1-2. a) Ki jan sitiyasyon an te ye nan Jide lè apot Pòl te ekri lèt pou kretyen ebre yo? b) Poukisa lèt sa a Bondye te fè Pòl ekri a te vini nan bon moman?

 KRETYEN ebre ki t ap viv Jerizalèm ak Jide yo te jwenn anpil difikilte kèk ane apre lanmò Jezi. Yon ti tan apre kongregasyon kretyen an te fin fòme, kretyen yo te jwenn gwo pèsekisyon (Tra. 8:1). Epi, anviwon 20 an annapre, disip Kris yo te vin gen gwo pwoblèm ekonomik, petèt, akoz yon gwo grangou ki te gen nan peyi a anvan sa (Tra. 11:​27-30). Sepandan, ozanviwon ane 61 epòk nou an, kretyen yo te vin gen yon ti lapè, men, yo t apral jwenn gwo pèsekisyon pi devan. Pandan peryòd sa a, yo te resevwa yon lèt Bondye te pouse apot Pòl ekri ki te vini nan bon moman.

² Lèt apot Pòl te ekri kretyen ebre yo te vini nan bon moman paske lapè yo te genyen an pa t ap dire. Pòl te bay kretyen sa yo bonjan konsèy ki t apral ede yo andire tribilasyon yo t apral jwenn nan yon ti tan ankò. Jerizalèm pa t lwen detwi, jan Jezi te anonse sa (Lik 21:20). Nòmalman, ni Pòl, ni kretyen nan Jide yo pa t konnen ki lè egzakteman destriksyon sa a t ap fèt. Sepandan, kretyen sa yo te kapab sèvi ak tan ki te rete a pou yo te prepare yo lè yo te chèche gen yon seri kalite tankou lafwa ak andirans. — Ebre 10:25; 12:​1, 2.

3. Poukisa jodi a kretyen yo ta dwe sitou enterese ak lèt apot Pòl te ekri kretyen ebre yo?

 ³ Talè konsa, nou pral jwenn yon tribilasyon ki pi gwo lontan pase sa kretyen ebre yo te jwenn nan (Mat. 24:21; Rev. 16:​14, 16). Donk, ann egzamine kèk nan bonjan konsèy Jewova te bay pou ede kretyen sa yo ki kapab itil nou tou.

“FÈ EFÒ POU NOU VIN GEN MATIRITE”

4. Ki difikilte Juif ki te vin kretyen yo te jwenn? (Gade foto a tou.)

⁴ Juif ki te vin kretyen yo te gen gwo chanjman pou yo fè, e sa pa t fasil. Yon lè, Juif yo se te pèp Jewova te chwazi. Pandan anpil ane, Jerizalèm te vrèman yon kote espesyal. Se nan vil sa a wa ki te reprezante Jewova yo t ap dirije, e se nan tanp lan moun te konn vin adore Jewova. Tout Juif ki te fidèl yo te suiv Lalwa Moyiz la jan chèf relijye yo te anseye yo sa. Te gen yon seri lwa sou manje pou moun manje, lwa sou sikonsizyon ak fason pou yo aji ak moun lòt nasyon. Sepandan, apre lanmò Jezi, Jewova pa t aksepte sakrifis Juif yo te konn fè yo ankò. Donk, li pa t fasil pou Juif ki te vin kretyen yo chanje fason yo te konn adore (Ebre 10:​1, 4, 10). Li te difisil menm pou kretyen ki te gen matirite yo, pa egzanp apot Pyè, te aksepte kèk nan chanjman sa yo (Tra. 10:​9-14; Gal. 2:​11-14). Kwayans kretyen sa yo te vin genyen yo te lakòz chèf relijye juif yo pèsekite yo.

5. Ki de gwoup moun ki te opoze ak kretyen yo?

⁵ Te gen de gwoup moun ki te opoze ak kretyen ebre yo. Toudabò, te gen chèf relijye juif yo ki te fè konnen kretyen yo se aposta. E te gen swadizan kretyen, petèt ki te pè pou moun pa t pèsekite yo, ki te fè konnen kretyen yo ta dwe kontinye suiv Lwa Moyiz la (Gal. 6:12). Ki sa k t ap ede kretyen ki fidèl yo ret atache ak laverite?

