1. Ki jan anpil moun reyaji anrapò ak konsèy ki gen sajès nou jwenn nan Bib la? (Pwovèb 1:20, 21).

 NAN anpil peyi, nou konn wè frè n ak sè n yo ki kanpe nan zòn kote ki gen anpil moun k ap pase, y ap souri e y ap ofri moun yo piblikasyon pou yo li. Èske w deja patisipe nan bay temwayaj fason sa a? Si w deja fè sa, se sèten sa fè w panse ak pawòl nou jwenn nan liv Pwovèb la ki fè konnen sajès ap rele byen fò sou plas piblik pou moun ka tande konsèy l ap bay. (Li Pwovèb 1:20, 21.) Nou jwenn “vrè sajès la”, sajès Jewova bay la, nan Bib la ak nan piblikasyon nou yo. Se sajès sa a moun yo bezwen genyen pou yo ka gen lavi ki pap janm fini an. Nou vrèman kontan lè yon moun aksepte piblikasyon nou yo. Men, se pa tout moun ki fè sa. Gen moun ki pa vle konnen sa Bib la di. Gen lòt ki pase nou nan rizib. Yo panse Bib la la twò lontan pou l ta itil. Gen lòt menm ki kritike sa Bib la anseye sou kesyon moral, e yo fè konnen moun ki suiv sa Bib la di yo gen kè di e yo renmen jije moun. Aktout sa, piske Jewova gen lanmou, li kontinye bay tout moun posiblite pou yo jwenn vrè sajès la. Ki jan l fè sa?

2. Ki kote nou kapab jwenn vrè sajès la jodi a, e ki sa pifò moun chwazi fè?

² Youn nan fason Jewova fè moun yo tande vrè sajès la se pa mwayen Labib, Pawòl li a. Prèske chak moun gen posiblite pou yo jwenn liv sa a. E ki sa nou kapab di konsènan piblikasyon nou yo ki baze sou Bib la? Grasa èd Jewova, yo disponib nan plis pase 1 000 lang. Moun ki koute, sa vle di moun ki li e ki aplike sa yo aprann, ap jwenn  byenfè. Sepandan, pifò moun chwazi pa koute vrè sajès la. Lè yo gen desizyon pou yo pran, yo pito konte sou pwòp entèlijans yo oswa yo pito koute lòt moun. Yo ka menm gade nou dwòl paske nou chwazi suiv sa Bib la di. Nan atik sa a, nou pral pale konsènan rezon ki fè moun yo aji konsa. Pou kòmanse, ann wè ki jan nou kapab vin gen sajès Jewova bay la.

3. Ki sa n bezwen fè pou n vin gen vrè sajès la?

³ Nou kapab di sajès se kapasite nou genyen pou n sèvi ak sa nou konnen pou n pran bon desizyon. Sepandan, pou n gen vrè sajès la, sa mande plis toujou. Men sa Bib la di: “Yon moun kòmanse gen sajès lè l gen lakrentif pou Jewova. Konesans Sila a ki pi sen an bay la fè moun gen bon konprann.” ​(Pwo. 9:10). Se sa k fè, lè nou gen yon desizyon enpòtan pou n pran, nou ta dwe kite fason Jewova panse, sètadi “konesans Sila a ki pi sen an bay la”, gide nou nan desizyon n ap pran an. N ap ka fè sa, lè n etidye Bib la ak piblikasyon ki baze sou Bib la. Konsa, n ap montre nou gen vrè sajès la. — Pwo. 2:5-7.

4. Poukisa se sèl Jewova ki kapab ban nou vrè sajès la?

⁴ Se sèl Jewova ki kapab ban nou vrè sajès la (Wom. 16:27). Sa k fè se nan li sajès soti? Premyèman, antanke Kreyatè, li byen konnen tout sa l kreye yo (Sòm 104:24). Dezyèmman, tout sa Jewova fè montre li gen sajès (Wom. 11:33). Twazyèmman, konsèy Jewova bay yo ki gen anpil sajès toujou nan avantaj moun ki aplike yo (Pwo. 2:10-12). Si nou vle gen vrè sajès la, nou dwe aksepte verite sa yo, epi kite yo gide n nan desizyon n ap pran ak nan fason n ap aji.

