1. Ki sa n dwe fè pou n ka sove lè jou Jewova a rive?

 LÈ LABIB ap pale de “jou Jewova a”, l ap pale konsènan moman Jewova pral jije ènmi l yo e l pral sove pèp li a. Nan tan lontan, pafwa Jewova te konn egzekite yon seri jijman (Eza. 13:1, 6; Eze. 13:5; Sof. 1:8). Nan epòk pa nou an, “jou Jewova a” ap kòmanse lè lidè politik yo atake Gran Babilòn nan, e sa ap mennen nan lagè Amagedon. Pou n ka sove lè “jou” sa a rive, nou bezwen prepare n depi kounye a. Jezi te montre nou dwe nonsèlman prepare n pou “gwo tribilasyon” an, men tou, nou dwe “montre nou pare” pou lè l rive. — Mat. 24:21; Lik 12:40.

2. Ki jan pawòl nou jwenn nan 1 Tesalonisyen yo kapab ede nou?

² Nan premye lèt Bondye te fè apot Pòl ekri kretyen nan vil Tesalonik yo, apot Pòl te sèvi ak yon seri egzanp pou ede kretyen yo montre yo pare pou lè gran jou jijman Jewova a rive. Pòl te konnen jou Jewova a pa t ap vin tousuit (2 Tes. 2:1-3). Aktout sa, li te ankouraje frè ak sè yo pou yo prepare yo pou jou sa a kòmsi l t ap vini demen, e nou menm tou, nou kapab suiv konsèy sa a li bay la. Ann egzamine esplikasyon apot Pòl te bay konsènan: 1) fason jou Jewova a ap vini, 2) kiyès k ap sove lè jou sa a rive, e 3) ki jan n ka prepare n pou n sove.

3. Nan ki sans jou Jewova a ap vini tankou yon vòlè ki vin vòlè lannuit? (Gade foto a tou.)

³ “Tankou yon vòlè ki vin vòlè lannuit.” (1 Tes. 5:2). Se premye nan twa egzanp apot Pòl te itilize pou l pale konsènan fason jou Jewova a ap vini. Souvan, vòlè yo aji byen  vit e yo vini lè l fènwa, nan moman moun pa atann. Menm jan an tou, jou Jewova a ap vini bridsoukou, nan moman pifò moun pa atann. Menm vrè kretyen yo kapab sezi wè jan evènman yo rive byen vit. Men, kontrèman ak mechan yo, nou pap detwi.

4. Nan ki sans jou Jewova a tankou doulè tranche?

⁴ “Menm jan doulè tranche pran yon fi ansent.” (1 Tes. 5:3). Yon fi ansent pa ka konnen ki lè egzakteman l ap gen tranche. Sepandan, li pa gen okenn dout sa ap fèt yon jou. Lè jou a rive, l ap gen tranche sanzatann e l ap soufri. Menm jan an tou, nou pa konn ki jou ak ki lè jou Jewova a ap kòmanse. Sepandan, nou gen asirans l ap vini kanmenm e jijman Bondye pral egzekite sou mechan yo ap fèt sanzatann e yo pap ka chape.

5. Nan ki sans gwo tribilasyon an tankou douvanjou?

⁵ Tankou douvanjou. Nan twazyèm egzanp Pòl te pran an, yon lòt fwa ankò li t ap pale konsènan vòlè ki vin vòlè lannuit. Men, fwa sa a, sanble Pòl t ap konpare jou Jewova a ak douvanjou (1 Tes. 5:4). Lè vòlè ap vòlè lannuit, yo ka tèlman konsantre sou sa y ap fè a, yo pa wè lè lè a pase. Jou ka bare yo e moun ka wè yo. Menm jan klète ka fè moun wè vòlè, se konsa tou, gwo tribilasyon an pral fè wè aklè ki moun k ap pratike yon seri bagay ki pa fè Bondye plezi. Kontrèman ak moun sa yo, n ap montre nou pare lè n pa fè yon seri bagay ki pa fè Jewova plezi e lè n chèche gen “tout kalite bonte ak jistis ak verite”. (Efe. 5:8-12.) Apre sa, Pòl te pran de egzanp ki ale nan menm sans pou l pale konsènan moun ki pap sove yo.

