1-2. Jan sa parèt nan Travay 8:27-31, 35-38, ki sa k te pouse Etyopyen ki te gen gwo pozisyon an pou l batize?

ÈSKE W vle batize pou w vin yon disip Kris? Se lanmou ak rekonesans ki te pouse anpil moun pran desizyon sa a. Annou egzamine istwa yon Etyopyen ki te yon chèf nan gouvènman rèn Etyopi a.

² Etyopyen an pa t pèdi tan pou l aji ann amoni ak sa l te aprann nan Ekriti yo. (Li Travay 8:27-31, 35-38.) Ki sa k te pouse l aji konsa? Sa klè, mesye sa a te gen rekonesans pou Pawòl Bondye a. Li t ap li yon pasaj nan liv Ezayi a pandan l t ap vwayaje nan yon charyo. Lè Filip te pale avè l li te vin gen rekonesans pou sa Jezi te fè pou li. Men, poukisa chèf sa a te vwayaje al Jerizalèm? Se paske l te deja renmen Jewova. Ki jan nou fè konn sa? Li te fèk sot adore Jewova nan Jerizalèm. Sanble mesye sa a te kite relijyon li te grandi ladan l lan e l te vin ap adore vrè Dye a ansanm ak sèl nasyon Li chwazi a. Se lanmou l te gen pou Jewova a tou ki te pouse l franchi etap enpòtan sa a, sètadi pou l batize e pou l vin yon disip Kris. — Mat. 28:19.

3. Ki sa k ka anpeche yon moun batize? (Gade kare ki gen tit “ Ki sa k nan kè w toutbonvre?”)

³ Lanmou w gen pou Jewova ka pouse w batize. Men lanmou ka anpeche w fè sa tou. Ki jan? Fè yon ti reflechi sou kèk egzanp. Ou ka renmen fanmi w ak zanmi w ki pa Temwen yo anpil, e w ka pè pou yo pa rayi w si w vin batize (Mat. 10:37). Oubyen ou gendwa renmen yon seri  pratik ou konnen Bondye rayi e w ka twouve li difisil pou w kite yo (Sòm 97:10). Oubyen pandan w t ap grandi ou te konn fete yon seri fèt ki gen rapò ak fo relijyon. Petèt ou renmen bèl souvni ki mache ak fèt sa yo. Sa ka fè w santi l difisil pou w sispann fete fèt ki pa fè Jewova plezi yo (1 Kor. 10:20, 21). Se sa k fè ou bezwen mande tèt ou: “Ki sa oubyen kiyès mwen pi renmen?”

4. Ki rezon ki pi enpòtan w genyen pou w batize?

⁴ Gen anpil bon bagay ou ka renmen e w ka demontre rekonesans pou yo. Pa egzanp, menm anvan w te kòmanse etidye Labib ak Temwen Jewova yo, petèt ou te renmen Bib la anpil. E petèt ou te vin renmen Jezi. Kounye a ou vin konnen Temwen Jewova yo, petèt ou renmen pase tan avèk yo. Men, se pa fòseman rezon sa yo k ap pouse w vwe Jewova lavi w epi batize. Rezon ki pi enpòtan k ap pouse w batize se lanmou pou Jewova Dye. Lè w renmen Jewova plis pase tout lòt bagay, ou pap kite okenn bagay oswa okenn moun anpeche w sèvi l. Lanmou pou Jewova ap pouse w batize epitou l ap ede w rete fidèl menm lè w fin batize.

5. Ki kesyon nou pral egzamine?

⁵ Jezi te di nou dwe renmen Jewova ak tout kè nou, ak tout nanm nou, ak tout lespri nou e ak tout fòs nou (Mak 12:30). Ki jan w ka aprann renmen Jewova nan pwen sa a epi pou w respekte l? Lè n reflechi sou lanmou Jewova gen pou nou, sa pouse n renmen l tou (1 Jan 4:19). Lè w fin gen lanmou ki pi enpòtan ki egziste a, ki lòt santiman w ap vin gen tou natirèlman e ki sa sa ap pouse w fè *?

6. Bay youn nan fason w ka aprann konnen Jewova, selon Women 1:20.

⁶ Aprann konnen Jewova pa mwayen kreyasyon an. (Li Women 1:20; Rev. 4:11.) Medite sou sajès Jewova demontre nan fason l fè plant yo ak bèt yo. Byen gade fason estrawòdinè kò nou fèt (Sòm 139:14). Epi, reflechi sou tout enèji Jewova mete nan solèy nou an, e sonje solèy la se jis youn nan plizyè milya zetwal ki genyen yo * (Eza. 40:26). Lè w fè sa, w ap vin gen plis respè pou Jewova. Men, konesans sou sajès ak pisans Jewova se sèlman yon aspè nan baz w ap poze pou w gen bon relasyon avè l. Pou w vin gen anpil lanmou pou Jewova, ou bezwen konn plis bagay sou li.

