1. Ki jan nou ka imite Jewova, Papa nou an ki gen lanmou?

JEWOVA renmen nou anpil (Jan 3:16). Nou vle imite Papa nou an ki renmen nou. Se poutèt sa nou eseye montre “nou gen senpati, [...] nou gen afeksyon [...], [ak] kè sansib” pou tout moun, men sitou pou moun ki “fanmi nou nan lafwa”. (1 Pyè 3:8; Gal. 6:10.) Lè frè ak sè nou ap lite anba strès, nou vle ede yo.

2. Sou ki sa nou pral pale nan atik sa a?

² Tout moun ki vle fè pati fanmi Jewova ap gen pou fè fas ak sitiyasyon ki bay strès (Mak 10:29, 30). Petèt, n ap gen pou n fè fas ak plis eprèv tank fen sistèm sa a ap pwoche. Ki jan youn ka ede lòt? Annou gade sa n ka aprann nan istwa nan Bib la ki pale sou Lòt, Jòb ak Nawomi. Nou pral pale tou sou kèk difikilte frè n ak sè n yo ap fè fas jodi a, e nou pral wè fason nou ka ede yo fè fas ak pwoblèm yo jwenn.

3. Jan sa parèt klè nan 2 Pyè 2:7, 8, ki move desizyon Lòt te pran, e ki sa sa te lakòz?

³ Lòt te pran yon move desizyon lè l te chwazi viv nan mitan moun Sodòm yo ki te imoral anpil. (Li 2 Pyè 2:7, 8.) Zòn nan te bay anpil manje, men lefètke Lòt t al viv Sodòm, li te peye sa chè (Jen. 13:8-13; 14:12). Sanble madanm li te vin tèlman atache ak vil la oswa ak kèk nan moun ki t ap viv nan vil la, sa te fè l dezobeyi Jewova. Konsa, li te pèdi lavi l lè Bondye te lage dife ak souf sou  zòn nan. E de pitit fi Lòt yo menm? Mesye yo te fiyanse avè yo te mouri Sodòm. Lòt te pèdi kay li, li te pèdi byen l, e sa k te ba l pi gwo lapenn nan sèke li te pèdi madanm li (Jen. 19:12-14, 17, 26). Nan moman sa a ki te bay strès, èske Jewova te pèdi pasyans ak Lòt? Non.

4. Ki jan Jewova te montre li pran pasyans avèk Lòt? (Gade foto ki sou paj kouvèti a.)

⁴ Menm lè Lòt te chwazi al viv Sodòm, avèk konpasyon, Jewova te voye zanj al delivre li menm ak fanmi l. Men, olye Lòt te kouri obeyi lòd zanj yo te ba l pou l kite Sodòm tousuit, li te ret “ap pèdi tan”. Zanj yo te oblije pran men l e yo te ede li menm ak fanmi l kite vil la (Jen. 19:15, 16). Apre sa, zanj yo di l pou l kouri al nan zòn ki gen mòn yo. Men, olye Lòt obeyi Jewova, li te mande pou l al nan yon ti vil ki toupre a (Jen. 19:17-20). Jewova te koute Lòt avèk pasyans, e li te kite l al nan ti vil sa a. Annapre, Lòt te vin pè ret nan zòn nan e li te deplase al nan zòn ki gen mòn nan, premye kote Jewova te di l ale a (Jen. 19:30). Se pa ti pasyans Jewova te demontre! Ki jan nou ka imite l?

5-6. Ki jan nou ka aplike 1 Tesalonisyen 5:14 pou nou imite Bondye?

⁵ Menm jan ak Lòt, yon moun nan kongregasyon an ka pran yon move desizyon ki ka lakòz li tonbe nan gwo pwoblèm. Si sa ta rive, ki jan n ta dwe reyaji? Nou ta ka gen tandans di se sa l fè l ap peye, sa ki t ap laverite (Gal. 6:7). Men, nou ta ka pi byen reyaji si nou imite fason Jewova te ede Lòt. Ki jan nou ka fè sa?

