1-2. a) Nan ki sitiyasyon Pòl te ye lè l te ekri kretyen nan vil Efèz yo? b) Ki kesyon nou pral egzamine?

 PANDAN apot Pòl te nan prizon nan yon kay nan vil Wòm, li te vle ankouraje frè l ak sè l yo. Kòm li pa t ka al vizite yo, li te ekri yo. Li te ekri kretyen nan vil Efèz yo youn nan lèt sa yo ozanviwon ane 60 oswa ane 61 epòk nou an. — Efe. 1:1; 4:1.

² Anviwon dizan anvan sa, Pòl te pase yon bon ti tan nan vil Efèz ap preche bon nouvèl la e ap anseye (Tra. 19:​1, 8-10; 20:​20, 21). Li te renmen frè l yo anpil, e l te vle ede yo pou yo ret fidèl ak Jewova. Sepandan, poukisa li te ekri kretyen Bondye chwazi pou al nan syèl yo konsènan fènwa ak limyè? E ki leson tout kretyen ka aprann nan konsèy sa a? Ann egzamine repons kesyon sa yo.

YO SOT NAN FÈNWA YO VIN NAN LIMYÈ

3. Ki mo Pòl te itilize nan lèt li te ekri kretyen nan vil Efèz yo?

³ Pòl te ekri kretyen nan vil Efèz yo, li te di yo: “Gen yon lè se fènwa nou te ye, men kounye a nou se limyè.” (Efe. 5:8). Pòl te itilize mo fènwa ak mo limyè a pou l esplike gwo chanjman kretyen sa yo te fè. Ann wè pou ki rezon Pòl te ka di kretyen nan vil Efèz yo “se fènwa [yo] te ye”.

4. Nan ki sans moun nan vil Efèz yo te nan fènwa akoz fo relijyon?

⁴ Yo te nan fènwa akoz fo relijyon. Anvan moun nan vil Efèz Pòl te ekri yo te aprann laverite e yo te vin kretyen, yo te esklav fo relijyon ak sipèstisyon. Se nan vil Efèz tanp Atemis la, yon tanp ki te gen gwo renome, te ye. Se yon tanp moun nan epòk la te konsidere kòm youn  nan sèt mèvèy ki te gen nan monn nan. Moun ki te konn adore nan tanp sa a t ap benyen nan idolatri. Te gen atizan ki te konn fè ti tanp ki gen estati deyès Atemis anndan yo pou vann. Yo te konn fè anpil kòb nan biznis sa a (Tra. 19:​23-27). Mete sou sa, anpil moun nan vil Efèz te konn fè maji. — Tra. 19:19.

5. Nan ki sans moun nan vil Efèz yo te nan fènwa nan domèn moral?

⁵ Yo te nan fènwa akoz imoralite. Moun nan vil Efèz yo te imoral anpil e yo pa t wont move konduit yo te genyen. Souvan, yo te konn pale sou sèks nan pyès teyat yo te konn ap jwe kote yo te konn fè teyat nan vil la e menm nan fèt relijye yo te konn selebre (Efe. 5:3). Anpil nan moun ki te abite nan vil sa a ‘pa t gen moralite menm ankò’, yon ekspresyon lè yo tradui l yon fason literal ki vle di yo te “sispann santi doulè” nan kè yo lè yo te fè yon bagay ki mal (Efe. 4:​17-19). Anvan kretyen nan vil Efèz yo te aprann konn sa ki byen oswa sa ki mal, konsyans yo pa t nui yo lè yo te fè yon bagay ki mal, oswa yo pa t panse yo te gen kont pou yo rann Jewova. Se sa k fè Pòl te kapab di “lespri yo nan fènwa e yo lwen lavi ki soti nan Bondye a”.

