1. Ki difikilte anpil nan nou te jwenn?

 ÈSKE W te gen yon objektif nan sèvis Bondye e w te fè anpil efò pou w rive reyalize l b? Si w te nan sitiyasyon sa a, se pa ou menm sèl. Pa egzanp Philip te vle amelyore priyè l ap fè e l te vle priye pi souvan, men, li pa t fasil ditou pou l jwenn tan pou l priye. Erika te gen objektif pou l rive alè nan reyinyon predikasyon. Aktout sa, li te toujou anreta nan prèske chak reyinyon. Pandan plizyè fwa, Tomáš te eseye li tout Bib la. Men sa l di: “Mwen te jis pa t renmen li Labib. Mwen te eseye fè sa twa fwa. Men chak fwa, mwen te sèlman rive nan liv Levitik la e m pa t kontinye.”

2. Poukisa n pa bezwen dekouraje si n poko reyalize yon objektif nou genyen nan sèvis Bondye?

² Si w gen yon objektif ou poko reyalize, sa pa vle di w echwe. Souvan, sa mande tan ak anpil efò pou yon moun reyalize menm yon objektif ki tou senp. Lefètke w toujou vle reyalize objektif ou genyen an, sa montre ou bay relasyon ou gen ak Jewova a anpil enpòtans e w vle ba l sa w genyen ki pi bon an. Jewova bay efò w ap fè yo anpil valè. Nòmalman, li pa atann pou w fè plis pase sa w kapab (Sòm 103:14; Miche 6:8). Donk, ou bezwen gen objektif ki rezonab, selon sitiyasyon w. Apre w fin gen yon objektif, ki sa w ka fè pou w reyalize l? Ann egzamine kèk konsèy.

3. Poukisa li enpòtan pou w vrèman vle reyalize objektif ou genyen?

³ Li enpòtan anpil pou w vrèman vle reyalize objektif ou genyen nan sèvis Bondye. Lè yon moun vrèman vle reyalize yon objektif li genyen, l ap fè efò pou sa. Nou ka konpare sa ak van k ap pouse yon kannòt vwal pou l rive kote l prale a. Si van an kontinye soufle, maren an ap ka rive kote l prale a. E si van an fò, li ka menm rive pi vit. Menm jan an tou, plis nou motive pou n reyalize objektif nou genyen yo, se plis n ap ka reyalize yo. Men sa yon frè nan peyi Salvadò ki rele David di: “Lè w santi w motive pou w fè yon bagay, ou fè plis efò pou sa. Ou veye pou w pa kite anyen anpeche w reyalize objektif ou genyen an.” Donk, ki sa w ka fè pou w vin pi motive pou w reyalize l?

4. Pou ki bagay nou ka priye? (Filipyen 2:13). (Gade foto a tou.)

⁴ Priye pou w vin pi motive. Jewova kapab ba w lespri sen pou w vrèman vle reyalize objektif ou genyen. (Li Filipyen 2:13.) Pafwa, nou chèche gen yon objektif paske nou konnen nou bezwen fè sa, e se yon bon bagay. Men, nou ka pa vrèman anvi reyalize objektif la. Men sa k te rive yon sè ki rele Norina k ap viv nan peyi Ouganda. Li te gen objektif pou l gen yon etid, men l pa t vrèman fè efò pou sa paske li te santi l pa t yon bon anseyan. Ki sa k te ede l. Men sa l di: “Mwen te kòmanse priye Jewova chak jou pou l ede m vin pi anvi gen yon etid. Anmenmtan, mwen te fè efò pou m amelyore fason m anseye. Apre kèk mwa, mwen te remake mwen te vin pi anvi gen etid. E nan menm ane a, mwen te kòmanse de etid.”

5. Sou ki bagay nou ka medite k ap pouse n fè plis efò pou n reyalize objektif nou genyen?

⁵ Medite sou sa Jewova fè pou ou (Sòm 143:5). Apot Pòl te medite sou favè san parèy Jewova te fè l e sa te pouse l travay di pou Jewova (1 Kor. 15:9, 10; 1 Tim. 1:12-14). Menm jan an tou, plis nou medite sou sa Jewova fè pou nou, se plis n ap vle fè efò pou n reyalize objektif nou genyen (Sòm 116:12). Ann wè sa k te ede yon sè nan peyi Ondiras reyalize objektif li te genyen pou l vin pyonye pèmanan. Men sa l di: “Mwen te reflechi anpil sou jan Jewova renmen m. Li fè m vin fè pati pèp li a. Li gen sousi pou mwen e li pwoteje m. Lefètke m te medite sou sa, m te vin pi renmen Jewova e sa te pouse m fè plis efò pou m reyalize objektif mwen te genyen an.”

