ATIK ETID 9
Jèn frè, ki sa nou ka fè pou yo fè n konfyans?
“Gwoup jèn gason w yo tankou gout lawouze.” — SÒM 110:3.
KANTIK 39 Ann chèche gen yon bèl repitasyon devan Bondye
SA NOU PRAL WÈ *
1. Ki sa nou ka di konsènan jèn frè nou yo?
JÈN frè, gen anpil bagay nou kapab fè. Anpil nan nou gen fòs e nou chaje ak enèji (Pwo. 20:29). Nou ede frè ak sè yo nan kongregasyon an anpil. Petèt nou ta renmen vin sèvitè ministeryèl. Sepandan, nou gendwa panse moun nan kongregasyon an twouve nou twò jèn oswa nou pa gen ase eksperyans pou yo konfye nou travay ki enpòtan. Byenke nou jèn, gen anpil bagay nou kapab fè kounye a pou frè ak sè yo nan kongregasyon an fè nou konfyans epi respekte nou.
2. Sou ki sa nou pral pale nan atik sa a?
2 Nan atik sa a, nou pral pale sou lavi wa David. Nou pral fè yon ti pale tou sou kèk evènman ki te rive nan lavi Aza ak Jozafa, de wa peyi Jida. Nou pral pale tou sou kèk pwoblèm twa mesye sa yo te genyen, ki sa yo te fè pou yo rezoud yo e ki sa jèn frè yo ka aprann nan egzanp yo.
APRANN NAN EGZANP WA DAVID
3. Bay youn nan fason jèn yo ka ede moun ki aje nan kongregasyon an.
3 Lè David te jèn, li te aprann fè yon seri bagay moun te bay anpil valè. Yo te ka wè li te renmen Bondye. Li te antrene anpil pou l vin yon bon mizisyen e l te sèvi ak talan sa a pou l ede Sayil, wa Bondye te chwazi a (1 Sam. 16:16, 23). Jèn frè, èske gen yon bagay ou konn fè ki ta ka itil moun nan kongregasyon an? Anpil nan nou ka fè anpil bagay. Pa egzanp, èske w konn kèk moun ki aje ki ta renmen w ede yo konn fason pou yo sèvi ak tablèt yo oswa lòt aparèy elektwonik yo genyen pou yo fè etid pèsonèl e pou yo suiv reyinyon yo. Lefètke w konn ki jan pou w sèvi ak aparèy sa yo, sa ka itil yo anpil.
Lè David t ap pran swen mouton papa l yo, li te montre l se yon moun ki responsab e yo te ka konte sou li. Li te menm pwoteje mouton yo lè yon lous te atake yo. (Gade paragraf 4.)
4. Menm jan ak David, ki kalite jèn frè yo dwe fè efò pou yo genyen? (Gade foto ki sou paj kouvèti a.)
4 David te toujou montre li se yon moun ki responsab e yo ka konte sou li. Pa egzanp, lè l te jèn, li te travay di pou l pran swen mouton papa l yo. Se te yon travay ki te gen anpil danje ladan l. Men sa David te di wa Sayil: “Mwen menm, sèvitè w la, mwen se gadò mouton papa m yo. Yon lè, te gen yon lyon ki te vini, li pran yon mouton nan twoupo a l ale. Yon lòt lè, yon lous te vini, li fè menm bagay la. Mwen te kouri dèyè yo e m te ba yo yon kou, epi m te pran bèt la nan bouch yo.” (1 Sam. 17:34, 35). David te santi se yon responsablite pou l pran swen mouton yo e li te met kouraj sou li pou l pwoteje yo. Jèn frè yo ka imite David lè yo byen fè nenpòt travay yo ba yo fè.
5. Selon Sòm 25:14, ki bagay ki pi enpòtan jèn frè yo ka fè?
5 Depi lè David te jèn, li te chèche vin pwòch ak Jewova. Relasyon sa a te pi enpòtan pase kouraj David te genyen oswa kapasite l te genyen pou l jwe yon enstriman mizik. Nonsèlman Jewova se te Bondye David, men li te Zanmi l tou, li te bon Zanmi l. (Li Sòm 25:14.) Jèn frè, bagay ki pi enpòtan nou ka fè, se chèche vin gen pi bon relasyon ak Papa nou ki nan syèl la. Si nou fè sa, yo ka ban nou plis responsablite.