6. Sa k fè Pòl te ka di kretyen nan vil Efèz yo: “Kounye a nou se limyè”?

⁶ Sepandan, gen kèk moun nan vil Efèz ki pa t ret nan fènwa. Nan lèt Pòl te ekri a li te fè konnen “kounye a [yo] se limyè ann inyon ak Seyè a”. (Efe. 5:8.) Yo te vin ap viv ann amoni ak limyè verite ki nan Pawòl Bondye a (Sòm 119:105). Moun sa yo te sispann fè sa yo te konn ap fè lè yo te nan fo relijyon e yo te kite konduit imoral yo te genyen. Yo te vin ap “imite Bondye” e yo te fè anpil efò pou yo adore Jewova e pou yo fè l plezi. — Efe. 5:1.

7. Nan ki sans sitiyasyon nou sanble ak sitiyasyon anpil kretyen nan vil Efèz?

⁷ Menm jan an tou, anvan nou te aprann laverite nou te nan fènwa akoz fo relijyon ak imoralite. Gen nan nou ki te  konn fete fèt ki gen rapò ak fo relijyon, e gen nan nou ki te konn ap mennen yon vi imoral. Men, lè nou te aprann prensip Jewova anrapò ak sa ki byen ak sa ki mal, nou te fè chanjman. Nou te vin ap viv fason Jewova vle a. Se sa k fè nou jwenn anpil byenfè (Eza. 48:17). Sepandan, jodi a nou pa sispann jwenn difikilte. Nou bezwen rete lwen fènwa nou te kite dèyè a e nou bezwen “kontinye mache tankou pitit limyè”. Ki jan nou ka fè sa?

EVITE FÈNWA A

8. Selon Efezyen 5:​3-5, ki sa kretyen nan vil Efèz yo te bezwen evite?

⁸ Li Efezyen 5:​3-5. Pou kretyen nan vil Efèz yo te rete lwen fènwa nan domèn moral, yo te bezwen kontinye vire do bay yon seri bagay yo t ap fè ki pa t fè Jewova plezi. Nonsèlman yo te bezwen sispann fè imoralite seksyèl, men tou, yo te bezwen sispann pale sou bagay ki gen rapò ak sèks. Pòl te fè kretyen nan vil Efèz yo sonje yo dwe evite bagay sa yo si yo ta renmen gen “eritaj nan Wayòm ki pou Kris ak Bondye a”.

9. Poukisa nou bezwen pran anpil prekosyon pou n pa fè anyen ki ta ka fè n tonbe nan imoralite?

⁹ Nou menm tou, nou dwe kontinye lite pou n pa patisipe nan “travay ki pa pwodui anyen, travay ki gen rapò ak fènwa”. (Efe. 5:11.) Plizyè fwa, eksperyans montre plis yon moun gade oswa koute oubyen pale sou bagay ki pa pwòp, bagay ki imoral, se plis l ap fasil pou l tonbe nan fè sa k pa bon (Jen. 3:6; Jak 1:​14, 15). Nan yon peyi, gen plizyè frè ki te vin “zanmi” nan yon gwoup yo te fè sou Entènèt. Okòmansman, anpil nan yo te konn voye mesaj ki gen rapò ak bagay espirityèl sou gwoup la. Men, tikras pa tikras yo te vin kòmanse pale sou bagay ki pa t fè Jewova plezi. Yo te vin plis ap pale sou sèks. Annapre, plizyè ladan yo te fè konnen konvèsasyon sal sa yo te fè yo tonbe nan imoralite seksyèl.

10. Ki jan Satan chèche twonpe nou? (Efezyen 5:6).

¹⁰ Monn Satan an ap eseye twonpe nou pou fè nou kwè bagay Jewova di ki imoral e ki pa pwòp pa gen anyen mal ladan yo (2 Pyè 2:19). Sa pa fè n sezi! Youn nan taktik Dyab la gen lontan depi l ap itilize se lage moun nan konfizyon pou yo pa kapab fè diferans ant sa ki byen ak sa ki mal (Eza. 5:20; 2 Kor. 4:4). Nou pa sezi dèske gen anpil fim, anpil emisyon televizyon ak sit Entènèt k ap ankouraje ide ki kont prensip Jewova yo ki jis! Satan ap chèche twonpe nou pou fè n panse bagay moun ap fè ki pa pwòp ak vi imoral moun ap mennen, nonsèlman pa gen anyen mal ladan yo, men tou, yo bay kè kontan e yo san danje. — Li Efezyen 5:6.