6. Ki bagay ankò ki ka ede n fè plis efò pou n reyalize objektif nou genyen?

⁶ Panse ak benediksyon w ap jwenn lè w reyalize objektif ou genyen an. Remake sa k te ede Erika, sè nou te pale de li pi wo a, ki te gen objektif pou l rive alè nan reyinyon predikasyon. Men sa l di: “Mwen te rann  mwen kont, lè m rive an reta nan reyinyon predikasyon, mwen pèdi anpil. Men, lè m rive bonè, sa ban m posiblite pou m salye frè m ak sè m yo e pou m pase tan ansanm avè yo. Epitou, mwen jwenn bonjan konsèy ki ede m gen plis kè kontan nan sèvis mwen e pou m vin pi maton.” Erika te reflechi sou byenfè l jwenn lè l rive alè, e l te reyalize objektif li te genyen an. Ki benediksyon konsa ou ka reflechi sou yo? Si w gen objektif pou w li Labib oswa pou w priye, reflechi sou jan sa ap fè w vin pi pwòch ak Jewova (Sòm 145:18, 19). Si w gen objektif pou w vin gen yon kalite antanke kretyen, reflechi sou jan sa ap fè w gen pi bon relasyon ak lòt moun (Kol. 3:14). Sa w panse si w ta fè yon lis ki gen ladan l tout rezon w genyen pou w vle reyalize objektif ou? Gade lis sa a tanzantan. Men sa Tomáš nou te pale de li pi wo a di: “Lè m jwenn plis rezon pou m reyalize yon objektif mwen genyen, mwen fè plis efò pou sa.”

7. Ki sa k te ede Julio ak madanm li reyalize objektif yo te genyen?

⁷ Pase tan ak moun k ap ankouraje w reyalize objektif ou genyen (Pwo. 13:20). Remake ki sa k te ede Julio ak madanm li reyalize objektif yo te genyen pou yo fè plis nan travay fè disip la. Men sa Julio di: “Nou te fè zanmi ak moun ki te ankouraje n reyalize objektif nou te genyen e nou te konn pale ak yo sou sa. Anpil nan yo te deja reyalize menm objektif sa yo. Donk, yo te kapab ban nou bonjan konsèy. Epitou, zanmi nou yo te konn mande n ki jan sa ap mache e yo te ankouraje n nan moman nou te bezwen sa.”

8. Ki sa k ka rive si se sèlman lè n santi n motive nou fè efò pou n reyalize yon objektif nou genyen? (Gade foto a tou.)

⁸ An reyalite, gen jou kote nou tout konn pa santi n motive. Men, èske sa vle di nou pa ka fè anyen pou n reyalize objektif nou genyen an? Non, sa pa vle di sa. Ann pran yon egzanp: Lè van ap soufle, li ka pouse yon kannòt vwal pou l rive kote l prale a. Sepandan, van pa toujou soufle ak menm fòs la. E gen jou konn pa gen van menm. Èske sa vle di maren an pa ka kontinye fè kannòt la avanse? Sa pa vrèman vle di sa. Pa egzanp, gen kannòt vwal ki gen motè, gen lòt ki gen zaviwon. Maren an ka itilize mwayen sa yo pou l kontinye fè kannòt la avanse jiskaske l rive kote l prale a. Nou ka konpare volonte nou genyen pou n fè yon bagay ak van an. Gen jou kote nou ka santi n motive pou n reyalize yon objektif nou genyen, konsa tou, gen lòt jou nou ka santi n pa anvi fè anyen. Donk, si se sèlman lè n santi n motive nou fè efò pou n reyalize objektif nou genyen an, nou ka pa janm reyalize l. Menm jan maren an jwenn lòt mwayen pou l rive kote l prale a, konsa tou, nou kapab kontinye fè efò pou n reyalize objektif nou genyen an, menm lè n pa santi n anvi fè efò. Se vre, sa ap mande  pou n gen disiplin, men, n ap kontan lè n reyalize l. Anvan nou pale sou sa nou kapab fè, ann fè yon ti pale sou yon kesyon nou ka ap poze tèt nou.

9. Èske n bezwen kontinye fè efò pou n reyalize yon objektif nou genyen menm lè n pa santi n motive? Esplike.