6. Ki jan kèk moun te wè David?
6 Gen moun ki te twouve David twò jèn oswa li pa t pran responsablite l oserye. Pa egzanp, lè David te ofri tèt li pou l al batay ak Golyat, wa Sayil te eseye dekouraje l. Li te di l: “Se yon timoun ou ye.” (1 Sam. 17:31-33). Anvan sa, pwòp frè David te akize l kòmkwa li pa pran responsablite l oserye (1 Sam. 17:26-30). Men, Jewova pa t wè David twò jèn oswa li se yon moun ki pa t pran responsablite l oserye. Li te byen konn David. E piske David te konte sou Jewova, Zanmi l lan, pou l jwenn fòs, li te rive touye Golyat. — 1 Sam. 17:45, 48-51.
7. Ki sa w ka aprann nan sa k te rive David la?
7 Ki sa n ka aprann nan sa k te rive David la? Nou aprann nou bezwen gen pasyans. Sa ka pran tan pou moun ki te konnen nou lè n te timoun vin konprann nou pa timoun ankò. Men, nou mèt gen asirans Jewova pa gade nou sou aparans. Li konnen nou byen e li konn sa nou kapab fè (1 Sam. 16:7). Chèche vin pi pwòch ak Bondye. David te fè sa, lè l te pran san l pou l gade bagay Jewova kreye yo. David te reflechi anpil sou sa bagay sa yo aprann li sou Kreyatè a (Sòm 8:3, 4; 139:14; Wom. 1:20). Yon lòt bagay nou ka fè, se konte sou Jewova pou l ban n fòs. Pa egzanp, èske gen elèv nan lekòl ou k ap pase w nan rizib paske w se Temwen Jewova? Si w ta nan yon sitiyasyon konsa, priye Jewova pou l ede w fè fas ak pwoblèm sa a. Epi, suiv bonjan konsèy ou jwenn nan Pawòl li a, nan piblikasyon ki baze sou Bib la ak nan videyo nou yo. Chak fwa w wè jan Jewova ede w fè fas ak yon pwoblèm, w ap vin gen plis konfyans nan li. Mete sou sa, lè lòt moun wè jan w konte sou Jewova, y ap fè w konfyans.
Gen plizyè fason jèn frè yo ka ede lòt moun avèk imilite. (Gade paragraf 8-9.)
8-9. Ki sa k te ede David tann avèk pasyans jiskaske l vin wa, e ki sa jèn frè yo ka aprann nan egzanp li?
8 Ann wè yon lòt difikilte David te jwenn. Apre Bondye te fin chwazi David pou l vin wa, David te oblije tann anpil ane anvan l kòmanse dirije antanke wa nan peyi Jida (1 Sam. 16:13; 2 Sam. 2:3, 4). Pandan tan sa a, ki sa k te ede David tann avèk pasyans? Olye l te kite dekourajman pote l ale, li te konsantre sou sa l kapab fè. Pa egzanp, pandan l te nan mawon nan tèritwa moun Filisti yo, li te pwofite okazyon sa a pou l konbat ènmi Izrayèl yo. Konsa, li te pwoteje fwontyè peyi Jida. — 1 Sam. 27:1-12.
9 Ki sa jèn frè yo ka aprann nan egzanp David? Yo bezwen pwofite okazyon yo jwenn pou yo sèvi frè ak sè yo. Ann wè ki eksperyans yon frè ki rele Ricardo * te fè. Depi nan kòmansman adolesans li, rèv li se te vin pyonye pèmanan. Men, ansyen yo te fè l konnen li poko pare. Olye Ricardo te vin dekouraje oswa fache, li te patisipe plis nan travay predikasyon an. Men sa l di: “Lè m reflechi, mwen rann mwen kont mwen te bezwen fè kèk pwogrè. Mwen te asire m mwen retounen vizite tout moun ki te montre yo enterese e mwen te konn prepare chak vizit. Mwen te menm vin gen yon etid. Plis mwen te preche, se plis mwen te vin gen eksperyans.” Kounye a, Ricardo se yon pyonye pèmanan ki efikas e li se yon sèvitè ministeryèl.
10. Ki sa David te fè yon lè anvan l te pran yon desizyon enpòtan?
10 Ann reflechi sou yon lòt bagay ki te rive David. Pandan li menm ansanm ak mesye l yo ak fanmi yo te nan mawon, yo te kite fanmi yo lakay pou y al nan yon misyon. Pandan yo pa t la, gen ènmi ki te anvayi kote yo te rete a e yo te pran fanmi yo al avèk yo. David te ka panse piske l gen anpil eksperyans nan fè lagè, li te ka jwenn yon bon fason pou l delivre moun yo te pran yo byen fasil. Men, olye de sa, li te mande Jewova gide l. Gen yon prèt ki te rele Abyata ki te ede David pou l ka pale ak Jewova, epi David te mande Jewova: “Èske m dwe al dèyè bann vòlè sa yo.” Jewova te di David li mèt ale e li te ba l asirans l ap delivre moun yo te pran yo (1 Sam. 30:7-10). Ki sa w aprann nan istwa sa a?
