1. Ki jan Pyè te reyaji apre Jezi te fin fè yon mirak pou fè l pran yon pakèt pwason?

 PYÈ te pase tout yon nuit ap fè lapèch san l pa pran anyen. Li te sezi lè Jezi te di l: “Avanse kote dlo a fon, epi lage filè nou pou nou peche.” (Lik 5:4). Pyè pa t fin kwè l ap pran pwason, men, li te fè sa Jezi te di l fè a. Filè a te tèlman chaje pwason, li te kòmanse chire. Lè Pyè ak mesye ki t ap travay ansanm avè l yo te rann yo kont se yon mirak ki sot fèt, “yo te sezi anpil”. Pyè te di byen fò: “Seyè, pa rete pre m, paske mwen fè anpil peche.” (Lik 5:​6-9). Sanble Pyè te santi l pa t merite pou l te ansanm ak Jezi.

2. Poukisa li bon pou n egzamine egzanp Pyè?

² Pyè te gen rezon, paske li te “fè anpil peche”. Ekriti yo montre pafwa li te di e l te fè yon seri bagay li te regrèt annapre. Èske w konn santi w menm jan ak Pyè? Èske w ap lite ak yon defo ou gen nan pèsonalite w oswa èske w gen lontan depi w ap goumen ak yon move tandans? Si se ka pa w, ou kapab pran kouraj lè w etidye egzanp Pyè? Nan ki sans? Fè yon ti reflechi: Li te fasil pou Jewova pa t fè ekri defo Pyè te genyen yo nan Bib la. Sepandan, Jewova te fè mete yo nan Bib la pou sèvi nou leson (2 Tim. 3:​16, 17). Lè n aprann mesye sa a te gen defo ak santiman menm jan avè n, sa kapab ede n wè Jewova pa atann pou nou pafè. Li vle nou ret fidèl, sa vle di, pou n kontinye fè efò malgre nou gen defo.

3. Poukisa nou bezwen kontinye ret fidèl?

 ³ Poukisa l enpòtan pou n ret fidèl? Gen yon pawòl ki di: Tank ou pratike yon bagay se tank w ap vin fò ladan l. Ann pran yon egzanp: Yon mizisyen ka fè plizyè ane ap jwe yon enstriman pou l ka vin fò ladan l. Pandan tan sa a li ka fè anpil erè, men, si l kontinye pratike l ap vin fò. Menmsi l vin yon gwo mizisyen, li ka fè erè pafwa. Malgre sa, li pa bay vag, li kontinye pratike pou l ka vin pi fò. Menm jan an tou, menm lè n panse nou rive elimine yon defo n genyen, li ka tounen ankò. Men, aktout sa, nou kontinye fè efò pou n amelyore. Nou tout konn di oswa fè yon seri bagay nou konn regrèt annapre. Sepandan, si n pran detèminasyon pou n pa bay vag, Jewova ap ede n pou n kontinye fè pwogrè (1 Pyè 5:10). Ann egzamine egzanp Pyè ki pa t bay vag. Konpasyon Jezi te montre l gen pou Pyè malgre defo Pyè te genyen kapab ankouraje n pou n kontinye sèvi Jewova.

4. Selon Lik 5:​5-10, ki jan Pyè te wè tèt li, e ki asirans Jezi te ba li?

⁴ Ekriti yo pa di pou ki rezon Pyè te di li “fè anpil peche” oswa ak ki peche l t ap panse lè l te di sa a. (Li Lik 5:​5-10.) Men, li ka te fè kèk peche grav. Jezi te konnen Pyè te pè paske Pyè te santi li pa t bon ase. Epitou, Jezi te konnen Pyè te kapab ret fidèl. Se sa k fè li te di Pyè avèk jantiyès: “Ou pa bezwen pè ankò.” Konfyans Jezi te gen nan Pyè te gen efè sou Pyè pandan tout vi l. Annapre, Pyè ak Andre, frè l la, te abandone biznis lapèch yo te genyen an e yo te suiv Mesi a nètale, yon desizyon ki te fè yo jwenn anpil benediksyon. —  Mak 1:​16-18.

5. Ki benediksyon Pyè te jwenn paske l te konbat laperèz li te genyen yo e paske l te aksepte envitasyon Jezi te fè l la?