11. Ki jan eksperyans Angela fè a montre nesesite pou n aplike konsèy ki gen sajès nou jwenn nan Efezyen 5:7 la? (Gade foto a tou.)

¹¹ Satan ta renmen nou fè zanmi ak moun k ap fè l pi difisil pou n suiv prensip Jewova yo. Se sa k fè, men sa Pòl te di kretyen Efèz yo: “Pinga nou annafè ak yo”, sa vle di ak moun k ap pratike sa ki mal nan je Bondye (Efe. 5:7). Nou bezwen sonje se pa sèlman lè yon moun la ansanm avè n nou frekante l. Lè nou an kontak ak moun sou rezo sosyal nou frekante yo tou. Se yon danje ki pa t egziste nan epòk kretyen nan vil Efèz tan lontan an. Angela a, k ap viv ann Azi, wè  jan rezo sosyal yo kapab yon danje. Men sa l admèt: “Sa kapab yon pyèj, sa kapab chanje fason w panse tikras pa tikras. M te rive nan yon pwen sa pa t deranje m pou m te fè ‘zanmi’ ak moun ki pa t gen respè pou prensip ki nan Bib la. Mwen te vin ap panse pa gen okenn pwoblèm pou m mennen yon vi ki pa fè Jewova plezi.” Erezman, te gen yon seri ansyen ki gen lanmou ki te ede Angela fè chanjman ki nesesè yo. Men sa l di: “Kounye a, mwen ranpli lespri m ak bagay ki fè Jewova plezi, olye m ranpli lespri m ak bagay mwen jwenn sou rezo sosyal yo.”

12. Ki sa k ap ede n ret atache ak prensip Jewova bay anrapò ak sa ki byen ak sa ki mal?

¹² Nou dwe lite kont fason monn nan panse ki fè konprann konduit imoral yo akseptab. Nou konnen se pa vre (Efe. 4:​19, 20). Li bon pou n mande tèt nou: ‘Èske m veye pou m evite tout kontak ki pa nesesè ak kòlèg travay mwen, kondisip mwen oswa lòt moun ki pa respekte prensip Jewova yo ki jis? Èske m met kouraj sou mwen pou m suiv prensip Jewova yo menm lè kèk moun ka di mwen se yon fanatik poutèt mwen fè sa?’ Jan 2 Timote 2:​20-22 montre, nou bezwen pran prekosyon tou lè n ap chwazi moun nan kongregasyon an pou n fè zanmi. Nou bezwen sonje gen ladan yo ki ka pa ede n ret fidèl nan sèvis n ap bay Jewova a. 

“MACHE TANKOU PITIT LIMYÈ”

13. Ki sa “kontinye mache tankou pitit limyè” vle di? (Efezyen 5:​7-9).

¹³ Pòl te ankouraje kretyen nan vil Efèz yo nonsèlman pou yo kontinye vire do bay fènwa, men tou pou yo “kontinye mache tankou pitit limyè”. (Li Efezyen 5:​7-9.) Sa sa vle di? Sa vle di tou senpleman pou n toujou aji antanke vrè kretyen. Youn nan fason pou n fè sa se lè n chèche gen yon pwogram pou n li Bib la e pou n etidye l ansanm ak piblikasyon nou yo ki baze sou Bib la. Li enpòtan anpil pou n byen suiv egzanp ak ansèyman Jezi Kris, li menm ki “limyè pou monn nan”. — Jan 8:12; Pwo. 6:23.

14. Ki jan lespri sen kapab ede nou?

 ¹⁴ Epitou, nou bezwen èd lespri sen Bondye pou nou kapab kontinye aji “tankou pitit limyè”. Poukisa? Paske sa mande anpil efò pou n rete pwòp nan monn imoral sa a (1 Tes. 4:​3-5, 7, 8). Lespri sen kapab ede n reziste kont fason moun nan monn nan panse, sa gen ladan l fason yo wè bagay yo ki pa ann amoni ak fason Bondye panse. Lespri sen kapab ede n tou pou n pwodui “tout kalite bonte ak jistis”. — Efe. 5:9.

