Moun ki li istwa sa a byen vit konn poze tèt yo kesyon sa a. Men, vèsè sa yo ap pale konsènan de moun, e toule de te rele Mefibochèt. Epitou, gen yon bagay nou ka aprann lè n reflechi sou sa k te rive a.

Sayil, wa peyi Izrayèl, te gen sèt pitit gason ak de pitit fi. Premye pitit gason Sayil la te rele Jonatan. Annapre, wa Sayil te vin fè yon pitit gason ki te rele Mefibochèt ak Rispa, yon madanm sou kote l te genyen. Sa ki enteresan, Jonatan te gen yon pitit gason ki te rele Mefibochèt tou. Konsa, wa Sayil te gen yon pitit gason ki te rele Mefibochèt ak yon pitit pitit ki te gen menm non an.

Rive yon lè, wa Sayil te vin rayi moun Gabawon yo ki t ap viv nan mitan Izrayelit yo, e l te chèche elimine yo. Sanble yo te touye anpil nan yo. Se sèten sa l te fè a pa t bon. Poukisa? Paske nan epòk Jozye a, chèf fanmi pami Izrayelit yo te fè yon alyans ak moun Gabawon yo pou yo fè lapè ak yo. — Joz. 9:3-27.

Alyans sa a te toujou la nan epòk wa Sayil. Aktout alyans lan te la, wa a t ap chèche elimine moun Gabawon yo. Aksyon sa a te vin fè “Sayil ak moun lakay li koupab pou san yo te fè koule”. (2 Sam. 21:1.) Finalman, David te vin wa. Moun Gabawon ki te chape yo t al pale avè l konsènan gwo mechanste yo te fè yo a. David te mande yo ki sa k ta dwe fèt pou repare aksyon terib sa a Sayil te fè a pou Jewova ka beni peyi a. Olye moun Gabawon yo te mande lajan, yo te mande pou yo ba yo sèt pitit gason moun ki “te fè plan pou elimine” yo a pou yo te ka touye yo (Nonb 35:30, 31). David te fè sa yo te mande a. — 2 Sam. 21:2-6.

Lè sa a, Sayil ak Jonatan te gentan mouri nan lagè. Men, Mefibochèt, pitit gason Jonatan an, te vivan. Li te domaje nan pye akoz yon malè ki te rive l lè l te timoun, e l pa t nan touye moun Gabawon yo ansanm ak granpapa l. David ak Jonatan te vin zanmi e yo te fè yon alyans ki t ap nan avantaj pitit Jonatan yo, san wete Mefibochèt, pitit gason Jonatan (1 Sam. 18:1; 20:42). Men sa istwa a di: “Wa [David] te gen pitye pou Mefibochèt, pitit gason Jonatan ki te pitit gason Sayil, akoz sèman David ak Jonatan, pitit gason Sayil la, te fè devan Jewova.” — 2 Sam. 21:7.

Aktout sa, David te fè sa moun Gabawon yo te mande a. Li te remèt yo de nan pitit gason Sayil yo, youn ladan yo te rele Mefibochèt, ansanm ak senk nan pitit pitit gason Sayil yo (2 Sam. 21:8, 9). Sa David te fè a te fè peyi a pa koupab ankò pou san ki te koule a.

Evènman sa a se pa jis yon istwa. Lwa Bondye te bay la te klè. Men sa l te di: “Nou pa dwe touye yon pitit pou sa papa l fè.” (Det. 24:16). Jewova pa t ap dakò pou yo touye de pitit gason Sayil yo ak senk pitit pitit gason l yo si yo te inosan. Men sa lwa sa a te di tou: “Yo dwe touye yon moun sèlman pou peche li menm li fè.” Sanble sèt desandan Sayil sa yo ki te mouri te patisipe nan masak Sayil te fè lè l t ap chèche elimine moun Gabawon yo. Se sa k fè yo toule sèt te peye pou zak yo te fè a.

Istwa sa a montre yon moun pa ka fin fè yon move bagay epi pou l panse oswa pou l di se lòd li te resevwa. Men sa yon pwovèb ki gen anpil sajès di: “Fè chemen kote w ap met pye w la vin plat, e pap gen okenn danje sou wout ou.” — Pwo. 4:24-27; Efe. 5:15.