Jèn frè yo ta dwe mande ansyen yo konsèy. (Gade paragraf 11.)
11. Ki sa w ka fè anvan w pran desizyon?
11 Chèche jwenn konsèy anvan w pran desizyon. Pale ak paran w. Ou ka jwenn bon konsèy tou lè w pale ak ansyen yo, paske yo gen eksperyans. Se Jewova ki chwazi mesye sa yo e li fè yo konfyans, ou ka fè yo konfyans tou. Jewova wè mesye sa yo tankou yon “kado” pou kongregasyon an (Efe. 4:8). Si w imite lafwa yo e w koute bon konsèy yo ba w, w ap kapab pran bon desizyon. Kounye a, ann wè sa nou ka aprann nan egzanp wa Aza.
APRANN NAN EGZANP WA AZA
12. Ki bèl kalite wa Aza te genyen lè l te kòmanse dirije?
12 Lè wa Aza te jèn gason, li te gen imilite e li te gen kran. Pa egzanp, lè l te vin wa apre lanmò Abija, papa l, li te fè yon kanpay pou l elimine zidòl nan peyi a. Mete sou sa, “li te ankouraje moun nan tribi Jida yo pou yo chèche Jewova, Bondye zansèt yo, e pou yo obeyi Lwa l yo ak kòmandman l yo”. (2 Kwo. 14:1-7.) E lè Zera, moun Etyopi a, te vin anvayi Jida ak 1 000 000 sòlda, Aza te montre l gen sajès lè l te mande Jewova èd. Li te di l: “O Jewova, kit moun w ap ede yo anpil, kit yo pa gen fòs, pou ou, se menm bagay. O Jewova, Bondye nou an, ede nou tanpri, paske se sou ou nou konte.” Bèl pawòl sa yo Aza te di montre jis nan ki pwen li gen konfyans nan kapasite Jewova genyen pou l sove pèp li a. Aza te met konfyans li nan Papa l ki nan syèl la, e “Jewova te [...] pot laviktwa sou moun Etyopi yo”. — 2 Kwo. 14:8-12.
13. Ki sa k te vin rive Aza, e sa k te fè sa?
13 Se sèten w ap dakò se pa t yon bagay ki te fasil menm pou yon wa fè fas ak yon lame ki gen 1 000 000 sòlda. Epoutan, Aza te pot laviktwa sou yo paske l te konte sou Jewova. Men, malerezman, lè l te nan yon lòt sitiyasyon ki pa t grav menm jan an, li pa t chèche èd Jewova. Lè Baacha, wa Izrayèl la, yon wa ki te mechan, te menase wa Aza, Aza t al chèche èd nan men wa peyi Siri a. Desizyon wa Aza te pran an te gen move konsekans. Men sa Jewova te voye pwofèt Anani al di wa Aza: “Kòm se sou wa Siri a ou te konte e w pa t konte sou Jewova, Bondye w la, lame wa Siri a chape nan men w.” Anfèt, depi lè sa a, wa Aza pa t janm sispann fè lagè (2 Kwo. 16:7, 9; 1 Wa 15:32). Ki leson nou aprann nan istwa sa a?
14. Ki jan w ka montre w konte sou Jewova, e selon 1 Timote 4:12, ki sa k ap rive si w fè sa?
14 Ou bezwen kontinye gen imilite epi kontinye konte sou Jewova. Lè w te batize, ou te montre w gen anpil lafwa ak anpil konfyans nan Jewova. E Jewova te kontan dèske w te vin fè pati fanmi l. Kounye a, sa w bezwen fè, se kontinye konte sou Jewova. Petèt, li kapab fasil pou w konte sou Jewova lè w gen desizyon ki enpòtan anpil pou w pran. Men, ki sa w ap fè nan lòt sitiyasyon yo? Li vrèman enpòtan pou w konte sou Jewova nan kèlkeswa desizyon w ap pran, kit se detant w ap chwazi, travay w ap aksepte, ak sa w ta renmen fè ak lavi w! Pa konte sou entèlijans ou. Okontrè, chèche konn ki prensip biblik k ap ede w nan chak sitiyasyon, epi chèche aplike l (Pwo. 3:5, 6). Si w fè sa, w ap fè kè Jewova kontan e frè ak sè yo nan kongregasyon an ap gen respè pou ou. — Li 1 Timote 4:12.
