NAN lang orijinal la, mo lè yo tradui l yo mete “charyo” pou li nan Tradiksyon monn nouvo a ka fè referans ak divès kalite charyo (Tra. 8:​28, 29, 38). Sepandan, sanble charyo Etyopyen an te ladan l lan te pi gwo pase yon senp charyo yo te konn itilize nan lame oswa yon charyo pou moun fè kous. Ann wè kèk rezon ki fè n di sa.

Etyopyen an se te yon gwo otorite ki t ap fè yon vwayaj byen long. Se te yon mesye “ki te gen gwo pozisyon sou Kandas, rèn peyi Etyopi. Se li ki te responsab tout trezò rèn nan”. (Tra. 8:27.) Etyopi nan tan lontan an te gen ladan l peyi ki rele Soudan jodi a ak pati ki nan dènye pwent sid peyi Ejip jodi a. Byenke mesye a ka pa t monte menm charyo a pandan tout vwayaj la, li dwe te gen plizyè bagay li te bezwen pou vwayaj byen long li t ap fè a. Nan premye syèk epòk nou an, pami charyo yo te konn itilize pou pot pasaje, te gen charyo ki te kouvri ki te gen kat wou. Selon yon kòmantè yo fè sou liv Travay la, “yon charyo konsa te pèmèt moun yo pote plis bagay, yo te vwayaje pi alèz, e petèt sa te pèmèt yo vwayaje sou yon distans ki pi long”. — Acts: An Exegetical Commentary.

Etyopyen an t ap li lè Filip te vin kote l la. Istwa a fè konnen “Filip kouri al bò charyo a, e li tande [mesye ki te gen gwo pozisyon an] k ap li awotvwa nan liv pwofèt Ezayi a”. (Tra. 8:30.) Charyo pou moun vwayaje yo pa t fèt pou kouri vit. Nonsèlman vitès charyo a t ap kouri a te pèmèt mesye a li, men tou, sa te pèmèt Filip rive jwenn charyo a pandan l apye.

Etyopyen an te “sipliye Filip pou l monte vin chita bò kote l”. (Tra. 8:31.) Nan yon charyo pou moun fè kous, moun ki t ap kondui l yo te konn kanpe. Sepandan, nan yon charyo pou moun vwayaje, te gen ase plas pou mesye ki te nan gwo pozisyon an ak Filip chita.

Ann amoni ak istwa Bondye te fè ekri nou jwenn nan chapit 8 liv Travay la ak prèv listwa rapòte, sa pa gen lontan piblikasyon nou yo montre Etyopyen ki te nan gwo pozisyon an te nan yon charyo ki pi gwo pase yon senp charyo yo te konn itilize nan lame oswa yon charyo pou moun fè kous.