⁵ Pyè te fè anpil bèl eksperyans antanke yon disip Kris. Li te wè Jezi ki te geri moun ki te malad, ki te chase demon e ki te menm resisite moun ki te mouri b (Mat. 8:​14-17; Mak 5:​37, 41, 42). Epitou, Pyè te viv yon vizyon estrawòdinè kote l te wè Jezi nan glwa li t apral genyen nan Wayòm Bondye a. Vizyon sa a te gen yon gwo efè sou Pyè (Mak 9:​1-8; 2 Pyè 1:​16-18). Pa gen dout nan sa, Pyè te wè yon seri bagay li pa t ap janm ka wè si l pa t  suiv Jezi. Li dwe te kontan anpil dèske l pa t kite santiman negatif li te genyen yo fè l pa jwenn benediksyon sa yo!

6. Èske Pyè te rive konbat feblès li te genyen yo byen vit? Esplike.

⁶ Malgre sa Pyè te wè ak sa l te tande, li te toujou ap goumen ak defo li te genyen yo. Ann pran kèk egzanp. Lè Jezi te esplike jan li t ap gen pou l soufri e l t ap gen pou l mouri pou reyalize pwofesi ki nan Bib la, Pyè te di l pou l pa t di bagay konsa (Mak 8:​31-33). Se pa ni de ni twa fwa Pyè ak lòt apot yo te fè diskisyon pou yo konnen kiyès nan yon ki pi enpòtan (Mak 9:​33, 34). Nan dènye nuit Jezi te fè anvan l mouri a, Pyè pa t ezite koupe zòrèy yon mesye (Jan 18:10). Nan menm nuit sa a, Pyè te vin pè, e pandan twa fwa li te nye Jezi, zanmi l lan (Mak 14:​66-72). Sa te fè Pyè kriye anpil. —  Mat. 26:75.

7. Ki posiblite Pyè te vin genyen apre Jezi fin resisite?

⁷ Jezi pa t abandone apot li a ki te dekouraje anpil. Apre Jezi fin resisite, li te bay Pyè okazyon pou Pyè montre li toujou renmen l. Jezi te mande Pyè pou l pran swen ti mouton l yo avèk imilite (Jan 21:​15-17). Pyè te byen reyaji. Li te Jerizalèm nan jou Pannkòt la, e li te pami premye moun ki te resevwa lespri sen.

8. Ki erè grav Pyè te fè nan vil Antyòch?

⁸ Menm apre Pyè te vin yon kretyen Bondye chwazi pou al nan syèl, li te oblije goumen ak defo li genyen. Nan ane 36 epòk nou an, Pyè te la lè Bondye te bay Kònèy, yon moun lòt nasyon ki pa t sikonsi, lespri sen. Sa ki te montre aklè “Bondye pa gen patipri” e moun lòt nasyon yo te ka vin fè pati kongregasyon kretyen an (Tra. 10:​34, 44, 45). Annapre, Pyè te santi l alèz pou l manje ak moun lòt nasyon yo, yon bagay li pa t ap janm fè anvan sa (Gal. 2:12). Sepandan, gen kèk Juif ki te kretyen ki te santi Juif yo ak moun lòt nasyon yo pa t dwe manje ansanm. Lè kèk nan moun sa yo te vin Antyòch, Pyè te sispann manje ak frè l yo ki te soti nan lòt nasyon, petèt paske l te pè pou l pa t choke Juif ki te kretyen yo. Lè apot Pòl te wè kalite ipokrizi sa a, li te reprann Pyè devan tout moun (Gal. 2:​13, 14). Malgre Pyè te fè erè sa a, li te kontinye ret fidèl. Ki sa k te ede l?

9. Ki fason Jan 6:​68, 69 montre Pyè te fidèl?

⁹ Pyè te fidèl. Li pa t kite anyen fè l sispann suiv Jezi. Yon lè, li te montre l fidèl lè Jezi te di yon bagay disip li yo pa t konprann. (Li Jan 6:​68, 69.) Anpil nan yo te sispann suiv Jezi san yo pa t tann pou l ba yo yon esplikasyon oswa san yo pa t mande l sa l te vle di. Men, Pyè pa t fè sa, li te konnen se Jezi sèlman ki gen “pawòl k ap mennen nan lavi ki pap janm fini an”.

