1. Ki sa Jewova mande moun k ap adore l yo pou yo fè? (Gade foto a tou.)

 AK KIYÈS nou ka pale lè n bezwen konsolasyon ak konsèy? Nou deja konn repons lan. Nou ka priye Jewova Dye. E Jewova mande nou pou n fè sa. Li vle pou n priye souvan, sa vle di pou n “priye toutan”. (1 Tes. 5:17.) Nou ka priye Jewova nenpòt lè e n ka mande l pou l gide n nan tout desizyon n ap pran nan lavi nou (Pwo. 3:5, 6). Piske Jewova se yon Bondye ki renmen bay, li pa fikse kantite fwa nou ka priye l.

2. Sou ki sa nou pral pale nan atik sa a?

² Lapriyè se yon kado Jewova ban nou e n bay kado sa a anpil valè. Men, piske nou gen anpil bagay pou n fè, nou ka twouve l difisil pou n jwenn tan pou n priye. Epitou, nou ka santi n bezwen fè efò pou n amelyore priyè n ap fè yo. Erezman nou kapab jwenn anpil ankourajman ak konsèy nan Ekriti yo. Nan atik sa a, nou pral egzamine egzanp Jezi pou n wè ki jan n ka chèche jwenn tan pou n priye. Epitou, nou pral wè senk bagay enpòtan nou kapab fè k ap ede n amelyore priyè n ap fè yo.

3. Ki sa Jezi te konprann anrapò ak lapriyè?

³ Jezi te konprann priyè nou yo gen anpil enpòtans pou Jewova. Byen lontan anvan Jezi te vin sou tè a, li te konn wè Papa l k ap reponn priyè yon seri gason ak fi ki  te fidèl. Pa egzanp, Jezi te bò kot Papa l lè Papa l t ap reponn priyè sensè Ana, David ak Eli te fè, san konte lòt moun ankò (1 Sam. 1:10, 11, 20; 1 Wa 19:4-6; Sòm 32:5). Nou konprann rezon ki fè Jezi te aprann disip li yo pou yo priye souvan e pou yo fè sa ak lafwa! — Mat. 7:7-11.

4. Ki sa egzanp Jezi aprann nou anrapò ak lapriyè?

⁴ Lefètke Jezi te konn priye Jewova, li te bay disip li yo yon egzanp pou yo suiv. Pandan sèvis Jezi sou tè a, li te konn priye souvan. Li te oblije chèche jwenn tan pou l priye paske byen souvan li te konn okipe e l te konn gen anpil moun avè l (Mak 6:31, 45, 46). Li te konn leve byen bonè nan maten pou l te ka poukò l pou l priye (Mak 1:35). Omwen nan yon okazyon, li te fè tout yon nuit ap priye anvan l te pran yon desizyon enpòtan (Lik 6:12, 13). E Jezi te priye plizyè fwa nan nuit lavèy jou l te mouri a, jis anvan l te reyalize pati ki pi enpòtan nan misyon Jewova te voye l fè sou tè a. — Mat. 26:39, 42, 44.

5. Ki jan n ka suiv egzanp Jezi lè n ap priye?

⁵ Egzanp Jezi montre nou bezwen chèche jwenn tan pou n priye menmsi n okipe anpil. Menm jan ak Jezi, nou ka bezwen rezève tan pou n priye. Pou n fè sa, nou ka leve byen bonè nan maten oswa nou ka fè sa yon ti jan pita nan aswè. Lè n fè sa, nou montre Jewova nou gen rekonesans pou kado espesyal sa a li ban nou an. Gen yon sè ki rele Lynne ki sonje premye fwa l te aprann li kapab priye Bondye, sa te touche l anpil. Men sa l di: “Lè m te aprann mwen ka pale ak Jewova nenpòt lè, sa te ede m wè l kòm bon Zanmi m e sa te fè m anvi amelyore priyè m ap fè yo.” Pa gen dout, anpil nan nou santi n menm jan an. Donk, ann wè senk bagay enpòtan nou kapab fè lè n ap priye.

