1-2. Ki difikilte sèvitè fidèl Jewova yo ka jwenn?

 SI YON bagay terib rive nou, sa kapab chanje lavi nou bridsoukou. Pa egzanp, gen yon frè fidèl ki te rele Luis a ki te aprann li fè yon kansè ki ra. Doktè a te fè l konnen li ret sèlman kèk mwa pou l viv. Monika ak mari l te gen anpil aktivite nan sèvis Bondye. Epi yon jou, Monika te aprann mari l, ki te yon ansyen, gen lontan depi l ap peche an kachèt. Olivia, yon sè selibatè, te oblije kite kay li akoz yon gwo siklòn ki t ap vini. Lè l te retounen, li te wè siklòn nan te kraze kay li. Nan yon bat je, lavi moun sa yo te chanje nèt. Èske gen yon bagay terib ki te rive w ki te chanje lavi w bridsoukou?

² Antanke sèvitè fidèl Jewova, nou konn jwenn difikilte e nou konn malad menm jan ak tout moun. Epitou, nou ka oblije andire opozisyon oswa pèsekisyon anba men moun ki rayi pèp Bondye a. Byenke Jewova pa anpeche nou jwenn pwoblèm sa yo, li pwomèt l ap ede nou (Eza. 41:10). Grasa èd Jewova, nou ka kontinye gen kè kontan, nou ka pran bon desizyon, e nou ka ret fidèl avè l menm nan sitiyasyon ki pi difisil yo. Nan atik sa a, nou pral wè kat fason Jewova ede n nan moman ki difisil anpil nan lavi n. Epitou, nou pral wè sa n bezwen fè pou n jwenn èd li bay.

JEWOVA AP PWOTEJE W

3. Lè gen yon bagay terib ki rive n, ki sa n ka twouve ki difisil pou n fè?

³ Difikilte. Lè gen yon bagay terib ki rive n, nou ka twouve l difisil pou n byen reflechi e pou n pran desizyon.  Sa k fè sa? Nou ka ap soufri anpil. Tètchaje ka fè n pa ka reflechi. Nou ka santi se kòmsi nou nan yon bwouya, e nou pa wè ni devan ni dèyè. Remake ki jan de sè nou te pale de yo pi wo a te santi yo lè yo te nan pwoblèm. Men sa Olivia di: “Apre siklòn nan te fin kraze kay mwen, m pa t konn sa pou m fè e m te dekontwole nèt.” Men sa Monika di konsènan kou trèt mari l te fè a: “Sa te fè m mal anpil. Se kòmsi yon moun te ban m yon kout kouto. Li te vin difisil pou m fè menm aktivite ki pi fasil yo. M pa t janm panse sa te ka rive m.” Ki sa Jewova di l ap fè pou l ede nou lè n pa konn sa pou n fè?

4. Selon Filipyen 4:​6, 7, ki sa Jewova pwomèt nou?

⁴ Sa Jewova fè. Li pwomèt l ap ban nou sa Bib la rele “lapè Bondye”. (Li Filipyen 4:​6, 7.) Lapè sa a fè lespri nou ak kè nou kalm paske nou gen bon relasyon avè l. Lapè sa a “depase tout sa moun ka konprann”. Li pi estrawòdinè pase sa n ka imajine. Èske w konn sezi wè jan w santi w kalm apre w fin priye Jewova ak tout kè w? Sa w santi a se “lapè Bondye”.

5. Ki jan lapè Bondye pwoteje lespri nou ak kè nou?

⁵ Menm pasaj sa a di lapè Bondye “ap pwoteje kè nou ak lespri nou”. Nan lang orijinal la, mo yo mete “pwoteje” pou li la a se yon mo yo konn itilize pou militè yo e li fè referans ak sòlda k ap veye yon vil e k ap pwoteje l pou ènmi pa anvayi l. Moun ki te abite nan yon vil ki te pwoteje te dòmi san kè sote paske yo te konnen gen sòlda ki t ap fè pòs nan pòtay yo. Menm jan an tou, lè lapè Bondye pwoteje kè nou ak lespri nou, nou santi n kalm, paske nou konnen nou an sekirite (Sòm 4:8). Menm jan ak Ana, menmsi sitiyasyon nou pa chanje tousuit, nou ka toujou santi n plizoumwen anpè (1 Sam. 1:​16-18). Lè nou santi n kalm, souvan nou twouve l pi fasil pou n byen reflechi e pou n pran bon desizyon.

