1. Ki sa n te aprann nan reyinyon ànyèl pou ane 2023 a?

 NAN reyinyon ànyèl pou ane 2023 a a, yo te ede n pi byen konprann yon seri bagay anrapò ak kwayans nou ki te ankouraje n, e nou te tande kèk bèl anons konsènan travay fè disip la. Pa egzanp, nou te aprann kèk moun ka gen posiblite pou yo vin sèvi Jewova ansanm ak pèp li a menm apre Gran Babilòn nan fin detwi. Mete sou sa, nou te aprann, apati mwa novanm 2023, pwoklamatè Wayòm yo pa bezwen remèt yon rapò sou tout aktivite yo fè nan travay fè disip la ankò. Èske chanjman sa yo fè travay fè disip la vin gen mwens enpòtans, èske li vin mwens ijan pase anvan? Non!

2. Poukisa travay fè disip la vin pi ijan chak jou ki pase? (Mak 13:10).

² Chak jou ki pase, travay fè disip la vin pi ijan. Sa k fè sa? Paske pa ret tan ankò. Ann egzamine sa Jezi te anonse konsènan travay predikasyon an nan dènye jou yo. (Li Mak 13:10.) Selon sa Matye te rapòte, Jezi te di yo t ap gen pou yo preche bon nouvèl la sou tout tè a anvan “lafen an” vini (Mat. 24:14). Ekspresyon sa a gen rapò ak detwi sistèm Satan an pral detwi nèt. Jewova deja fikse ‘jou ak lè’ pou evènman ki pral rive talè  konsa yo (Mat. 24:36; 25:13; Tra. 1:7). Chak jou ki pase fè nou vin pi pwòch moman sa a (Wom. 13:11). Annatandan, nou dwe kontinye preche jiskaske lafen an rive.

3. Ki sa ki pouse n preche?

³ Pandan n ap reflechi sou travay fè disip la, nou bezwen egzamine yon kesyon ki vrèman enpòtan: Poukisa nou preche bon nouvèl la? Nou ka di tou senpleman, se lanmou ki pouse n preche. Lè n preche, sa montre nou renmen bon nouvèl la, nou renmen moun e sa k pi enpòtan an, nou renmen Jewova e nou renmen non l. Ann egzamine chak aspè sa yo youn apre lòt.

NOU PRECHE PASKE NOU RENMEN BON NOUVÈL LA

4. Ki sa nou fè lè n aprann yon bon nouvèl?

⁴ Èske w sonje jan w te santi w lè w te aprann yon bon nouvèl, petèt se yon tibebe ki te fèt nan fanmi an oswa menm yo te ofri w yon travay ou te vrèman bezwen? Pa gen dout, ou te kontan fè fanmi w ak zanmi w konn sa. Èske w te santi w konsa lè w te tande pi bon nouvèl ki ka genyen an, anpalan de bon nouvèl Wayòm Bondye a?

5. Ki jan w te santi w lè w te fèk aprann verite ki nan Pawòl Bondye a? (Gade foto yo tou.)

⁵ Reflechi sou jan w te santi w lè w te fèk aprann verite ki nan Pawòl Bondye a. Ou te aprann Papa w ki nan syèl la renmen w, li vle w vin fè pati moun k ap adore l yo, li pwomèt li pral retire doulè ak soufrans, ou te aprann ou kapab gen espwa pou w wè moun ou renmen yo retounen viv ankò nan yon monn nouvo, san wete anpil lòt verite (Mak 10:​29, 30; Jan 5:​28, 29; Wom. 8:​38, 39; Rev. 21:​3, 4). Verite sa yo te ba w anpil kè kontan (Lik 24:32)! Ou te renmen sa w t ap aprann yo e w pa t ka kenbe bèl verite sa yo pou ou! — Konpare ak Jeremi 20:9.

6. Ki sa w aprann nan egzanp Ernest ak Rose?

 ⁶ Ann pran yon egzanp. Gen yon frè ki rele Ernest b ki te gen anviwon dizan lè papa l mouri. Men sa Ernest sonje: “M te konn mande tèt mwen: ‘Èske l al nan syèl? Oubyen èske l sispann egziste?’ Mwen te anvye lòt timoun ki te gen papa yo.” Ernest te konn al nan simityè a regilyèman. Li te konn met ajenou sou tonm papa l e l te konn priye. Li te konn di: “Bondye tanpri, m ta renmen konnen ki kote papa m ye.” Anviwon 17 an apre lanmò papa Ernest, yo te ofri l yon etid Labib e l te aksepte san pèdi tan. Se pa ti kontan l te kontan aprann moun ki mouri yo pa konn anyen, se kòmsi yo nan yon pwofon somèy, e Bib la pwomèt pral gen yon rezirèksyon alavni (Ekl. 9:​5, 10; Tra. 24:15)! Finalman, li te jwenn repons kesyon ki t ap boulvèse l pandan tout ane sa yo! Ernest te vrèman renmen verite li t ap aprann nan Bib la. Rose, madanm li, te vin ap etidye tou e li menm tou te vin renmen mesaj Wayòm nan. Yo te batize nan ane 1978. Yo te kontan pataje bèl verite yo te aprann yo ak fanmi yo, zanmi yo e ak kèlkeswa moun ki te vle koute. Ernest ak Rose te rive ede plis pase 70 moun fè pwogrè pou yo batize.