6. Selon Revelasyon 4:10, 11, ki sa Jewova merite resevwa?

⁶ Fè louwanj pou Jewova. Nan yon vizyon ki bay lakrentif apot Jan te fè, li te wè 24 ansyen nan syèl la k ap adore  Jewova. Yo te fè louwanj pou Bondye, yo te rekonèt li merite resevwa “glwa, onè ak pisans”. (Li Revelasyon 4:10, 11.) Zanj fidèl yo gen anpil rezon tou pou yo fè louwanj pou Jewova e pou yo onore l. Yo nan syèl la ansanm avè l e yo vin konnen l byen. Yo wè kalite l yo parèt nan sa l fè yo. Lè yo wè Jewova k ap aji, sa pouse yo fè louwanj pou li. — Jòb 38:4-7.

7. Pou ki bagay nou kapab fè louwanj pou Jewova?

⁷ Nou menm tou, nou bezwen fè louwanj pou Jewova lè n ap priye. Nou kapab di l sa n renmen lakay li ak rezon ki fè n gen respè pou li. Pandan w ap li Bib la e w ap etidye l, chèche wè ki kalite Jewova genyen ou pi renmen (Jòb 37:23; Wom. 11:33). Apre sa, fè Jewova konnen ki jan kalite sa yo fè w santi w. Nou kapab fè louwanj pou Jewova tou pou sa l fè pou nou e pou sa l fè pou tout frè n ak sè n yo. Li toujou pran swen nou e li pwoteje n. — 1 Sam. 1:27; 2:1, 2.

8. Bay kèk nan rezon nou genyen pou n di Jewova mèsi. (1 Tesalonisyen 5:18).

⁸ Di Jewova mèsi. Nou gen anpil rezon pou n di Jewova mèsi lè n ap priye. (Li 1 Tesalonisyen 5:18.) Nou kapab di l mèsi pou tout bon bagay nou genyen. Dayè, se li ki bay tout bèl don (Jak 1:17). Pa egzanp, nou kapab di l jan n gen rekonesans pou jan tè a bèl e pou tout bèl bagay ki gen nan kreyasyon an. Nou kapab di l mèsi tou pou lavi li ban nou, pou fanmi nou, zanmi nou ak esperans nou genyen an. Epitou, nou vle di Jewova mèsi lefètke l pèmèt nou gen yon bèl amitye avè l.

9. Poukisa nou ka bezwen fè efò pou n gen plis rekonesans pou sa Jewova fè pou nou?

⁹ Nou ka bezwen fè bonjan efò pou n reflechi sou rezon nou menm nou genyen pou n gen Jewova rekonesans. N ap viv nan yon monn kote moun yo engra. Byen souvan, moun yo panse sèlman ak sa yo ta renmen genyen olye yo panse ak sa yo ka fè pou yo montre rekonesans pou sa yo genyen. Si n ta kite fason moun sa yo aji detenn sou nou, se mande nou t ap mande Jewova sèlman lè n ap priye. Pou sa pa rive n, nou bezwen kontinye fè efò pou n gen plis rekonesans pou tout sa Jewova fè pou nou, epi di l mèsi pou sa. — Lik 6:45.

10. Lefètke yon sè te gen rekonesans, ki jan sa te ede l andire? (Gade foto a tou.)

¹⁰ Lè n pran abitid demontre rekonesans, sa kapab ede n andire lè n jwenn difikilte. Ann pran egzanp sè Kyung-sook ki parèt nan Toudegad 15 janvye 2015. Doktè te fè l konnen li fè kansè poumon e sitiyasyon l lan te grav anpil. Men sa l di: “Maladi sa a te fè m dekouraje  anpil. Mwen te santi m te pèdi tout bagay e m te pè anpil.” Ki sa k te ede l andire? Li te di chak swa anvan l al dòmi, li te konn monte sou do kay li e l te konn priye Jewova awotvwa pou l di l senk bagay li te gen rekonesans pou yo pandan jounen an. Sa te fè l enkyete mwens, e sa te pouse l di Jewova jan l renmen l. Li te wè jan Jewova ede sèvitè l ki fidèl yo lè y ap fè fas ak eprèv, e li te vin rann li kont nou jwenn plis benediksyon lontan nan lavi n pase n jwenn eprèv. Menm jan ak Kyung-sook, nou gen anpil rezon pou n di Jewova mèsi, menmsi n ap fè fas ak yon eprèv. Lè n di Jewova mèsi pou sa l fè pou nou lè n ap priye l, sa kapab ede n pou n andire e pou n rete kalm.

