1. Menm jan ak wa David, ki kesyon kèk nan nou ka poze?

NOU tout vle viv anpè. Pa gen moun ki renmen viv ak enkyetid. Men, pafwa nou ka santi nou gen anpil tètchaje. Anfèt, gen kèk sèvitè Jewova ki ka poze menm kesyon wa David te poze Jewova a. Men sa David te mande l: “Pandan konbyen tan ankò m ap kontinye viv ak enkyetid, ak lapenn nan kè m chak jou ki pase?” — Sòm 13:2.

2. Sou ki sa nou pral pale nan atik sa a?

² Byenke nou pap janm pa gen okenn tètchaje, gen anpil bagay nou ka fè pou nou gen mwens enkyetid. Nan atik sa a, toudabò, nou pral chèche wè kèk bagay ki ka lakòz nou gen enkyetid. Apre sa, nou pral pale sou sis bagay nou ka fè pou nou ret dousman lè nou jwenn pwoblèm.

3. Ki bagay ki ban nou strès, e èske nou ka anpeche bagay sa yo rive?

³ Gen anpil bagay ki ka fè nou gen enkyetid, e nou pa ka anpeche kèk nan bagay sa yo rive. Pa egzanp, nou pa ka gen kontwòl sou pri manje, pri rad ak pri kay k ap ogmante chak ane. Nou pa ka gen kontwòl sou kantite fwa kòlèg travay nou oswa kondisip nou ap eseye tante nou pou nou aji yon fason ki malonèt oswa ki imoral. Nou pa ka anpeche krim fèt nan zòn bò lakay nou. N ap fè fas ak  sitiyasyon sa yo paske n ap viv nan yon monn kote pifò moun pa suiv prensip ki nan Bib la. Satan, dye monn sa a, konnen gen kèk moun k ap kite “tètchaje ki gen nan sistèm sa a” anpeche yo sèvi Jewova (Mat. 13:22; 1 Jan 5:19). Donk, nou pa sezi dèske monn nan chaje ak pwoblèm ki fè moun gen anpil strès.

4. Ki jan n ka reyaji lè n jwenn gwo pwoblèm?

⁴ Nou ka tèlman ap enkyete lè nou gen gwo pwoblèm, se ak sa sèlman n ap panse. Pa egzanp, nou ka ap enkyete paske nou pa touche ase kòb pou n achte sa n bezwen, oswa nou gendwa pè pou n pa vin malad epi pou sa fè n pa ka travay oswa menm pèdi travay nou. Nou ka ap enkyete tou pou n pa ta dezobeyi lwa Bondye yo lè nou devan tantasyon. Talè konsa Satan pral fè moun ki anba kontwòl li atake pèp Bondye a. Se sa k fè nou ka ap enkyete paske nou pa konn ki jan n ap reyaji devan atak sa a. Nou ka ap mande tèt nou: ‘Èske sa mal pou m ap bay tèt mwen pwoblèm pou bagay sa yo?’

5. Ki sa Jezi te vle di lè l te di: “Sispann bay tèt nou pwoblèm”?

⁵ Nou konnen Jezi te di disip li yo: “Sispann bay tèt nou pwoblèm.” ​(Mat. 6:25). Èske Jezi te vle di nou pa dwe enkyete ditou pou kèlkeswa bagay la? Non! Dayè, nan tan lontan, gen sèvitè Jewova ki te fidèl ki te konn enkyete yo, men, yo pa t pèdi favè Jewova pou sa * (1 Wa 19:4; Sòm 6:3). Anfèt, se ankouraje Jezi t ap ankouraje n. Li pa t vle pou n vin tèlman ap enkyete pou n jwenn bagay nou bezwen, nou vin neglije sèvis n ap bay Bondye a. Donk, ki sa n ka fè pou n pa enkyete depase limit? — Gade kare ki gen tit “ Fason pou n fè sa”.

