan l te fini lekòl segondè. Li te batize nan dat 7 jen 1980. Li te kòmanse sèvis aplentan antanke pyonye pèmanan 1^ye septanm 1982. Apre li te fin fè dezan pyonye, yo te envite l vin nan Betèl. Li te kòmanse sèvis li nan Betèl Wòlkil, nan Nouyòk, nan dat 12 oktòb 1984.

Pandan 25 ane ki te vin apre yo, frè Cook te pase nan divès sèvis, ni nan enprimri ni nan Biwo Betèl. Li te marye ak Jamie an 1996, e madanm li te vin sèvi avè l nan Betèl Wòlkil. An desanm 2009, yo te transfere frè ak sè Cook nan Sant ansèyman Temwen Jewova yo ki nan Patèsonn, nan Nouyòk, kote frè Cook te resevwa asiyasyon pou l travay ak Sèvis korespondans. Ann avril 2016, apre frè ak sè Cook te fin tounen nan Wòlkil pou yon ti tan tou kout, yo te transfere yo Bwouklin, nan Nouyòk. Senk mwa apre, yo te demenaje al nan nouvo syèj mondyal la ki nan Wòwik, Nouyòk. An janvye 2017, yo te nome frè Cook pou l ede Komite redaksyon Kolèj santral la.