15. Ki fason nou kapab resevwa lespri sen? (Efezyen 5:​19, 20).

¹⁵ Youn nan fason nou kapab jwenn lespri sen se lè nou priye pou sa. Jezi te di Jewova “ap bay moun lespri sen si yo mande l li”. (Lik 11:13.) E lè n ap fè louwanj pou Jewova ansanm nan reyinyon yo, se yon lòt fason nou resevwa lespri sen. (Li Efezyen 5:​19, 20.) Bonjan enfliyans lespri sen Bondye gen sou nou ap ede n viv yon fason ki fè Bondye plezi.

16. Ki sa k ap ede n pran bon desizyon? (Efezyen 5:​10, 17).

¹⁶ Lè nou gen desizyon enpòtan pou n pran, nou bezwen chèche konprann “sa volonte Jewova ye”, epi aji ann amoni ak volonte l. (Li Efezyen 5:​10, 17.) Lè n ap chèche wè ki prensip biblik nou kapab aplike nan sitiyasyon pa nou, anfèt se chèche n ap chèche wè fason Bondye wè sitiyasyon an. Epi, pandan n ap aplike prensip li yo, n ap kapab pran bon desizyon.

17. Ki jan nou ka byen sèvi ak tan nou? (Efezyen 5:​15, 16). (Gade foto a tou.)

¹⁷ Epitou, Pòl te ankouraje kretyen nan vil Efèz yo pou yo byen sèvi ak tan yo. (Li Efezyen 5:​15, 16.) “Mechan an”, anpalan de Satan, ènmi nou an, ta renmen nou tèlman okipe nan kouri dèyè yon seri bagay nan monn sa a, nou pa  gen tan pou sèvis n ap bay Bondye a (1 Jan 5:19). Li ka fasil pou yon kretyen chèche gen byen materyèl, edikasyon oswa yon karyè olye l chèche jwenn posiblite pou l fè plis nan sèvis Jewova. Si l ta fè sa, sa t ap montre li kite fason moun nan monn nan panse enfliyanse l. Nòmalman, bagay sa yo pa gen anyen mal ladan yo, men yo pa dwe janm gen premye plas nan lavi nou. Pou n mache “tankou pitit limyè”, nou bezwen “byen sèvi ak tan nou”, sa vle di konsantre sou sa ki vrèman enpòtan.

18. Ki sa Donald te fè pou l te ka pi byen sèvi ak tan l?

¹⁸ Chèche okazyon pou w fè plis pou Jewova. Se sa Donald k ap viv ann Afrik disid te fè. Men sa l di: “Mwen te reflechi sou sitiyasyon m e m te sipliye Jewova pou l ede m fè plis nan travay predikasyon an. M te priye l pou l ede m jwenn yon travay ki t ap pèmèt mwen pase plis tan nan travay predikasyon an. Jewova te ede m jwenn travay mwen te bezwen an. Mwen menm ak madanm mwen te antre nan sèvis aplentan ansanm.”

19. Ki jan nou ka kontinye mache “tankou pitit limyè”?

¹⁹ Lèt Pòl te ekri kretyen nan vil Efèz yo dwe te ede yo anpil pou yo te ret fidèl ak Jewova. E konsèy sa a Bondye te fè Pòl ekri a kapab ede nou tou. Jan nou te wè sa, li kapab ede nou pou nou byen chwazi detant n ap pran ak moun n ap fè zanmi. Li kapab ankouraje n pou n etidye Labib regilyèman, pou limyè verite a ka kontinye gide nou nan tout sa n ap fè. Epi, li montre jan lespri sen enpòtan pou ede n vin gen yon seri bèl kalite. Lè nou aplike sa Pòl te ekri a, sa kapab ede n pran bon desizyon, yon seri desizyon ki ann amoni ak fason Jewova panse. Lè n fè tout sa, n ap kapab evite fènwa ki gen nan monn sa a e n ap rete nan limyè a!