7. Ki konviksyon w bezwen genyen pou w renmen Jewova anpil?

⁷ Ou bezwen gen konviksyon Jewova gen sousi pou ou pèsonèlman. Èske l difisil pou w kwè Sila a ki kreye syèl la ak tè a konnen w egziste e li gen sousi pou ou? Si w santi w konsa, sonje Jewova “pa lwen okenn nan nou”. (Tra. 17:26-28.) Li “egzamine kè tout moun”, e menm jan David te di Salomon sa, li pwomèt ou “si w chèche l, l ap kite w jwenn li”. (1 Kwo. 28:9.) Anfèt, rezon ki fè w ap etidye Bib la kounye a se paske Jewova di: “M rale w vin jwenn mwen.” ​(Jer. 31:3). Plis ou gen rekonesans pou tout sa Jewova fè pou ou, se plis w ap renmen l.

8. Ki jan w ka montre Jewova ou gen rekonesans pou lanmou l gen pou ou?

 ⁸ Youn nan fason w ka montre Jewova ou gen rekonesans pou lanmou l gen pou ou a se lè w pale avè l nan lapriyè. Plis w ap fè Bondye konnen tètchaje w genyen yo e plis w ap remèsye l pou tout sa l fè pou ou, se plis w ap vin gen lanmou pou li. Plis w ap wè fason Jewova reponn priyè w yo, se plis relasyon w gen avè l la ap vin solid (Sòm 116:1). W ap vin gen konviksyon li konprann ou. Men, pou w vin pwòch ak Jewova, ou bezwen konprann fason l panse. Epitou, ou bezwen konnen sa l vle w fè. Sèl fason w ka rive konnen sa, se lè w etidye Labib, Pawòl li a.

9. Ki jan w ka montre w gen rekonesans pou Bib la?

⁹ Aprann gen rekonesans pou Labib, Pawòl Bondye a. Se sèl nan Bib la w ap jwenn laverite sou Jewova ak sou objektif li gen pou ou. Ou montre w gen rekonesans pou Bib la lè w li l chak jou, lè w prepare etid ou e lè w aplike sa w aprann yo (Sòm 119:97, 99; Jan 17:17). Èske w gen yon pwogram pou w li Bib la? Èske w suiv pwogram sa a, lè w fè tout sa w kapab pou w li Bib la chak jou?

10. Bay youn nan bagay ki fè Bib la vrèman espesyal.

¹⁰ Youn nan bagay ki fè Bib la vrèman espesyal se paske l gen ladan l yon seri istwa sou Jezi e se moun ki te viv yo ki rakonte yo. Li se sèl liv ki bay esplikasyon ki egzak sou sa Jezi fè pou ou. Tank w ap aprann sa Jezi te di ak sa l te fè, se tank w ap santi w anvi vin zanmi l.

11. Ki jan w ka aprann renmen Jewova?

¹¹ Aprann renmen Jezi, e w ap vin pi renmen Jewova. Sa k fè sa? Paske Jezi imite kalite Papa l yo yon fason ki pafè (Jan 14:9). Kidonk, plis w ap aprann konn Jezi, se plis w ap vin konprann kiyès Jewova ye e se plis w ap vin pwòch avè l. Fè yon ti reflechi sou konpasyon Jezi te demontre pou moun lòt moun te  meprize yo anpalan de moun ki pòv yo, moun ki malad yo ak moun ki san defans yo. Fè yon ti reflechi tou sou konsèy li ba ou ak fason lavi w vin amelyore lè w koute l. — Mat. 5:1-11; 7:24-27.

12. Tank w ap aprann konnen Jezi, ki sa sa ka pouse w fè?

¹² Tank ou pran tan pou w byen reflechi sou sakrifis Jezi te fè yon fason pou peche nou yo ka jwenn padon, se tank w ap vin gen plis lanmou pou Jezi (Mat. 20:28). Lè w konprann Jezi te aksepte mouri pou ou, sa ka pouse w repanti e sa ka pouse w chèche jwenn padon nan men Jewova (Tra. 3:19, 20; 1 Jan 1:9). Epitou, toutpandan w ap aprann renmen Jezi ak Jewova, tou natirèlman, w ap vle vin pwòch ak moun ki renmen yo tou.

13. Ki sa Jewova ba ou?

¹³ Aprann renmen moun ki renmen Jewova yo. Moun nan fanmi w ki pa Temwen ak ansyen zanmi w yo ka pa konprann rezon ki fè w vwe Jewova lavi w. Yo ka menm opoze avè w. Jewova ap ede w lè l fè frè ak sè yo nan kongregasyon an vin tankou yon fanmi pou ou. Si w rete pwòch ak fanmi sa a, w ap jwenn lanmou ak sipò ou bezwen an (Mak 10:29, 30; Ebre 10:24, 25). Rive yon lè, moun nan fanmi w ka vin sèvi Jewova e yo ka vin suiv prensip li yo ansanm avè w. — 1 Pyè 2:12.

