1. Ki sa Jewova vle pou tout moun?

 JEWOVA kreye lèzòm ak libète pou yo deside. Se toutan nou itilize kado sa a lè n ap pran desizyon. Pi gwo desizyon yon moun ka pran se lè l vwe Jewova lavi l e l vin fè pati fanmi l. Jewova vle pou tout moun fè sa. Poukisa? Paske li renmen moun e li vle sa ki pi bon an pou yo. Li ta renmen yo vin zanmi l e pou yo viv pou toutan. — Det. 30:​19, 20; Gal. 6:​7, 8.

2. Ki sa Jewova vle pou moun ki peche ki poko repanti yo? (1 Jan 2:1).

² Men, Jewova pa fòse pèsonn sèvi l. Li vle se chak moun ki deside ki sa y ap fè. Men, e si yon kretyen ki batize pa respekte Lwa Bondye yo e li fè yon peche grav? Si l pa repanti, yo dwe retire l nan kongregasyon an (1 Kor. 5:13). Men, menm lè sa a, Jewova gen bonjan espwa moun ki fè peche a ap retounen vin jwenn li. Anfèt, se youn nan pi gwo rezon ki fè l te bay ranson an yon fason pou moun ki peche ki repanti kapab jwenn padon. (Li 1 Jan 2:1.) Bondye nou an ki gen lanmou ankouraje moun ki peche yo pou yo repanti. — Zak. 1:3; Wom. 2:4; Jak 4:8.

3. Sou ki sa nou pral pale nan atik sa a?

 ³ Jewova vle nou wè peche ak moun ki peche yo menm jan l wè yo a. Nan atik sa a, nou pral wè ki jan n ka fè sa. Pandan w ap egzamine atik la, chèche wè: 1) Ki sa yo te fè lè yon moun nan kongregasyon Korent lan nan premye syèk la te fè yon peche grav? 2) Ki sa apot Pòl te ankouraje yo fè lè yon moun ki peche repanti? E 3) ki sa istwa sa a nou jwenn nan Bib la aprann nou sou fason Jewova wè yon kretyen ki fè yon peche grav?

SA KONGREGASYON AN TE FÈ LÈ TE GEN PECHE GRAV KI FÈT NAN PREMYE SYÈK LA

4. Ki sitiyasyon ki te genyen nan kongregasyon Korent lan nan premye syèk la? (1 Korentyen 5:​1, 2).

⁴ Li 1 Korentyen 5:​1, 2. Pandan twazyèm vwayaj misyonè Pòl la, li te aprann gen yon bagay grav ki t ap pase nan kongregasyon Korent lan ki te fèk fòme. Gen yon frè nan kongregasyon sa a ki te gen relasyon seksyèl ak bèlmè l. Yon bagay konsa te chokan e l pa t “menm egziste pami nasyon yo”! Nonsèlman kongregasyon an te tolere bagay mal sa a li t ap fè a, men tou, yo te santi yo fyè pou sa. Petèt kèk nan yo te panse se imite yo t ap imite mizèrikòd Jewova ak fason Jewova byen konprann moun ki enpafè. Men, Jewova pa tolere pou pèp li a ap fè sa ki pa sa. Lefètke mesye sa a te gen yon konduit ki derespektan, sa te ka sal bon repitasyon kongregasyon an. Sa te ka gen efè tou sou lòt kretyen ki te konn pase tan avèk li. Ki sa Pòl te ankouraje kongregasyon an fè?

5. Ki sa Pòl te mande kongregasyon an fè, e ki sa l te vle di? (1 Korentyen 5:13). (Gade foto a tou.)

⁵ Li 1 Korentyen 5:13. Bondye te enspire Pòl ekri yon lèt pou fè konnen yo te dwe retire mesye sa a ki te peche e ki pa t repanti a nan kongregasyon an. Ki jan kretyen ki fidèl yo te dwe aji avè l? Pòl te di yo pou yo “sispann frekante” l. Sa sa vle di? Pòl esplike sa gen ladan l pou yo “pa menm manje ak yon moun konsa”. (1 Kor. 5:11.) Chita manje ak yon moun fè l fasil pou gen bèl konvèsasyon avè l. Donk, li klè, Pòl te vle di pou kongregasyon an pa pase tan ki pa nesesè avèk mesye sa a. Sa t ap pwoteje kongregasyon an kont move enfliyans li ta ka  gen sou yo (1 Kor. 5:​5-7). Anplis de sa, sa t ap ede mesye a wè nan ki pwen sa l te fè a te fè Jewova mal, sa ki t ap fè l santi l wont e ki t ap pouse l repanti.