⁹ Jewova vle n sèvi l ak kè kontan e l vle n fè sa san fòse (Sòm 100:2; 2 Kor. 9:7). Donk, èske nou bezwen kontinye fè efò pou n reyalize yon objektif nou genyen nan sèvis Bondye menm lè n pa anvi fè sa? Ann pran egzanp apot Pòl. Men sa l te di: “Mwen bay kò m gwo disiplin e mwen mennen l tankou yon esklav.” (1 Kor. 9:25-27, nòt). Menm lè Pòl te ka pa t vle fè sa Jewova te vle l fè, li te fè l kanmenm. Èske Jewova te aksepte sèvis Pòl te ba li a? Pa gen okenn dout! E Jewova te rekonpanse l pou efò l te fè. — 2 Tim. 4:7, 8.

10. Ki benediksyon nou jwenn lè n fè efò pou n reyalize yon objektif menm lè n pa santi n motive?

¹⁰ Menm jan an tou, Jewova kontan wè n k ap fè efò pou n reyalize yon objektif nou genyen menm lè n pa santi n motive. Li kontan paske byenke nou ka pa toujou fè yon aktivite paske nou renmen aktivite sa a, men li konnen se lanmou nou gen pou li ki pouse n fè l. Menm jan Jewova te beni Pòl, L ap beni efò nou fè (Sòm 126:5). E lè n wè jan Jewova beni nou, nou ka menm kòmanse santi n vle fè efò. Men sa yon sè nan peyi Polòy ki rele Lucyna di: “Pafwa, mwen pa anvi al preche, sitou lè m fatige. Sepandan, kè kontan m santi m genyen apre m sot preche se yon kado ki vrèman estrawòdinè.” Donk, ann wè sa n ka fè lè n pa vrèman motive pou n fè yon bagay.

11. Ki jan Jewova ka ede n gen plis metriz?

¹¹ Priye pou w gen metriz. Metriz se kapasite yon moun genyen pou l kontwole santiman l ak aksyon l. Souvan, mo sa a fè n panse ak fason nou kontwole tèt nou pou n pa fè sa ki mal. Sepandan, nou bezwen gen metriz tou pou n fè sa ki byen, sitou si n ap fè yon bagay ki difisil oswa si n pa santi n motive. Sonje, metriz se yon kalite ki fè pati fwi lespri a, se sa k fè nou kapab mande Jewova lespri sen pou ede n vin gen kalite enpòtan sa a plis toujou (Lik 11:13; Gal. 5:22, 23). David, nou te pale de li pi wo a, te fè konnen jan lapriyè te ede l. Li te vle pi regilye nan etid pèsonèl li. Men sa l di: “Mwen te konn mande Jewova pou l ede m gen plis metriz e grasa èd li te ban m, mwen te vin gen yon bon pwogram pou m etidye e m te rive suiv pwogram sa a.”

12. Ki jan prensip nou jwenn nan Eklezyas 11:4 la ede n pou n reyalize objektif nou genyen nan sèvis Jewova a?

¹² Pa tann pou tout bagay anfòm nèt. Nan monn sa a, tout bagay pap janm anfòm nèt. Si se sa n ap tann, nou ka pa janm reyalize objektif nou genyen. (Li Eklezyas 11:4.) Men sa yon frè ki rele Dayniel di: “Pa gen sitiyasyon ki pafè. Donk, nou pa bezwen ret ap tann, nou bezwen annik kòmanse.” Gen yon frè nan peyi Ouganda ki rele Paul ki bay yon lòt rezon ki fè nou pa dwe kite sa n kapab fè jodi a pou yon lòt lè. Men sa l di: “Lè n kòmanse sa n gen pou n fè, menm lè sitiyasyon yo pa fasil, nou bay Jewova yon bagay pou l beni.” — Mal. 3:10.

13. Lè yon moun chèche reyalize objektif li genyen tikras pa tikras, ki avantaj sa gen ladan l?

¹³ Kòmanse tikras pa tikras. Nou ka pa vrèman santi n motive pou n reyalize objektif nou genyen an paske l parèt twò difisil. Si se ka pa w, èske w pa ta ka kòmanse tikras pa tikras? Pa egzanp, si w gen objektif pou w vin gen yon kalite, èske w pa ta ka fè efò pou w kòmanse demontre kalite sa a tikras pa tikras? Si objektif ou se pou w li tout Bib la, èske w pa ta ka kòmanse rezève ti  moman tou kout pou w li l? Tomáš, nou te pale de li nan kòmansman atik la te fè anpil efò pou l reyalize objektif li te genyen pou l li Bib la nan ennan. Men sa l di: “Mwen te rann mwen kont mwen te vle ale twò vit. Se sa k fè mwen te deside rekòmanse. Men, fwa sa a, mwen te planifye pou m li kèk vèsè chak jou e pou m medite sou yo. Konsa, mwen te kòmanse renmen lekti m t ap fè a.” Piske Tomáš’ te vin renmen li Labib, li te kòmanse pase plis tan ap li l. Finalman, li te li tout Bib la. c