6. Ki sa n ka fè pou n gen lapè Bondye? (Gade foto a tou.)

⁶ Sa nou bezwen fè. Lè w gen pwoblèm, rele Jewova. Ki jan w ka fè sa? Priye jiskaske w santi w gen lapè Bondye (Lik 11:9; 1 Tes. 5:17). Luis, nou te pale de li pi wo a, te esplike fason li menm ak Ana, madanm li, te rive andire lè yo te aprann li ret sèlman kèk mwa pou l viv. Men sa l te di: “Nan yon moman konsa, li difisil anpil pou w pran desizyon anrapò ak  sante w e ak lòt bagay ankò. Men, grasa lapriyè, nou te kapab santi n anpè nan moman sa a ki te difisil anpil.” Luis ak madanm li te di yo te priye anpil e yo te fè sa plizyè fwa pou yo te mande Jewova ede yo pou lespri yo anpè, pou kè yo rete kalm, e pou l ba yo sajès pou yo pran bon desizyon. E yo te santi li ede yo. Si w nan yon sitiyasyon ki difisil, pèsevere nan lapriyè, e w ap wè jan lapè Jewova bay la ap pwoteje kè w ak lespri w. — Wom. 12:12.

JEWOVA AP FÈ W VIN FÈM

7. Ki jan nou ka santi n lè n nan yon gwo eprèv?

⁷ Difikilte. Lè n nan yon gwo eprèv, santiman nou, panse nou ak fason nou reyaji ka pa nòmal menm jan ak anvan. Nou ka santi se kòmsi se kou sou kou. Ana, nou te pale de li pi wo a, fè konnen li te gen tout kalite santiman ki te travèse l apre lanmò Luis. Men sa l te di: “Lè m te santi m deprime, m te vin ap plenyen sò m. Epitou, m te vin santi m fache poutèt li pa t la ankò.” Mete sou sa, Ana te santi l poukont li e l te santi l boulvèse lè l t ap pran desizyon sou yon seri bagay Luis te konn jere trè byen. Pafwa, li te santi se kòmsi l te nan yon tanpèt nan mitan lanmè. Ki jan Jewova ede n lè santiman konsa kòmanse anvayi n.

8. Selon 1 Pyè 5:​10, ki asirans Jewova ban nou?

⁸ Sa Jewova fè. Li ban nou asirans l ap fè nou vin fèm. (Li 1 Pyè 5:10.) Lè yon bato pran nan yon tanpèt, li ka kòmanse balanse de bò, sa ki kapab yon danje. Gen anpil bato ki gen yon bagay anba yo sou chak bò anba dlo a ki fè yo pa balanse twòp. Sa fè pasaje yo santi yo pi an sekirite e yo pi alèz. Sepandan, anpil nan bagay sa yo yo konn met anba bato yo fonksyone pi byen lè bato a ap avanse. Menm jan an tou, Jewova ap fè nou vin fèm lè n kontinye ret fidèl nan moman eprèv.