6. Ki efè lèt Pòl la te genyen sou kongregasyon an ak sou mesye ki te peche a?

⁶ Apre Pòl te fin voye lèt li a bay kretyen nan kongregasyon Korent lan, li te kòmanse mande tèt li ki jan kongregasyon an t ap reyaji. Rive yon lè, Tit te ba l yon nouvèl ki te fè l kontan anpil. Kongregasyon an te byen reyaji devan lèt Pòl te voye a (2 Kor. 7:​6, 7). Yo te suiv enstriksyon l yo. Mete sou sa, pandan mwa ki pase apre Pòl te fin voye lèt la, mesye ki te peche a te repanti. Li te chanje mantalite l ak fason l t ap aji e l te kòmanse suiv prensip Jewova yo ki jis (2 Kor. 7:​8-11). Ki sa Pòl t apral mande kongregasyon an pou l fè kounye a?

 FASON KONGREGASYON AN TE DWE AJI AK MESYE KI TE PECHE E KI TE REPANTI A

7. Ki sa mesye ki te peche a te fè apre yo te fin retire l nan kongregasyon an? (2 Korentyen 2:​5-8).

⁷ Li 2 Korentyen 2:​5-8. Pòl te di: “Reprimann sa a pifò moun te bay la kont pou mesye sa a.” Donk, disiplin nan te ede l toutbon. Nan ki sans? Li te ede l repanti. — Ebre 12:11.

8. Ki sa Pòl te di kongregasyon an pou l fè annapre?

⁸ Pòl te di kongregasyon an pou yo “dispoze padone” frè yo a, pou yo “konsole l” e pou yo “fè l santi [yo] renmen l”. Pòl pa t vle pou kongregasyon an jis kite mesye a retounen pami pèp Jewova a. Li te vle yo ba l asirans yo padone l toutbon e yo renmen l, kit se nan pawòl yo, kit se nan aksyon yo. Konsa, yo t ap montre aklè yo te kontan li retounen nan kongregasyon an.

9. Poukisa kèk moun te ka renka pou yo padone mesye ki te peche e ki te repanti a?

⁹ Èske gen kèk moun nan kongregasyon an ki te renka pou yo akeyi mesye ki te peche e ki repanti a nan mitan yo? Bib la pa di anyen sou sa, men sa te ka rive. Dayè, aksyon l te fè yo te lage latwoublay nan kongregasyon an e petèt sa te fè kèk moun santi yo wont tou. Gen kèk moun ki te ka twouve l pa nòmal pou y ap akeyi mesye sa a avèk tout lanmou sa a alòske se yo menm ki t ap fè gwo efò pou yo rete pwòp nan domèn moral. (Konpare ak Lik 15:​28-30.) Donk, poukisa li te enpòtan pou kongregasyon an demontre bonjan lanmou pou frè yo a ki te retounen?

10-11. Ki sa k te ka rive si ansyen yo te refize padone mesye ki te peche e ki te repanti a?

¹⁰ Imajine ki sa k t ap rive si ansyen yo te refize kite mesye sa a ki te repanti toutbon retounen nan kongregasyon an? Oswa, si apre l fin retounen, kongregasyon an refize montre yo renmen l? “Gwo tristès” t ap fini avè l. Li t ap fasil pou l panse sitiyasyon l lan sanzespwa. Li te ka menm sispann fè efò pou l retounen gen bon relasyon ak Bondye.

¹¹ Sa k pi mal la, si lòt frè ak sè nan kongregasyon an te refize padone mesye sa a ki te peche e ki te repanti, yo t ap met relasyon yo gen ak Jewova a an danje. Poukisa? Paske lè sa a, yo pa t ap imite Jewova, li menm ki padone moun ki peche e ki repanti. Olye de sa, yo t ap montre yo imite Satan, li menm ki di e ki pa demontre mizèrikòd. Anfèt, yo t ap tounen zouti Dyab la itilize pou kraze relasyon mesye sa a gen ak Jewova. — 2 Kor. 2:​10, 11; Efe. 4:27.