5. Ki rezilta sa bay lè yon moun refize rekonèt se nan Jewova vrè sajès la soti?

⁵ Anpil moun rekonèt lanati se yon mèvèy. Epoutan, yo pa dakò gen yon Kreyatè, e yo di se evolisyon ki fè tout bagay egziste. Gen lòt moun ki di yo kwè nan Bondye, men, yo konsidere prensip ki nan Bib la kòm bagay ki pase mòd e yo chwazi viv jan yo vle. Ki rezilta sa bay? Èske monn nan vin pi bon paske moun yo konte sou sajès pa yo olye yo konte sou sajès Bondye? Èske yo gen vrè kè kontan an ak bonjan espwa pou lavni? Sa n wè k ap pase jodi a fè n gen konviksyon pawòl nou pral li la a se laverite: “Pa gen okenn sajès, ni bon jijman, ni konsèy lakay moun ki kont Jewova.” ​(Pwo. 21:30). Sa vrèman ankouraje n pou n kontinye mande Jewova pou l ban nou vrè sajès la! Malerezman, pifò moun pa fè sa. Poukisa?

6. Selon Pwovèb 1:22-25, kiyès ki fè kòmsi yo pa tande lè vrè sajès la ap rele?

⁶ Anpil moun fè kòmsi yo pa tande lè vrè sajès la ap “rele byen fò nan lari”. Selon Bib la, gen twa gwoup moun ki meprize sajès: moun “ki pa konn anyen”, moun “k ap pase moun nan rizib”, ak moun “ki sòt”. (Li Pwovèb 1:22-25.) Ann chèche pi byen konprann poukisa moun sa yo meprize sajès ki soti nan Bondye a, e ann wè ki jan n ka evite vin menm jan ak yo.

7. Poukisa gen kèk moun ki chwazi pou yo “pa gen eksperyans”?

⁷ Moun ki pa konn anyen an se moun “ki pa gen eksperyans” oswa ki pa  konprann anyen, moun yo konvenk fasil oswa yo twonpe fasil. (Pwo. 14:15, nòt.) Nou rankontre moun sa yo souvan lè n ap preche. Pa egzanp, panse ak plizyè milyon moun chèf relijye yo oubyen lidè politik yo ap twonpe. Gen ladan yo ki vekse lè yo vin rann yo kont se twonpe chèf relijye sa yo oswa lidè politik sa yo te twonpe yo. Men, moun Pwovèb 1:22 ap pale de yo la a chwazi pou yo ret san yo pa konn anyen paske yo renmen sa (Jer. 5:31). Yo renmen fè sa yo vle e yo pa vle aprann sa Bib la di oswa obeyi prensip ki ladan l yo. Anpil moun santi yo menm jan ak yon dam nan Kebèk, nan peyi Kanada, ki renmen relijyon l anpil ki te di yon Temwen ki te vin vizite l: “Si prèt nou an twonpe nou, se ap fòt pa l, men se pap fòt pa nou!” Se sèten nou pa ta renmen imite moun ki pa vle chèche konprann! — Pwo. 1:32; 27:12.

8. Ki sa k ap ede n vin gen bonjan eksperyans lan?

⁸ Nou ka konprann rezon ki fè Bib la ankouraje n pou n pa rete san n pa gen eksperyans, men pou n “vin granmoun nan fason nou konprann”. (1 Kor. 14:20.) N ap vin gen bonjan eksperyans lan lè n aplike prensip ki nan Bib la nan lavi n. Tikras pa tikras, nou vin konprann ki jan prensip sa yo ede n pou n evite pwoblèm e pou n pran bon desizyon. Li bon pou n toujou ap chèche wè ki pwogrè nou fè nan sans sa a. Si nou gen kèk tan depi n ap etidye Labib e n ap asiste reyinyon, nou ta dwe mande tèt nou poukisa nou poko deside vwe Jewova lavi n epi batize. Si nou batize, èske n fè efò pou n preche bon nouvèl la pi byen e pou n anseye l pi byen? Èske desizyon nou pran yo montre se prensip ki nan Bib la k ap dirije nou? Antanke kretyen, èske n demontre yon seri bèl kalite nan fason n ap aji ak lòt moun? Si n wè nou bezwen fè pwogrè nan domèn sa yo, nou bezwen suiv rapèl Jewova yo ki “fè moun ki pa gen eksperyans yo vin saj”. — Sòm 19:7.

9. Ki jan moun “k ap pase moun nan rizib” yo montre yo meprize sajès?

⁹ Dezyèm gwoup moun ki meprize sajès ki soti nan Bondye a se moun “k ap pase moun nan rizib” yo. Pafwa, nou konn rankontre moun sa yo lè n ap preche. Yo renmen pase moun nan jwèt (Sòm 123:4). Bib la te avèti nou, nan dènye jou yo, t ap gen anpil moun k ap pase moun nan rizib (2 Pyè 3:3, 4). Lòt se te yon moun ki te jis, men, bofis li yo pa t koute avètisman Bondye bay, e gen moun jodi a ki aji menm jan an tou (Jen. 19:14). Anpil moun ri moun k ap obeyi prensip ki nan Bib la. Moun k ap pase moun nan rizib yo aji konsa paske yo vle suiv “pwòp dezi yo genyen pou bagay ki dezonore Bondye”. (Jid 7, 17, 18.) Sa Bib la di konsènan moun sa yo sanble ak fason aposta yo ak lòt moun ki meprize Bondye yo konn aji!