9. Ki jan zouti nou genyen pou n fè rechèch yo ka ede n rete fèm? (Gade foto a tou.)

⁹ Sa nou bezwen fè. Lè w santi w boulvèse, fè tout sa w kapab pou w kontinye priye, pou w asiste reyinyon yo e pou w preche. Nòmalman, ou ka pa kapab fè tout sa w te konn fè anvan, men, ou bezwen sonje Jewova pa mande w fè plis pase sa w ka fè. (Konpare ak Lik 21:​1-4.) Epitou, rezève tan pou w fè etid pèsonèl ou e pou w medite. Poukisa? Jewova sèvi ak òganizasyon l lan pou l ban nou yon seri bèl atik ak videyo ki kapab ede n  rete fèm. Pou w jwenn sa w bezwen, ou ka sèvi ak zouti pou fè rechèch ki disponib nan lang ou, pa egzanp aplikasyon JW Library^® a, Index des publications des Témoins de Jéhovah, ak Gid pou Temwen Jewova yo fè rechèch. Monika, nou te pale de li pi wo a, te fè konnen li te konn itilize zouti pou fè rechèch yo pou l chèche konsèy lè l te kòmanse santi l boulvèse. Pa egzanp, li te konn fè rechèch sou mo “kòlè”. Gen lòt lè, li te konn fè rechèch sou mo “trayizon” oswa “fidelite”. Apre sa, li te konn li jiskaske l santi l pi byen. Men sa l di: “Nan moman mwen te kòmanse ap fè rechèch yo, mwen te santi m boulvèse anpil. Men, tank mwen t ap li, mwen te santi Jewova k ap ban m yon gwo akolad. Epitou, mwen te vin rann mwen kont Jewova konprann tout sa k ap trakase m e l t ap ede m.” Lè Jewova ede w konsa, sa kapab ede w kenbe ekilib ou jiskaske w santi w pi kalm. — Sòm 119:​143, 144.

JEWOVA AP SOUTNI W

10. Ki jan n ka santi n apre n fin viv yon sitiyasyon ki rèd anpil?

¹⁰ Difikilte. Apre n fin viv yon sitiyasyon ki rèd anpil, gen jou nou ka santi kò n kraze e moral nou ba. Nou ka santi n tankou yon atlèt ki te konn kouri vit ki blese e k ap mache bwete kounye a. Sa ka mande gwo efò pou n fè yon seri travay nou te konn fè byen fasil, oswa nou ka pa tèlman anvi fè yon seri aktivite nou te renmen fè. Menm jan ak Eli, nou ka twouve l difisil anpil pou n leve nan kabann nou. Nou jis vle dòmi (1 Wa 19:​5-7). Ki sa Jewova pwomèt l ap fè lè n santi n faya?

11. Bay yon lòt fason Jewova ede nou selon Sòm 94:18.

¹¹ Sa Jewova fè. Li pwomèt l ap soutni nou. (Li Sòm 94:18.) Menm jan lè yon atlèt blese li bezwen yon sipò pou l deplase, nou ka bezwen èd pou n kontinye ret aktif nan sèvis Jewova. Nan moman sa yo, men asirans Jewova ban nou: “Mwen menm, Jewova, Bondye w la, mwen kenbe men dwat ou, e mwen se Sila a k ap di w: ‘Ou pa bezwen pè, m ap ede w.’” (Eza. 41:13). Wa David te jwenn èd sa a. Lè l t ap fè fas ak eprèv e ak ènmi li te genyen, li te di Jewova: “Ou soutni m ak men dwat ou.” (Sòm 18:35). Men, ki jan Jewova soutni nou?

12. Kiyès Jewova ka itilize pou ede n lè n santi n faya?

 ¹² Byen souvan, yon fason Jewova soutni nou se lè l pouse lòt moun ede n. Pa egzanp, yon lè David te santi l faya, e Jonatan, zanmi l, t al wè l pou ba l fòs ak ankourajman (1 Sam. 23:​16, 17). Menm jan an tou, Jewova te chwazi Elize pou bay Eli èd li te bezwen (1 Wa 19:​16, 21; 2 Wa 2:2). Jodi a, Jewova ka sèvi ak fanmi nou, zanmi nou, oswa ansyen yo pou ede nou. Sepandan, lè n santi n tris, nou ka gen tandans met kò n apa. Nou ka jis vle ret poukont nou. E se nòmal. Ki sa n ka fè pou Jewova soutni nou?