6. Ki sa Pòl te ankouraje kwayan parèy li yo fè? (Ebre 5:14–6:1).

⁶ Nan lèt Pòl te ekri kretyen ebre yo, li  te ankouraje kwayan parèy li yo pou yo fouye pi fon nan Pawòl Bondye a. (Li Ebre 5:14–6:1.) Pòl te sèvi ak Liv ki te ekri ann ebre yo pou l te ede frè l yo konprann rezon ki fè fason kretyen yo t ap adore Jewova te pi bon lontan pase fason Juif yo t ap adore Jewova a. Pòl te konnen si kretyen sa yo ta vin gen plis konesans e yo ta vin pi byen konprann laverite, yo t ap ka rekonèt fo rezònman e yo pa t ap aksepte yo. Konsa, yo pa t ap kite moun pran tèt yo.

7. Ki difikilte nou jwenn jodi a?

⁷ Menm jan ak kretyen ebre yo, jodi a, nou jwenn moun k ap gaye enfòmasyon ak rezònman ki kont prensip Jewova yo ki jis. Gen moun ki konn mal wè Temwen Jewova yo poutèt yo obeyi sa Bib la di anrapò ak relasyon seksyèl. Fason moun nan monn nan aji ak fason yo panse ap vin pi depaman toujou ak fason Bondye panse (Pwo. 17:15). Donk, li enpòtan anpil pou n idantifye fason moun yo panse ki pa kòrèk yo e pou n pa aksepte yo. Nou pa dwe kite okenn opozan fè n vin dekouraje oswa menm fè n sispann sèvi Jewova. — Ebre 13:9.

8. Ki jan nou ka chèche vin gen plis matirite antanke kretyen?

⁸ L ap bon pou n suiv konsèy Pòl te bay kretyen ebre yo pou yo chèche vin gen matirite. Sa vle di, nou bezwen fouye pi plis nan Bib la pou n ka pi byen konn Jewova ak fason li panse. Nou bezwen kontinye fè sa menm apre nou fin vwe Jewova lavi n epi nou batize. Kèlkeswa kantite tan nou gen nan laverite, nou tout dwe li Pawòl Bondye a chak jou epi etidye l regilyèman (Sòm 1:2). Lè n etidye Bib la regilyèman, sa ap ede n vin gen plis lafwa, yon kalite Pòl te di kretyen ebre yo bezwen genyen. — Ebre 11:​1, 6. 

NOU BEZWEN “GEN LAFWA POU NOU KA PA PÈDI LAVI NOU”

9. Poukisa l te enpòtan anpil pou kretyen ebre yo te gen yon lafwa solid?

⁹ Kretyen ebre yo t ap bezwen gen yon lafwa solid pou yo te ka chape nan tribilasyon ki t apral gen nan Jide a (Ebre 10:​37-39). Jezi te fè disip li yo konnen lè yo wè lame yo monte kan toutotou Jerizalèm, yo dwe kouri al nan mòn. Tout kretyen te dwe suiv konsèy sa a kit yo t ap viv nan vil sa a, kit yo t ap viv andeyò (Lik 21:​20-24). Nan epòk sa a, lè yon lame te vin atake, moun ki t ap viv andeyò yo te konn kouri antre nan yon vil paske te gen miray ki te kapab pwoteje yo. Li pa t ap parèt lojik pou kretyen yo ta kouri al nan mòn, donk, sa t ap mande anpil lafwa.

10. Lè kretyen yo gen yon lafwa solid, ki sa sa ka pouse yo fè? (Ebre 13:17).

¹⁰ Epitou, kretyen ebre yo t ap bezwen fè moun Jezi t ap itilize pou dirije kongregasyon an konfyans. Sanble moun ki te alatèt yo te bay enstriksyon byen klè anrapò ak ki lè pou kretyen yo kouri ak fason pou yo fè sa nan lòd. (Li Ebre 13:17.) Mo grèk yo mete “obeyi” pou li nan Ebre 13:17 la kapab vle di yon moun yo konvenk pou l obeyi paske li fè moun k ap ba l direksyon an konfyans. Sa mande plis pase annik obeyi moun sa a paske li gen dwa pou l bay direksyon. Donk, kretyen ebre yo te bezwen chèche gen konfyans nan moun k ap dirije yo anvan  tribilasyon an vini. Si kretyen sa yo te konn obeyi moun ki te alatèt yo nan moman tout bagay te kalm, li t ap pi fasil pou yo obeyi yo nan moman bagay yo t ap difisil anpil.

