1-2. Ki byenfè nou jwenn lefètke Jewova kreye nou ak kapasite pou n jwenn plis kè kontan lè n bay pase lè n resevwa?

 LÈ JEWOVA te kreye lèzòm, li te fè yo ak kapasite pou yo gen plis kè kontan lè yo bay pase lè yo resevwa (Tra. 20:35). Èske sa vle di nou pa gen okenn kè kontan lè nou resevwa? Non. Nou kontan lè nou resevwa yon kado. Sepandan, nou pi kontan toujou lè se nou menm ki bay. E vrèmanvre, se yon bon bagay lefètke Jewova fè nou fason sa a. Sa k fè sa?

² Lefètke Jewova kreye nou konsa, nou kapab chèche gen plis kè kontan. Nou kapab vin gen plis kè kontan lè n chèche plis okazyon pou n bay. Sa vrèman estrawòdinè dèske se konsa Jewova fè nou! — Sòm 139:14.

3. Poukisa nou kapab di Jewova se “Bondye ki gen kè kontan an”?

³ Labib fè nou konnen moun ki bay lòt moun gen kè kontan. Donk, nou ka konprann poukisa Bib la fè konnen Jewova se “Bondye ki gen kè kontan an”. (1 Tim. 1:11.) Se li menm an premye ki te bay e se li ki bay plis. Se grasa li “nou gen lavi, nou fè mouvman ak kò nou e nou egziste”, jan apot Pòl fè konn sa (Tra. 17:28). Vrèmanvre, “tout bèl don ak tout kado pafè sot” nan Jewova. — Jak 1:17.

4. Ki sa k ap ede n gen plis kè kontan?

⁴ Petèt nou tout ta renmen gen pi plis kè kontan lè nou bay. Nou kapab gen kè kontan sa a lè n imite Jewova ki renmen bay (Efe. 5:1). Nou pral wè bèl egzanp Jewova ban nou nan kesyon renmen bay, e nou pral aprann ki sa nou ka fè si nou santi lòt moun pa gen rekonesans pou  sa n fè pou yo. Sa ap ede nou kontinye bay, e konsa, n ap vin gen plis kè kontan.

IMITE JEWOVA KI RENMEN BAY

5. Ki bagay materyèl Jewova ban nou?

⁵ Ki fason Jewova montre li renmen bay? Ann egzamine kèk egzanp. Jewova ban nou bagay materyèl nou bezwen. Nou ka pa toujou ap viv nan liks, men, grasa Jewova, pifò nan nou gen sa nou bezwen. Pa egzanp, li pèmèt nou jwenn manje, rad ak yon kote pou n rete (Sòm 4:8; Mat. 6:​31-33; 1 Tim. 6:​6-8). Èske se paske Jewova santi l oblije ban n bagay sa yo ki fè l fè sa? Non! Poukisa Jewova fè sa pou nou?

6. Ki sa nou aprann nan Matye 6:​25, 26?

⁶ Jewova ban nou sa nou bezwen paske l renmen nou. Ann egzamine pawòl Jezi te di nou jwenn nan Matye 6:​25, 26. (Li vèsè yo.) Jezi sèvi ak egzanp nou jwenn nan kreyasyon an. Li te pale konsènan zwazo yo. Men sa l te di: “Yo pa ni simen ni rekòlte, ni yo pa ranmase al met nan depo.” Sepandan, remake sa l di annapre: “Papa nou ki nan syèl la ba yo manje.” Apre sa, Jezi mande: “Èske nou pa gen plis valè pase yo?” Ki leson nou aprann? Jewova konsidere moun k ap adore l yo gen plis valè pou li lontan pase bèt. Si Jewova pran swen bèt yo, nou kapab gen asirans l ap ban nou sa n bezwen! Menm jan ak yon papa ki pran swen pitit li, Jewova bay fanmi l sa yo bezwen paske l renmen yo. — Sòm 145:16; Mat. 6:32.