⁶ Jewova te voye zanj yo nonsèlman pou yo avèti Lòt, men tou pou yo ede l chape anba kalamite li t apral lage sou Sodòm nan. Menm jan an tou, nou ka bezwen avèti yon frè nou si nou wè l ap fè yon bagay ki ka lage l nan pwoblèm. Men, nou ka ede l tou. Menmsi l pran tan pou l aplike konsèy li jwenn ki sot nan Bib la, nou bezwen pran pasyans avè l. Aji menm jan ak de zanj yo. Olye nou kite sa epi nou pran distans ak frè nou an, nou dwe chèche bonjan mwayen pou nou ede l (1 Jan 3:18). Nan yon sans, nou ka bezwen pran men frè nou an, sa vle di, ede l pou l suiv bon konsèy li te jwenn nan. — Li 1 Tesalonisyen 5:14.

7. Ki jan nou ka imite fason Jewova te wè Lòt?

⁷ Jewova te ka konsantre sou enpèfeksyon Lòt, men, li pa t fè sa. Okontrè, pi devan, li te enspire apot Pyè pou l pale de Lòt kòm yon moun ki jis. Se pa ti kontan nou kontan poutèt Jewova pa gade erè nou fè (Sòm 130:3)! Ki jan nou ka imite fason Jewova te wè Lòt? Si nou konsantre sou bèl kalite frè n ak sè n yo genyen, n ap pran plis pasyans avèk yo. Yo menm bò kote pa yo ap pi dispoze aksepte èd n ap ba yo.

8. Ki sa konpasyon ap pouse nou fè?

⁸ Kontrèman ak Lòt, se pa akoz yon move desizyon Jòb te pran ki fè l t ap soufri. Malgre sa, li te soufri anpil. Li te pèdi byen l, pozisyon l nan sosyete a e li te pèdi sante l. Sa k pi mal la, lanmò te pase pran tout pitit li menm ak madanm li te genyen yo. Mete sou sa, twa swadizan zanmi Jòb yo te lage akizasyon sou do l. Ki youn nan rezon ki fè twa moun ki te swadizan vin konsole Jòb yo pa t montre yo gen konpasyon pou li? Yo pa t eseye konprann sa k te vrèman rive Jòb. Se sa k fè, yo te kouri di sa ki pa laverite, e yo te pote yon move jijman sou Jòb.  Ki jan nou ka evite fè menm erè sa a? Nou bezwen konprann se Jewova sèlman ki konn tout detay nan sitiyasyon yon moun ye. Pran san w pou w koute sa moun k ap soufri a ap di. Chèche konprann sa l vle di epi eseye mete w nan plas li. Se sèlman lè sa a w ap kapab demontre bonjan senpati pou frè w la oswa sè w la.

9. Si nou gen konpasyon, ki sa nou pap fè e poukisa?

⁹ Si nou gen konpasyon, nou pap mache fè tripotay sou lòt moun pou fè konnen pwoblèm y ap rankontre. Yon moun ki renmen fè tripotay pa fòtifye kongregasyon an, li kraze l pito (Pwo. 20:19; Wom. 14:19). Li pa janti, li pa panse ak lòt moun, e pawòl li di ka blese yon moun ki deja ap soufri (Pwo. 12:18; Efe. 4:31, 32). Li pi bon lontan lè nou chèche wè bèl kalite lòt moun e nou reflechi sou fason nou ka ede yo fè fas ak pwoblèm yo genyen!

10. Ki sa pawòl nou jwenn nan Jòb 6:2, 3 a aprann nou?

¹⁰ Li Jòb 6:2, 3. Pafwa, Jòb te konn di “vye pawòl”. Men annapre, li te rekonèt kèk nan sa l te di yo pa t bon (Jòb 42:6). Menm jan ak Jòb, yon moun jodi a k ap lite anba pwoblèm ki bay strès ka di vye pawòl, pawòl l ap regrèt annapre. Ki jan nou ta dwe reyaji? Olye pou nou ap kritike yo, poukisa nou pa gen konpasyon pou yo pito? Sonje Jewova pa t vle pou youn nan nou jodi a gen pwoblèm ki bay strès. Donk, si yon sèvitè Jewova ki fidèl di pawòl san reflechi lè l anba gwo strès, nou ka konprann sa. Menmsi li ta di pawòl ki pa sa sou Jewova oswa sou nou, nou pa dwe kouri fache avè l oswa kouri jije l pou sa l di a. — Pwo. 19:11.