7. Ki sa k rive lè nou vin renmen verite ki nan Bib la? (Lik 6:45).

⁷ Sa klè, lè nou vin renmen verite ki nan Bib la, nou pa ka rete san n pa pale. (Li Lik 6:45.) Nou santi nou menm jan ak disip Jezi yo nan premye syèk la ki te di: “Nou pa ka sispann pale bagay nou te wè yo ak bagay nou te tande yo.” (Tra. 4:20). Nou tèlman renmen laverite nou vle pataje l ak plis moun posib!

NOU PRECHE PASKE N RENMEN MOUN

8. Ki sa k pouse n ede lòt moun konn bon nouvèl la? (Gade kare ki gen tit “ Renmen moun, epi fè disip”.) (Gade foto a tou.)

⁸ Menm jan ak Jewova ak Pitit li a, nou renmen moun (Pwo. 8:31; Jan 3:16). Kè n fè n mal anpil pou moun ki “san Bondye” yo ak moun ki “san esperans” yo (Efe. 2:12). Y ap neye anba pwoblèm ki gen nan lavi a, men nou gen jile sovtaj ki kapab ede yo a, anpalan de bon nouvèl Wayòm Bondye a. Lanmou ak konpasyon nou genyen pou moun sa yo fè nou fè tout sa n kapab pou n fè yo tande bon nouvèl la. Mesaj sa a ki gen anpil valè ka ba yo espwa, li ka ede yo viv pi bon fason an depi kounye a, e li ka ba  yo espwa pou yo gen “lavi toutbon an”, lavi ki pap janm fini an, nan monn nouvo Bondye pwomèt la. — 1 Tim. 6:19.

9. Ki avètisman nou bay konsènan lavni, e poukisa? (Ezekyèl 33:​7, 8).

⁹ Lefètke nou renmen moun, sa pouse nou pou n fè yo konnen monn mechan sa a prèske rive nan bout li. (Li Ezekyèl 33:​7, 8.) Nou gen pitye pou pwochen nou ak moun nan fanmi nou ki pap sèvi Jewova. Anpil moun ap viv chak jou san yo pa menm konnen pral “gen yon gwo tribilasyon, yon tribilasyon ki poko janm rive depi monn nan egziste pou jiska prezan, non, e ki pap rive ankò”. (Mat. 24:21.) Nou vle yo konnen sa k pral rive pandan peryòd jijman sa a, kote fo relijyon pral detwi, e annapre, monn sa a ki mechan pral detwi nan Amagedon (Rev. 16:​14, 16; 17:​16, 17; 19:​11, 19, 20). N ap priye pou gen plis moun toujou ki tande mesaj avètisman n ap bay la e pou yo vin sèvi Jewova ansanm avèk nou. Men, ki sa k ap rive moun ki pa koute avètisman n ap bay la jodi a, san wete moun nan fanmi nou nou renmen anpil?

10. Poukisa li ijan pou n kontinye avèti moun yo?

¹⁰ Jan nou te wè sa nan atik anvan an, Jewova ka deside sove moun ki vin gen lafwa nan li lè yo wè Gran Babilòn nan detwi. Si se ta sa, li vin pi ijan toujou pou n kontinye avèti moun yo. Fè yon ti reflechi: Sa n ap di moun yo kounye a gendwa se sa yo pral sonje pi devan. (Konpare ak Ezekyèl 33:33.) Petèt yo pral sonje sa nou te konn di yo e sa ka fè yo vle vin adore Jewova anvan l twò ta. Menm jan ak gadyen prizon nan vil Filip kè l te vin chanje apre “yon gwo tranblemanntè”, petèt, gen nan yo ki pa byen reyaji kounye a kè yo pral chanje lè Gran Babilòn nan detwi, yon bagay k ap fè lemonnantye sezi. — Tra. 16:​25-34.