7. Bay youn nan fason nou kapab imite Jewova ki renmen bay. (Gade foto a tou.)

⁷ Menm jan ak Jewova, nou menm tou nou kapab bay moun ki nan bezwen yon bagay paske nou renmen yo. Pa egzanp, èske w konnen yon kwayan parèy ou ki bezwen manje oswa rad? Jewova kapab sèvi avè w pou w ede l. Yo konnen pèp Jewova a konn aji byen vit pou ede lòt moun lè gen katastwòf. Pa egzanp, pandan pandemi COVID-19 la, frè ak sè yo te bay moun ki te nan bezwen manje, rad ak lòt bagay ankò. Gen anpil ladan yo tou ki te fè ofrann ak tout kè yo pou travay mondyal la. Sa te ede frè yo jwenn kòb pou yo pote sekou bay moun ki nan bezwen toupatou sou tè a. Yo te aplike pawòl nou jwenn nan Ebre 13:16 la ki di:  “Pa bliye fè byen, e pa bliye pataje sa nou genyen ak lòt moun, paske se nan sakrifis sa yo Bondye pran plezi.”

8. Ki jan pisans Jewova genyen an ede nou? (Filipyen 2:13).

⁸ Jewova bay pisans. Jewova kontan pataje fòs san limit li genyen an ak sèvitè fidèl li yo. (Li Filipyen 2:13.) Èske w konn priye pou w jwenn fòs pou w reziste anba tantasyon oswa pou w andire yon gwo eprèv? Petèt ou te priye tou senpleman pou w jwenn fòs pou w fè sa w bezwen fè pandan jounen an. Lè Bondye te reponn priyè ou te fè pou w te jwenn fòs la, ou ka te dakò ak pawòl apot Pòl te ekri ki di: “Mwen gen fòs pou tout bagay grasa Sila a ki ban m pisans lan.” — Flp. 4:13.

9. Bay kèk fason nou kapab imite Jewova lè nou sèvi ak fòs nou genyen pou n ede lòt moun. (Gade foto a tou.)

⁹ Byenke nou enpafè, nou kapab imite Jewova ki kontan sèvi ak pisans li genyen an pou ede moun. Nou pa ka pataje fòs oswa enèji nou genyen an ak lòt moun. Men, nou ka sèvi ak fòs nou genyen an pou n ede yo. Pa egzanp, nou ka al fè komisyon pou yon kretyen ki granmoun oswa ki malad oubyen nou ka fè travay nan kay pou li. Si sitiyasyon nou pèmèt nou, nou ka ofri tèt nou kòm volontè pou nou netwaye Sal Wayòm nan e pou n fè antretyen ladan l. Lè nou sèvi ak fòs nou fason sa yo, sa bon pou lòt moun k ap adore Jewova.

10. Ki jan nou kapab sèvi ak pawòl n ap di pou n ankouraje lòt moun?

¹⁰ Epitou, pa bliye pawòl nou di gen fòs. Èske w konn yon moun ki t ap kontan si w felisite l ak tout kè w? Èske w konn yon moun ki bezwen konsolasyon? Nan ka sa yo, fè moun nan konnen ou gen sousi pou li. Ou kapab al vizite moun nan, rele l nan telefòn, oswa petèt ou kapab voye yon kat pou li, yon imel oswa yon mesaj. Ou pa bezwen di pawòl ki konplike. Kèk pawòl tou senp ou di ak tout kè w se kapab egzakteman sa frè w la oswa sè w la bezwen pou l kontinye ret fidèl e pou l santi l pi byen nan sitiyasyon l ye a. — Pwo. 12:25; Efe. 4:29.

11. Ki jan Jewova sèvi ak sajès li genyen an?

¹¹ Jewova bay sajès. Men sa disip Jak te ekri: “Si youn nan nou manke sajès, se pou l kontinye mande Bondye l, e l ap ba li l, paske l donan ak tout moun, e li pa [chèche] jwenn fot.” (Jak 1:​5, nòt). Jan pawòl sa yo montre sa, Jewova pa renka pou l pataje sajès li genyen an. Li kontan  pataje l ak lòt moun. Remake tou, lè Jewova bay sajès, “li pa fè repwòch” oswa “li pa [chèche] jwenn fot”. Li pa janm fè n santi n wont lè nou mande l gide nou. Okontrè, li vle nou mande l sa. — Pwo. 2:​1-6.