11. Poukisa li enpòtan anpil jodi a pou kretyen yo gen yon lafwa solid?

¹¹ Jodi a, nou bezwen gen lafwa menm jan ak moun sa yo ki te resevwa lèt Pòl te ekri a. N ap viv nan yon epòk kote pifò moun pa aksepte avètisman Bib la bay anrapò ak fen sistèm sa a, e yo menm pase sa l di yo nan rizib (2 Pyè 3:​3, 4). Mete sou sa, byenke Bib la bay kèk detay sou fason gwo tribilasyon an pral fèt, gen anpil bagay nou pa konnen. Nou bezwen gen konviksyon lafen an ap vini nan moman l dwe vini an, e Jewova ap pran swen nou. — Aba. 2:3.

12. Ki sa k ap ede n chape nan gwo tribilasyon an?

¹² Epitou, nou dwe chèche gen plis konviksyon Jewova ap sèvi ak “esklav fidèl ki prevwayan an” pou gide nou jodi a (Mat. 24:45). Lè gwo tribilasyon an kòmanse, nou ka resevwa yon seri enstriksyon byen klè ki kapab sove lavi nou menm jan kretyen ebre yo sanble te resevwa enstriksyon lè Women yo te vini. Kounye a, se moman pou n chèche gen plis konfyans nan direksyon nou resevwa nan men moun ki alatèt nan òganizasyon Jewova a. Nou pa ka atann n ap suiv enstriksyon yo pral bay pandan gwo tribilasyon an si l difisil pou n suiv enstriksyon yo bay kounye a.

13. Poukisa konsèy ki nan Ebre 13:5 lan te nesesè?

¹³ Pandan kretyen ebre yo t ap tann yo fè yo konnen nan ki moman pou yo kouri, yo te bezwen kontinye mennen yon vi senp, yo pa t dwe gen “lanmou pou lajan”. (Li Ebre 13:5.) Kèk nan yo te pase moman difisil akoz gwo grangou ak lamizè (Ebre 10:​32-34). Menm lè yo te dispoze andire difikilte pou bon nouvèl la, gen nan yo ki te kòmanse wè si yo te vin gen plis lajan sa t ap pwoteje yo. Men, kèlkeswa kantite kòb yo ta genyen, sa pa t ap ka pwoteje yo lè Jerizalèm detwi (Jak 5:3). Anfèt, li t ap pi difisil pou yon moun ki renmen bagay materyèl kouri kite ni kay li ni bagay li posede.

14. Lè nou gen yon lafwa ki solid, ki jan sa kapab ede n nan desizyon n ap pran kounye a anrapò ak bagay materyèl?

¹⁴ Si nou kwè toutbon Jewova pral detwi monn mechan sa a talè konsa, nou pap met nan tèt nou sa k pi enpòtan se chèche gen plis lajan oswa plis bagay materyèl. Anfèt, moun yo pral “voye ajan yo genyen yo nan lari” paske y ap rann yo kont “ni ajan yo genyen yo ni lò yo genyen yo pap ka sove yo nan jou kòlè Jewova a”. (Eze. 7:19.) Olye n ap chèche ranmase valè lajan nou kapab, nou bezwen pran desizyon k ap ede nou pran swen tèt nou ak fanmi nou e k ap pèmèt nou sèvi Jewova. Sa gen ladan l pou n reziste ak tantasyon nou jwenn pou n fè yon seri dèt ki pa nesesè oswa pou n pase yon bann tan ap pran swen yon pakèt bagay materyèl. Epitou, nou dwe veye pou n pa vin twò atache ak sa n deja genyen (Mat. 6:​19, 24). Tank lafen an ap vin pi pre, lafwa nou ka jwenn eprèv anrapò ak bagay materyèl ak lòt bagay ankò.

“NOU BEZWEN GEN ANDIRANS”

15. Poukisa kretyen ebre yo te sitou bezwen gen andirans?

¹⁵ Kretyen ebre yo t ap bezwen andire eprèv lafwa yo te jwenn tank sitiyasyon  ki te gen nan Jide yo t ap vin pi mal (Ebre 10:36). Byenke kèk kretyen ebre te jwenn gwo pèsekisyon, anpil nan yo te vin kretyen nan yon moman ki te plizoumwen gen lapè. Pòl te fè konnen, menm lè lafwa yo te pase anba gwo eprèv, yo pa t soufri menm jan ak Jezi, sa vle di nan pwen pou yo mouri (Ebre 12:4). Sepandan, lefètke te gen anpil Juif ki te vin kretyen, Juif ki te opoze yo te vin fache anpil e yo te vin vyolan. Kèk ane anvan sa, te gen yon foul moun ki te atake Pòl lè l t al preche Jerizalèm. Te gen plis pase 40 Juif ki te “sèmante sou tèt yo, yo di yo pa gendwa ni manje ni bwè, toutotan yo pa touye Pòl”. (Tra. 22:22; 23:​12-14.) Menm lè yo te rayi kretyen yo e yo te pèsekite yo, kretyen yo te bezwen kontinye reyini pou yo adore Jewova, yo te bezwen kontinye preche bon nouvèl la epi kontinye fè lafwa yo vin djanm.