11. Ki jan ansyen yo ka imite Eliyou lè y ap bay konsèy?

 ¹¹ Pafwa, yon moun k ap fè fas ak yon pwoblèm ki bay strès ka bezwen kèk konsèy tou (Gal. 6:1). Ki jan ansyen yo ka fè sa? L ap bon si yo imite Eliyou, li menm ki te koute Jòb e ki te montre li vrèman mete l nan plas li (Jòb 33:6, 7). Se sèlman lè Eliyou te konprann sa k nan panse Jòb li te ba l konsèy. Ansyen k ap suiv egzanp Eliyou yo ap pran san yo pou yo koute moun nan e y ap eseye konprann sitiyasyon l. Sa ap fè lè yo bay konsèy, li ka pi fasil pou l touche kè moun nan.

12. Ki efè lanmò mari Nawomi an ak lanmò de pitit gason l yo te genyen sou Nawomi?

¹² Nawomi se te yon dam fidèl ki te renmen Jewova. Men, apre lanmò mari l ak de pitit gason l yo, li te vle chanje non l pou yo pa rele l Nawomi ankò, men pito, pou yo rele l “Mara”, ki vle di “Anmè”. (Rit 1:3, 5, 20, nòt, 21.) Rit, bèlfi Nawomi, te rete avè l malgre tout pwoblèm Nawomi te genyen. Rit pa t sèlman ede Nawomi jwenn sa l te bezwen, men tou li te pale ak Nawomi yon fason pou l konsole l. Rit te di yon seri pawòl ki senp, men ki soti nan kè l, pou l montre jan li renmen Nawomi e jan li vle soutni l. — Rit 1:16, 17.

13. Poukisa moun ki gen mari yo oswa madanm yo ki mouri bezwen èd nou?

¹³ Lè yon frè nan kongregasyon an pèdi madanm li oswa lè yon sè pèdi mari l, li bezwen èd nou. Yon mari ak yon madanm ka tankou de pyebwa k ap grandi youn bò kote lòt. Tank ane ap pase, rasin pyebwa yo vin makònen youn ak lòt. Lè yo derasinen youn nan pyebwa sa yo oswa youn nan pyebwa sa yo ta vin mouri, lòt pyebwa ki rete a ka gen gwo pwoblèm. Menm jan an tou, lè ènmi yo rele lanmò a pase pran mari a oswa madanm nan, moun ki vivan an ka santi li gen gwo pwoblèm pandan anpil tan. Paula *, ki te gen mari l ki mouri sibit, te di: “Lavi m te vin boulvèse, e mwen te santi m lage poukò m. Mwen te pèdi pi bon zanmi m nan. Mwen te konn pale tout bagay ak mari m. Lè m te kontan li te kontan tou, e li te konn soutni m lè m gen pwoblèm. Li te toujou koute m lè m t ap di l sa k ap trakase m. Mwen vrèman santi se yon pati nan mwen ki ale.”

14-15. Ki jan nou ka konsole yon moun ki gen mari l oswa madanm li ki mouri?

¹⁴ Ki jan nou ka konsole moun ki gen mari yo oswa madanm yo ki mouri? Premye etap ki enpòtan se pale ak moun nan, menm lè nou santi nou yon ti jan jennen oswa nou ka pa konn sa pou n di. Men sa Paula nou te pale de li pi wo a di: “Mwen konprann yon moun ka yon ti jan jennen pou l pale lè gen lanmò. Yo pè pou yo pa di yon bagay yo pa t dwe di. Men, lè w pa di anyen ditou, sa pi mal.” Petèt yon moun ki nan lapenn pap atann pou n di yon bagay ki pwofon. Men sa Paula di: “Mwen apresye lè zanmi m yo annik di: ‘Mwen regrèt sa k rive a.’”