12. Ki okazyon nou jwenn pou n pataje sajès nou genyen an ak lòt moun?

¹² E nou menm? Èske n ka imite Jewova lè n pataje sajès nou genyen (Sòm 32:8)? Pèp Jewova a gen anpil okazyon pou l pataje sa l aprann. Pa egzanp, souvan nou bay nouvo yo fòmasyon nan travay fè disip la. Avèk pasyans, ansyen yo montre sèvitè ministeryèl yo ak frè ki batize yo fason pou yo fè travay yo ba yo fè nan kongregasyon an. E sila yo ki gen eksperyans nan konstriksyon ak nan antretyen patisipe nan bay moun ki gen mwens eksperyans yo fòmasyon pou yo travay nan yon seri lokal òganizasyon an genyen.

13. Lè n ap bay lòt moun fòmasyon, ki jan nou ka imite fason Jewova pataje sajès li genyen an?

¹³ Moun k ap bay fòmasyon yo bezwen imite fason Jewova pataje sajès li genyen. Sonje, Jewova bay sajès san grate tèt. Menm jan an tou, nou pataje konesans ak eksperyans nou genyen ak lòt moun k ap aprann yo san grate tèt. Nou pa kenbe yon pati nan konesans nou genyen paske nou pè pou moun k ap aprann nan pa vin ranplase nou. Epitou, nou pa di: ‘Pa t gen moun ki te ban m fòmasyon! Se pou l degaje l poukont li.’ Yon atitid konsa pa gen plas li nan mitan pèp Jewova a. Okontrè, nou kontan pataje tout sa n konnen ak lòt moun e n fè tout sa n kapab pou n bay yo fòmasyon (1 Tes. 2:8). Nou espere “yo menm [tou], bò kote pa yo, y ap vin kalifye kòmsadwa pou yo anseye lòt moun”. (2 Tim. 2:​1, 2.) Si nou tout pataje sajès nou genyen an ak lòt moun, ni nou menm ni lòt moun ap gen plis sajès e y ap pi kontan.

SI MOUN PA SANBLE GEN REKONESANS POU SA N FÈ POU YO

14. Ki jan pifò moun reyaji lè nou fè yon bagay pou yo?

¹⁴ Lè nou renmen bay, sitou lè nou bay frè n ak sè n yo, byen souvan, yo montre yo gen rekonesans. Yo ka voye yon ti kat pou nou pou di nou mèsi oswa yo ka montre yo gen rekonesans lòt fason ankò (Kol. 3:15). Lè moun montre yo gen rekonesans fason sa yo, sa fè n pi kontan toujou.

15. Ki sa nou bezwen sonje lè gen moun ki pa di nou mèsi?

¹⁵ An reyalite, gen moun ki ka pa toujou montre yo gen rekonesans. Gende lè nou ka bay tan nou, fòs nou oswa sa n posede, men, annapre n ap mande tèt nou si moun nan menm bay sa enpòtans. Si sa rive, ki sa n ka fè pou n pa sispann gen kè kontan oswa pou n pa fache? Sonje pawòl ki nan vèsè atik la baze sou li a, pawòl ki nan Travay 20:35 lan. Kè kontan nou jwenn lè n bay pa depann de fason moun reyaji. Nou ka chwazi renmen bay menmsi lòt moun ta sanble pa gen rekonesans pou sa nou fè a. Ki jan n ka fè sa? Ann egzamine kèk fason.

16. Ki sa k ka ede n kontinye bay ak kè kontan?

¹⁶ Kontinye imite Jewova. Li bay moun bon bagay kit yo montre yo gen rekonesans, kit yo pa montre sa (Mat. 5:​43-48). Jewova pwomèt lè nou bay menm jan avè l, “san nou pa espere anyen anretou”, “n ap gen yon gwo rekonpans”. (Lik 6:35.) “Anyen” ka vle di menmsi yo pa di w mèsi. Kit yo di nou mèsi, kit yo pa di  nou mèsi, Jewova ap toujou rekonpanse nou pou bon bagay nou fè pou n ede lòt moun poutèt nou se “moun ki bay ak kè kontan”. — Pwo. 19:17; 2 Kor. 9:7.

17. Ki lòt fason nou kapab imite Jewova lè n ap bay? (Lik 14:​12-14).

¹⁷ Yon lòt bagay nou kapab fè pou n imite Jewova lè n ap bay, se lè n aplike sa Jezi te di nan Lik 14:​12-14. (Li vèsè yo.) Se pa yon move bagay pou n akeyi moun ki kapab fè menm bagay la pou nou tou, oswa pou nou renmen bay moun ki kapab ban nou tou. Sepandan, ki sa pou n fè si byen souvan nou rann nou kont nou bay moun paske nou atann y ap ban nou yon bagay tou? Li ta bon pou n eseye fè sa Jezi te di a. Nou kapab akeyi yon moun nou konnen ki pa gen mwayen pou l akeyi nou tou. Lè sa a, n ap kontan paske n ap imite Jewova. Si n pa atann anyen anretou, n ap toujou kontan lè nou bay lòt moun, menm lè yo pa montre yo gen rekonesans.