11. Poukisa disip Jezi yo te bezwen gen kran apre Jezi te retounen nan syèl la?

¹¹ Mande Jewova pou l fè w gen kran lè w ap preche. Yon ti tan anvan Jezi retounen nan syèl, li te fè disip li yo sonje responsablite yo genyen pou yo bay temwayaj sou li “nan Jerizalèm, nan tout Jide ak nan Samari, rive jis nan zòn ki pi lwen sou tè a”. (Tra. 1:8; Lik 24:46-48.) Yon ti tan annapre, chèf relijye juif yo te arete apot Pyè ak apot Jan e yo te mennen yo devan Sanedren an. Yo te bay mesye fidèl sa yo lòd pou yo sispann preche e yo te menm menase yo (Tra. 4:18, 21). Ki jan Pyè ak Jan te reyaji?

12. Selon Travay 4:29, 31, ki sa disip yo te fè?

¹² Apre chèf relijye juif yo te fin menase Pyè ak Jan, men sa yo te reponn: “Si sa bon nan je Bondye pou nou koute nou olye nou koute Bondye, se nou ki konnen. Men, kanta pou nou menm, nou pa ka sispann pale bagay nou te wè yo ak bagay nou te tande yo.” (Tra. 4:19, 20). Lè yo te lage Pyè ak Jan, disip yo te priye Jewova pou l te ede yo kontinye fè volonte l. Yo te di: “Bay esklav ou yo posiblite pou yo kontinye pale pawòl ou a ak anpil kran.” Jewova te reponn priyè sensè sa a. — Li Travay 4:29, 31.

13. Ki sa n ka aprann nan egzanp Jin-hyuk?

¹³ Nou kapab suiv egzanp disip yo lè n kontinye preche menm lè otorite yo pase n lòd pou n sispann fè sa. Ann pran egzanp yon frè ki rele Jin-hyuk, yo te mete nan prizon poutèt li pa t vle antre nan lame. Pandan l te nan prizon an, yo te konn ba l pot manje ak lòt bagay pou kèk prizonye ki te nan izòlman. Men, li pa t gen dwa pale ak yo sou kèlkeswa bagay ki pa t gen rapò ak responsablite yo te ba li a. Li pa t menm gen dwa pale avè yo sou Bib la. Li te priye Jewova pou l fè l gen kran ak ladrès pou l preche yo nan tout okazyon l jwenn (Tra. 5:29). Men sa l di: “Jewova te reponn priyè m lefètke l te ban m kouraj ak sajès pou m te ka kòmanse plizyè etid biblik ki te dire senk minit devan pòt kacho yo. Epi, nan aswè, mwen te konn ekri lèt pou m te ka bay prizonye yo nan demen.” Nou menm tou, nou kapab gen konfyans Jewova ap ede n nan travay fè disip la. Menm jan ak Jin-hyuk, nou kapab priye Jewova pou l fè n gen kran ak sajès.

14. Ki sa ki kapab ede n lè n jwenn pwoblèm? (Sòm 37:3, 5).

¹⁴ Mande Jewova ede w pou w andire pwoblèm yo. Anpil nan nou ap soufri swa paske nou malad oswa nou gen yon pwoblèm k ap trakase lespri nou. Petèt se yon moun pa nou ki mouri oswa  fanmi nou ap fè fas ak yon sitiyasyon difisil, oubyen tou, se kapab pèsekisyon oswa lòt pwoblèm. E lè gen pandemi ak lagè, sa fè anpil nan pwoblèm sa yo vin pi difisil toujou pou n sipòte. Di Jewova tout sa k nan kè w. Rakonte l sitiyasyon w menm jan w t ap rakonte yon bon zanmi w sa. Ou mèt gen konfyans Jewova “ap ede w”. — Li Sòm 37:3, 5.