NOU PRECHE PASKE N RENMEN JEWOVA E NOU RENMEN NON L

11. Ki fason nou bay Jewova glwa, onè ak pisans? (Revelasyon 4:11). (Gade foto yo tou.)

¹¹ Pi gwo rezon ki fè nou preche bon nouvèl la, se paske nou renmen Jewova Dye e n renmen non l ki sen. Nou konsidere travay fè disip la kòm yon mwayen pou n bay Bondye nou renmen an louwanj. (Li Revelasyon 4:11.) Se ak tout kè n nou dakò Jewova Dye merite resevwa glwa, onè ak pisans nan men moun k ap sèvi l fidèlman yo. Nou ba l glwa ak onè lè n fè lòt moun konnen prèv ki montre li “kreye tout bagay” e se grasa li nou egziste. Nou ba l pisans, sa vle  di pisans pa nou, lè n sèvi ak tan nou, fòs nou ak sa n posede pou n patisipe nan travay fè disip la toutotan sitiyasyon nou pèmèt nou fè sa (Mat. 6:33; Lik 13:24; Kol. 3:23). Anfèt, nou renmen pale ak lòt moun konsènan Bondye nou renmen an. Epitou, nou santi nou dwe fè lòt moun konn non l ak tout sa non l reprezante. Poukisa?

12. Ki jan nou fè non Jewova vin sen nan travay fè disip la?

¹² Piske nou renmen Jewova nou vle fè non l vin sen (Mat. 6:9). Sa vle di, nou vle fè lòt moun konnen vye bagay Satan di sou Jewova yo se manti (Jen. 3:​1-5; Jòb 2:4; Jan 8:44). Nan travay fè disip la, nou kontan pran pozisyon pou Bondye nou an lè n fè tout moun ki vle koute konnen laverite sou li. Nou vle tout moun konnen pi bèl kalite l genyen se lanmou, li dirije yon fason ki dwat e avèk jistis, epitou talè konsa, Wayòm li an pral elimine tout soufrans e l pral fè lèzòm viv nan lapè ak kè kontan (Sòm 37:​10, 11, 29; 1 Jan 4:8). Lè n defann repitasyon Jewova nan travay fè disip la, nou fè non l vin sen. Epitou, nou kontan paske n fè sa n dwe fè antanke Temwen Jewova. Nan ki sans?

13. Poukisa nou fyè dèske n se Temwen Jewova? (Ezayi 43:​10-12).

¹³ Jewova chwazi nou kòm “temwen” l. (Li Ezayi 43:​10-12.) Men sa Kolèj santral la te di nan yon lèt sa gen kèk ane: “Pi gwo onè nenpòt nan nou kapab genyen se lefètke nou se Temwen Jewova. c” Sa k fè sa? Ann pran yon egzanp. Si w bezwen yon moun pou sèvi w temwen nan  tribinal, w ap chwazi yon moun ou konnen e w fè konfyans, yon moun repitasyon l ap fè yo kwè temwayaj li bay. Lefètke Jewova chwazi nou kòm temwen l, li montre li konnen nou byen e li fè n konfyans pou n fè lòt moun konnen se li menm ki sèl vrè Dye a. Nou tèlman santi se yon onè Jewova fè n pou n Temwen l, nou pwofite chak okazyon nou jwenn pou n fè moun konn non l e pou n pwouve tout vye bagay y ap di sou li yo se manti. Lè n fè sa, nou viv ann amoni ak non nou fyè pou n pote a: Temwen Jewova! — Sòm 83:18; Wom. 10:​13-15.

N AP KONTINYE PRECHE JISKA LAFEN

14. Ki sa n ap tann ki ka rive talè konsa?

¹⁴ Se pa ti tann n ap tann pou n wè sa k pral rive talè konsa! Grasa benediksyon Jewova, nou espere ap gen plis moun toujou k ap aksepte laverite anvan gwo tribilasyon an kòmanse. Epitou, nou vrèman kontan dèske menm nan moman ki pral pi difisil nan istwa lèzòm, anpalan de gwo tribilasyon an, nou ka wè gen plis moun toujou ki vire do bay monn Satan an k ap depafini e ki vin bay Jewova louwanj ansanm avè n! — Tra. 13:48.

15-16. Ki sa n ap kontinye fè, e ki lè n ap sispann?

¹⁵ Annatandan, nou gen travay pou n fè. Nou gen privilèj pou n patisipe nan travay preche bon nouvèl Wayòm Bondye a sou tout tè a, yon travay ki pap janm fèt ankò. Toutpandan n ap fè sa, nou bezwen kontinye avèti moun yo. Moun yo bezwen konnen sistèm mechan sa a prèske rive nan bout li. Donk, lè moman jijman an rive, y ap konnen se Jewova Dye ki te ban n preche mesaj sa a. — Eze. 38:23.

¹⁶ Donk, ki sa nou detèmine pou n fè? Grasa lanmou nou genyen, anpalan de lanmou pou bon nouvèl la, lanmou nou gen pou moun yo, e sa k pi enpòtan an, lanmou nou gen pou Jewova Dye e pou non l, n ap kontinye preche ak kè kontan, n ap sonje gen ijans e n pap sispann preche jiskaske Jewova di: “Nou mèt kanpe!”