18. Ki sa nou bezwen veye pou n fè, e poukisa?

¹⁸ Nou pa dwe gen dout sou entansyon lòt moun (1 Kor. 13:7). Si lòt moun pa montre yo gen rekonesans, nou ta kapab mande tèt nou: ‘Èske yo vrèman apresye sa nou fè a oswa èske se bliye yo bliye di mèsi?’ Petèt gen lòt rezon ki fè yo pa aji fason nou t ap atann nan. Gen moun ki ka santi yo gen anpil rekonesans, men li ka difisil pou yo fè konn sa. Yo ka santi yo jennen pou yo resevwa èd, sitou si anvan sa se yo k te konn ede lòt moun. Men, si nou vrèman renmen frè n ak sè n yo, nou pap mal wè yo e n ap kontinye bay ak kè kontan. — Efe. 4:2.

19-20. Poukisa lè nou gen pasyans sa kapab ede n lè n ap bay lòt moun? (Gade foto a tou.)

¹⁹ Nou bezwen gen pasyans. Anrapò ak renmen bay, men sa wa Salomon ki te gen sajès te ekri: “Lage pen w sou dlo, paske apre yon pakèt jou, w ap jwenn li ankò.” (Ekl. 11:1). Jan pawòl sa yo montre, gen kèk moun ki ka di nou mèsi pou  sa n fè pou yo apre yon bon ti tan, sa vle di “apre yon pakèt jou”. Ann wè yon egzanp ki montre sa.

²⁰ Sa gen plizyè ane, madanm yon siveyan sikonskripsyon te voye yon bèl ti kat bay yon sè ki te fèk batize pou l te ankouraje l ret fidèl. Anviwon uitan annapre, sè a te ekri madanm siveyan sikonskripsyon an yon lèt pou l di l: “Mwen santi m oblije ekri w pou m fè w konnen jan sa w te fè a te ede m pandan plizyè ane san w pa t menm rann ou kont.” Li te kontinye pou l di: “[Ti kat ou te voye pou mwen an] te fè kè m kontan anpil. Men, se vèsè ou te itilize a ki te touche kè m, e m pa janm bliye l. a” Apre sè a te fin esplike madanm siveyan sikonskripsyon an kèk difikilte l te jwenn, men sa l te di: “Pafwa m te vle kite tout bagay epi sispann sèvi Jewova. Men, vèsè sa a ou te ekri m nan te ret tache nan kè m e m te kapab [...] kontinye kenbe.” Men sa l te ajoute: “Pandan tout uitan sa yo, pa gen anyen ki te ankouraje m menm jan ak lèt ou te ekri m nan ak vèsè ou te pataje avè m nan.” Imajine jan madanm siveyan sikonskripsyon an dwe te kontan resevwa lèt sa a “apre yon pakèt jou”! Nou menm tou, yon moun ka di nou mèsi plizyè ane apre nou fin fè yon bagay pou li.

21. Poukisa w pran detèminasyon pou w kontinye imite Jewova ki renmen bay?

²¹ Jan nou sot wè sa, Jewova kreye nou avèk yon kapasite espesyal. Byenke nou kontan lè nou resevwa, nou jwenn plis kè kontan toujou lè nou bay lòt moun. Nou santi nou byen lè nou kapab ede kwayan parèy nou. E nou kontan lè yo montre yo gen rekonesans. Sepandan, kit moun ki resevwa a montre l gen rekonesans, kit li pa montre sa, nou kapab kontan dèske nou fè sa nou te dwe fè. Pa janm bliye, kèlkeswa sa w bay, “Jewova ka ba w plis pase sa lontan”. (2 Kwo. 25:9.) Nou pap janm ka bay plis pase Jewova! E lè se Jewova ki rekonpanse nou, se pi bèl rekonpans nou te ka jwenn. Kidonk, ann pran detèminasyon pou n kontinye imite Papa nou ki nan syèl la ki renmen bay.