12. Ki jan kongregasyon an te ka imite Jewova?

¹² Donk, ki jan kongregasyon Korent lan te ka imite Jewova olye yo imite Satan? Se lè yo imite fason Jewova aji ak moun ki peche e ki repanti. Men sa kèk moun ki te patisipe nan ekri Bib la te di konsènan Jewova: David te di li “bon e [li] dispoze padone”. (Sòm 86:5.) Miche te di: “Kiyès ki tankou w, o Bondye, ou menm ki padone erè [...] e ki pase sou peche?” (Miche 7:18). Ezayi te di: “Se pou moun ki mechan an kite wout li ladan l lan, e se pou moun k ap fè sa k mal la retire lide li gen nan tèt li yo. Se pou l retounen vin jwenn Jewova k ap fè l mizèrikòd, e se pou l  vin jwenn Bondye nou an, paske l ap padone l nèt.” — Eza. 55:7.

13. Poukisa l te nòmal pou yo te reyentegre mesye ki te peche e ki te repanti a nan kongregasyon an? (Gade kare ki gen tit “ Ki lè yo te reyentegre mesye ki te nan kongregasyon Korent lan?”)

¹³ Pou kongregasyon Korent lan te ka imite Jewova, yo te dwe akeyi mesye ki te repanti a e yo te dwe fè l santi yo renmen l. Lè kongregasyon an te suiv konsèy Pòl te ba yo pou yo akeyi mesye ki te peche e ki te repanti a, yo t ap montre yo “obeyisan nan tout bagay”. (2 Kor. 2:9.) Se vre, se kèk mwa sèlman ki te pase depi yo te retire l nan kongregasyon an, men disiplin nan te bay bon rezilta, li te pouse l repanti. Donk, pa t gen okenn rezon pou kongregasyon an te pran tan pou yo reyentegre l.

IMITE JISTIS JEWOVA AK MIZÈRIKÒD LI

14-15. Ki sa nou aprann nan sitiyasyon ki te pase nan kongregasyon Korent lan? (2 Pyè 3:9). (Gade foto a tou.)

¹⁴ Bondye te fè ekri istwa sou sa k te pase nan kongregasyon Korent lan “pou enstriksyon nou”. (Wom. 15:4.) Nan istwa sa a, nou aprann Jewova pa tolere peche grav nan mitan pèp li a. Li pa dakò ak moun ki panse yo dwe demontre mizèrikòd pou moun ki peche ki pa repanti yo epi kite yo kontinye rete nan  kongregasyon an. Jewova gen mizèrikòd, men li pa sitirè, ni li pap chanje prensip li yo (Jid 4). Dayè, si l ta fè sa, li pa t ap demontre l gen mizèrikòd ditou paske sa t ap mete tout kongregasyon an an danje. — Pwo. 13:20; 1 Kor. 15:33.

¹⁵ Mete sou sa, nou aprann Jewova pa ta renmen pou pèsonn moun detwi. Li vle sove plis moun posib. Li montre mizèrikòd pou moun ki repanti e ki vle retounen vin gen bon relasyon avè l ankò (Eze. 33:11; Li 2 Pyè 3:9.) Se sa k fè, lè mesye nan kongregasyon Korent lan te repanti e l te kase tèt tounen, Jewova te sèvi ak Pòl pou l te esplike kongregasyon an yo te dwe padone mesye sa a epi akeyi l.

16. Ki jan w santi w konsènan fason yo te jere sitiyasyon ki te pase nan kongregasyon Korent lan?

¹⁶ Egzamen nou sot fè sou sa k te pase nan kongregasyon Korent lan ede nou wè jan Jewova gen lanmou, jan l renmen ladwati ak jan l aji avèk jistis (Sòm 33:5). Èske sa pa fè w anvi fè plis louwanj pou Bondye nou an? Dayè, nou tout fè peche e nou bezwen li padone nou. Nou chak gen rezon pou nou montre nou rekonesan pou ranson an Jewova ban nou ki fè l posib pou nou jwenn padon. Se pa ti ankourajan sa ankourajan pou n konnen Jewova renmen pèp li a toutbon e li vle sa ki pi bon an pou yo!

17. Sou ki sa nou pral pale nan atik ki vin apre yo?

¹⁷ Si yon moun fè peche grav jodi a, ki jan ansyen yo ka imite lanmou Jewova epi ede moun sa a repanti? Ki sa kongregasyon an dwe fè lè ansyen yo deside retire oswa reyentegre yon moun nan kongregasyon an? N ap jwenn repons kesyon sa yo nan atik ki vin apre yo.