Men sa apot Pòl te ekri kretyen ki nan vil Tesalonik yo: “Si yon moun pa obeyi pawòl nou di nan lèt sa a, pran prekosyon ak moun sa a.” (2 Tes. 3:14). Anvan sa, nou te konn di enstriksyon sa a se te pou ansyen yo. Si yon moun te kontinye dezobeyi prensip ki nan Bib la malgre ansyen yo konseye l plizyè fwa, ansyen yo te kapab fè yon diskou pou avèti kongregasyon an. Annapre, frè ak sè yo pa t ap pase tan ak moun yo note a ankò.

Sepandan, nou dwe fè yon ajisteman. Kounye a, nou vin konprann konsèy Pòl te bay la gen rapò ak desizyon chak kretyen nan kongregasyon an dwe pran nan yon seri sitiyasyon. Kidonk, li pa nesesè pou ansyen yo bay yon diskou pou avèti kongregasyon an ankò. Pou ki rezon nou fè chanjman sa a? Ann egzamine kontèks Pòl te bay konsèy sa a.

Pòl te remake gen kèk moun nan kongregasyon an ki t ap “mache yon fason ki dezòdone”. Yo te meprize konsèy Bondye te ba yo a. Nan yon vizit li te fè anvan sa, li te ba yo lòd sa a: “Si yon moun pa vle travay, li pa fèt pou l manje tou.” Malgre sa, gen kèk moun ki te refize travay pou yo pran swen tèt yo alòske yo te kapab fè sa. Epitou, yo te mele nan zafè lòt moun. Ki jan kretyen yo te dwe aji ak moun sa yo? — 2 Tes. 3:​6, 10-12.

Men sa Pòl te di: “Pran prekosyon ak moun sa a.” Mo grèk lè yo tradui l yo mete “pran prekosyon” pou li a vle di idantifye moun sa yo epi veye pou nou pa kite yo enfliyanse nou. Se tout kongregasyon an Pòl te bay enstriksyon sa a, se pa t sèlman ansyen yo (2 Tes. 1:1; 3:6). Kidonk, se chak kretyen ki te wè yon kwayan parèy li k ap dezobeyi konsèy Bondye bay yo ki te dwe chwazi “sispann frekante” moun sa a ki dezòdone.

Èske sa vle di yo te aji avèk moun nan menm jan yo te aji ak yon moun yo retire nan kongregasyon an? Non, paske men sa Pòl te ajoute: “Kontinye avèti l tankou yon frè.” Kidonk, frè ak sè yo t ap kontinye pase tan ak moun sa a nan reyinyon yo ak nan travay predikasyon an, men, yo t ap chwazi pa patisipe avè l nan detant. Pou ki rezon? Men sa Pòl te di: “Pou l ka vin wont.” Lefètke yo aji avè l konsa, kretyen sa a ki dezòdone t ap vin wont poutèt konduit li e l t ap chanje fason l aji. — 2 Tes. 3:​14, 15.

Jodi a, ki jan kretyen yo ka aplike konsèy sa a? Toudabò, nou dwe sèten moun nan ap aji yon fason ki vrèman “dezòdone”, jan Pòl te montre sa. Pòl pa t ap pale konsènan moun ki gendwa te fè yon seri bagay ki deranje konsyans nou alòske bagay sa yo pa an kontradiksyon ak lwa oswa ak prensip Bib la bay, nitou li pa t ap pale konsènan moun ki te jis gen pwòp preferans yo. Mete sou sa, li pa t ap pale konsènan moun ki te senpleman blese santiman nou. Okontrè, Pòl t ap pale konsènan moun ki te chwazi dezobeyi konsèy klè Bondye bay yo.

Jodi a, si nou wè yon kretyen parèy nou kontinye dezobeyi konsèy Pawòl Bondye a bay a, n ap pran desizyon pou nou pa patisipe avè l nan detant nou yo. Piske se yon desizyon pèsonèl sa ye, nou pap pale sou sa ak lòt moun sof ak moun lakay nou. Mete sou sa, nou kapab kontinye pase tan avèk moun sa a nan reyinyon nou yo ak nan travay predikasyon an. Si l korije fason l t ap aji a, lè sa a nou ka rekòmanse patisipe avè l nan detant nou yo.