14. Selon 1 Jan 5:3, ki sa w vin aprann konsènan prensip Jewova yo?

¹⁴ Aprann gen respè pou prensip Jewova yo epi aplike yo. Anvan w te aprann konn Jewova, ou te gendwa gen pwòp prensip pa w, men, kounye a ou wè se prensip Jewova yo ki pi bon. (Sòm 1:1-3; li 1 Jan 5:3.) Fè yon ti reflechi sou konsèy Bib la bay pou mari yo, madanm yo, paran yo ak timoun yo (Efe. 5:22–6:4). Toutpandan w ap aplike konsèy sa a èske w wè fason lavi fanmi w amelyore? Lè w obeyi konsèy Jewova bay pou w byen chwazi zanmi w, èske w wè w vin yon pi bon moun? Èske w vin gen plis kè kontan (Pwo. 13:20; 1 Kor. 15:33)? Sandout repons kesyon sa yo se wi.

15. Ki sa w ka fè si w bezwen èd pou w aplike prensip Bib la bay yo?

¹⁵ Pafwa, ou ka twouve l difisil pou w wè fason pou w aplike prensip w ap aprann nan Bib la. Se rezon sa a ki fè Jewova sèvi ak òganizasyon l lan pou l ba w yon seri piblikasyon ki baze sou Bib la ki ka ede w fè diferans ant sa ki byen ak sa ki mal (Ebre 5:13, 14). Lè w li piblikasyon sa yo e w etidye yo, w ap wè jan yo bay bon konsèy ak fason w ka aplike yo nan lavi w, e sandout, w ap anvi fè pati òganizasyon Jewova a.

16. Ki fason Jewova òganize pèp li a?

¹⁶ Aprann renmen òganizasyon Jewova a e aprann soutni l. Jewova òganize pèp li a pou yo vin fòme plizyè kongregasyon. Jezi, Pitit Gason l lan, se chèf yo tout (Efe. 1:22; 5:23). Jezi nome yon ti gwoup gason Bondye chwazi pou al nan syèl pou pran latèt nan òganize travay li vle yo fè jodi a. Jezi te pale de gwoup gason sa a antanke “esklav fidèl ki prevwayan an”. Mesye sa yo gen responsablite pou ede w vin pi pwòch Bondye, pou pwoteje relasyon w gen avè l, e yo pran responsablite sa a oserye (Mat. 24:45-47). Youn nan fason esklav fidèl la pran swen w se lè l veye pou gen ansyen ki kalifye pou gide w  e pou pwoteje w (Eza. 32:1, 2; Ebre 13:17; 1 Pyè 5:2, 3). Ansyen yo dispoze fè tout sa yo kapab pou yo konsole w e pou yo ede w vin pi pwòch Jewova. Men, youn nan bagay ki pi enpòtan yo ka fè pou ou se ede w aprann lòt moun konn Jewova. — Efe. 4:11-13.

17. Dapre Women 10:10, 13, 14 poukisa nou pale ak lòt moun konsènan Jewova?

¹⁷ Ede lòt moun aprann renmen Jewova. Jezi te di disip li yo pou yo aprann lòt moun konnen Jewova (Mat. 28:19, 20). Nou ka obeyi lòd sa a paske nou konnen se yon responsablite nou genyen. Men, toutpandan w ap vin pi renmen Jewova, w ap santi w menm jan ak apot Pyè ak apot Jan ki te di: “Nou pa ka sispann pale bagay nou te wè yo ak bagay nou te tande yo.” ​(Tra. 4:20). Pa gen anpil bagay ki bay moun kè kontan konsa pase ede yon moun renmen Jewova. Imajine jan Filip, yon moun ki te konn ap evanjelize, te santi l kontan lè l te ede Etyopyen an konprann verite ki nan Ekriti yo epi Etyopyen an te batize! Lè w imite Filip e w obeyi lòd Jezi bay pou w preche a, ou montre w vle vin yon Temwen Jewova. (Li Women 10:10, 13, 14.) Lè sa a, se sèten w ap poze menm kesyon Etyopyen an te poze a lè l te di: “Ki sa k anpeche m batize?” — Tra. 8:36.

18. Ki sa nou pral egzamine nan atik ki vin apre a?

¹⁸ Lè w deside batize, se pral etap ki pi enpòtan w ap franchi nan lavi w. Piske se yon etap ki enpòtan anpil, ou bezwen pran tan pou w byen reflechi sou sa sa mande. Ki sa w bezwen konnen konsènan batèm? Ki sa w bezwen fè anvan w batize e apre w fin batize? W ap jwenn repons kesyon sa yo nan atik ki vin apre a.