6. Selon Filipyen 4:6, 7, ki sa k ka ede n pa gen twòp enkyetid?

⁶ 1) Priye souvan. Lè yon kretyen gen yon pwoblèm k ap boulvèse l, li ka priye Jewova ak tout kè l (1 Pyè 5:7). Jewova kapab reponn priyè w lè l ba w “lapè Bondye ki depase tout sa moun ka konprann” nan. (Li Filipyen 4:6, 7.) Jewova sèvi ak lespri sen l ki gen anpil pisans pou l kalme panse k ap trakase nou. — Gal. 5:22.

7. Ki sa n bezwen sonje lè n ap priye Bondye?

⁷ Lè w ap priye Jewova, ouvri kè w ba li. Di l egzakteman sa w genyen. Fè l konn pwoblèm ou epi di l ki jan sa fè w santi w. Si pwoblèm nan ka rezoud, mande l pou l ba w sajès pou w kapab jwenn yon solisyon e pou w jwenn kouraj pou w fè sa w dwe fè a. Si w pa ka fè anyen pou w rezoud pwoblèm nan, mande Jewova ede w pou w pa enkyete depase limit. Lè w di Jewova egzakteman ki pwoblèm ou genyen, l ap vin pi fasil pou w wè fason l reponn ou. Si w pa jwenn repons priyè w yo tousuit, pa sispann priye. Nonsèlman Jewova vle w di l egzakteman sa w genyen, men tou, li vle w kontinye priye sou sa. — Lik 11:8-10.

8. Lè w ap priye, ki sa w ta dwe sonje di?

⁸ Lè w ap priye Jewova pou w fè l konnen sa k ap enkyete w, sonje di l mèsi tou. Li bon pou n reflechi ak tout bon bagay nou genyen, menm lè nou  gen anpil pwoblèm. Si pafwa ou pa konn egzakteman sa pou w di Jewova lè w vle fè l konnen sa k ap trakase w, sonje Jewova ap reponn priyè w, menmsi se sèlman ‘tanpri ede m!’ ou kapab di. — 2 Kwo. 18:31; Wom. 8:26.

9. Ki jan n ka jwenn vrè sekirite a?

⁹ 2) Konte sou sajès Jewova, pa konte sou sajès pa w. Nan uityèm syèk anvan epòk nou an, pèp Jida a te pè pou Asiryen yo pa atake yo. Yo te tèlman pè pou yo pa t tonbe anba jouk Asiryen yo, yo te mande Ejip ede yo (Eza. 30:1, 2). Jewova te avèti yo, li te di yo, piske yo te met konfyans yo nan Ejip, sa t ap fini mal pou yo (Eza. 30:7, 12, 13). Jewova te sèvi ak pwofèt Ezayi pou l te fè pèp la konnen ki jan y ap ka jwenn vrè sekirite a. Li te di: “Si nou ret dousman e nou montre nou gen konfyans [nan Jewova], se sa k ap fòs nou.” — Eza. 30:15b.

10. Nan ki sitiyasyon nou kapab montre nou gen konfyans nan Jewova?

¹⁰ Ki jan n ka montre nou fè Jewova konfyans? Ann pran kèk egzanp. Ann sipoze yo ta ofri w yon travay ki byen peye men k ap pran anpil nan tan w e k ap anpeche w sèvi Jewova jan w ta dwe fè sa. Oswa, ann sipoze yon moun nan travay la ta montre l enterese nan ou, men moun sa a pa yon sèvitè Bondye ki batize. Oubyen, ann imajine yon moun nan fanmi w ou renmen ta mande w pou w fè yon chwa ki difisil, li ta di w: “Chwazi ant mwen menm ak Bondye w la.” Nan chak sitiyasyon sa yo, w ap gen pou w pran yon desizyon ki difisil, men, Jewova ap ba w èd ou bezwen an (Mat. 6:33; 10:37; 1 Kor. 7:39). Èske w ap fè Jewova konfyans pou w suiv direksyon li ba ou?