6. Nan ki sans pifò moun ap dòmi? (1 Tesalonisyen 5:6, 7).

⁶ “Moun k ap dòmi.” ​(Li 1 Tesalonisyen 5:6, 7.) Pòl te konpare moun ki pap sove lè jou Jewova a rive ak moun k ap dòmi. Moun sa yo pa konn sa k ap pase toutotou yo oubyen yo pa wè lè tan an ap pase. Se sa k fè yo pa ka rive konprann evènman enpòtan k ap pase yo, oswa yo pa ka reyaji parapò ak sa k ap pase yo. Pifò moun jodi a tankou moun k ap dòmi (Wom. 11:8). Yo pa bay prèv ki montre n ap viv nan “dènye jou yo”, ak prèv ki montre gwo tribilasyon an gen pou vini talè konsa, regle anyen pou yo. Lè gen gwo evènman ki rive nan monn nan, sa ka souke kèk nan moun sa yo e sa ka fè yo plizoumwen enterese nan mesaj Wayòm nan. Sepandan, anpil nan yo kite dòmi pran yo ankò olye yo ret je klè. Menm lè gen nan yo ki kwè ap gen yon jou jijman, yo met nan tèt yo li poko prèt pou rive (2 Pyè 3:3, 4). Sepandan, nou rann nou kont li vin pi ijan chak jou pou n ret je klè, jan Bib la mande nou fè sa.

7. Nan ki sans moun Bondye pral detwi yo sanble ak moun ki sou?

⁷ “Moun k ap bwè pou yo sou.” Apot Pòl konpare moun Bondye pral detwi yo ak moun k ap bwè pou yo sou. Lè yon moun sou li pa ka reyaji vit e li pran move desizyon. Menm jan an tou, mechan yo pa reyaji lè yo tande avètisman Bondye bay. Yo chwazi viv yon fason k ap lakòz yo detwi. Men, kretyen yo jwenn avètisman pou yo rete nan bonsans yo, pou lespri yo rete klè (1 Tes. 5:6). Gen yon biblis ki fè konnen yon moun lespri l klè se “yon moun ki kalm, ki pa panike e ki reflechi pou l ka pran bon desizyon”. Poukisa nou dwe rete kalm e nou pa dwe panike? Sa ap ede n pou n pa mele nan politik oswa nan pwoblèm sosyal ki genyen yo. Tank jou Jewova a ap pwoche, se tank n ap jwenn presyon pou n mele nan bagay sa yo. Sepandan, nou pa bezwen enkyete n pou fason n ap reyaji. Lespri Bondye kapab ede n pou n rete kalm, pou n pa panike e pou n pran bon desizyon. — Lik 12:11, 12.

8. Ki kalite 1 Tesalonisyen 5:8 montre k ap ede n rete je klè epi rete nan bonsans nou? (Gade foto a tou.)

⁸ ‘Mete pwotèj pwatrin nan ak kas la.’ Pòl konpare n ak sòlda ki vijilan e ki abiye pou y al nan lagè. (Li 1 Tesalonisyen 5:8.) Yo atann pou yon sòlda ki al nan lagè pare pou l batay nenpòt ki lè. Se menm bagay la pou nou menm tou. Nou montre nou pare pou lè jou Jewova a rive lè n mete lafwa ak lanmou kòm pwotèj pwatrin e lè n met esperans lan kòm kas. Kalite sa yo kapab ede nou anpil.

9. Ki jan lafwa nou genyen pwoteje nou?

⁹ Yon pwotèj pwatrin te pwoteje kè yon sòlda. Lafwa ak lanmou pwoteje kè senbolik nou an. Kalite sa yo ap ede n kontinye sèvi Bondye epi kontinye suiv Jezi. Lafwa fè n gen asirans Jewova ap rekonpanse nou paske n ap chèche l ak tout kè n (Ebre 11:6). L ap ede n pou n ret fidèl ak Jezi, Gid nou an, menm lè n oblije andire sitiyasyon ki difisil. N ap kapab vin gen kalite lafwa nou bezwen pou n rive fè fas ak pwoblèm nou jwenn nan lavi a lè n reflechi sou egzanp yon seri moun jodi a ki rete fidèl malgre pèsekisyon oswa pwoblèm ekonomik. E n ap kapab evite tonbe nan pyèj pou n renmen lajan oswa bagay  materyèl lè n suiv egzanp moun ki chwazi mennen yon vi senp pou yo ka bay Wayòm nan premye plas nan lavi yo. b