13. Ki sa nou bezwen fè pou Jewova ka soutni nou? (Gade foto a tou.)

¹³ Sa nou bezwen fè. Fè anpil efò pou w pa met kò w apa. Lè n met kò n apa, byen souvan, nou konn vin ap panse sèlman ak tèt nou e ak pwoblèm nou genyen yo. Panse konsa ka gen efè sou desizyon n ap pran (Pwo. 18:1). Nòmalman, nou tout konn bezwen ret poukont nou pafwa, sitou lè gen bagay terib ki rive nan lavi nou. Sepandan, si n ta met kò n apa pandan anpil tan, sa ta ka anpeche n pwofite mwayen Jewova ap itilize pou ede n. Donk, kèlkeswa jan yon sitiyasyon ta difisil, aksepte èd fanmi w, zanmi w ak ansyen yo ba w. Konsidere yo kòm mwayen Jewova ap itilize pou soutni w. — Pwo. 17:17; Eza. 32:​1, 2.

JEWOVA AP KONSOLE W

14. Ki sitiyasyon ki kapab fè nou pè?

¹⁴ Difikilte. Gende moman nou ka konn santi n pè. Nan Bib la, gen sèvitè fidèl Bondye ki te pale konsènan moman yo te nan pwoblèm e yo t ap tranble akoz ènmi yo te genyen oswa lòt presyon yo te jwenn (Sòm 18:4; 55:​1, 5). Menm jan an tou, nou ka jwenn opozisyon nan lekòl nou, nan travay nou, nan fanmi nou, oswa anba men gouvènman an. Nou ka menm pè pou n pa mouri akoz yon pwoblèm sante. Lè konsa, nou ka santi n san defans menm jan ak yon timoun piti. Ki jan Jewova ede n nan moman sa yo?

15. Ki asirans Sòm 94:19 ban nou?

¹⁵ Sa Jewova fè. Li konsole n e li soulaje n. (Li Sòm 94:19.) Vèsè sa a ka fè n  panse ak yon tifi ki pè e ki pa ka dòmi akoz gwo loray k ap gwonde. Nou ka imajine papa l k al pran l e ki kenbe l nan bra l jiskaske dòmi pran l. Byenke loray la toujou ap gwonde, li santi l byen nan bra papa l. Lè nou jwenn eprèv ki fè n pè, nan yon sans nou ka bezwen Papa nou ki nan syèl la kenbe nou nan bra l, jiskaske nou vin kalm. Ki jan nou ka jwenn konsolasyon konsa nan men Jewova?

16. Ki sa nou kapab fè pou Jewova ka konsole n? (Gade foto a tou.)

¹⁶ Sa nou bezwen fè. Pase tan regilyèman ak Jewova lè w priye l e lè w li Pawòl li a (Sòm 77:​1, 12-14). Konsa, lè w gen strès, sandout premye sa k ap vin nan lespri w se priye Papa w ki nan syèl la. Di Jewova sa k fè w pè ak sa k ap enkyete w. Kite l pale avè w e kite l konsole w pa mwayen Pawòl li a (Sòm 119:28). Ou ka wè, lè w li kèk pasaj nan Bib la, sa ka vrèman konsole w lè w pè. Pa egzanp, ou ka jwenn ankourajman nan liv Jòb la, liv Sòm nan ak liv Pwovèb la, san wete nan pawòl Jezi te di nou jwenn nan Matye chapit 6. Lè w priye Jewova e w li Pawòl li a, w ap santi l ap konsole w.

17. Ki asirans nou kapab genyen?

¹⁷ Nou kapab gen konfyans Jewova ap toujou ede n nan moman ki difisil anpil nan lavi n. Nou pap janm poukò n (Sòm 23:4; 94:14). Jewova pwomèt l ap pwoteje n, l ap fè n vin fèm, l ap soutni nou e l ap konsole n. Men sa Ezayi 26:3 di konsènan Jewova: “W ap pwoteje moun ki konte sou ou nèt yo. W ap ba yo lapè nètale, paske, se nan ou yo met konfyans yo.” Kidonk, met konfyans ou nan Jewova, aksepte mwayen li itilize pou ede w. Si w fè sa, w ap rejwenn fòs, menm nan moman difisil.