¹⁵ William, ki gen madanm li mouri sa gen kèk ane, di: “Mwen apresye sa anpil lè lòt moun di m sa yo te renmen lakay madanm mwen. Sa fè m wè yo te renmen l e yo te respekte l. Kalite èd sa a te bon anpil pou mwen. Pawòl yo di ankouraje m anpil, paske mwen te renmen  madanm mwen anpil e li te jwe yon gwo wòl nan lavi m.” Men sa Bianca, ki te gen mari l mouri, esplike: “Mwen jwenn konsolasyon lè lòt moun priye avè m e lè yo pataje youn oswa de vèsè avè m. Lè yo pale konsènan mari m e lè yo koute m lè m ap pale konsènan mari m, sa ede m.”

16. a) Ki sa nou dwe fè pou yon moun ki gen yon moun pa l ki mouri? b) Selon Jak 1:27, ki responsablite nou genyen?

¹⁶ Menm jan Rit te ret atache ak Nawomi ki te yon vèv, nou bezwen kontinye soutni moun ki gen moun pa yo ki mouri. Men sa Paula, nou te pale de li pi wo a, di: “Tousuit apre lanmò mari m, anpil moun te vin ede m epi konsole m. Men, apre yon ti tan, yo te retounen nan aktivite nòmal yo. Sepandan, lavi m te chanje nèt. Sa bon anpil lè lòt moun rann yo kont yon moun ki nan lapenn bezwen yo kontinye soutni l plizyè mwa apre lanmò a e menm plizyè ane annapre.” Natirèlman, tout moun pa menm. Gen moun ki sanble adapte yo byen vit. Men, gen lòt, chak aktivite yo te konn fè ak moun ki mouri a fè yo sonje moun nan anpil, e sa fè yo gen lapenn. Tout moun pa montre lapenn yo menm jan. Se pou nou sonje Jewova ban nou privilèj ak responsablite pou nou ede moun ki gen mari yo oswa madanm yo ki mouri. — Li Jak 1:27.

17. Poukisa moun ki gen mari yo oswa madanm yo ki kite yo bezwen èd nou?

¹⁷ Gen kèk mari oswa madanm ki oblije fè fas ak gwo strès sa bay lè moun yo marye  avè l la kite yo. Men sa Joyce, ki gen mari l ki kite l pou yon lòt fi, di: “Lapenn mwen santi akoz divòs la prèske pi rèd pase si mari m te mouri. Si mari m te mouri nan yon aksidan oswa akoz li te malad, se pa li ki t ap chwazi kite m. Men, nan ka sa a, se li ki chwazi kite m. Mwen santi m imilye e m pa vo anyen.”

18. Ki sa nou ka fè pou n ede moun ki pa gen mari oswa madanm ankò?

¹⁸ Lè nou fè bèl ti aksyon anvè moun ki pa gen mari oswa madanm ankò, nou ba yo asirans nou renmen yo. Se nan moman sa a menm yo bezwen bon zanmi (Pwo. 17:17). Ki jan nou ka montre nou se zanmi yo? Nou ka envite yo vin manje yon ti manje tou senp avè nou. E nou ka envite yo pase yon moman avèk nou nan yon ti detant oswa nou ka envite yo preche avèk nou. Yon lòt bagay nou ka fè se envite yo pafwa pou yo vin nan adorasyon an fanmi n ap fè. Si nou fè sa, n ap fè kè Jewova kontan, paske li “toupre moun kè yo ap fann” e li “pwoteje vèv yo”. — Sòm 34:18; 68:5.

19. Toutpandan nou gen 1 Pyè 3:8 nan lespri nou, ki detèminasyon nou pran?

¹⁹ Talè konsa, lè Wayòm Bondye a pral dirije tè a, nou “pral bliye” tout pwoblèm. Se pa ti tann n ap tann moman kote “ansyen bagay yo pap vin nan lespri moun” e “pap gen bagay konsa nan kè yo”. (Eza. 65:16, 17.) Annatandan, annou youn soutni lòt epi annou montre nou renmen tout frè n ak sè n yo ni nan pawòl nou ni nan aksyon nou. — Li 1 Pyè 3:8.