11. Ki istwa nan Bib la nou ka egzamine pou nou ka ret dousman lè n jwenn opozisyon?

¹¹ 3) Aprann nan bon egzanp yo ak nan move egzanp yo. Gen anpil istwa nan Bib la ki montre jan l enpòtan pou n ret dousman e pou n met konfyans nou nan Jewova. Pandan w ap egzamine istwa sa yo, remake ki sa k te ede kèk sèvitè Bondye ret dousman lè yo te jwenn gwo opozisyon. Pa egzanp, lè pi gwo tribinal Juif yo te bay apot yo lòd pou yo sispann preche, yo pa t pran nan presyon. Okontrè, yo te di avèk kran: “Se Bondye nou dwe obeyi antanke chèf, se pa lèzòm.” ​(Tra. 5:29). Menm apre yo te fin bat yo, yo pa t pè. Sa k fè sa? Se paske yo te konnen Jewova te avèk yo. Yo te fè kè Jewova kontan. Se sa k fè yo te kontinye preche bon nouvèl la (Tra. 5:40-42). Menm jan an tou, lè yo t apral touye disip Etyèn, li te tèlman ret dousman e li te kalm, figi l te “tankou figi yon zanj”. (Tra. 6:12-15.) Sa k te fè sa? Se paske li te gen asirans li fè Jewova plezi.

12. Selon 1 Pyè 3:14 ak 4:14, poukisa nou kapab kontan lè yo pèsekite nou?

¹² Apot yo te gen bonjan prèv Jewova te avèk yo. Li te ba yo pisans pou yo fè mirak (Tra. 5:12-16; 6:8). Li pa fè menm bagay la pou nou jodi a. Sepandan, Jewova montre li renmen nou e li ban nou asirans pa mwayen Pawòl li a, lè n ap soufri pou sa ki jis, nou fè kè l kontan e lespri sen avèk nou. (Li 1 Pyè 3:14; 4:14.) Se sa k fè, olye pou n ret ap panse sou fason nou ka reyaji lè nou jwenn gwo pèsekisyon alavni, nou bezwen konsantre sou sa nou ka fè kounye a pou nou vin gen plis konfyans nan kapasite Jewova genyen pou l ban nou fòs e pou l  delivre nou. Menm jan ak kretyen nan premye syèk yo, nou dwe gen konfyans nan pwomès Jezi te fè a. Men sa l te di: “M ap mete pawòl sajès nan bouch nou. Menmsi tout opozan nou yo ta met ansanm, yo pap ka kenbe tèt ak pawòl sa yo, yo pap ka di anyen.” Men garanti li ban nou: “Grasa andirans nou, n ap gen lavi.” ​(Lik 21:12-19). E pa janm bliye sa, Jewova sonje tout ti detay sou sèvitè l ki mouri fidèl yo. E l ap sèvi ak sa lè l ap resisite yo.

13. Ki jan sa ka itil nou lè nou egzamine eksperyans moun ki pa t ret dousman e ki pa t met konfyans yo nan Jewova?

¹³ Nou ka aprann anpil bagay tou nan eksperyans moun ki pa t ret dousman e ki pa t met konfyans yo nan Jewova. Lè nou egzamine move egzanp sa yo, sa ap ede nou evite fè menm erè yo te fè yo. Pa egzanp, lè wa Aza te fèk kòmanse dirije peyi Jida, li te konte sou Jewova lè yon gwo lame te vin atake l, e Jewova te fè l pot laviktwa (2 Kwo. 14:9-12). Annapre, lè wa Baacha, ki t ap dirije peyi Izrayèl, ak lame l la, ki te pi piti lontan, te vin atake Aza, Aza te peye moun peyi Siri yo pou yo te vin ede l olye l te konte sou Jewova pou l jwenn delivrans, jan l te deja fè sa (2 Kwo. 16:1-3). Nan fen lavi l, lè l te vin gen yon maladi ki grav anpil, li pa t konte sou Jewova pou ede l. — 2 Kwo. 16:12.