10. Ki jan lanmou pou Bondye ak lanmou pou pwochen nou ede n andire nan travay predikasyon an?

¹⁰ Lanmou enpòtan anpil tou pou n rete je klè e pou n ret nan bonsans nou (Mat. 22:37-39). Lanmou pou Bondye ede n pou n kontinye preche kèlkeswa pwoblèm sa ta ka fè nou jwenn (2 Tim. 1:7, 8). Piske nou renmen moun ki pap sèvi Jewova yo tou, nou kontinye preche, nou menm fè sa nan telefòn e pa mwayen lèt. Nou gen espwa yon jou moun yo ap chanje e y ap vin fè sa ki dwat. — Eze. 18:27, 28.

11. Ki jan lanmou nou gen pou frè n ak sè n yo ede nou? (1 Tesalonisyen 5:11).

¹¹ Nou renmen pwochen nou, sa gen ladan l frè n ak sè n yo tou. Nou demontre lanmou sa a lè “youn [...] ankouraje lòt e [lè] youn [...] fòtifye lòt”. (Li 1 Tesalonisyen 5:11.) Menm jan ak sòlda ki nan menm konba, nou ankouraje youn lòt. Nòmalman, sa ka rive yon sòlda blese yon sòlda ki nan menm kan avè l pandan yon batay, men li pa t ap janm fè espre li blese l. Menm jan an tou, nou pa t ap janm fè espre pou n fè frè n ak sè n yo yon bagay k ap blese yo oswa pou n ta rann yo mal pou mal (1 Tes. 5:13, 15). Epitou, nou montre nou gen lanmou lè n demontre respè pou frè ki alatèt nan kongregasyon an (1 Tes. 5:12). Lè Pòl te ekri lèt sa a, kongregasyon Tesalonik la te gen mwens pase ennan depi l egziste. Sandout frè ki te alatèt yo te manke eksperyans e yo dwe te konn fè erè. Aktout sa, yo te merite respè. Etandone gwo tribilasyon an ap pwoche, nou ka bezwen konte sou ansyen yo nan kongregasyon an pou gide nou plis pase jan n ap fè sa kounye a. Nou ka pèdi kontak ak syèj mondyal la e ak biwo filyal la. Se sa k fè, depi kounye a, li enpòtan pou n aprann renmen ansyen yo e pou n aprann demontre respè pou yo. Kèlkeswa sa k rive, ann kontinye  ret nan bonsans nou lè n pa ret konsantre sou defo yo genyen, men, lè n konsantre pito sou prèv ki montre Jewova ap sèvi ak Kris pou gide frè sa yo ki fidèl.

12. Ki jan esperans nou genyen an pwoteje panse nou?

¹² Menm jan yon kas pwoteje tèt yon sòlda, esperans nou genyen pou n sove a pwoteje panse nou. Grasa esperans solid nou genyen an, nou rann nou kont, sa monn sa a ofri yo san valè (Flp. 3:8). Esperans nou genyen an ede n pou n rete kalm e pou n pa panike. Wallace ak Laurinda k ap sèvi ann Afrik te viv sa. Nan espas twa semèn, yo chak te gen yon paran yo ki mouri. Akoz pandemi COVID-19 la, yo pa t ka retounen nan peyi yo pou yo te ka ansanm ak fanmi yo. Men sa Wallace te ekri: “Esperans rezirèksyon an ede m panse ak jan yo pral ye pandan premye jou yo nan monn nouvo a olye m panse ak jan yo te ye pandan dènye jou yo te fè ap viv nan monn sa a. Esperans sa a ede m rete kalm lè tristès ak dezespwa vle anvayi m.”