APRANN NAN EGZANP WA JOZAFA
15. Jan sa parèt nan 2 Kwonik 18:1-3; 19:2, ki erè wa Jozafa te fè?
15 Nòmalman, ou enpafè menm jan ak tout moun, e w ap fè erè pafwa. Men, ou pa ta dwe kite sa anpeche w fè tout sa w kapab nan sèvis Jewova a. Ann pran egzanp wa Jozafa. Li te gen anpil bèl kalite. Lè l te jèn, “li te chèche Bondye papa l la, li te obeyi kòmandman l yo”. Anplis de sa, li te voye gwo chèf nan tout vil Jida yo pou al anseye pèp la pawòl Jewova (2 Kwo. 17:4, 7). Byenke Jozafa te sensè, li te konn pran move desizyon pafwa. Se sa k fè, apre l te fin pran yon move desizyon, gen youn nan sèvitè Jewova yo ki t al kote l pou fè l konnen jan Jewova pa t kontan sa l te fè a. (Li 2 Kwonik 18:1-3; 19:2.) Ki sa w ka aprann nan istwa sa a?
Jèn frè yo vin gen bèl repitasyon lè yo travay di e lè moun ka konte sou yo. (Gade paragraf 16.)
16. Ki sa nou ka aprann nan eksperyans Rajeev te fè a?
16 Aksepte konsèy yo ba w epi suiv yo. Petèt, menm jan ak anpil lòt jèn frè, ou fè anpil efò pou w bay sèvis Jewova a premye plas nan lavi w. Kontinye fè sa! Ann wè ki eksperyans yon jèn frè ki rele Rajeev te fè lè l te nan adolesans li. Men sa l di: “Pafwa, m pa t konn sa m te vle fè ak lavi m. Menm jan ak anpil lòt jèn, mwen te plis enterese nan spò ak nan pran plezi m pase pou m t al nan reyinyon oswa al preche.” Ki sa k te ede Rajeev? Yon ansyen ki te gen anpil sousi pou li te ba l konsèy. Men sa Rajeev fè konnen: “Li te ede m rezone sou prensip ki nan 1 Timote 4:8 la.” Avèk imilite, Rajeev te suiv konsèy frè a te ba li a e li te reflechi sou sa l ta dwe bay plis enpòtans nan lavi l. Men sa l di: “Mwen te deside bay sèvis Jewova a premye plas nan lavi m.” Ki rezilta sa te bay? Men sa Rajeev fè konnen: “Kèk ane apre frè a te fin ban m konsèy la, mwen te kalifye pou m vin sèvitè ministeryèl.”
FÈ PAPA W KI NAN SYÈL LA KONTAN LÈ L AP GADE W
17. Ki jan moun ki aje yo santi yo lè yo wè jèn gason k ap sèvi Jewova yo?
17 Nou menm jèn frè, moun ki aje yo vrèman kontan lefètke n ap sèvi Jewova “kòtakòt” avèk yo (Sof. 3:9)! Yo renmen wè jan nou bay tout fòs nou ak enèji nou nan travay n ap fè. Nou gen anpil valè nan je yo. — 1 Jan 2:14.
18. Jan sa parèt nan Pwovèb 27:11, ki jan Jewova santi l lè l ap gade jèn gason k ap sèvi l yo?
18 Jèn frè, pa janm bliye Jewova renmen nou e li fè nou konfyans. Jewova te anonse, nan dènye jou yo, t ap gen yon gwoup jèn gason ki t ap ofri tèt yo san fòse (Sòm 110:1-3). Li konnen nou renmen l e nou vle fè tout sa n kapab nan sèvis li. Se pou nou pran pasyans ak lòt moun, e se pou nou pran pasyans ak tèt nou. Lè nou fè erè, aksepte fòmasyon ak disiplin nou resevwa a kòmsi se Jewova k ap ban nou l (Ebre 12:6). Pran san nou pou nou byen fè nenpòt travay yo ban nou fè. E sa k pi enpòtan an, nan tout sa n ap fè, se pou nou fè Papa nou ki nan syèl la kontan lè l ap gade nou. — Li Pwovèb 27:11.
KANTIK 135 “Pitit mwen, montre w saj”