14. Ki sa nou ka aprann nan erè Aza te fè?

¹⁴ Okòmansman, Aza te chèche èd Jewova lè l te jwenn pwoblèm. Men annapre, li pa t mande Bondye l la èd, li te pito chèche rezoud pwoblèm yo poukont li. Yon moun te ka panse plan Aza te genyen pou l mande moun peyi Siri yo vin ede l nan lagè l t apral fè ak Izrayèl la te parèt bon. Men, lapè li te genyen an pa t dire. Men sa Jewova te voye yon pwofèt al di l: “Kòm se sou wa Siri a ou te konte e w pa t konte sou Jewova, Bondye w la, lame wa Siri a chape nan men w.” ​(2 Kwo. 16:7). Nou dwe fè atansyon pou n pa tèlman vin gen konfyans nan fason n ap jere yon sitiyasyon nou pa kite Jewova gide nou pa mwayen Pawòl li a. Menm lè nou devan yon sitiyasyon ki mande pou nou aji vit, nou bezwen ret dousman epi konte sou Jewova, e l ap ede nou pran bon desizyon.

15. Ki sa n ka fè lè n ap li Labib?

¹⁵ 4) Aprann kèk vèsè pa kè. Lè w jwenn yon seri vèsè nan Bib la ki montre se lè yon moun ret dousman e li met konfyans li nan Jewova l ap jwenn fòs, fè efò pou w aprann kèk nan yo pa kè. Yon bagay ki ka ede w se lè w li vèsè sa yo awotvwa oswa w ekri yo e w gade yo tanzantan. Jewova te bay Jozye lòd pou l li liv Lalwa a tou ba regilyèman pou l ka aji avèk sajès. Rapèl sa yo t ap ede l tou pou l pa t pè e pou l te jwenn kouraj pou l gide pèp Bondye a (Joz. 1:8, 9). Gen anpil vèsè nan Pawòl Bondye a ki ka fè lespri nou ak kè nou anpè nan yon seri sitiyasyon ki te kapab fè nou enkyete oswa panike. — Sòm 27:1-3; Pwo. 3:25, 26.

16. Ki jan Jewova itilize kongregasyon an pou ede nou ret dousman epi fè l konfyans?

¹⁶ 5) Pase tan ak moun ki fè pati pèp Bondye a. Jewova sèvi ak frè n ak sè n yo pou ede nou ret dousman e pou n met konfyans nou nan li. Nan reyinyon yo, enstriksyon nou jwenn nan diskou yo, kòmantè moun nan asistans lan ansanm ak konvèsasyon ankourajan nou gen ak  frè ak sè yo ede nou (Ebre 10:24, 25). Nou kapab jwenn anpil ankourajman tou lè nou di zanmi nou fè konfyans ki nan kongregasyon an sa n santi. “Yon bèl ti pawòl” yon zanmi di nou kapab ede n gen mwens enkyetid. — Pwo. 12:25.

17. Selon Ebre 6:19, ki jan esperans Wayòm nan kapab ede nou rete kalm lè n ap fè fas ak sitiyasyon ki difisil?

¹⁷ 6) Kenbe esperans ou genyen an fèm. Esperans Wayòm nan “tankou yon lank batiman pou nanm nou”, li ede nou rete kalm lè n ap fè fas ak sitiyasyon ki difisil oswa lè nou gen enkyetid. (Li Ebre 6:19.) Medite sou pwomès Jewova fè nou anrapò ak lavni, kote pa gen moun k ap gen enkyetid ankò (Eza. 65:17). Imajine w k ap viv nan monn nouvo a kote k ap gen lapè e pap gen anyen k ap fè nou pè ankò (Miche 4:4). Esperans ou an ap pi solid lè w pataje l ak lòt moun. Fè tout sa w kapab nan travay preche epi fè disip la. Si w fè sa, ou ka “gen yon asirans total nan esperans lan jiska lafen”. — Ebre 6:11.

18. Ki pwoblèm nou ka jwenn alavni, e ki jan n ap kapab fè fas ak yo?

¹⁸ Tank sistèm sa a ap rive nan bout li, n ap jwenn plis pwoblèm ki ka fè nou gen enkyetid. Tèks pou ane 2021 an kapab ede nou fè fas ak pwoblèm sa yo epi ret dousman, se pa paske nou konte sou pwòp fòs pa nou, men paske nou met konfyans nou nan Jewova. Pandan ane a, annou montre nan aksyon nou nou gen lafwa nan pwomès Jewova fè nou an ki di: “Si nou ret dousman e nou montre nou gen konfyans, se sa k ap fòs nou.” — Eza. 30:15.