14. Ki sa k ka fè l difisil pou n reyalize objektif nou genyen?

¹⁴ Malerezman, menmsi nou vrèman motive pou n reyalize objektif nou genyen, oswa nou se moun ki gen disiplin, gen sitiyasyon ki ka fè l difisil pou n reyalize l. Pa egzanp, “malè [ki rive] sanzatann” ka anpeche n jwenn tan nou bezwen pou n reyalize objektif nou genyen (Ekl. 9:11). Nou ka vin gen yon pwoblèm ki fè n santi n dekouraje e ki kite n prèske san fòs (Pwo. 24:10). Piske nou enpafè, nou ka fè yon erè ki fè l pi difisil pou n reyalize objektif nou genyen an (Wom. 7:23). Oswa, nou ka jis santi n fatige (Mat. 26:43). Ki sa k ka ede n si yon sitiyasyon ta fè l difisil pou n reyalize objektif nou genyen?

15. Si yon sitiyasyon fè l difisil pou n reyalize objektif nou genyen, èske sa vle di nou echwe? Esplike. (Sòm 145:14).

¹⁵ Sonje, si yon sitiyasyon fè l difisil pou w reyalize objektif ou genyen, sa pa vle di w echwe. Bib la fè konnen nou ka jwenn pwoblèm oswa difikilte youn dèyè lòt. Sepandan, li fè konnen aklè tou nou ka rekòmanse fè efò pou n reyalize objektif nou genyen an, sitou avèk èd Jewova. (Li Sòm 145:14.) Men sa Philip, frè nou te pale de li pi wo a, di: “Mwen pa ret ap panse ak kantite fwa mwen pa rive reyalize objektif  mwen genyen. Okontrè, mwen konsantre sou kantite fwa mwen rekòmanse fè efò pou m reyalize objektif sa a.” Men sa David, nou te pale de li pi wo a, di: “Mwen fè efò pou m pa konsidere sitiyasyon ki fè l difisil pou m reyalize objektif mwen genyen kòm yon obstak, men pito kòm okazyon pou m montre Jewova jan m renmen l.” Vrèmanvre, lè n kontinye fè efò pou n reyalize objektif nou genyen, menm lè sa difisil, nou montre Jewova nou vle fè l plezi. Se pa ti kontan Jewova dwe kontan lè l wè n kontinye fè efò pou n reyalize objektif nou genyen!

16. Si gen yon bagay ki anpeche w reyalize yon objektif ou genyen, ki sa sa ka aprann ou?

¹⁶ Ou ka aprann nan sitiyasyon ki anpeche w reyalize objektif ou genyen. Reflechi sou sa k te rive a, epi mande tèt ou: ‘Ki sa m ka fè pou sa pa rive ankò?’ (Pwo. 27:12). Sepandan, pafwa, difikilte yo ka fè n wè li pa t posib pou n reyalize yon objektif nou te genyen. Si w santi petèt se ka pa w, reflechi ankò sou objektif ou genyen an pou w wè si l toujou posib pou w reyalize l d. Jewova pap konsidere w echwe paske w pa rive reyalize yon objektif ki te twòp pou ou. — 2 Kor. 8:12.

17. Poukisa w bezwen sonje sa w deja reyalize?

¹⁷ Sonje sa w deja reyalize. Bib la di: “Bondye pa enjis pou l ta bliye travay nou fè.” (Ebre 6:10). Donk, ou menm tou, ou pa dwe bliye sa w fè. Reflechi sou sa w deja reyalize. Se kapab lefètke w vin zanmi Jewova, lefètke w ede lòt moun konnen l, oswa lefètke w batize. Menm jan w te fè pwogrè e w te reyalize yon seri objektif nan sèvis Bondye, ou ka kontinye fè pwogrè pou w reyalize objektif ou genyen kounye a. — Flp. 3:16.

18. Ki sa nou bezwen sonje fè pandan n ap fè efò pou n reyalize objektif nou genyen? (Gade foto a tou.)

¹⁸ Grasa èd Jewova, ou kapab reyalize objektif ou genyen, menm jan ak yon maren ki kontan rive kote l t aprale a. Men, sonje, anpil maren pwofite vwayaj y ap fè a tou. Menm jan an tou, pandan w ap kontinye fè efò pou w reyalize objektif ou genyen nan sèvis Jewova, toujou chèche wè fason l ap ede w ak jan l beni efò w ap fè (2 Kor. 4:7). Si w pa bay vag, w ap jwenn plis benediksyon toujou. — Gal. 6:9.