10. Selon Sòm 1:1, ki sa k ap ede n pou n pa aji menm jan ak moun k ap pase moun nan rizib yo?

¹⁰ Ki jan n ka veye pou n pa vin menm jan ak moun k ap pase moun nan rizib yo? Youn nan fason nou ka fè sa se lè n pa frekante moun ki renmen kritike. (Li Sòm 1:1.) Sa vle di, nou pa koute aposta yo oswa nou pa li anyen yo ekri. Nou konprann, si n pa fè atansyon, nou ka vin renmen kritike e nou ka vin gen dout sou Jewova ak sou enstriksyon òganizasyon l lan bay. Pou sa pa rive nou, nou ka mande tèt nou: ‘Èske m toujou gen bagay negatif pou m di lè n resevwa  nouvo enstriksyon oswa nouvo esplikasyon? Èske m gen tandans kritike frè ki alatèt yo?’ Lè n aji byen vit pou n korije tandans sa yo nou ta gen lakay nou, n ap fè kè Jewova kontan. — Pwo. 3:34, 35.

11. Ki jan ‘moun ki sòt’ la konsidere prensip moral Jewova yo?

¹¹ Twazyèm gwoup moun ki meprize sajès se ‘moun ki sòt’ yo. Yo sòt paske yo refize obeyi lwa Bondye bay nan domèn moral. Yo fè sa ki dwat nan je pa yo (Pwo. 12:15). Moun sa yo meprize Jewova, li menm ki Sous sajès (Sòm 53:1). Lè nou rankontre moun sa yo pandan n ap preche, yo toujou pare pou yo kritike nou paske nou respekte prensip ki nan Bib la. Men, yo pa gen anyen ki pi bon pou yo ofri nou. Men sa Bib la di: “Moun sòt la pa ka rive gen vrè sajès la, li pa gen anyen pou l di nan antre vil la.” (Pwo. 24:7). Moun ki sòt la pa ka bay okenn konsèy ki gen sajès. Se sa k fè Jewova avèti nou pou n “rete lwen moun sòt la”! — Pwo. 14:7.

12. Ki sa k ap ede n pou n pa aji menm jan ak moun ki sòt yo?

¹² Kontrèman ak moun ki rayi konsèy Bondye bay, nou aprann renmen fason Bondye panse, san wete prensip moral li yo. Nou ka vin pi renmen fason Bondye panse lè n konpare rezilta sa bay lè moun obeyi ak rezilta sa bay lè moun dezobeyi. Panse ak kalite pwoblèm yon seri moun vin genyen paske yo aji tankou moun sòt lè yo meprize konsèy Jewova bay. Epi, reflechi ak jan n viv pi byen paske n obeyi Bondye. — Sòm 32:8, 10.

13. Èske Jewova fòse n obeyi konsèy saj li bay?

¹³ Jewova bay tout moun posiblite pou yo gen sajès, men li pa fòse pèsonn pou yo chèche genyen l. Sepandan, li fè konn ki rezilta moun ki pa koute sajès li bay la ap jwenn (Pwo. 1:29-32). Moun ki chwazi pa obeyi Jewova ap “peye sa yo fè”. Rive yon lè, y ap jwenn anpil soufrans ak pwoblèm akoz fason y ap viv, e finalman y ap detwi. Yon lòt bò, men pwomès Jewova fè moun ki koute konsèy saj li bay e ki aplike yo: “Moun ki koute m yo ap viv ak kè poze, y ap viv trankil san yo pa pè okenn malè.” — Pwo. 1:33.

14-15. Ki sa nou aprann nan Pwovèb 4:23?

¹⁴ Lè n koute sajès Bondye bay la, sa toujou bon pou nou. Jan nou sot wè sa, Jewova pran dispozisyon pou n jwenn konsèy saj li bay yo byen fasil. Pa egzanp, nan tout liv Pwovèb la, Jewova bay bonjan konsèy k ap amelyore lavi nou si nou aplike yo. Ann wè sèlman kat egzanp nan konsèy saj sa yo.

