Kesyon lektè yo poze
Èske pawòl nou jwenn nan Sòm 12:7 ki di “W ap pwoteje yo” a gen rapò ak “moun k ap soufri yo” (vèsè 5) oswa ak “pawòl Jewova yo” (vèsè 6)?
Kontèks la montre vèsè sa a ap pale konsènan moun.
Sòm 12:1-4 fè konnen “pa gen moun ki fidèl pami lèzòm ankò”. Kounye a, ann egzamine Sòm 12:5-7 ki parèt nan kesyon an.
“Jewova di: ‘Piske y ap toupizi moun k ap soufri yo
E yo lakòz moun ki pòv yo ap plenn,
M ap pase alaksyon.
M ap sove moun sa yo anba men moun k ap meprize yo.’
Pawòl Jewova yo pwòp,
Yo tankou ajan yo pase sèt fwa nan founèz ki fèt an tè pou yo pirifye l.
W ap pwoteje yo, o Jewova,
W ap pwoteje yo chak anba men jenerasyon moun sa yo pou toutan.”
Vèsè 5 lan fè konnen sa Bondye di konsènan “moun k ap soufri yo”. L ap sove yo.
Epi, vèsè 6 la di: “Pawòl Jewova yo pwòp”, ‘yo tankou ajan yo pirifye’. Sa montre ki jan nou konsidere pawòl Jewova. — Sòm 18:30; Sòm 119:140.
Kounye a, ann fè yon ti pale konsènan Sòm 12:7. Li di: “W ap pwoteje yo, o Jewova, w ap pwoteje yo chak anba men jenerasyon moun sa yo pou toutan.” Ak ki sa mo “yo” a gen rapò?
Kòm vèsè 7 la vin tousuit apre vèsè 6 la ki pale konsènan “pawòl Jewova”, gen moun ki ka panse mo “yo” ki apre mo pwoteje a gen rapò ak pawòl Bondye di. E nou konnen Bondye te pwoteje Bib la malgre tout efò opozan yo fè pou yo entèdi l e pou yo detwi l. — Eza. 40:8; 1 Pyè 1:25.
Sepandan, sa vèsè 5 lan di yo se laverite tou. Jewova te ede “moun k ap soufri yo” ak moun y ap “toupizi” yo, li te sove yo, e l ap kontinye fè sa. — Jòb 36:15; Sòm 6:4; 31:1, 2; 54:7; 145:20.
Donk, ak ki sa mo “yo” ki nan vèsè 7 la gen rapò?
Pawòl ki nan sòm sa a montre mo “yo” a gen rapò ak moun.
Nan Sòm 12:1, 2, David pale konsènan “moun ki fidèl” moun ki mechan bay manti. Vèsè ki vin annapre a montre Jewova pral aji kont moun sa yo ki mal sèvi ak lang yo. Sòm sa a ban nou asirans nou kapab gen konfyans Bondye pral aji pou pèp li a paske pawòl li yo pwòp.
Donk, vèsè 7 la di Jewova ap pwoteje “yo”, sa vle di, l ap pwoteje moun k ap soufri anba men mechan yo.
N ap jwenn menm mo “yo” ki nan vèsè sa a nan yon seri kopi Ekriti ann ebre moun fè konfyans. Tradiksyon nan lang grèk ki rele Septant lan itilize mo “nou” an de fwa nan vèsè 7 la, sa ki montre li gen rapò ak moun ki fidèl y ap toupizi e k ap soufri yo. Finalman, vèsè 7 la di “chak” moun ki fidèl ap jwenn pwoteksyon “anba men jenerasyon moun sa yo”, anpalan de moun k ap fè lwanj pou move bagay (Sòm 12:7, 8). Nan yon tradiksyon Liv ki te ekri ann ebre yo nan lang arameyen, men sa vèsè 7 la di: “Ou menm, o SEYÈ, w ap pwoteje moun ki jis yo, w ap pwoteje yo anba men jenerasyon moun mechan sa a pou toutan. Mechan an ap mache toupatou. Li tankou yon sansi k ap souse san pitit lèzòm yo.” Sa a se yon lòt prèv ki montre aklè Sòm 12:7 pap pale konsènan pawòl Bondye.
Kidonk, vèsè sa a montre gen espwa pou “moun ki fidèl” yo, li montre Bondye pral aji.