15. Ki jan lapriyè ka ede n “andire anba tribilasyon”? Bay yon egzanp.

¹⁵ Lè n toujou priye, sa ap ede n “andire anba tribilasyon”. (Wom. 12:12.) Jewova konnen sa sèvitè l yo ap andire, “li tande lè y ap rele l pou yo mande l èd”. (Sòm 145:18, 19.) Gen yon sè ki rele Kristie ki gen 29 an e ki pyonye ki te viv sa pèsonèlman. Li te kòmanse gen gwo pwoblèm sante sanzatann e sa te fè l fè yon gwo depresyon. Annapre, li te vin aprann manman l fè yon maladi grav e li pa t lwen mouri. Men sa Kristie di: “Mwen te priye Jewova anpil pou l ban m fòs pou m andire chak jou. Mwen te fè efò pou m kenbe yon bon pwogram espirityèl, pa egzanp, mwen te konn asiste reyinyon yo e m te konn fè etid pèsonèl mwen.” Men sa l di ankò: “Lapriyè te ede m andire moman difisil yo. Mwen te konnen Jewova te toujou la avè m e sa te konsole m anpil. Byenke pwoblèm sante m te genyen yo pa t disparèt menm kote a, Jewova te reponn priyè m, li te fè m santi m anpè e li te fè kè m poze.” Nou pa dwe janm bliye “Jewova konnen ki jan pou l delivre moun ki gen atachman pou li yo anba eprèv”. — 2 Pyè 2:9.

16. Poukisa nou bezwen Jewova ede n pou n reziste anba tantasyon?

¹⁶ Mande Jewova pou l ede w reziste anba tantasyon. Piske nou enpafè, se toutan n ap goumen pou n pa fè sa ki mal. Satan ap fè tout sa l kapab pou l fè  batay la pi difisil pou nou. Li ka sèvi ak detant ki imoral yo pou l chèche sal lespri nou. Detant sa yo kapab met yon seri vye panse nan lespri nou, yon seri panse ki ka sal moun nou ye pa anndan an e ki ka fè nou fè peche ki grav. — Mak 7:21-23; Jak 1:14, 15.

17. Ki jan n ka aji ann amoni ak priyè nou fè pou n pa tonbe nan tantasyon? (Gade foto a tou.)

¹⁷ Nou bezwen Jewova ede n pou n ka reziste lè n jwenn tantasyon pou n fè sa ki mal. Nan priyè Jezi te bay kòm modèl la, men yon bagay li te di pou n mande: “Pa kite nou tonbe anba tantasyon, men delivre nou anba Mechan an.” (Mat. 6:13). Jewova vle ede n, men nou dwe mande l sa. Epitou, nou dwe aji ann amoni ak priyè nou fè yo. Nou kapab fè efò pou n pa oblije an kontak ak yon seri vye panse ak vye ide ki gaye nan monn Satan an (Sòm 97:10). Nou kapab met bon bagay nan lespri nou lè n li Labib e lè n etidye l. Epitou, lè n asiste reyinyon yo e lè n patisipe nan travay fè disip la, sa ap pwoteje panse nou. Jewova bò kote pa l pwomèt li pap kite nou tante plis pase sa nou ka sipòte. — 1 Kor. 10:12, 13.

18. Ki sa nou tout bezwen fè anrapò ak lapriyè?

¹⁸ Plis pase nenpòt lòt lè, nou chak bezwen priye Jewova pou n ka ret fidèl avè l nan dènye jou sa yo ki difisil. Chèche jwenn tan chak jou pou w priye ak tout kè w. Jewova vle nou “ouvri kè nou ba li” lè n ap priye (Sòm 62:8). Fè louwanj pou Jewova epi di l mèsi pou tout sa l fè. Mande l pou l ede w gen kouraj nan travay fè disip la. Sipliye l pou l ede w fè fas ak kèlkeswa pwoblèm ou genyen e pou w reziste anba nenpòt tantasyon ou ta ka jwenn. Pa kite anyen ni pèsonn anpeche w priye Jewova regilyèman. Sepandan, ki jan Jewova reponn priyè nou yo? N ap reponn kesyon enpòtan sa a nan atik ki vin apre a.