¹⁵ Pwoteje kè senbolik ou a. Labib di: “Plis pase tout lòt bagay, pwoteje kè w, paske se ladan l sous ki bay lavi yo soti.”  (Pwo. 4:23). Reflechi ak sa nou bezwen fè pou n pwoteje kè nou. Nou bezwen manje manje ki bon pou sante nou, fè bonjan egzèsis, epi evite move abitid. Nou fè menm bagay la pou n pwoteje kè senbolik nou an. Nou nouri nou chak jou nan Pawòl Bondye a. Nou prepare reyinyon yo, nou asiste yo e nou patisipe ladan yo. Nou ret aktif lè nou patisipe regilyèman nan travay fè disip la. E nou evite vin gen move abitid lè n rete lwen nenpòt bagay ki ta kapab kòwonp panse nou, tankou detant ki imoral ak move frekantasyon.

16. Poukisa pawòl ki nan Pwovèb 23:4, 5 lan vrèman itil nou jodi a?

¹⁶ Se pou n kontante n ak sa n genyen. Men konsèy Bib la bay: “Pa touye tèt ou dèyè richès. [...] Lè w voye je gade l, li pap la, paske, wè pa wè, l ap pouse zèl tankou èg e l ap vole nan syèl.” ​(Pwo. 23:4, 5). Moun ka pèdi lajan ak byen materyèl yo genyen byen fasil. Epoutan, jodi a, moun rich kou moun pòv fou dèyè lajan. Lefètke se sa ki nan lespri yo, souvan sa konn fè yo fè yon seri bagay ki sal repitasyon yo, e ki konn lakòz yo pèdi zanmi yo e menm sante yo (Pwo. 28:20; 1 Tim. 6:9, 10). Yon lòt bò, sajès ede nou pou n pa bay tèt nou twòp pwoblèm pou lajan. Konsa, nou pap vin ava, n ap kontante n ak sa n genyen e n ap gen kè kontan. — Ekl. 7:12.

17. Ki jan nou ka vin gen “lang moun ki gen sajès la”, jan Pwovèb 12:18 montre sa?

¹⁷ Reflechi anvan w pale. Si nou pa fè atansyon, pawòl nou di kapab fè gwo dega. Men sa Bib la di: “Pawòl moun di san reflechi tankou kout epe, men, lang moun ki gen sajès la geri moun.” ​(Pwo. 12:18). Nou pwoteje bon relasyon nou gen ak lòt moun lè n evite fè tripotay sou yo (Pwo. 20:19). Nou dwe toujou li Pawòl Bondye a epi medite sou li yon fason pou pawòl nou di ka geri moun olye l blese yo (Lik 6:45). Lè nou medite sou sa Bib la di, pawòl nou ka vin tankou yon “sous sajès” k ap konsole lòt moun. — Pwo. 18:4.

18. Lè n aplike pawòl ki nan Pwovèb 24:6 la, ki jan sa ede n nan travay fè disip la?

 ¹⁸ Suiv enstriksyon. Men konsèy pratik Bib la bay pou n ka reyisi: “Lè w suiv konsèy ki saj, sa ap ede w mennen batay ou, e lè gen anpil moun k ap bay konsèy, gen siksè.” ​(Pwo. 24:6, nòt). Ann wè ki jan lè n aplike prensip sa a sa ap ede n vin pi efikas nan travay preche ak anseye a. Olye nou preche oswa anseye fason pa nou, nou eseye suiv konsèy yo ban nou. Nou jwenn konsèy ki saj nan reyinyon nou yo, kote yon seri frè ki gen eksperyans bay diskou ki baze sou Bib la epi yo fè yon seri patisipasyon pou fòme nou. Anplis de sa, òganizasyon Jewova a fè n jwenn piblikasyon ak videyo ki kapab ede moun yo konprann Bib la. Èske w fè efò pou w byen itilize yo?

19. Ki jan w konsidere sajès Jewova bay la? (Pwovèb 3:13-18).

¹⁹ Li Pwovèb 3:13-18. Se pa ti rekonesans nou genyen pou bonjan konsèy nou jwenn nan Pawòl Bondye a! Ki kote n t ap ye si n pa t gen konsèy sa yo? Nan atik sa a, nou sot wè kèk bon konsèy nou jwenn nan liv Pwovèb la. Nòmalman, nan tout Bib la, Jewova bay konsèy ki gen sajès. Ann pran detèminasyon pou n toujou aji ann amoni ak sajès Jewova bay la. Pifò moun pa bay sajès sa a valè. Men, nou menm, nou gen konviksyon “moun ki kenbe [sajès] byen di yo ap kontan”.