10. Ki jan Jezi te montre li gen konfyans nan Pyè? (Gade foto a tou.)

¹⁰ Jezi pa t abandone Pyè. Dènye nuit Jezi te fè ap viv sou tè a, li te konnen Pyè ak lòt apot yo t ap abandone l. Aktout sa, Jezi te fè Pyè konnen li gen konfyans li t ap retounen e li t ap ret fidèl (Lik 22:​31, 32). Jezi te konprann “lespri a byen dispoze, men chè a fèb”. (Mak 14:38.) Vrèmanvre, menm apre Pyè te fin nye Jezi, Jezi pa t bay apot li a vag. Apre Jezi fin resisite, li te parèt devan Pyè, sandout ki te poukont li lè sa a (Mak 16:7; Lik 24:34; 1 Kor. 15:5). Sa dwe te ankouraje apot la ki te tris anpil!

11. Ki jan Jezi te bay Pyè asirans Jewova t ap pran swen l?

 ¹¹ Jezi te bay Pyè asirans Jewova t ap pran swen l. Apre Jezi fin resisite, li te fè yon lòt mirak kote l te fè Pyè ak lòt apot yo pran anpil pwason (Jan 21:​4-6). Pa gen dout, mirak sa a te bay Pyè asirans Jewova t ap kapab ede l jwenn sa l bezwen pou l viv byen fasil. Petèt lè sa a, apot la te sonje lè Jezi te di Jewova t ap pran swen moun ki “kontinye chèche Wayòm nan an premye”. (Mat. 6:33.) Se pou rezon sa a, Pyè te bay travay predikasyon an premye plas nan lavi l olye l te bay biznis lapèch la plis enpòtans. Nan jou Pannkòt ane 33 epòk nou an, li te bay yon bèl temwayaj, e sa te ede plizyè milye moun aksepte bon nouvèl la (Tra. 2:​14, 37-41). Annapre, li te ede moun Samari yo ak moun lòt nasyon yo pou yo konn kiyès Kris ye e pou yo suiv li (Tra. 8:​14-17; 10:​44-48). Se sèten, Jewova te itilize Pyè anpil pou ede tout kalite moun vin fè pati kongregasyon an.

12. Pandan n ap panse ak egzanp Pyè, ki sa nou bezwen sonje si n gen lontan depi n ap goumen ak yon feblès?

¹² Jewova kapab ede n pou n kontinye ret fidèl. Sa ka pa toujou fasil, sitou si n gen lontan depi n ap goumen ak yon defo. Pafwa, defo nou yo ka sanble pi mal pase defo Pyè te genyen yo. Men, Jewova kapab ban nou fòs pou n pa bay vag (Sòm 94:​17-19). Pa egzanp, gen yon frè ki te omoseksyèl pandan plizyè ane anvan l t aprann laverite. Li te deside chanje lavi l nèt pou l te ka viv ann amoni ak sa Bib la di. Aktout sa, pafwa li konn ap goumen ak move dezi. Ki sa k te ede l kontinye ret fidèl? Men sa l esplike: “Jewova ban m fòs.” Apre sa li di: “Grasa èd lespri sen Jewova [...], mwen te aprann li posib pou n [kontinye] viv fason Jewova vle a. Jewova itilize m, e li kontinye ban m fòs malgre feblès mwen genyen yo.”

13. Ki jan nou kapab suiv egzanp Pyè, jan sa parèt nan Travay 4:​13, 29, 31? (Gade foto a tou.)

¹³ Jan nou sot wè sa, pandan plizyè fwa Pyè te fè gwo erè paske l te pè moun. Men, apre Pyè te fin priye pou l gen kran, li te kapab aji avèk kouraj. (Li Travay 4:​13, 29, 31.) Nou menm tou, nou kapab konbat laperèz nou genyen yo. Ann wè  sa k te rive yon jèn frè ki rele Horst, ki t ap viv ann Almay pandan Dezyèm Gè mondyal la. Pafwa, yo te mande moun yo pou yo salye youn lòt yon fason ki te vle di: “Se Hitler k ap sove nou!” Byenke Horst te konnen li pa t dwe salye moun fason sa a, pafwa li te konn fè sa nan lekòl li paske l te pè pwofesè l ak kamarad li yo. Paran Horst yo pa t blame l, okontrè, yo te priye avè l, yo te mande Jewova pou l ba l kouraj. Grasa èd paran l yo e lefètke l te konte sou Jewova, li te vin jwenn fòs pou l aji avèk kouraj. Men sa l te di annapre: “Jewova pa t janm abandone m.” c