13. Ki sa n kapab fè pou Bondye ban nou lespri sen?

¹³ “Pa etenn dife lespri a.” ​(1 Tes. 5:19). Pòl te konpare lespri sen ak yon dife ki anndan nou. Lè n gen lespri sen Bondye, nou chofe anpil pou n fè sa ki dwat e nou gen fòs pou n fè travay Jewova a (Wom. 12:11). Ki sa nou kapab fè pou Bondye ban nou lespri sen? Nou kapab priye Bondye pou l ban nou l, nou kapab etidye Pawòl li a e nou kapab patisipe nan aktivite òganizasyon l lan l ap dirije pa mwayen lespri sen. Lè n fè sa, sa ap ede n pou n vin gen “fwi lespri a”. — Gal. 5:22, 23.

14. Ki sa n dwe evite si n ta renmen Bondye kontinye ban nou lespri sen? (Gade foto a tou.)

¹⁴ Apre Bondye fin ban nou lespri sen, nou dwe veye pou n “pa etenn dife lespri a”. Se moun ki fè efò pou panse yo ak konduit yo rete pwòp Bondye bay lespri sen. Li pap kontinye ban nou lespri sen si n toujou ap panse ak bagay ki pa  pwòp e si n ap pratike bagay sa yo (1 Tes. 4:7, 8). Pou Jewova kontinye ban nou lespri sen, nou pa dwe “meprize pwofesi yo” tou (1 Tes. 5:20). “Pwofesi” y ap pale de yo la a gen rapò ak mesaj Jewova bay pa mwayen lespri sen, sa gen ladan l pwofesi konsènan jou Jewova a ak epòk n ap viv la ki mande pou n aji san pèdi tan. Nou pa dwe met nan lespri nou jou sa a poko ap vini, pou n ta panse Amagedon pap vini pandan nou vivan an. Okontrè, n ap montre nou vle l vini byen vit, sa vle di nou toujou ap panse avè l, lè n kontinye gen yon konduit ki pwòp e lè n kontinye “montre nan aksyon nou nou gen atachman pou Bondye” chak jou nan lavi nou. — 2 Pyè 3:11, 12.

15. Ki sa n ka fè pou n pa pran nan manti ak nan pwopagann demon yo ap gaye? (1 Tesalonisyen 5:21).

¹⁵ Nan yon tan ki pa lwen rive, ènmi Bondye yo pral fè konnen yo rive met lapè ak sekirite (1 Tes. 5:3). Se demon yo ki pral pouse yo fè pwopagann sa a toupatou sou tè a, e pifò moun ap pran ladan l (Rev. 16:13, 14). E nou menm? Nou pap pran nan pwopagann sa a si nou “verifye tout bagay”. (Li 1 Tesalonisyen 5:21.) Yo te itilize mo grèk lè yo tradui l yo mete “verifye” pou li a, pou esplike fason yo teste lò ak ajan pou yo ka wè si yo bon. Kidonk, nou bezwen verifye sa n ap tande oswa sa n ap li pou n wè si se laverite. Li te enpòtan pou kretyen Tesalonik yo te fè sa e l ap pi enpòtan toujou pou n fè sa tank gwo tribilasyon an ap pwoche. Olye n annik kwè tout sa moun di, nou sèvi ak kapasite nou genyen pou n reflechi a pou n konpare sa nou li oswa sa nou tande ak sa Bib la di e ak sa òganizasyon Jewova a di. Konsa, nou pap pran nan kèlkeswa pwopagann oswa manti demon yo ap gaye. — Pwo. 14:15; 1 Tim. 4:1.

16. Ki esperans nou genyen ki sèten, e ki sa sa pouse nou fè?

¹⁶ Nou konnen pèp Jewova a ap pase gwo tribilasyon an vivan. Men, nou pa konnen ki sa demen ap pote pou nou chak (Jak 4:14). Sepandan, kit nou travèse gwo tribilasyon an vivan, kit nou mouri anvan sa, depi n rete fidèl, Jewova ap ban nou lavi ki pap janm fini an kòm rekonpans. Kretyen Bondye chwazi pou al nan syèl yo ap ansanm ak Kris nan syèl la. Lòt mouton yo pral viv nan yon paradi sou tè a. Annou tout ret konsantre sou bèl esperans nou genyen an e ann montre nou pare pou lè jou Jewova a rive!