16. Ki jan lèt Pòl te ekri kretyen ebre yo kapab ede n pou n pozitif lè nou jwenn pèsekisyon? (Ebre 12:7).

¹⁶ Ki sa k t ap ede kretyen ebre yo andire opozisyon yo te jwenn? Pòl te vle ede kretyen yo wè avantaj ki genyen lè yo andire eprèv. Li te esplike lè kretyen yo jwenn eprèv, Bondye kapab sèvi ak sa pou ba yo fòmasyon. (Li Ebre 12:7). Fòmasyon konsa ka ede yon moun vin gen yon seri kalite ki enpòtan anpil pou l fè Jewova plezi. Si kretyen sa yo te konsantre sou rezilta sa t ap bay lè yo andire eprèv, li t ap vin pi fasil pou yo andire. — Ebre 12:11.

17. Ki sa Pòl te byen konnen anrapò ak andire pèsekisyon?

¹⁷ Pòl te ankouraje kretyen ebre yo pou yo andire eprèv yo jwenn yo avèk anpil detèminasyon. Li te kapab ba yo bonjan konsèy sou fason pou yo andire pèsekisyon. Lefètke li te konn pèsekite kretyen  yo anvan sa, li te konnen sa k t ap tann yo. Li te konnen tou ki jan pou l andire pèsekisyon. Dayè, li te jwenn divès kalite opozisyon apre l te vin kretyen (2 Kor. 11:​23-25). Donk, Pòl te byen konnen sa yo te bezwen fè pou yo andire. Li te fè kretyen sa yo sonje yo pa dwe konte sou tèt yo lè yo jwenn eprèv, men yo bezwen konte sou Jewova. Pòl te kapab di avèk kouraj: “Se Jewova ki èd mwen, mwen pap pè.” — Ebre 13:6.

18. Ki sa k ap rive nou tout alavni, e ki jan n ka prepare n depi kounye a?

¹⁸ Gen kèk nan frè nou yo k ap andire pèsekisyon kounye a. Youn nan fason nou kapab ede yo se lè nou priye pou yo. E pafwa, nou ka fè yo jwenn yon bagay yo bezwen (Ebre 10:33). Dayè, Bib la di aklè “tout moun ki vle demontre atachman pou Bondye nan lavi yo ann inyon ak Kris Jezi ap jwenn pèsekisyon tou”. (2 Tim. 3:12.) Pou rezon sa a, nou tout bezwen prepare nou pou sa k ap vin pi devan. Ann kontinye met tout konfyans nou nan Jewova piske nou konnen l ap ede nou pou n andire kèlkeswa eprèv nou ta jwenn. Nan moman Jewova fikse a, l ap fè tout moun k ap adore l ki fidèl yo jwenn soulajman. — 2 Tes. 1:​7, 8. 

19. Ki sa n kapab fè pou nou prepare n pou gwo tribilasyon an? (Gade foto a tou.)

¹⁹ Se sèten, lèt Pòl te ekri kretyen ebre yo te ede kretyen nan premye syèk yo pou yo prepare yo pou tribilasyon yo t apral jwenn. Pòl te ankouraje frè l yo pou yo te byen etidye Pawòl Bondye a e pou yo te chèche konprann li pi byen. Si yo te fè sa, sa t ap ede yo idantifye ansèyman ki te kapab febli lafwa yo, epi pa aksepte yo. Li te ankouraje yo pou yo fòtifye lafwa yo pou yo te ka suiv direksyon Jezi ak moun ki alatèt nan kongregasyon an san pèdi tan. Epitou, li te ede yo pou yo andire eprèv yo jwenn, e pou yo konsidere eprèv sa yo kòm yon okazyon pou Papa yo ki nan syèl la ki renmen yo ba yo fòmasyon. Nou menm tou nou dwe aplike konsèy sa a ki soti nan Bib la. Konsa, n ap kapab andire fidèlman jiska lafen. — Ebre 3:14.