14. Ki jan bèje yo ki gen sousi pou moun kapab ankouraje frè ak sè ki santi yo dekouraje yo?

¹⁴ Jewova ak Jezi pap abandone nou. Apre Pyè te fin nye Jezi, li te gen pou l pran yon desizyon enpòtan nan lavi l. Èske l t ap sispann suiv Kris oswa èske l t ap kontinye ret fidèl avè l antanke disip li? Jezi te sipliye Jewova pou lafwa Pyè pa t febli. Jezi te fè Pyè konn sa, e li te di Pyè li gen konfyans li t ap kapab bay frè l yo fòs annapre (Lik 22:​31, 32). Sa dwe te ankouraje Pyè anpil lè l te sonje pawòl Jezi te di l yo. Lè nou gen yon desizyon enpòtan pou n pran nan lavi nou, Jewova ka itilize bèje yo ki gen sousi pou nou pou l ban nou ankourajman nou bezwen pou n kapab ret fidèl (Efe. 4:​8, 11). Gen yon frè ki rele Paul ki gen lontan depi l ansyen ki fè efò pou l ankouraje frè ak sè yo fason sa a. Li mande frè ak sè ki anvi bay vag yo pou yo reflechi sou jan Jewova te atire yo vin nan laverite. Annapre, li ba yo asirans Jewova pap abandone yo paske Li gen yon lanmou ki fidèl. Alafen, men sa l di: “Mwen te wè anpil moun ki te  dekouraje ki kontinye ret fidèl grasa èd Jewova.”

15. Ki jan egzanp Pyè ak egzanp Horst montre pawòl ki nan Matye 6:33 a se laverite?

¹⁵ Menm jan Jewova te ede Pyè ak lòt apot yo jwenn sa yo bezwen pou yo viv, L ap ede n jwenn sa n bezwen pou n viv lè n bay travay predikasyon an premye plas nan lavi n (Mat. 6:33). Apre Dezyèm Gè mondyal la, frè Horst nou te pale de li pi wo a te vle vin pyonye. Men, li te pòv anpil e li pa t fin kwè si l t ap ka rive pran swen tèt li toutpandan li nan sèvis aplentan. Ki sa l t ap fè nan ka sa a? Pou l te ka wè si Jewova t ap pran swen l toutbon, li te pase tout semèn nan nan travay predikasyon an pandan vizit siveyan sikonskripsyon an. Nan fen semèn nan, se pa ti sezi l te sezi lè siveyan sikonskripsyon an te ba l yon anvlòp ki gen lajan ladan l, men, li pa t di l kiyès ki te ba l kòb la. Te gen ase kòb nan anvlòp la pou l pran swen tèt li nan sèvis pyonye a pandan plizyè mwa. Horst te konsidere kado sa a kòm yon prèv Jewova t ap pran swen l. Li te met Wayòm nan an premye pandan tout rès vi l. —  Mal. 3:10.

16. Poukisa l bon pou n reflechi sou egzanp Pyè ak sou sa l te ekri yo?

¹⁶ Se pa ti kontan Pyè dwe te kontan dèske Jezi pa t koute l lè l te mande l pou l pa rete pre l la! Kris te kontinye bay Pyè fòmasyon pou l vin yon apot ki fidèl e pou l vin yon bèl egzanp pou kretyen yo. Nou jwenn anpil bèl leson nan fòmasyon Jezi te bay Pyè a ki kapab itil nou tout jodi a. Nou jwenn kèk nan leson sa yo ak lòt leson ankò nan de lèt Bondye te fè Pyè ekri voye bay kongregasyon yo nan premye syèk la. Nan atik ki vin apre a, nou pral pale sou kèk rapèl nou jwenn nan lèt sa yo e nou pral wè ki jan nou kapab aplike yo jodi a.